Makpel Sano Nidudunget ed Isusumpa

SI GAYO tan Aristarko, duaran kakaiba nen apostol Pablo, so inggayugoy na magulon pangkat diad teatro na Efeso. Ditan et duay oras ya inyeeyag na saray maingongot a totoo: “Baleg si Diana [Matalonggaring si Artemis] na saray taga-Efeso!” (Gawa 19:28, 29, 34) Kasin nansiansian mapekder iratan a kaiba nen Pablo sanen nipaarap ed ontan ya isusumpa? Tan anto ta so sengegan na sayan kipapasen?

Si Pablo so matalonan nampulong diad syudad na Efeso ed loob na taloy taon. Bilang resulta, dakel a taga-Efeso so tinmundan nandayew ed saray talintao. (Gawa 19:26; 20:31) Say kaslakan a talintao ed Efeso et say melag a pilak ya altar nen Artemis, say diosa na panag-anak, a say atagey a templo na satan et banbantagen ed syudad. Sarayan melag a talintao ed templo so uusaren bilang anting-anting odino ipaparungtal ed loob na saray abung. Siempre, saray Kristiano so agmanasaliw na sarayan talintao.​—1 Juan 5:21.

Inisip nen Demetrio, sakey ed saray platiro, a sesga so ministeryo nen Pablo ed maaligwas a negosyo ra. Diad impangibaga to na aliwan puron katuaan tan inkaalablabas, akombinse to iray kapara ton platiro ya ompan ontunda lan mandayew ed si Artemis iray totoo ed interon Asia Minor. Kanian sanen inkelyaw na saray sinmanok a platiro so panangidayew da ed si Artemis, agawa so aktual a panggugulo tan agulo so interon syudad.​—Gawa 19:24-29.

Nilibon totoo so nandudumog diad teatro, a napanyurongan na 25,000 a totoo. Kinerew nen Pablo a pitongtongan iray agnabanon pangkat, balet sikatoy kinombinse na makaaro iran opisyal ya aleg la. Diad kaunoran et apadeen na sekretaryo na syudad iray totoo, tan si Gayo tan Aristarko so akataynan ya ag-asakitan.​—Gawa 19:35-41.

Nayarin saray totoo na Dios natan so nipapaarap met ed saray onsusumpa tan ed saray gulo ni ingen legan dan susumpalen so ministeryo ra. Sikaray mabetbet a mangipupulong ed maong a balita diad saray syudad a kasmak so idolatriya, imoralidad, tan inkadelinkuente. Anggaman ontan, sikaray makmakpel a mangaalig ed si apostol Pablo, ya ‘anggapoy pinaulyan ton impaliwawa ed lapag tan ed kabkaabungan’ diad syudad na Efeso. (Gawa 20:20) Tan sikaray manggagayaga met sano nanenengneng da ya ‘ombabaleg tan ontatalona so salita nen Jehova.’​—Gawa 19:20.

[Litrato ed pahina 30]

Saray geray na teatro diad Efeso