Say Ilalon Kikioli​—Anto so Kabaliksan na Satan ed Sika?

“Sika buskagen mo so limam, tan peneken mo so saray pilalek na ami’ bengatlan mabilay.”​—SALMO 145:16.

1-3. Anto so ilalo na arum dia ed arapen? Iyilustra.

 SAY siam-taon a si Christopher tan say kuya to so sankabuasan ya akila ed pangamaen, panginaen, tan duaran kakapinsan da, diad panagkabkaabungan ed Makristianon ministeryo ra ed asingger ed Manchester, Inglatera. Say agawa ed saman so nisalaysay ed magasin ya Awake! “Diad ngarem na saman, sikara so sankakaiban nambiahe pian ompasyar ed Blackpool, sakey ya asingger ya ayuyang (resort) ed gilig na baybay. Sikaran 6 so kaiba ed 12 totoo ya inatey a tampol sanen nidumbo so luganan da, a deneskribe na saray polis a ‘graben tuloy a duknal.’”

² Diad samay labi sakbay na satan a trahedya, say pamilya so inmatendi ed Panagaral na Kongregasyon ed Libro, a say teman siningbat et nipaakar ed ipapatey. “Si Christopher et lawas maum-umameng ya ugaw,” so inkuan na ama to. “Diad saman a labi, malinew ton sinaglawi so nipaakar ed balon mundo tan say ilalo to ed arapen. Insan, diad impantultuloy na panagaral, oniay biglan imbaga nen Christopher: ‘Say sakey a gunggona ed pagmaliw a Tasi nen Jehova et amta tayon walay agew na pannenengneng tayo lamet diad dalin, anggaman makapaermen so ipapatey.’ Anggapo ed sikami so akamoria ed saman ya agnalinglingwanan manaya iraman a salita.” *

³ Dakel a taon ed akadkauna, nen 1940, sakey a Tasin taga-Austria a manngaray Franz so nipaarap la ed ipapatey panamegley na gilotina lapud agto labay ya italirak si Jehova. Sanen si Franz so walad sakey a prisoan diad Berlin et oniay insulat to ed nanay to: “Unong ed kabat ko la, makagawa ak na kasalanan a makanepegan na ipapatey no mansamba ak [a mansundalo]. Mauge-uges itan parad siak. Agak onoli. . . . Tan natan, pinablik ya Ina tan amin yon agagik a lalaki tan bibii, diad sayan agew et naawat ko so sentensiak, tan agkayo nabibigla, satan et ipapatey, tan siak so pateyen la nabuas na kabuasan. Walaan ak na biskeg a manlapud Dios, a singa met ed agamoran na amin a tuan Kristiano nensaman. . . . No mansiansia kayon mapekder anggad ipapatey, mannenengneng itayo lamet ed kikioli. . . . Anggad pannenengneng tayo lamet.” *

4. Anto so epekto ed sikayo na saray eksperiensyan nidalatdat dia, tan anto so ontumbok a konsideraen tayo?

⁴ Say ilalon kikioli so mabmabli parad si Christopher tan si Franz. Petepeteg itan ed sikara. Maseguron natenyeg so kapusoan tayo ed saratan a salaysay! Ta pian onaralem so apresasyon tayo ed si Jehova tan ombiskeg so ilalo tayo ed kikioli, konsideraen tayo no akin a nagawa so kikioli tan panon iyan mangapekta ed sikatayon mismo.

Pasingawey Nipaakar ed Kikioli Diad Dalin

5, 6. Anto so ipaparungtal na pasingawey ya inkurit nen apostol Juan diad Apocalipsis 20:12, 13?

⁵ Diad sakey a pasingawey na saray ebento legan na Milenyon Uley nen Kristo Jesus, anengneng nen apostol Juan so nagagawan kikioli diad dalin. “Anengneng ko so saray inaatey, angkekelag tan angkakabaleg,” so inkuan to. “Tan say dayat initer to so inaatey a wala ed  sikato; tan say patey tan say Hades initer da so inaatey a wala ed sikara.” (Apocalipsis 20:12, 13) Antokaman so kipapasen da​—balanglan “angkakabaleg” odino “angkekelag”​—amin na saramay walad Hades (Sheol), say kaslakan a lubok na katooan, so nibulos. Saramay abalang day bilay da ed dayat so ompawil met ed bilay diad satan a panaon. Sayan makapakelkelaw a nagawa so kabiangan na gagala nen Jehova.

