Tepetepet Manlapud Saray Managbasa

Akin a nansulat si Pablo nipaakar ed Kristianon asawan bii a: “Sikatoy nasalimbengan diad pananak to”?​—1 Timoteo 2:15, NW.

Antoy ipaparungtal na konteksto na sayan bersikulo nipaakar ed labay ya ibaga nen Pablo? Sikato so pinuyanan a manimbawa nipaakar ed betang na Kristianon bii ed kongregasyon. Insulat to: “[Pirawat ko ed] saray bibii a manpales ira na masimpit, a manparakep ira na mabinta tan madangka; aleg ed saray buek a nilaga, tan balitok odino perlas odino kawes ya ankabli; noag ingen dia ed saray maabig a gawa (a sikato so matukoy ed saray bibii a labay da so mansimpit).” (1 Timoteo 2:9, 10) Papasesegen nen Pablo iray Kristianon agagi ton bibii a magmaliw a masimpit, balanse ed panagpili na parakep odino pampaganggana, tan “manpales” tekep na saray maabig a gawa.

Kayari na satan et impaliwawa nen Pablo so uksoyan na inkaulo diad kongregasyon, ya inkuan to: “Agko abuloyan so bii a manbangat, odino walay pakauley to ed laki, noag ingen wala komon ed andi-esel.” (1 Timoteo 2:12; 1 Corinto 11:3) Impaliwawa to so basiyan na sayan uksoyan diad impangipabitar to a bangta si Adan et ag-atilaan odino ag-apalikdo nen Satanas, si Eva so sigpot ya “atilaan, [tan] naplag ed kasalanan.” Panon a naprotektaan so Kristianon bii ed impankasalanan nen Eva? Oniay ebat nen Pablo: “Anggaman ontan, sikatoy nasalimbengan diad pananak to, daput no sikara so mansiansia ed pananisia tan panangaro tan panamasanto tekep na inkalimpio na nonot.” (1 Timoteo 2:14, 15, NW) Antoy labay ya ibaga nen Pablo ed sarayan balikas?

Ompatnag ya isusuheri na arum a managpatalos a say kililiktar na sakey a bii so akadepende ed pakawalaan toy ananak. Alimbawa, oniay inkuan na Say Biblia na PBS: “[Say bii so] nilaban dia ed pangiyanak to ed saray anak.” Balet, sayan interpretasyon ed inkuan nen Pablo et aliwan susto. Dakel a teksto so mangipapanengneng a pian niliktar so sakey a too, nepeg a kabaten to si Jehova, manisia ed si Jesus, tan mangagamil na pananisia, ya ipatnag itan a pananisia diad saray gawa. (Juan 17:3; Gawa 16:30, 31; Roma 10:10; Santiago 2:26) Niarum ni, aglabay ya ibaga nen Pablo a saray mananisian bibii et garantisado lan maligen so pananak da. Walaray bibiin maligen ya akapananak, mananisia man ira odino andi. Tan makapaermen ya arum so inatey legan a manaanak, mananisia man ira odino andi.​—Genesis 35:16-18.

Makatulong so kaaruman a simbawa nen Pablo nipaakar ed saray bibii ed saginonor na saman lanlamang a sulat to pian natalosan tayo so labay ton ibaga. Pinasakbayan to so arum a malangwer a bibiin balo a ‘mangiras, ya onla ra ed saray kaabungan; tan aliwa labat a mangiras noag ingen matongtong ira tan misasalet, a salitaen da so saray bengatla ya agda kanepegan.’ Antoy simbawa nen Pablo? Intuloy to: “Pirawat ko lanti a saray ugugaw a balo miasawa’ra komon, mananak ira, uksoyen da so abung da, tan ag-ira mangiter ed kabusol na antokaman a sengeg na panayew.”​—1 Timoteo 5:13, 14.

Ipapabitar nen Pablo so makanan betang na bibii diad uksoyan ed pamilya. Lapud okupado ed saray obligasyon a singa say ‘panag-anak tan pananguksoy ed abung,’ say bii a mansiasiansia “ed pananisia tan panangaro tan panamasanto tekep na inkalimpio na nonot” so agnalagyat ed makapuy a kondukta. Sirin et napansiansia odino “nasalimbengan” so pananisia to. (1 Timoteo 2:15, NW) Say panggawa ed saya et ontulong ed dakel a malangwer nin bibii a napaliisan iray patit nen Satanas.

Saray salita nen Pablo ed si Timoteo so mangipapanonot ed sikatayon amin, lalaki man odino bibii, a magmaliw ya okupado diad makagunggonan paraan. Oniay isisimbawa na Salita na Dios ed amin a Kristiano: “Nengneng yo sirin a tinekepan na panlikas no panon so panakar yo, aliwan singa andi kalakal, noag ingen singa makalakal.”​—Efeso 5:15.