Paibangat Pian Naamtaan Iray Dalan nen Jehova

“Ipaimanom pa ed siak so saray dalan mo, pian napikabkabatan ta ka.”​—EXODO 33:13.

1, 2. (a) Akin a kinmiwas si Moises sanen anengneng ton mamaltratoen na Ehipsio so sakey a Hebreo? (b) Pian manepeg a makapanlingkor ed si Jehova, anto so kinaukolan ya aralen nen Moises?

 SI Moises so pinabaleg ed sankaabungan nen Faraon tan nibangat unong ed kakabatan a papablien na saray dederlengen ed Ehipto. Ingen ta naamtaan nen Moises a sikato et aliwan Ehipsio. Saray atateng to et Hebreo. Diad koma-40 a taon to, sikato so pinmaway pian amtaen so kipapasen na agagi to, saray anak na Israel. Sanen anengneng nen Moises so sakey ya Ehipsio a nanmaltrato ed sakey ed saray Hebreo, satan so inyagel to tan pinatey to so Ehipsio. Denesidi nen Moises so ondapag ed totoo nen Jehova tan inisip ton sikato so uusaren na Dios a mangiliktar ed agagi to. (Gawa 7:21-25; Hebreos 11:24, 25) Sanen akabatan itan ya agawa, say maarin sankaabungan na Ehipto so angipasen la ed si Moises bilang rebelde, kanian kinaukolan toy ombatik pian iliktar toy bilay to. (Exodo 2:11-15) Pian nausar na Dios si Moises ed saman, kinaukolan a nakabkabat to nin maong iray dalan nen Jehova. Kasin impaibangat si Moises?​—Salmo 25:9.

² Diad tinmumbok a 40 taon, nambilay si Moises bilang adestiero tan pastol. Imbes a paningongotan to so ompatnag ya ag-impangawat ed sikato na saray Hebreon agagi to, sikato so nampasakop ed no anto so inyabuloy na Dios. Anggaman dakel a taon so linmabas ya anggapo ed saman so ompatnag ya amidbir ed sikato, inabuloyan nen Moises a sikatoy moldien nen Jehova. Oniay insulat to ed saginonor, ya aliwan lapud pangipapasirayew toy inkasikato, noagta lapud panangipuyan na masanton espiritu na Dios: “[Say] laki a Moises sikato nensaman so mauyamon tuloy ed saray amin a lalaki a wala ed tapew na dalin.” (Numeros 12:3) Inusar nen Jehova si Moises diad matalonggaring iran paraan. No panggunaetan tayon ipatnag met so kauyamoan, bendisyonan itayo nen Jehova.​—Sofonias 2:3.

Sikato so Niganggan

3, 4. (a) Anton kimey so ingganggan nen Jehova ed si Moises? (b) Anton tulong so intarya parad si Moises?

³ Sakey ya agew et akisalita ed si Moises so sakey ya anghel ya imbaki nen Jehova diad asingger na Palandey Horeb ed Sinai Peninsula. Oniay nibaga ed si Moises: “Peteg ya anengneng ko so ermen na totook a wadman ed Ehipto, et dinengel ko so tagleey da lapu ed saray kapatas da, ta amtak so kaermenan da. Et linmasur ak ta ekalen ko ra ed saray lima na saray Ehipsio, tan pian itaynan ko ra ed saman a dalin tan yakar ko ra ed sakey a maong tan maawang, dia ed sakey a dalin a panagusan na gatas tan dilo.” (Exodo 3:2, 7, 8) Nipaakar ed saya, walay kimey a pagawa na Dios ed si Moises, balet ta nepeg ton gawaen itan unong ed paraan nen Jehova.

⁴ Oniay intuloy na anghel nen Jehova: “Gala sirin natan, ta ibaki ta ka ed kinen Faraon pian itaynan mo so katooan ko ya anak na Israel diman ed Ehipto.” Si Moises so masuyat lapud inisip to a sikatoy agkualipikado, tan agto napanmatalkan so dili to. Balet, oniay impaseguro nen Jehova ed si Moises: “Iba mo ak naani.” (Exodo 3:10-12) Si Moises so inikdan nen Jehova na pakayarin manggawa na mamilagro iran tanda ya onkanan pakabidbiran a sikato so talagan imbaki na Dios. Say agi nen Moises, a si Aaron, so kaiba to bilang pinagkasangiyan. Imbangat ira nen Jehova no anto so nepeg dan ibaga tan gawaen. (Exodo 4:1-17) Kasin matoor a sinumpal nen Moises itan ya asainmin?