⁶ Sano onggapo lan manuley si Kristo ed loob na sanlibon taon, sikato so mamalor tan mangikalinsurong ed si Satanas. Anggapo ed saramay napaoli odino siopaman a makaliktar ed baleg a kairapan so napalikdo nen Satanas legan na satan ya uley, lapud sikato so magmaliw ya inaktibo. (Apocalipsis 20:1-3) Say sanlibon taon so nayarin ompatnag ya andukey a panaon parad sikayo, balet diad tua et ipapasen itan nen Jehova bilang “sanagew.”​—2 Pedro 3:8.

7. Anto so basiyan na panangukom legan na Milenyon Uley nen Kristo?

⁷ Unong ed pasingawey, say Milenyon Uley nen Kristo so panaon na panangukom. Oniay insulat nen apostol Juan: “Anengneng ko so saray inaatey, angkekelag tan angkakabaleg, a wala ra ed arap na trono; tan saray libro nibuskag ira: tan sananey a libro so nibuskag, a sikato so libro na bilay: tan naukom so saray inaatey unong ed saray bengatla a wala a nisulat ed saray libro, unong ed saray gawa ra. . . . Tan agawa so impangukom ed balang sakey unong ed saray gawa to.” (Apocalipsis 20:12, 13) Imanoen pa a say basiyan ed sayan panangukom et aliwan say agawaan odino ag-agawaan na sakey a too sakbay na impatey to. (Roma 6:7) Imbes, nisiglaot itan ed “saray libro” odino lukot a nalukasan ed arapen. Saray ginawa na sakey a too kayari ton naamtaan iray lugan na saray lukot so basiyan pian desidien no kasin nisulat so ngaran to ed “libro na bilay.”

‘Kikioli ed Bilay’ Odino ‘Kikioli ed Kaukom’

8. Anto so duaran posiblin pansumpalan parad saramay napaoli?

⁸ Diad akadkaunan kabiangan na pasingawey ed si Juan, si Jesus so adeskribe bilang walaan na “saray tombok na patey tan say Hades.” (Apocalipsis 1:18) Sikato so manlingkor bilang say “Pangulon Ahente na bilay” a tinuro nen Jehova, say inikdan to na pakayarin mangukom ed “saray mabilay tan inatey.” (Gawa 3:15, NW; 2 Timoteo 4:1) Panon ton gawaen itan? Paolien to ed bilay iramay naugip ed patey. “Agkayo mankelaw ed saya,” so inkuan nen Jesus ed ulop na totoo a pupulongan to, “ta onsabi oras, ya amin so saray wala ed saray lubok narengel da so boses to, et ompaway ira.” Insan oniay inyarum to: “Saray nanggawa na maong, nipaakar ed kioli ed bilay, bang saray nanggawa na mauges, dia met ed kioli ed bilay ed kaukom.” (Juan 5:28-30) Kanian, anton arapen so manatalaran ed matoor a lalaki tan bibii nensaman?

9. (a) No onoli ed bilay so dakel a totoo, anto so seguradon naamtaan da? (b) Anton malaklaknab ya edukasyonal a kimey so gawaen?

⁹ Sano onoli iratan a matoor nensaman, naamtaan da a saray sipan a nanilaloan da so peteg lan nagagawa. Agaylay paninteres dan naamtaan so pakabidbiran ed Bini na asawan bii na Dios, ya asalambit ed inmunan propesiya na Biblia, diad Genesis 3:15! Malikeliket dan narengelan a sayan insipan a Mesias, si Jesus, so nanmatoor anggad ipapatey, ya inter to so bilay to bilang dondon bagat! (Mateo 20:28) Saramay mangabet ed sikara no onoli ira so malikeliket ya ontulong pian natalosan da a sayan probisyon a dondon et panangipatnag na agkanepegan a kaabigan tan panangasi nen Jehova. Sano naamtaan na saray inmoli no anto so gagawaen na Panarian na Dios pian nasumpal so gagala nen Jehova ed dalin, seguradon onleppua ed kapusoan da iray balikas na panangidayew ed si Jehova. Nawalaan ira na daakan a pankanawnawa pian ipatnag so debosyon da ed maaron mangatatawen ya Ama ra tan ed Anak to. Amin lan mabilay ed satan so maliket a mibiang ed malaklaknab ya edukasyonal a kimey a nakaukolan pian bangatan so binilyon ya ombilay manlapud lubok, a mankaukolan met a mangawat ed probisyon na Dios a dondon.

