‘Mantultuloy Kayon Mantepel Sano Nidudunget ed Kaugsan’

“Say aripen na Katawan agto kanepegan so makolkol, noag ingen maamo ed ganagana, maong a mangibangat, matpel [“matepel sano nidunget ed kaugsan,” NW].”​—2 TIMOTEO 2:24.

1. Sano mibibiang itayo ed Makristianon kimey, akin a sagpaminsan a makaabet itayo na totoon mapasang so panagsalita ra?

 PANON so ikiwas yo sano nipaarap kayo ed saramay negatibo so pidedeneng da ed sikayo odino ed irerepresenta yo? Diad impaneskribe nen apostol Pablo ed saray kaunoran ya agew, impasakbay to a saray totoo et “maayew, . . . managpauges, aliwa ran maadia, maruksa ra.” (2 Timoteo 3:1-5, 12) Nayarin akaabet kayo la na ontan iran indibidual diad ministeryo yo odino ed arum iran aktibidad.

2. Antoran teksto so makatulong ed sikatayo pian makabat a napidenengan so totoo a mapasang so panagsalita ra ed sikatayo?

² Aliwan amin a mansasalitay mapasang et andian na interes ed no anto so maptek. Lapud pirmin paniirap odino inkadismaya ra, nayarin mapayunget a mansalita so totoo ed siopaman a naabet da. (Eclesiastes 7:7) Ontan so ikikiwas na dakel lapud manbibilay tan mankikimey ira ed kaliberliber a kaslakan la so maabuson panagsalita. Ingen, aliwa itan a rason pian awaten tayo bilang Kristiano so ontan a panagsalita, balet ontulong itan ed sikatayo pian natalosan no akin ya ontan so panagsalita na arum a totoo. Panon so ikiwas tayo ed mapasang a panagsalita? Oniay ibabaga na Uliran 19:11: “Say kalakal na too manggawa ed sikato [a] matantan a manpasnok.” Tan oniay ibibilin ed sikatayo na Roma 12:17, 18: “Aleg ya itumang yo ed anggan siopa so mauges ed mauges. . . . No nayari, dia ed anganggaan na nayarian yo, manayam kayo ed kareenan ed ganaganay totoo.”

3. Panon a nalalanor so pikakareenan ed mensahen ipupulong tayo?

 ³ No talagan mikakareenan itayo, nanengneng itan ed awawey tayo. Napatnagan itan ed ibabaga tan gagawaen tayo, a nayarin diad itsura na lupa tan tonada na boses tayo met. (Uliran 17:27) Sanen imbaki nen Jesus iray apostol to pian manpulong, oniay insimbawa to ed sikara: “Sano onloob kayo ed abung, sikato so igalang yo [“Ikuan yo, Manari komoy kareenan ed sayan abung,” Maung a Balita]. Et no say abung makana, onla’d sikatoy kareenan yo; bangbalet no agmakana, ompawil ed sikayo so kareenan yo.” (Mateo 10:12, 13) Say mensahen tarok tayo et say maong a balita. Satan so tinawag na Biblia ya “ebanghelyo na kareenan,” “ebanghelyo na grasya na Dios,” tan “ebanghelyo na panarian.” (Efeso 6:15; Gawa 20:24; Mateo 24:14) Say gagala tayo et, aliwan say pankritiko ed saray sisiaen na arum a too odino pisangsangan ed sikato nipaakar ed saray punto de bista to, noagta pian inabang ed sikato so maong a balita manlapud Salitay Dios.