5. Akin ya asubok si Moises ed awawey na Israel?

⁵ Diad primero et anisia iray mamasiken na Israel  ed kinen Moises tan Aaron. (Exodo 4:29-31) Balet, agnambayag et tinetel na “saray makauley na saray anak na Israel” si Moises tan say agi to lapud ginawa ra a say ‘balingit da et kagulgula’ nen Faraon tan saray aripen to. (Exodo 5:19-21; 6:9) Sanen ontataynan laray Israelita manlapud Ehipto, sikaray atalagnaw sanen anengneng dan uusilan ira na saray aka-karwahen Ehipsio. Lapud wala la ra’d asingger na Ambalangan Dayat tan walad benegan da iray karwahen parad bakal, asaruko iray Israelita, tan tinetel day Moises. Anto kasi so reaksion yo sano kaiba kayo ed saman? Anggaman anggapo iray baloto na saray Israelita, diad panangiwanwan nen Jehova et pinaseseg nen Moises ya ompikal laray totoo. Insan binelsay na Dios iray danum na Ambalangan Dayat, tan say datal na dayat et nagmaliw ya amagan dalin kanian akadalan so Israel.​—Exodo 14:1-22.

Sakey ya Isyu a Mas Importante nen say Kililiktar

6. Anto so indanet nen Jehova sanen ingganggan to si Moises?

⁶ Sanen ingganggan nen Jehova si Moises, indanet To so kaimportantian na madibinon ngaran To. Makanakana so panrespeto ed satan a ngaran tan ed samay Sakey ya irerepresenta na satan. Sanen tinepetan nipaakar ed ngaran to, oniay inkuan nen Jehova ed si Moises: “Siak so siak.” Niarum ni, oniay nepeg ya ibaga nen Moises ed saray anak na Israel: “Si Jehova a Dios na saray atateng yo, a Dios nen Abraham, Dios nen Isaac, tan Dios nen Jacob, imbaki to ak ed sikayo.” Insan oniay inyarum nen Jehova: “Sikato’ya so ngaran ko ed andi-anggaan, tan sikato’ya so pakanodnonotan ed saray amin a kailalakan.” (Exodo 3:13-15) Say Dios so siansia nin kabkabat na saray lingkor to ed interon dalin diad ngaran a Jehova.​—Isaias 12:4, 5; 43:10-12.

7. Anto so impaseseg na Dios a gawaen nen Moises anggaman ed inkatangsit nen Faraon?

⁷ Sanen pinmarisi si Moises tan Aaron ed si Faraon, impasabi ra so mensahe ra diad ngaran nen Jehova. Balet ta oniay matangsit ya imbaga nen Faraon: ‘Siopa si Jehova, a nepeg kon dengelen so boses to ya abuloyan ko so Israel ya onla? Agko amta si Jehova, tan sakey ni agko abuloyan so Israel ya onla.’ (Exodo 5:1, 2) Impatnag nen Faraon ya anawet so puso to tan mapalikdo, ingen ta pinaseseg nen Jehova si Moises a maminpigan mangipasabi na saray mensahe ed sikato. (Exodo 7:14-16, 20-23; 8:1, 2, 20) Atebek nen Moises a maingongot lay Faraon. Wala ta so maabig a pansumpalan no sikato so piarapan lamet? Labay na Israel so niliktar balet ta aglabay nen Faraon. Anto so gawaen yo no sikayo si Moises?

8. Anto so agunggona ed paraan na impideneng nen Jehova ed situasyon a mangilalanor ed si Faraon, tan panon itayon naapektoan ed saraman ya agawgawa?