10, 11. (a) Diad Milenyo, antoran pankanawnawa so niwala ed amin diad dalin? (b) Panon itayon naapektoan ed saya?

 ¹⁰ Sano napaoli si Abraham, sikato so naligliwan tuloy no naeksperiensya to la so inkapeteg na bilay diad silong na uley na samay “baley” odino syudad a tinalaranan to. (Hebreos 11:10) Agaylay panliket nen matoor a Job sano naamtaan ton say impanbilay to et amabiskeg ed arum niran lingkor nen Jehova ya asubok so katooran da! Tan agaylay pampilalek nen Daniel a naamtaan so nipaakar ed impakasumpal na saray propesiya a nipuyan ya insulat to!

¹¹ On, amin a makagamor na bilay diad matunong a balon mundo, balanglan diad kikioli odino diad pakaliktar ed baleg a kairapan, so walaan ni na dakel ya aralen nipaakar ed gagala nen Jehova ed dalin tan ed saray manaayam ditan. Talagan makapalikliket so edukasyon a nagawa legan na Milenyo lapu ed ilalo ya andi-anggaan a pambilay tan magnayon a panangidayew ed si Jehova. Balet, say sankaimportantian et no anto so gawaen tayo bilang indibidual legan a naaaralan tayo iray lugan na saray lukot. Kasin iyaplika tayo so naaralan tayo? Kasin morekdeken tan iyaplika tayo so makanan impormasyon a mamabiskeg ed sikatayon manresisti ed unor a getma nen Satanas a mangisuawi ed sikatayo manlapud katuaan?

12. Anto so ontulong ed kada sakey pian nawalaan na sigpot a pibibiang ed edukasyonal a kimey tan ed say kapasimbalo na dalin a magmaliw a paraiso?

¹² Agtayo nepeg a lingwanan so alay abig iran bendisyon a resulta na kiyaplika na saray gunggona na dondon bagat nen Kristo. Saramay ombilay ed kikioli so agla mansakit odino nawalaan na pisikal a depekto a singa say nasasagmak natan. (Isaias 33:24) Lapud maksil a laman tan ed ilalon nawalaan na ayadyarin bunigas, amin a manayam ed balon mundo so sigpot a makapibiang ed edukasyonal a kimey a pangibangat ed saramay binilyon a napaoli ed bilay. Mibiang met iratan a manayam ditan diad sankabalegan a kimey ya agnin balot agawa ed dalin, salanti, say pamasimbalo ed interon planeta a pagmaliwen dan paraiso diad kirayewan nen Jehova.

13, 14. Anto so gagala na kibulos nen Satanas ed kaunoran a subok, tan anton pansumpalan so magmaliw a posible ed sikatayo bilang indibidual?

¹³ Sano nibulos si Satanas manlapud kalinsurong parad kaunoran a subok, panggunaetan ton palikdoen lamet iray totoo. Unong ed Apocalipsis 20:7-9, amin ya ‘asiliban a nasyones,’ odino grupo na totoo, a naimpluensyaan ed marelmeng iran pakana nen Satanas so naukom a makana ed kadederal: ‘Onakseb so apoy ed tawen, tan naupot ira.’ Parad saramay arum ed sikara ya apaoli legan na Milenyo, say inkioli ra so magmaliw a kioli ed panangukom lapud kaderal da. Diad pidumaan, saramay apaoli ya amemben ed katooran da so makaawat ed langkap a bilay ya andi-anggaan. On, say inkioli ra et “kioli ed bilay.”​—Juan 5:29.

¹⁴ Panon itayo natan a naligliwa ed ilalo nipaakar ed kikioli? On, anto so nepeg tayon gawaen ta pian naseguro a nagamoran tayo iray gunggona na satan diad arapen?

