Tinmalona ed Nikadkaduman Paraan
Tinmalona ed Nikadkaduman Paraan
WALA tay onsusumpa ed pananisiam—nayari pa lagin diad trabaho, diad eskuelaan, diad pamilyam, odino lapu ed saray panameget na gobierno? Agka nadidismaya. Dakel a Tasi nen Jehova so akasali la na ontan iran subok, ingen ta ayarian da itan. Imanoen pa so agawa ed si Erna Ludolph.
Si Erna so inyanak ed Lübeck, Alemanya, nen 1908. Bukbukor to’d pamilya ra so manlilingkor ed si Jehova. Sanen ginmapon anguley so rehimen nen Hitler nen 1933, alodloor so irap na saray Tasi nen Jehova. Si Erna so impungit-pungit na saray katrabahoan to lapud agto pansaludo parad Hitler, tan lapud saya et sikatoy inaresto na saray Nazi. Waloy taon a sikatoy impisok ed nanduruman prisoan tan panangipangawan a kampo diad Hamburg-Fuhlsbüttel, Moringen, Lichtenburg, tan Ravensbrück. Legan a walad Ravensbrück, walay agawa ed si Erna ya akatulong pian sikatoy ontalona.
Nidumaduman Katulong
Si propesor Friedrich Holtz tan say misis to, si Alice, so manaayam ed Berlin. Aliwa ran membro na partidoy Nazi tan agda sinuportaan so ideolohiya na satan. Balet, walay kanayon dan atagey a ranggon opisyal na SS ya akansakop ed saray priso diad pigaran panangipangawan a kampo. Kanian sanen manaanap na katulong so sanasawa, sayan opiser na SS so inmabuloy a mamili ra’d saray prison bibii. Kanian, nen Marso 1943 et nila nen Alice so Ravensbrück pian mamili na katulong. Siopay apili to? Si Erna Ludolph. Nanayam si Erna ed pamilyan Holtz, tan maabig so impantrato ra’d sikato. Sanen angangga la so guerra, sikatoy akila ed pamilyan Holtz diad syudad na Halle ed ilog Saale. Diman, akasagmak lamet na isusumpa si Erna, diad saman et panamegley na uley na Sosyalista ed Bukig ya Alemanya. Nen 1957 say pamilyan Holtz so pinaskar ya onalis ed Sagur ya Alemanya, tan akila si Erna ed sikara. Awalaan a siansia si Erna na kawayangan ya agamilen so pananisia to.
Panon a tinmalona si Erna diad nikadkaduman paraan? Lapud maabig a kondukta nen Erna tan inkadunong ton mangipulong ed mensahe na Biblia, si Alice Holtz tan say limaran anak to so nagmaliw a bautismadon Tasi nen Jehova. Niarum ni, 11 ed saray apo nen Alice so Tasi met. Duara ed sikara so kaplesan a manlilingkor ed sangan opisina na saray Tasi nen Jehova diad Selters, Alemanya. Oniay inkuan nen Susanne a sakey ed saray anak a bibii nen Alice: “Baleg so intulong na ehemplo nen Erna ed impakakamang na pamilya mi ed katuaan.” Mayamyaman ya atumangan so inkaanos nen Erna. Komusta met so kipapasen mo? Nayarin say matoor a panaanos mo ed mairap iran kipapasen so walaan met na ontan a marakep iran resulta. On, say maabig a kondukta tan say marunong a panagpulong so makatulong pian ontalona ed nikadkaduman paraan. *
[Paimano ed leksab]
^ par. 6 Legan ya ipaparaan iyan artikulo pian ipalapag, si Erna Ludolph so naandi’d bilay diad edad a 96. Sikatoy nanmatoor angga ed kasampotan.
[Litrato ed pahina 31]
Si Erna Ludolph (akayurong) kaiba iray membro na pamilyan Holtz