⁸ Wala ni so mensahen impasabi nen Moises, ya oniay inkuan to: “Si Jehova a Dios na saray Hebreos onia so kuan to, Paulyan mo ya ontaynan so katooan ko ya onla a manlingkor ed siak.” Imbaga met na Dios: “Inyayag ko la komon so limak, tan dinusa ta ka la komon a pati saray uuleyan mo na salot, et andi ka la komon dia ed dalin: Ingen ta dia ed tuay tua sikato’ya so amaawetan ko ed sika, pian ipanengneng ko ed sika so pakapanyarik, tan pian say ngaran ko nibawag ed amin a mundo.” (Exodo 9:13-16) Diad impangukom to ed anawet-puson si Faraon, inggagala nen Jehova ya ipatnag so pakayari to diad paraan a mamasakbay ed amin a manaangat ed sikato. Kaiba ed satan si Satanas a Diablo, samay tinawag nen Jesu-Kristo ed saginonor bilang say manuley odino “prinsipe na mundo.” (Juan 14:30;  Roma 9:17-24) Unong a nipasakbay la, say ngaran nen Jehova so niyabawag ed interon mundo. Lapud panag-anos to, niliktar iray Israelita ontan met ed dakel a sankailin totoo ya akila ed sikara diad panagdayew ed sikato. (Exodo 9:20, 21; 12:37, 38) Manlapu la’d saman, sirin, say impangiyabawag ed ngaran nen Jehova so angunggona ed minilyon nin angawat ed tuan panagdayew.

Pidedeneng ed Matewet a Totoo

9. Panon so ag-impanrespeto na mismon kanasyonan nen Moises ed si Jehova?

⁹ Amta na saray Hebreo no anto so ngaran na Dios. Inusar nen Moises itan a ngaran sanen nansalita ed sikara, balet ta ag-ira lawas angipatnag na suston panagrespeto ed samay Sakey ya akanngaran ed satan. Kayarin tuloy na mamilagron impangiliktar nen Jehova ed saray Israelita manlapud Ehipto, anto so agawa sanen ag-ira tampol akaromog na nainum a danum? Nanmeremere ira sumpad si Moises. Insan nanreklamo ira nipaakar ed tagano. Pinasakbayan ira nen Moises a say panmemeremere ra et aliwa labat a sumpad sikato tan ed si Aaron noagta sumpad si Jehova. (Exodo 15:22-24; 16:2-12) Diad Palandey Sinai, inter nen Jehova ed saray Israelita so Ganggan, tan saya so atekepan na saray mamilagron gawa. Balet saray totoo so matungangan nanggawa na binalitokan a baka parad panagdayew tan inkuan da a sikara so ‘manpipiesta ed kinen Jehova.’​—Exodo 32:1-9.

10. Akin a say kerew nen Moises a nikurit ed Exodo 33:13 so makapainteres a tuloy ed saray Kristianon manangasikaso natan?

¹⁰ Panon so nepeg a pideneng nen Moises ed totoo a deneskribe nen Jehova ya anawet-tenten? Oniay inkerew nen Moises ed si Jehova: “Kerewen ko ed sika, no aromog ko so panangaro ed arapan mo, ipaimanom pa ed siak so saray dalan mo, pian napikabkabatan ta ka, pian naromog ko so panangaro ed arap mo.” (Exodo 33:13) Diad pangaasikaso ra ed modernon-agew iran Tasi nen Jehova, say papastolan na saray Kristianon manangasikaso et mas mapaabeban tuloy a pulok. Ingen, oniay ipipikasi ra met: “Iparungtal mo ed siak so saray dalan mo, O Jehova; ibangat mo ed siak so saray basbas mo.” (Salmo 25:4) Say pikakabat ed saray dalan nen Jehova so makakatulong ed saray manangasikaso pian pidenengan iray situasyon diad paraan a mitunosan ed Salitay Dios tan mitukoyan itan ed personalidad to.