Saray Leksion a Naaralan Tayo Natan

15. Panon a makatulong natan so pananisia ed kikioli?

¹⁵ Nayarin agano nin naandi ed bilay so sakey ya inad-aro yo tan tatalonaan yo ni so baleg a pananguman lapud epekto na satan. Say ilalon kikioli so ontulong ed sikayo a makagamor na akindalem a deen tan biskeg ya agnagamoran na saramay agmakaamta ed katuaan. “Agmi labay komon ya ompasen kayo ya andi amta,” so impanligliwa nen Pablo ed saray taga-Tesalonica, “pian agkayo onermen, unong na singa saray arum, ya anggapo so ilalo ra.” (1 Tesalonica 4:13) Kasin ililitrato yo ed isip yo a wala kayo ed balon mundo, ya iimatonan yo so kikioli? No ontan, naligliwa kayo natan no dalepdepen yo so ilalo ed pakapinengnengan lamet ed saray inad-aro yo.

16. Anto so nayarin nalikna yo sano nagawa so kioli?

¹⁶ Nayarin sasagmaken yo natan so pisikal iran epekto na impanrebelde nen Adan, a nayarin diad sakey a nengneng na sakit. Agyo komon aabuloyan so gonigon a sengegay pakalingwanan yo la ed maliket ya ilalo yon naeksperiensya a mismo so kikioli tan ombilay lamet a walaay apasimbalon bunigas tan kasil  diad balon mundo. Insan no nalukasan la iray mata yo tan nanengneng yo so maligliga iran kalupaan na saramay maliket a mangabet ed sikayo diad inkioli yo, maseguron pisalamatan yo so Dios lapud maaron-kaabigan to.

17, 18. Anton duaran importantin leksion so nepeg tayon ipapuso?

¹⁷ Kaleganan ni, konsideraen tayo so duaran leksion a nepeg tayon ipapuso. Say sakey et say kaimportantian na interon-kamarerwan panaglingkor ed si Jehova natan. Diad pangalig ed Katawan tayo, si Kristo Jesus, say bilay tayo ya atekepan na dilin-panagsakripisyo so mangipanengneng ed panangaro tayo ed si Jehova tan ed kapara tayon totoo. No naandi so pangaalaan tayoy pambilay odino say kawayangan tayo lapud isusumpa odino panamasegsegang, determinado itayon mansiansian malet ed pananisia antokaman iray subok ya arapen tayo. No bilang ta sikatayoy pagyawen na saray onsusumpa a pateyen da itayo, say ilalon kikioli so manligliwa tan mamabiskeg ed sikatayo pian mansiansian matoor ed si Jehova tan ed Panarian to. On, say seseg tayo ed panangipulong ed Panarian tan panaggaway babangatan so mangiter ed sikatayo na ilalon magnayon iran bendisyon ya itatarya nen Jehova parad saray matunong.

¹⁸ Say komaduan leksion et misiglaotan ed no panon so pangarap tayo ed saray tukso ya epekto na makabos a laman. Say pikakabat tayo ed ilalon kikioli tan say apresasyon tayo ed agkanepegan a panangasi nen Jehova so mamabiskeg ed determinasyon tayon mansiansian malet ed pananisia. “Aleg ya aroen yo so mundo, ni saray bengatla a wala ed mundo,” so impasakbay nen apostol Juan. “No siopaman a too aroen to so mundo say aro na Ama andi ed sikato. Ta amin a wala ed mundo, kilalawan na laman tan kilalawan na mata tan maapan gloria na bilay, aliwa a kien na Ama noag kien na mundo. Et say mundo mangangga, tan saray penel to: sabalet so mangunor ed linawa na Dios onsiansia lawas.” (1 Juan 2:15-17) Say pananagyat na mundo panamegley na materyalismo so agla makapasagyat ed sikatayo no ikompara itan ed ‘peteg a bilay.’ (1 Timoteo 6:17-19) No natutukso itayon manggawa na imoralidad, mapekder itayon manresisti. Moriaen tayo a no bilang ompatey itayo sakbay na Armagedon, say ag-impangitunda ed kondukta ya  agmakapaliket ed si Jehova so nayarin mangiyan ed sikatayo ed parehon kipapasen na saramay andian na ilalon onoli.