4. Anto so nayarin ibaga yo sano nibaga ed sikayoy “agak interesado” sakbay yo nin nibaga so pegdat yo?

⁴ Lapud agton talaga onderengel, nayarin ibaga lan tampol na unabung ya, “Agak interesado.” Diad dakel a kipapasen, nayarin oniay ibaga yo, “Labay kon ibasa labat komon iyan antikey a teksto ed Biblia.” Nayarin sikatoy onabobon. Diad arum a kipapasen, nayarin matukoy so pangibagay: “Labay ko labat komon ya ibaga ed sikayo so nipaakar ed panaon sano naandi la so ag-inkahustisya tan amin a totoo et makaaral lan mangaro ed balang sakey.” No say unabung et agtampol mangibalikas na interes ton manusisa ni ed satan, nayarin oniay iyarum yo: “Balet singano aliwan kombeniente amo natan parad sikayo.” No negatibo so ebat na unabung, nepeg kasin isipen tayo a sikato et ‘agmakanepegan’? Antokaman so reaksion da, tandaan so simbawa na Biblia a magmaliw a ‘matamoy ed amin, matepel sano nidunget ed kaugsan.’​—2 Timoteo 2:24, NW.

Malangas Lapud Apalikdo

5, 6. Panon so impideneng nen Saulo ed saray patumbok nen Jesus, tan akin ya ontan so inkiwas to?

⁵ Nen inmunan siglo, walay lakin manngaran na Saulo a kabkabat lapud agmarespeton panagsalita to, a marawal ni ingen so kakikiwas to. Ibabaga na Biblia a sikato so “manengas ni ed pangigagaem tan panagpatey ed saray binangatan na Katawan.” (Gawa 9:1, 2) Inaksobi to ed saginonor a sikato et ‘maayew tan manamasegsegang  tan managdumsis’ odino malangas. (1 Timoteo 1:13) Anggaman arum ed kakanayon to so nayarin nagmaliw lan Kristiano, oniay inkuan to nipaakar ed dilin awawey to ed saray patumbok nen Kristo: “Napno ak na alabas a sanok ed sikara, inusilan ko ra angga ed saray sananey a baley.” (Gawa 23:16; 26:11; Roma 16:7, 11) Anggapo so ebidensya ya akisangsangan iray babangatan ed si Saulo diad publiko sanen ontan ni so kakikiwas to.

⁶ Akin ya ontan so inkiwas nen Saulo? Oniay insulat to kayari na pigaran taon: “Ginawak [itan] ya andi am-amta, nen agak ni anisia.” (1 Timoteo 1:13) Sikatoy sakey a Fariseo, a nibangat “unong ed elet na Ganggan na saray atateng.” (Gawa 22:3) Anggaman ompatnag a makatalos so maestro nen Saulo a si Gamaliel, say atagey a saserdoten si Caifas, ya akiulopan nen Saulo, so apaneknekan a panatiko. Si Caifas so angigaulo ed impankokomplot ya angitonton ed impamatey ed si Jesu-Kristo. (Mateo 26:3, 4, 63-66; Gawa 5:34-39) Kayari na satan, sineguro nen Caifas a nasiplatan iray apostol nen Jesus, tan mapeget ton ingganggan ya agla ra manpupulong ed ngaran nen Jesus. Si Caifas so angidaulo ed Sanhedrin diad magulon impan-usay ed korte a diad saman et impaway si Esteban pian tupaken. (Gawa 5:27, 28, 40; 7:1-60) Inimatonan nen Saulo so impantupak, tan sikato so inautorisaan nen Caifas a mangitultuloy a mamaer ed saray patumbok nen Jesus diad pangerel ed sikara diad Damasco. (Gawa 8:1; 9:1, 2) Lapud satan ya impluensya ed sikato, abaloan nen Saulo a say gagawaen to et pakapatnagan na seseg ed Dios, balet ta diad tua et sikatoy andian manaya na peteg a pananisia. (Gawa 22:3-5) Bilang resulta, ag-amoria nen Saulo a si Jesus so tuan Mesias. Balet amorian siansia nen Saulo so makulangkulang a kurang to sanen mamilagron akitongtong ed sikato so apaolin Jesus diad dalan a mamaarap ed Damasco.​—Gawa 9:3-6.