No Anto so Iilaloan nen Jehova ed Totoo To

11. Antoran totontonen so inter nen Jehova ed si Moises, tan akin ya interesado itayo ed saratan?

¹¹ Say iilaloan nen Jehova ed totoo to so niyanunsio diad Palandey Sinai. Diad saginonor et akaawat si Moises na duaran tapyas na bato ya akasulatan na Samploran Ganggan. Kalasor to ed palandey, anengneng to iray Israelita a mandadayew ed imbolik a kilaw a baka tan masanok ton imbasig iray tapyas na bato, kanian abetag iratan. Inyukit lamet nen Jehova so Samploran Ganggan diad saray tapyas na bato a ginawa nen Moises. (Exodo 32:19; 34:1) Saratan a ganggan so mipara lanlamang ed samay primeron niiter. Si Moises so nepeg ya onkiwas unong ed saratan. Impurek met na Dios ed si Moises no anto so personalidad To, pian nipatnag ed si Moises no panon so nepeg ya awawey to bilang manangilaman nen Jehova. Saray Kristiano so agla nisilong ed Mosaikon Ganggan, balet say imbaga nen Jehova ed si Moises so walaan na dakel iran manunan prinsipyo ya agni anguman tan onaaplika ni ed amin a mandadayew ed si Jehova. (Roma 6:14; 13:8-10) Konsideraen tayo so pigara ed saratan.

12. Anto komon so nepeg ya epekto ed Israel na say kakaukolanen nen Jehova a nikabkabiig a debosyon?

¹² Iter ed si Jehova so nikabkabiig a debosyon. Say nasyon na Israel so mandengdengel sanen inyabawag nen Jehova a nakaukolan to so nikabkabiig a debosyon. (Exodo 20:2-5) Naimatonan la na saray Israelita so daakan ya ebidensya a si Jehova so tuan Dios. (Deuteronomio 4:33-35) Impabitar nen Jehova ya antokaman so gagawaen na arum a nasyon, agto abuloyan so anggan anton nengneng na idolatriya odino espiritismo ed limog na totoo to. Say debosyon da ed sikato et aliwa lambengat a pormalidad. Amin da so nepeg a mangaro ed si Jehova diad interon puso, interon kamarerwa, tan interon biskeg da. (Deuteronomio 6:5, 6) Lalanoren na satan so panagsalita tan kondukta ra​—on, amin ya aspekto na bilay da. (Levitico 20:27; 24:15, 16; 26:1) Impabitar met nen Jesu-Kristo a say kakaukolanen  nen Jehova et nikabkabiig a debosyon.​—Marcos 12:28-30; Lucas 4:8.

13. Akin a kinaukolan na Dios ed Israel so mapeget a katutulok, tan anto so nepeg a mamakiwas ed sikatayo pian ontulok ed sikato? (Eclesiastes 12:13)

¹³ Mapeget ya unoren iray ganggan nen Jehova. Nakaukolan a nipanonot ed totoo na Israel a sanen akisipanan ira ed si Jehova, sinambaan da a sikatoy mapeget dan unoren. Nanggayagaan dan tuloy so personal a kawayangan, balet no nipaakar ed saray ganggan ya inter nen Jehova ed sikara, nepeg a mapeget da iratan a tuloken. Say panumpal da ed satan so mangipatnag ed panangaro ra ed Dios tan mangunggona ed sikara tan ed saray ilalak da lapud amin a kakaukolanen nen Jehova et parad pankaabigan da.​—Exodo 19:5-8; Deuteronomio 5:27-33; 11:22, 23.

14. Panon ya indanet na Dios ed Israel so kaimportantian na pangiyuna ed saray espiritual a gegemtan?

¹⁴ Iyuna iray espiritual a pamaakaran. Nepeg ya ag-aabuloyan na nasyon na Israel a saray pisikal a pankaukolan et pansengegan lay pakaandian da na panaon parad espiritual iran kimey. Nepeg ya ag-itatalaga na saray Israelita so bilay da ed minumundo iran gegemtan. Angigana si Jehova na panaon ed kada simba ya intalaga to bilang sagrado, say panaon a nepeg a para labat ed panagdayew ed tuan Dios. (Exodo 35:1-3; Numeros 15:32-36) Kada taon, walay kaaruman a panaon a nepeg ya ibiig parad nigeter iran sagradon pandaragup. (Levitico 23:4-44) Saratan so mangitarya na pankanawnawa pian tongtongen iray makapanyarin gawa nen Jehova, pian napanonotan ira ed saray dalan to, tan pian ibalikas so pisasalamat ed sikato parad amin a kaabigan to. Legan ya ipapatnag na totoo so debosyon da ed si Jehova, sikara so ombulaslas ed maridios a takot tan aro tan natulongan ira a mankurang ed saray dalan to. (Deuteronomio 10:12, 13) Saray makagunggonan prinsipyo na saraman a bilibilin so pakagunggonaan met na saray lingkor nen Jehova natan.​—Hebreos 10:24, 25.

