Anton Klase na Pundasyon so Pangileletnegan Mo?

SAY inkamalet na sakey a bilding so mandependin tuloy ed tibay na letnegan, odino pundasyon. Say Biblia so manguusar no maminsan ed sayan prinsipyo diad piguratibon pantalos.

Alimbawa, si propetan Isaias so anukoy ed si Jehova a Dios bilang “angiletneg na saray pundasyon na mundo.” (Isaias 51:13, Maung a Balita) Kabiangan ed sayan pundasyon so agmanguman iran ganggan na Dios a mangokontrol ed ikukurang na dalin tan mamapasiansia ed pasen na satan. (Salmo 104:5) Say Salita na Dios, say Biblia so anukoy met ed “saray angiletnegan” a kawalaan na sosyedad na too. Saraya et hustisya, ganggan, tan uksoyan. Sano “naderal,” odino napakapuy iraya na ag-inkahustisya, inkakurakot, tan karawalan, nakusbo so uksoyan na sosyedad.​—Salmo 11:2-6; Uliran 29:4.

Sayan prinsipyo so onaaplika met ed kada indibidual. Sanen sampotan la nen Jesu-Kristo so Sermon to ed Palandey, oniay inkuan to: “Ganagana sirin a makadngel na saraya a salitak, et sumpalen to ra, sikato so niulibay ed sakey a toon makalakal, ya impaalagey toy abung to ed tapew na baton-dampay. Et pinmelag so uran, tan sinmabi danas, tan sinmibok so saray dagem, tan binmasig ira ed saman ya abung; et agnagba; lapud nipaletneg ed tapew na baton-dampay. Tan balang sakey a makadngel na sarayan salitak, et agto sumpalen, sikatoy niulibay ed sakey a too ya andi-kalakal, ya impaalagey to so abung to ed tapew na buer. Et pinmelag so uran, tan sinmabi danas, tan sinmibok so saray dagem, tan binmasig ira’d saman ya abung, et nagba; tan makapakebbiew so inkagba to.”​—Mateo 7:24-27.

Anton klase na pundasyon so pangileletnegan moy bilay mo? Dia kasi ed agmaligen a kabueran na andiay-dios a pilosopiya na too, a manresulta ed kakusbo na istruktura? Odino kasin dia ed putel a baton dampay na katutulok ed saray simbawa nen Jesu-Kristo, ya ontulong ed sikan naliktaran so piguratibo iran bagyo ed bilay?