Asingger la so Mundon Anggapoy Kairapay-bilay

SARAY litrato na Paraiso, a singa say walad apis na sayan magasin, so makapasagyat ed saray totoon mairap-bilay. Say paraiso so peteg a nanggayagaan na inmunan sanasawa, di Adan tan Eva. Nanayam ira diad hardin na Eden. (Genesis 2:7-23) Anggaman naandi itan a Paraiso, aliwan kugkugip so panisian niwalay paraiso ed arapen​—diad sakey a balon mundo ya anggapo lay kairapay-bilay. Satan so malet a nibase ed saray sipan a nikurit ed Biblia.

Imanoen pa so insipan nen Jesu-Kristo diad unor lan agew na bilay to diad dalin. Say sakey ed saray managgaway-mauges a kaiba nen Jesus ya inatey so anisia a sarag na Dios a solbaren iray problema na too. Oniay inkuan to: “Jesus, nonot mo ak sano onsabi ka ed panarian mo.” Ipapatnag na sarayan balikas a manisia so managgaway-mauges a si Jesus et manuley bilang Ari tan saray inaatey et napaoli. Oniay inyebat nen Jesus: ‘Tua kuan ko ed sika natan ed sayan agew, Wala ka ed siak dia ed Paraiso.’​—Lucas 23:42, 43.

Nipaakar ed saraman so manayam naani ed Paraiso, oniay ibabaga na Biblia: “Sikara ipaalagey da naani so saray abung, tan manayam ira naani; et mantanem ira na saray ubas, tan mangan ira naani ed saray bunga ra.” (Isaias 65:21) On, “onyurong ira naani balang sakey ed silong na kiew to ya ubas tan ed silong na kiew to a higos; et anggapo naani manaktakot ed sikara: ta say sangi nen Jehova na saray ehersito sikato so sinalita to.”​—Miqueas 4:4.

Balet, akin a naabuloyan a niwala natan so kairapay-bilay? Panon a tutulongan na Dios iramay manasagmak na kairapan? Kapigan kasi manampot itan a kairapan?

Akin ya Inabuloyan so Kairapay-bilay?

Say Paraiso ya angipasenan ed kinen Adan tan Eva so naandi lapud panagrebelde ya inggapo na sakey a marelmeng ya anghel, si Satanas a Diablo. Diad impangusar nen Satanas ed sakey ya uleg a pinagkasangiyan to, pinalikdo to si Eva pian onsunggay ed ganggan na Dios ya agmangan na bunga na sakey a kiew. Si Eva so tinilaan to pian manisia a say inka-independente ed Dios et mangitarok na magmaong a bilay. Sanen inyopresi nen Eva so insebel a bunga ed kinen Adan, sikatoy angan met, a pinaboran toy asawa to imbes a say Dios.​—Genesis 3:1-6; 1 Timoteo 2:14.

Makatunongan labat a pinapaway ed Paraiso so matungangan sanasawa tan manlapu la’d saman et kaukolan day mantalikarkar pian nabilay. Angga ni’d natan et aabuloyan nen Jehova si Satanas ya uleyan so makasalanan a katooan, pian napabitar iray resulta na itutunganga ed Dios. Pinaneknekan na awaran na too ya agnayarian na katooan a pagmaliwen a Paraiso so dalin. (Jeremias 10:23) Imbes, say inka-independente ed Dios so nanresulta ed makapadesyang iran problema, a laktip lay kairapay-bilay.​—Eclesiastes 8:9.

Balet, saray mairap-bilay et agpapaulyanan a pakaskasi ed sayan mundo a napnoy gonigon. Say impuyan a Salitay Dios, say Biblia,  so mangitatarya na maabig a giya parad sikara.