Apresyaen Iray Kalidades nen Jehova

15. (a) Akin ya akagunggona ed si Moises so panangapresya ed saray kalidad nen Jehova? (b) Antoran tepet so nayarin ontulong ed sikatayon manumameng ed kada sakey ed saray kalidad nen Jehova?

¹⁵ Say panangapresya ed saray kalidad nen Jehova so tinmulong met ed si Moises diad pidedeneng to ed totoo. Indalatdat na Exodo 34:5-7 a dinmalan so Dios ed arap nen Moises tan inyabawag to: “Jehova, Jehova, Dios a mapangasi tan mapaaro, mapalna ya onsanok, tan daakan ed maaro ya abig na linawa, tan katuaan; a mangigagana na maaro ya abig na linawa ed saray nilibo, amerdona na inkauges, tan impakasumpa, tan kasalanan; tan anggan anton pamaakaran agto ibilang a malinis so nankasalanan, dalawen to so kaugsan na saray ama ed saray anak, tan saray anak ed saray anak, dia ed komatlo tan dia ed komapat a kailalakan.” Ipanaon pan dalepdepen iratan a salita, insan tepetan yoy inkasikayo: ‘Anto so kabaliksan na kada kalidad? Panon so impangipatnag nen Jehova ed satan a kalidad? Panon met itan a nipatnag na saray Kristianon manangasikaso? Panon a mangimpluensya so sakey a kalidad ed gagawaen na kada sakey ed sikatayo?’ Konsideraen pa so pigaran alimbawa.

16. Panon a nayarin onaralem so pakatalos tayo ed panangasi na Dios, tan akin ya importante so panggawa ed satan?

¹⁶ Si Jehova et “mapangasi tan mapaaro”  odino walaan na maong a linawa. No walay reperensya yon Insight on the Scriptures, akin ta no basaen so ibabaga na satan diad silong na paulon “Mercy” (panangasi)? Odino mansukimat nipaakar ed satan a tema diad pangusar ed Watch Tower Publications Index odino say programa na kompyuter a Watchtower Library (CD-ROM). * Usaren so konkordansia pian anapen iray tekston manutukoy ed salitan “mercy.” Naimano yo a nilikud ed sagpaminsan a pangiyaabuloy nen Jehova ya onlemew so pananusa, say panangasi to so mangilaktip ed matamoy a panangabagey. Lapud satan, onkikiwas so Dios pian mangitarok na inawa ed totoo to. Bilang ebidensya ed satan, intarya na Dios iray pisikal tan espiritual a pankaukolan na saray Israelita legan na pambabaroy da a paarap ed Insipan a Dalin. (Deuteronomio 1:30-33; 8:4) Si Jehova so mapangasin mamerdona sano walaray kalilingoan da. Impatnag to so panangasi ed saray totoo nensaman. Mas lalo a nepeg ya ipatnag na saray lingkor to natan so panangabagey ed balang sakey!​—Mateo 9:13; 18:21-35.

17. Panon a say pakatalos tayo ed maong a linawa ya ipapatnag nen Jehova so mangiyalibansa ed tuan panagdayew?

¹⁷ Say panangasi nen Jehova so atekepan na maong a linawa. Anto so amta yon kabaliksan na pakawalaan na maong a linawa? Ikompara itan ed saray teksto a manutukoy ed si Jehova bilang walaan na maong a linawa. Ipapabitar na Biblia a say maong a linawa ya ipapatnag nen Jehova so mangilaktip ed maaron panangiyansakit ed saray pakaskasi ed limog na totoo to. (Exodo 22:26, 27) Diad inerman a bansa, saray dayo ontan met ed arum so nayarin nidunget ed mairap iran kipapasen. Sanen imbangat to so totoo to a paliisan da so panaglabi tan ipatnag da so panangasi ed saratan a totoo, impanonot nen Jehova ed sikara a dayo met ira nensaman diad Ehipto. (Deuteronomio 24:17-22) Komusta itayo met natan bilang totoo na Dios? Say pangipatnag na maong a linawa so ontulong pian mankakasakey itayo tan nasagyat so arum a mandayew ed si Jehova.​—Gawa 10:34, 35; Apocalipsis 7:9, 10.