7. Anto so agawa ed si Saul bilang resulta na impakaabet to ed si Jesus diad dalan a mamaarap ed Damasco?

⁷ Kayarin tuloy na satan, nibaki so babangatan a si Ananias pian manpulong ed si Saulo. No sikayo si Ananias, labay yo kasin laen tan pulongan si Saulo? Masuyat si Ananias, balet ta kinatongtong to si Saulo diad maong a paraan. Anguman so awawey nen Saulo lapud mamilagron impakaabet to ed si Jesus diad dalan sanen sikatoy mamapaarap ed Damasco. (Gawa 9:10-22) Diad saginonor et sikato so akabkabat bilang apostol Pablo, sakey a maseseg a Kristianon misionaryo.

Mauyamo Ingen ta Makpel

8. Panon ya impatnag nen Jesus so awawey nen Ama to ed saray totoon akagawa na mauges iran bengatla?

⁸ Si Jesus so maseseg a manangiyabawag na Panarian, a mauyamo tan makpel diad impideneng to ed totoo. (Mateo 11:29) Impatnag to so awawey na mangatatawen ya Ama to, a pinaseseg to iray marelmeng ya ontunda la ed saray mauges a kurang da. (Isaias 55:6, 7) Diad impideneng to ed saray managkasalanan, inimano nen Jesus no walay pangumanan da ni, tan pinaseseg to ra. (Lucas 7:37-50; 19:2-10) Imbes a husgaan to so arum unong ed akinpaway ya itsura ra, inalig nen Jesus so kamaongan, inkaanos, tan andukey a panagtepel na Ama to diad gagalan nitonton ira ed panagbabawi. (Roma 2:4) Linawa nen Jehova ya amin a nengneng na totoo et nepeg a magbabawi tan nilaban.​—1 Timoteo 2:3, 4.

9. Anto so naaralan tayo ed impakasumpal na Isaias 42:1-4 ed biang nen Jesus?

⁹ Diad impangidalatdat to ed panmoria nen Jehova ed si Jesu-Kristo, inaon na managsulat na Ebanghelyo a si Mateo irayan mapropetikon salita: “Nia, so aripen ko a sikatoy pinilik; Inararok a diad sikato napaliket so kamarerwak. Say espirituk ‘yan ko naani ed sikato, et ipakaba’to naani ed saray Gentil so panangukom. Sikatoy agmisiblangan naani tan agmet oningal; tan anggapo met naani makadngel na boses to ed saray pulong. Say kawayan a betag sikatoy agto naani puteren, tan say pabilon manasewek agto naani erepen, angga ed napan-palabo toy panangukom. Et diad ngaran to so panilaloan na saray Gentiles.” (Mateo 12:17-21; Isaias 42:1-4) Mitunosan ed saratan a mapropetikon salita, ag-alanor si Jesus ed maingal a sangsangan. Anggan sanen nisilong ed pananesdes, sinalita to so katuaan ed paraan a makapasagyat ed saray matuan-impanpuso.​—Juan 7:32, 40, 45, 46.

10, 11. (a) Anggaman saray Fariseo so kabiangan ed saray diretsaan ya onsusumpa ed si Jesus, akin a pinulongan to so arum ed sikara? (b) Antoran nengneng na ebat so sagpaminsan ya inter nen Jesus ed saray onsusumpa ed sikato, balet anto so agto ginawa?

 ¹⁰ Legan na ministeryo to, si Jesus so akitongtong ed dakel a Fariseo. Anggaman nanggunaetan na arum ed sikara so mamatit ed sikato diad pansasalita to, ag-inisip nen Jesus ya amin da so walaan na mauges a motibo. Si Simon, a sakey a Fariseon makritiko, so ompatnag a malabay a man-obserba ed si Jesus kanian inimbitaan to ed sakey a panangan. Inawat nen Jesus so imbitasyon tan pinulongan to iramay wadman. (Lucas 7:36-50) Diad sananey ya inkagawa, sakey a prominentin Fariseo a manngaray Nicodemo so maamot a linma ed si Jesus leleg na labi. Sikato so agpinabaingan nen Jesus lapud inalagar to ni so ambilunget. Imbes, pinulongan to si Nicodemo nipaakar ed aro ya impatnag na Dios diad impangibaki to ed Anak to ta pian nilukas so dalan na kilalaban parad saramay mangagamil na pananisia. Mapangasin impabitar met nen Jesus so kaimportantian na katutulok ed uksoyan na Dios. (Juan 3:1-21) Diad saginonor et indepensa nen Nicodemo si Jesus sanen minelmelag na arum a Fariseo so maabig a balita nipaakar ed si Jesus.​—Juan 7:46-51.