“Agkayo Mapaga”

Sanen manpapaliwawa si Jesus ed amayamay a dumerengel a dakel ed sikara et mairap-bilay, oniay inkuan to: “Imano yo ray kamanokan ed tawen, ya ag-ira mantatanaman, ag-ira met manaani, tan ag-ira met mantipon ed kamkamalir; et say mangatatawen ya Ama yo tataganoen to ra. Agkayo ta mamabli nen sikara? . . . Agkayo sirin mapaga, ya ikuan yo, Anto kasi kanen mi? ono, Anto kasi inumen mi? ono, Anto kasi pankawes mi? Ta saraya ya amin a bengatla so anapen na saray Gentiles; et say Ama yon mangatatawen amta to a nakaukolan yo so saraya ya amin a bengatla. Ingen anapen yo nin unona so panarian, tan say inkatunong to; et amin iraya a bengatla niarum ira ed sikayo.”​—Mateo 6:26-33.

Say toon mairap-bilay et agto kaukolan so mantakew. (Uliran 6:30, 31) Nitarya so pankaukolan to no iyuna to so Dios ed bilay to. Imanoen pa so kipapasen nen Tukiso, a lakin taga-Lesotho ed abalaten ya Aprika. Nen 1998, dinmagsa ed Lesotho iray armada na arum a bansa pian panampoten so panagrebelde ed gobierno. Bilang resulta na satan a pambabakal, saray lakoan so tinatakewan, naandian na trabaho iray totoo, tan kinmisir a tuloy so suplay na tagano.

Manaayam si Tukiso diad sankapobrian a parte na kabisera. Dakel ed saray kakaabay to so mantatakew ed saray lakoan ta pian nabilay kalamor. Kasempet nen Tukiso diad sakey a kuarton panaayaman to, asabian to si Maseiso, say biin kaamong to, a walaan na dakdakel a tagano a tinatakew to. “Ipaway mo iraya,” so inkuan nen Tukiso, ya impaliwawa to a sumlang ed ganggan na Dios so pantakew. Tinmulok si Maseiso. Sikaray niludlurey na kakaabay da tan inala na saratan so tinatakew a tagano.

Ontan so talindeg nen Tukiso lapud iyaaplika to so naaaralan to ed Biblia ed saray Tasi nen Jehova. Kasin sikatoy naerasan lapud katutulok to ed ganggan na Dios? Andi. Diad saginonor, saray mamatatken ed kongregasyon na saray Tasi nen Jehova ya inatendian to so angiyakar ed si Tukiso na tagano. Diad tua, saray Tasi nen Jehova ed kaliberliber na Abalaten ya Aprika so angipawit na masulok a duaran tonilada a suplay pian tulongan iray Kristianon agagi ra diad Lesotho. Nandinayewan nen Maseiso so katutulok nen Tukiso ed Dios tan say maaron pananulong na kongregasyon. Kanian sikatoy impaiyaralan met la na Biblia. Diad kaunoran et nankasal la ra kanian kinmualipika iran nabautismoan bilang Tasi nen Jehova. Sikaray matoor a manlilingkor ed Dios anggad natan.

Iyaansakit nen Jehova a Dios iray mairap-bilay. (Nengnengen so kahon a “Panon so Panmoria na Dios ed Saray Mairap-bilay?”) Sikato so maaron mangitatarya na probisyon pian tulongan so arum a singa si Tukiso tan Maseiso a makaaral nin nagkalalo nipaakar ed sikato.  Tan sikatoy mangitatarya na praktikal a simbawa parad inagew-agew a panagbilay panamegley na Salita to.