18. Anto so naaralan tayo ed saray panameget ya imbangat nen Jehova ed Israel nipaakar ed saray paraan na totoo a taga-arum a bansa?

¹⁸ Balet, say mapangasin panangiyansakit ed totoo a taga-arum a bansa so agnepeg ya onsalat ed panangaro na Israel ed si Jehova tan ed saray estandarte to ed moral. Kanian saray Israelita so nibangat ya agda aagamilen iray dalan na saray nasyon ya akapaliber ed sikara, ya agda gagawaen iray relihyoson kustombre tan imoral a kabibilay na saratan. (Exodo 34:11-16; Deuteronomio 7:1-4) Satan so onaplika met ed sikatayo natan. Sikatayo so nepeg a magmaliw a masanton totoo, no panon a say Dios tayon Jehova et masanto.​—1 Pedro 1:15, 16.

19. Panon a say pakatalos ed panmoria nen Jehova nipaakar ed gawan-mauges so manalimbeng ed totoo to?

¹⁹ Ta pian natalosan nen Moises iray daladalan  nen Jehova, impabitar To ya anggaman agto aabuloyan so kasalanan, sikato so matantan ya onsanok. Aabuloyan to so totoo a makaaral ni ed saray kakaukolanen to ed sikara ta pian unoren da iratan. Sano wala so panagbabawi, perdonaen nen Jehova so kasalanan, balet agto pokpokan so makanepegan a dusa ed saray ambelat a kasalanan. Pinasakbayan to si Moises a naapektoan so arapen iran kailalakan, diad maabig odino mauges a paraan, lapud ginawa na saray Israelita. Say panangapresya ed saray dalan nen Jehova so manalimbeng ed totoo to pian agda itetel ed sikato iray situasyon a sinagmak da a makasengeg ed sikaran dili odino pian agda isipen a sikato et matantan.

20. Anto so ontulong ed sikatayo pian matukoy a napidenengan iray kapananisiaan tan saramay nakatongtong tayo ed ministeryo? (Salmo 86:11)

²⁰ No pilalek yon onaralem so mismon pikakabat yo ed si Jehova tan ed saray dalan to, itultuloy yo so mansukimat tan mandalepdep sano babasaen yo so Biblia. Maalwar yon usisaen iray nanduruma tan makapasagyat ya aspekto na personalidad nen Jehova. Sipipikasi yon nodnonoten no panon yon aligen so Dios tan nagkalalon nitunos so bilay yo ed gagala to. Satan so ontulong ed sikayo pian napaliisan iray pakakulasbongan, pian matukoy a makapideneng ed saray kapananisiaan, tan pian natulongan so arum a makapikabat tan mangaro ed alay abig a Dios tayo.

[Paimano ed leksab]

Anto so Naaralan Yo?

• Akin ya importante ed si Moises so kauyamoan, tan akin a makanakana itan ed sikatayo?

• Anto so maabig a nansumpalan na aminpigan impangipasabi na salita nen Jehova ed si Faraon?

• Anto so pigaran matalonggaring a prinsipyo a nibangat ed si Moises ya onaplika met ed sikatayo?

• Panon tayon napaaralem so pakatalos tayo ed saray kalidad nen Jehova?

[Tepetepet Parad Panagaral]

[Litrato ed pahina 21]

Matoor ya impasabi nen Moises so salita nen Jehova ed si Faraon

[Litrato ed pahina 23]

Imparungtal nen Jehova ed si Moises iray kakaukolanen To

[Litrato ed pahina  24, 25]

Dalepdepen iray kalidad nen Jehova