No Panon a Napagmaliw a Makana so Kada Agew

“IBANGAT mo kami a mamilang na saray agew mi, pian makala kami na sakey a puso na kakabatan.” (Salmo 90:12) Saya so mapaabeban pikakasi na managsulat na Biblia a si Moises. Antoy espisipikon kekerewen to? Kasin mapagalang a kerewen tayo met itan?

Diad bersikulo 10, inyey-ey nen Moises so kinatikey na bilay na too. Diad sananey ya inkagawa, inrekord to so balikas nen Job, a nankuan: “Say too a nianak ed bii, daiset so saray agew to, tan napno [na] gonigon.” (Job 14:1) Mapatnag a kabkabisado nen Moises so inkagano na ag-ayadyarin bilay na too. Kanian, impasen to a mablin langkap so kada agew. Legan ya ikekerew itan nen Moises ed Dios, imbalikas toy pilalek ton usaren a makabat so nakekeraan ya agew na bilay to, diad paraan a mamaliket ed Manamalsa to. Agta kaliktan tayo met ya usaren so kada agew na bilay tayo diad makabaliksan a paraan? Panggunaetan tayo itan no kaliktan tayo so panangabobon na Dios natan.

Walay kaaruman ya aspekto ya amakiwas ed si Moises tan Job, a nepeg met a mamakiwas ed sikatayo. Namparan sarayan maridios a lalaki so nanilalo ed tumang diad arapen​—say bilay ed dalin a marakep la iray kipapasen. (Job 14:14, 15; Hebreos 11:26) Diad satan a panaon, agla panganggaen na ipapatey so maabig a kimkimey na sakey. Gagala na Manamalsa tayo a saray matoor so manayam ya andi-angga diad paraison dalin. (Isaias 65:21-24; Apocalipsis 21:3, 4) Nailaloan mo met iya no ‘bilangen mo iray agew mo, pian makala ka na sakey a puso a makabat.’