Sakey a Maabig a Probisyon

Lawas manggugunaet iray Tasi nen Jehova ya ipatnag so panagpaga na Dios ed saray mairap-bilay. (Galacia 2:10) Mabetbet a sano walay nagawan desyang ed sakey a bansa tan naapektoan iray tuan Kristiano, gagawaen iray uksoyan pian nitarya so nakaukolan a tulong. Mas importante ni, pampapagaan na saray Tasi so espiritual iran pankaukolan na amin, a pati saray mairap-bilay. (Mateo 9:36-38) Diad apalabas a 60 a taon, nilibo ed saray nipasal a ministro so namboluntaryon manlingkor bilang misionaryo ed arum a bansa. Alimbawa, sakey a sanasawan misionaryo a taga-Finland, a nanaral na lenguahen Sesotho, so akapangibangat ed si Tukiso tan Maseiso a magmaliw a babangatan nen Jesus. (Mateo 28:19, 20) Mabetbet a nalalanor ed panagmisionaryo so panaynan ed komportablen bilay ed sakey a maaligwas a bansa tan onalis ed mairap a lugar.

Saray tuan Kristiano so agmantatakew pian nabilay. Imbes, sikaray manmamatalek ed pakayari nen Jehova a Dios a mangitarya. (Hebreos 13:5, 6) Say sakey a paraan na pangitatarya nen Jehova ed totoo to et diad panamegley na sankamundoan ya organisasyon na saray mandadayew ed sikato, a walaan na panangiyansakit ed sakey tan sakey.

Say sananey nin paraan na panutulong nen Jehova ed saray mairap-bilay et diad pangitatarya to ed sikara na praktikal a simbawa parad inagew-agew a panagbilay. Alimbawa, onia so igaganggan na Biblia: “Saman so nantatakew nensaman agkomon la mantakew: noag mansagpot, a gawaen na saray lima-lima to so bengatla a makapaabig, pian wala so niiter to ed  satay walay pankaukolan to.” (Efeso 4:28) Dakel a totoo ya andian na trabaho so makapapawala na saray anapan da, ya impasyan mankikimey, a singa say pantanem tan pangasikaso ed saray pising a tanaman. Say Biblia so ontutulong met ed saray mairap-bilay a makatipon na kuarta diad pangibabangat na satan ed sikaran ompaliis ed makapuy iran bisyo, a singa say alabas a panag-inum na alak.​—Efeso 5:18.

Sakey a Mundon Anggapo lay Kairapay-Bilay​—Kapigan?

Ipapabitar na Biblia a manbibilay itayo la ed ‘kaunoran iran agew’ na uley nen Satanas. (2 Timoteo 3:1) Magano lan ibaki nen Jehova a Dios si Jesu-Kristo a mangukom ed katooan. Anto kasi nagawa ed satan a panaon? Angiter na ebat si Jesus diad sakey ed saray ilustrasyon to. Inkuan to: “Sano onsabi so Anak na too ed gloria to, tan kaulop to ray amin ya angheles, saman la onyurong ed trono na gloria to. Tan natipon naani ed arap to so saray amin a nasyon; tan panbibiiganen to ra naani sakey tan sakey, a singa say pastol ibiig to so saray kanding. Tan ipasen to ’ray karnero ed nikawanan a lima to, balet saray kanding ed nikawigi.”​—Mateo 25:31-33.

Saray karnero ed sayan ilustrasyon et saramay manpapasakop ed inkaari nen Jesus. Inyaliling ira nen Jesus ed saray karnero lapud ontutumbok ira ed sikato bilang Pastol da. (Juan 10:16) Nagamoran na sarayan kinmarneron totoo so bilay diad silong na ayadyarin uley nen Jesus. Sakey itan a maliket a bilay dia ed balon mundo ya anggapo lay kairapan. Balet saramay kinmanding a totoo, a mangipupulisay ed uley nen Jesus, so naderal ed andi-anggaan.​—Mateo 25:46.

Panampoten la na Panarian na Dios so karelmengan. Tan agla nasagmak na totoo so kairapay-bilay. Imbes, say dalin so panayaman na saramay mangaaro tan mangiyaansakit ed sakey tan sakey. Posible a niwala so ontan a balon mundo unong a naiimano la itan ed maaron impanaagi na saray Tasi nen Jehova ed sankamundoan, ta oniay inkuan nen Jesus: “Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.”​—Juan 13:35.