¹¹ Atebek nen Jesus so pansimpisimpitan na saramay manasalin mamatit ed sikato. Agto inabuloyan iray onsusumpa a mangidunget ed sikato diad maapan pandedebate. Balet, sano matukoy, sikato so mangiiter na antikey tan mapuersan ebat diad panaglawi to na sakey a prinsipyo, ilustrasyon, odino pangaon toy teksto. (Mateo 12:38-42; 15:1-9; 16:1-4) No maminsan, si Jesus et agla oneebat sano ompatnag ya anggapoy maabig a pansumpalan na satan.​—Marcos 15:2-5; Lucas 22:67-70.

12. Anggan sanen sikatoy ineyagan, panon ya atulongan nen Jesus iray totoo?

¹² No maminsan, si Jesus so eeyagan na totoo ya aselepan na marumsis iran espiritu. Sanen agawa itan, inagamil to so panagtepel tan inusar to ni ingen so inter na Dios a pakayari pian itarok so inawa. (Marcos 1:23-28; 5:2-8, 15) No walaray totoon onsanok tan eyagan da itayo sano manpupulong itayo, nakaukolan tayo met ya agamilen so panagtepel, tan panggunaetan tayon arapen itan a situasyon diad mapangasi tan mataktikan paraan.​—Colosas 4:6.

Diad Loob na Pamilya

13. Akin ya onsusumpa no maminsan so totoo ed sakey a kapamilyaan dan papaiyaralan na Biblia ed saray Tasi nen Jehova?

¹³ Say pankaukolan ya agamilen na saray patumbok nen Jesus so panagtepel et mabetbet a mas napatnagan diad loob na pamilya. Say toon atenyeg a maong so puso to ed katuaan na Biblia so manpirawat ya ontan met so ikiwas na pamilya to. Balet unong ed inkuan nen Jesus, nayarin ipatnag na saray kapamilyaan so panagbusol. (Mateo 10:32-37; Juan 15:20, 21) Wala so nanduruman rason na saya. Singa bilang, bangta saray bangat na Biblia so ontulong ed sikatayo pian magmaliw a matua, responsable, tan marespeto, ibabangat met na Kasulatan a diad antokaman a kipapasen et mas baleg so responsabilidad tayo ed Manamalsa tayo. (Eclesiastes 12:1, 13; Gawa 5:29) Nayarin naopendi so sakey a kapamilyaan ya iisipen ton onkakapuy lay impluensya to ed loob na pamilya lapud katooran tayo ed si Jehova. Sano midedeneng ed ontan a situasyon, importantin tuloy a tumboken tayo so ehemplo  nen Jesus nipaakar ed panagtepel!​—1 Pedro 2:21-23; 3:1, 2.

14-16. Anto so sengegan na impanguman na pigaran datin onsusumpa ed saray kapamilyaan da?