19. Anton balbaleg a kagalangan so agtayo nepeg a lingwanan?

¹⁹ Manuna ed amin, agtayon balot nepeg a lingwanan so balbaleg a kagalangan diad pamaliket ed puso nen Jehova natan tan ed andi-anggaan. (Uliran 27:11) Say katooran tayo anggad ipapatey odino say pantultuloy tayon matoor anggad kasampotan na sayan marelmeng a sistema so mangipatnag ed si Jehova no siopa so dadapagan tayo nipaakar ed isyu na sankatalbaan ya inkasoberano. Insan agaylan makapaliket so pambilay ed mangaraldalin a Paraiso balanglan diad pakaliktar ed baleg a kairapan odino diad pakaeksperiensya ed mamilagron kikioli!

Pamenek ed Saray Pilalek Tayo

20, 21. Anto so ontulong ed sikatayo pian mansiansian matoor anggaman walaray tepet ya agni naebatan nipaakar ed kikioli. Ipaliwawa.

²⁰ Say impaningbat tayo ed kikioli so mangitilak na pigaran tepet ya agni naebatan. Antoray uksoyan a gawaen nen Jehova parad saramay inatey a walaay asawa? (Lucas 20:34, 35) Kasin say kioli so nagawa ed lugar ya inateyan na totoo? Ombilay kasi iramay napaoli diad asingger ed ayaman na saray pamilya ra? Dakel niran tepet nipaakar ed saray uksoyan ed kikioli so agni naebatan. Anggaman kuan, nepeg tayon tandaan iray salita nen Jeremias: “Si Jehova maong ed saray manaalagar ed sikato, ed kamarerwa a mananap ed sikato. Maong a say too manilalo tan mareereen komon a manalagar ed panangilaban nen Jehova.” (Tagleey 3:25, 26) Diad dugan panaon nen Jehova, amin so naebatan diad sigpot a kapenek tayo. Akin a makapanseguro itayo ed satan?

²¹ Dalepdepen iray apuyanan a salita na salmista sanen oniay inkanta to ed si Jehova: “Sika buskagen mo so limam, tan peneken mo so saray pilalek na ami’ bengatlan mabilay.” (Salmo 145:16) Diad itatakken tayo, manguuman iray pilalek tayo. Say pirawat tayo sanen ugugaw tayo ni et aliwa lan say pilalek tayo natan. Say panmoria tayo ed bilay so naapektoan na naeeksperiensya tayo ontan met ed saray iilaloan tayo. Anggaman kuan, antokaman iray manepeg a pilalek tayo ed balon mundo, maseguron peneken iratan nen Jehova.

22. Akin a walaan itayo na maabig a rason pian idayew si Jehova?

²² Say importantin bengatla natan parad balang sakey ed sikatayo et say panmatoor. “Nakaukolan ed saray manangasikaso a sakey a toon naromog a matoor komon.” (1 Corinto 4:2) Sikatayo iray angimatalekan na maglorian maong a balita na Panarian na Dios. Say inkaseet tayo ed panangiyabawag na sayan maong a balita ed amin a naabet tayo so ontulong pian mansiansia itayo ed basbas ya ompugta ed bilay. Lawas tayon tandaan so katuaan a say “panaon tan ag-iilaloan iran nagawa” so onsabi ed sikatayon amin. (Eclesiastes 9:11, NW) Pian nadaeg so antokaman ya agnakaukolan iran kapagaan lapud saray agpakaseguroan ed bilay, ombemben a malet ed maglorian ilalo a kikioli. Lawas nodnonoten a no bilang ta ompatey kayo sakbay ya onggapo so Milenyon Uley nen Kristo, naligliwa kayo ed pakaseguro ya onsabi so pakainawaan. Diad panaon nen Jehova et nasarag yon uliten iray salita nen Job ya oniay inkuan to ed Manamalsa: ‘Ontawag ka, tan onebat ak ed sika.’ Narayew komon si Jehova, a manpipilalek a mamilay lamet ed amin a walad pakanodnonotan to!​—Job 14:15.

[Saray Paimano ed Leksab]

Kasin Natandaan Yo?

• Anto so basiyan na pakaukoman na totoo legan na Milenyo?

• Akin a say arum et makagamor na “kioli ed bilay” tan say arum et ‘kioli ed kaukom’?

• Panon itayo natan a naligliwa na ilalon kikioli?

• Panon a saray salita na Salmo 145:16 so ontulong ed sikatayon mangarap ed saray agni naebatan a tepetepet nipaakar ed kikioli?

[Tepetepet Parad Panagaral]

[Saray litrato ed pahina 21]

Panon itayon natulongan natan na pananisia ed kikioli?