[Kahon/Saray litrato ed pahina 6, 7]

PANON SO PANMORIA NA DIOS ED SARAY MAIRAP-BILAY?

Say Biblia so manideskribe ed Manamalsa na katooan bilang ‘Manangiter na tagano ed naeerasan.’ (Salmo 146:7) Lugan na satan so masulok a sanlasus a bersikulo a mangipapabitar ed panagpaga na Dios ed saray duruka odino mairap-bilay.

Singa bilang, sanen initer nen Jehova so Ganggan to ed nasyon na Israel nensaman, ingganggan to ed saray Israelitan dumaralos ya agda la aanien ya amin iray walad gilig na kaumaan da. Agda la nepeg a todtoren iray akeran bunga diad pamawil lamet ed saray kaolibaan odino kaubasan da. Sarayan ganggan et maaron probisyon parad saray sankaili, ulila, balo a bibii, tan arum niran totoo a maniirap.​—Levitico 19:9, 10; Deuteronomio 24:19-21.

Oniay ingganggan ni na Dios ed saray Israelita: “Agyo pabpairapen so siopaman a bii a balo odino say ulila ed ama. No pabpairapen mo ra, et ontawag ira kalamor ed siak, dengelen ko so tagleey da; et say sano’ko ompetang naani, tan pateyen ta kayo naani ed kampilan, et saray kaasawaan yo a bibii nabalo ra, tan saray anak yo naulila ra naani ed ama.” (Exodo 22:22-24) Makapaermen ta saratan a salita so imbaliwala na dakel a mayayaman ya Israelita. Makalanor ed saya tan arum nin gawan-mauges, aminpigan pinasakbayan nen Jehova a Dios iray Israelita panamegley na saray propeta to. (Isaias 10:1, 2; Jeremias 5:28; Amos 4:1-3) Diad kaunoran, inabuloyan na Dios iray taga-Asirya tan diad saginonor et saray taga-Babilonia a sakopen so teritorya na Israel. Dakel ya Israelita so inatey, tan saray akaliktar so kinautibo ed sananey a bansa.

Say inad-aron Anak na Dios a si Jesu-Kristo so angipatnag ed maaron panangiyansakit nen Ama to ed saray duruka. Impaliwawa nen Jesus so gagala na ministeryo to, ya inkuan to: “Say espiritu na Katawan wala ed siak, ta nilanaan to ak a mangipulong na saray maong a balita ed saray duruka.” (Lucas 4:18) Agkabaliksan na saya ya inyapasakey labat nen Jesus so ministeryo to ed saray duruka. Sikatoy maaron tinmulong met ed saray mayayaman. Balet, legan a gagawaen nen Jesus itan, mabetbet ton impatnag so panagpaga to ed saray duruka. Alimbawa, oniay insimbawa to ed sakey a mayaman a manuley: “Ilakom so amin a wala ed sika, et yutob mo ed saray duruka, et wala naani kayamanan mo ed tawen; et gala, tumboken mo ak.”​—Lucas 14:1, 12-14; 18:18, 22; 19:1-10.

Si Jehova a Dios tan say Anak to so walaan na aralem a panangiyansakit ed saray duruka odino mairap-bilay. (Marcos 12:41-44; Santiago 2:1-6) Bilang panangipatnag na panagpaga nen Jehova ed saray mairap-bilay, nonodnonoten to so minilyon a mairap-bilay ya inaatey. Amin da so napaoli ed balon mundo ya anggapo lay kairapan.​—Gawa 24:15.

[Saray litrato]

Ipapatnag na internasyonal ya impanaagi na saray Tasi nen Jehova a posible so balon mundo

[Litrato ed pahina 5]

Si Tukiso tan Maseiso a kaiba so misionaryon angiyaral na Biblia ed si Tukiso

[Litrato ed pahina 5]

Si Maseiso a walad puertay abung to, kaiba so misionaryon angiyaral na Biblia ed sikato