¹⁴ Dakel natan a manlilingkor ed si Jehova so walaan na kapareha odino arum nin kapamilyaan ya onsusumpa ed saray pananguman ya agawaan da sanen ginmapo iran manaral na Biblia. Nayarin walaray negatibon nadngelan na saray onsusumpa nipaakar ed saray Tasi nen Jehova, tan ompano napapagaan iran niwalay agkalkaliktan ya impluensya ed sankaabungan da. Anto so mamakiwas ed sikara pian manguman so awawey da? Mabetbet a baleg so nagawaan na maabig ya ehemplo. Onkekepa no maminsan so isusumpa na pamilya lapud say mananisia et mapekder a mangiyaaplika ed simbawa na Biblia​—a regular ya onaatendi ed Makristiano iran pantitipon tan mibibiang ed ministeryo legan ton aasikasoen iray responsabilidad to ed pamilya tan ipapatnag to so panagtepel anggaman ed maruksa iran panagsalita.​—1 Pedro 2:12.

¹⁵ Say sakey ya onsusumpa so ag-ondengel ed antokaman a paliwawa manlapud Biblia lapud panangidumaduma odino kinon. Tua itan ed sakey a laki diad Estados Unidos ya imbaga ton pirmi so inkanasyonalistiko to. Aminsan et sikatoy nambalkot tan tinmaynan ed abung da sanen akikombension so akulaw to. Aminsan ni et sikatoy pinmaway ed abung da ya awit toy paltog tan impagyaw ton sikatoy manbikkel. Amin ya agmakatunongan a kakikiwas to, intetel to ed relihyon na akulaw to. Balet say asawan bii so nanggunaet a mangiyaplika ed simbawa na Biblia. Duamploy taon kayari na impagmaliw ton Tasi nen Jehova, say asawan laki so nagmaliw met a Tasi. Diad Albania, sinmanok so sakey ya ina lapud say anak ton bii et impaiyaralan na Biblia ed saray Tasi nen Jehova insan abautismoan. Labinduan danay a dineral na ina so Biblia na anak to. Insan sakey ya agew et nilukasan to so balon Biblia ya intilak na anak to diad sakey a lamisaan. Nibanbana ya alukasan to so Mateo 10:36, tan amoria na ina a parad sikato so abasa to. Anggaman kuan, lapud mapaga ed pankaabigan na anak ton bii, impatnubang na ina so marikit to diad bapor a panluganan to tan say arum nin Tasi ya onlan mikombension diad Italya. Anguman so liknaan na ina sanen anengneng to so aroan, lakap, tan imis na grupo tan nadngel to so maliket ya elekan da. Kayarin tuloy na satan, sikato so impaiyaralan na Biblia. Tan natan et sikato lay makulin ontutulong ed arum a datin onsusumpa.

¹⁶ Diad sakey nin inkagawa, kinompronta na sakey ya asawan lakin akabemben na kutsilyo so akulaw to, ya inakusaan to na ambebelat sanen asingger la ed Kingdom Hall. Say asawan bii so matamoy ya inmebat: “Loob ka ed Kingdom Hall, tan manobserba kan mismo.” Linmoob so asawan laki, tan asabi panaon et sikato so nagmaliw a Kristianon matatken.

17. No makapadesdes no maminsan so situasyon diad sankaabungan a Kristiano, anton Makasulatan a simbawa so makatulong?

¹⁷ Anggano Kristiano so amin a kabiangan na sankaabungan, walaray panaon a makapadesdes so situasyon na pamilya tan nayarin magmaliw a bugtabugtak so panagsalita lapud ag-inkayadyari. Makatantanda so nisimbawa ed saray Kristiano diad Efeso nensaman: “Saray amin a kapaitan, tan sanok, tan ingongot, tan ingal, tan mauges a panagsalsalita, naekal komon ed sikayo, pati amin a mauges a kanonotan.” (Efeso  4:31) Mapatnag, say kaliberliber na saray Kristiano diad Efeso, say mismon agda inkayadyari tan, diad arum a kipapasen, say datin kabibilay da so angimpluensya ed sikara. Anto so akatulong ed sikara pian manguman? Kinaukolan dan ‘pasimbaloen so espiritu na kalakal da.’ (Efeso 4:23) Legan iran manaaral na Salitay Dios, mandadalepdep ed no panon itan a mangimpluensya ed kabibilay da, mililimog ed kapara iran Kristiano, tan masimoon a manpipikasi, say bunga na espiritu na Dios so mas nagnap a napatnagan ed kabibilay da. Naaralan da so ‘manaanosan ed sakey tan sakey, mapangasi, manpeperdonaan ed sakey tan sakey, a singa met ed impamerdona na Dios ed sikara panamegley nen Kristo.’ (Efeso 4:32) Antokaman so gawaen na arum, nakaukolan tayon agamilen so panagtepel, magmaliw a mapangasi, maabagey, tan manamerdona. On, “aleg ya itumang [tayo] ed anggan siopa so mauges ed mauges.” (Roma 12:17, 18) Say pangipatnag na puron panangaro bilang pangalig ed Dios so susto lawas a gawaen.​—1 Juan 4:8.

Simbawa Parad Amin a Kristiano

18. Akin a say simbawan naromog ed 2 Timoteo 2:24 so matukoy parad sakey a matatken ed Efeso, tan panon itan a makagunggona ed saray Kristiano?

¹⁸ Say simbawa ya itultuloy tayoy ‘mantepel ed silong na kaugsan’ so onaaplika ed amin a Kristiano. (2 Timoteo 2:24) Balet satan so inmunan insimbawa ed si Timoteo, a kinaukolan to itan sanen sikatoy nanlingkor bilang matatken ed Efeso. Arum ed kongregasyon so prangkan tuloy nipaakar ed saray panmoria ra tan ibabangat da so palson doktrina. Lapud agda sigpot ya atebek so gagala na Mosaikon Ganggan, agda atalosan so kaimportantian na pananisia, aro, tan maabig a konsiensia. Say kinon so nansengegan na pankokolkol a nansasangsangan da iray salita, ya agda atalosan iray bangat nen Kristo tan say kaimportantian na maridios a debosyon. Pian napidenengan so ontan a situasyon, si Timoteo so kinaukolan a magmaliw a mapekder ed Makasulatan a katuaan ingen ta matamoy ed pidedeneng to ed agagi to. Singa saray mamatatken natan, amta to a say pulok et agto kayarian tan sikato so nepeg a mideneng ed arum diad paraan a mangiyalibansa na Makristianon aro tan pankakasakey.​—Efeso 4:1-3; 1 Timoteo 1:3-11; 5:1, 2; 6:3-5.

19. Akin ya importante ed sikatayon amin ya ‘anapen so kauyamoan’?

¹⁹ Papasesegen na Dios iray totoo ya ‘anapen da so kauyamoan.’ (Sofonias 2:3) Say kabaliksan na Hebreon balikas a ‘kauyamoan’ et sakey a disposisyon ya ontulong ed sakey a too pian makapansungdo tan makapan-anos ed panamasakit, ya agmaingongot tan ag-ombabales. Komon ta masimoon tayon kerewen ed si Jehova so tulong to ta pian naagamil tayo so panagtepel tan matukoy so pangirepresenta tayo ed sikato, anggan diad mairap iran kipapasen.

Anto so Naaralan Yo?

• Sano nidunget kayo ed mapasang a panagsalita, antoran teksto so makatulong ed sikayo?

• Akin a malangas a kinmiwas si Saulo?

• Panon itayon natulongan na alimbawa nen Jesus pian susto so pideneng tayo ed amin a nengneng na totoo?

• Antoray nayarin nagunggona no agamilen tayo so panagtepel ed panagsalita tayo diad loob na ayaman?

[Tepetepet Parad Panagaral]

[Litrato ed pahina 26]

Anggaman ed reputasyon nen Saulo, sikato so intrato nen Ananias tekep na kaabigan

[Litrato ed pahina 29]

Say matoor a panangasikaso na sakey a Kristiano ed saray responsabilidad to so nayarin mamakepa ed isusumpa na pamilya

[Litrato ed pahina 30]

Saray Kristiano so mangiyaalibansa na aro tan pankakasakey