Say Salita nen Jehova et Mabilay

Saray Pabitar ed Libro na Komaduan Samuel

KASIN say pamidbir ed inkasoberano nen Jehova et mankakaukolan na naspot a katutulok tayo? Lawas kasin makapanggaway maptek ed imaton na Dios so toon matoor? Anton klase na indibidual so ipapasen na tuan Dios a “makapaliket ed puso to”? (1 Samuel 13:14, NW) Say libro na Biblia a Komaduan Samuel so mangitatarya na makapenek ya ebat ed sarayan tepet.

Say Komaduan Samuel so insulat di Gad tan Natan, duaran propetan maapit ed si Arin David na kadaanan ya Israel. * Say libro so akompleto nen manga 1040 K.K.P. diad pansampo-sampot la na 40-taon ya impan-ari nen David, tan saya so manunan nipaakar ed si David tan ed relasyon to ed si Jehova. Sayan makapaligsan istorya so mangisasalaysay ed no panon a say nasyon a naapag-apag na gotgotan so nagmaliw a maaligwas a nankakasakey a panarian diad panangidaulo na makpel ya ari. Napnapno na pirmin emosyon na totoo iyan makapainteres a salaysay.

‘BINMALEG LAN BINMALEG’ SO INKATALONGGARING NEN DAVID

(2 Samuel 1:1–10:19)

Say reaksion nen David ed balitan inatey lay Saul tan Jonatan so mangipaparungtal ed liknaan to parad sikara tan ed si Jehova. Diad Hebron, si David so tinuron ari ed tribu na Juda. Say ilalak nen Saul a si Is-boset so impagmaliw ya ari ed amin lan keran tribu na Israel. Si David so ‘binmaleg lan binmaleg’ ed inkatalonggaring, tan manga pitora tan kapalduay taon ed saginonor et sikatoy nagmaliw ya ari ed interon Israel.​—2 Samuel 5:10.

Asamsam nen David so Jerusalem ed saray Jebuseo tan impagmaliw to itan a kabisera na panarian to. Say inmunan impanali to ya iyalis so kaban na sipanan ed Jerusalem et nansumpal ed desyang. Balet ta tinmalona so mikaduan impangiyalis, tan si David so malikeliket a nansayaw-sayaw. Si Jehova so akisipanan ed si David parad sakey a panarian. Tan tinaltalo nen David iray kalaban to lapud nantultuloy a wala so panangabobon ed sikato na Dios.

Makasulatan Iran Tepet a Naebatan:

2:18​—Akin a say impanawag ed si Joab tan ed duaran agagi ton lalaki et taloran anak a lalaki nen Sarvia, ya ina ra? Diad Hebreon Kasulatan, kaslakan lan nipapalista iray kapolian panamegley na ama. Nayarin asakbay ya inatey so asawa nen Sarvia, odino nayarin sikatoy impasen ya agmakanepegan ya ikurit ed Sagradon Sulsulat. Posible a si Sarvia so inlista lapud sikatoy agin peteg odino agi ed ina o ama nen David. (1 Awaran 2:15, 16) Say impanukoy lambengat ed ama na taloran sanaagi et nipaakar ed samay panagponponan to diad Betlehem.​—2 Samuel 2:32.

3:29​—Antoy kabaliksan na lakin “mankarangkarang”? Niyugali la a saray bibii so man-iinaramey.  Kanian, sayan balikas so nayarin manutukoy ed lalakin ag-onnepeg ed kimkimey a singa say pibabakal, diad ontan et naobligan manggawa ed kaslakan a kimey na bii.

5:1, 2​—Pigaran taon ni so apalabas kayari impamatey ed si Is-boset antis a si David so ginawan ari ed interon Israel? Ompatnag a makatunongan so pangibaga a ginapoan nen Is-boset so duay-taon ya impanuley to kayarin tuloy na impatey nen Saul, a ngalngalin diad panaon sanen ginmapo met a nanuley si David diad Hebron. Inuleyan nen David so Juda diad Hebron ed loob na pitora tan kapalduan taon. Ag-abayag sanen nagmaliw lan ari ed interon Israel, inyalis to so kabisera to ed Jerusalem. Kanian, manga limay taon ni so apalabas kayari na impatey nen Is-boset antis a nagmaliw ya ari si David ed interon Israel.​—2 Samuel 2:3, 4, 8-11; 5:4, 5.

8:2​—Pigaran Moabita so apapatey kayari na impilaban na Israel ed sikara? Nayarin adetermina so karakel diad panukat imbes a diad pamilang. Ompatnag a nan-aampar a pinarukol nen David ed dalin iray Moabita ya adarasig. Kayari na satan, pinasukat to so kada dasig panamegley na karukey na sakey a linya, odino lubir. Ompatnag a duaran sukat a linya, odino duaran kakatlo so apapatey a Moabita, tan sakey a sukat a linya, odino kakatlo ra so alegyas.

Saray Leksion Parad Sikatayo:

2:1; 5:19, 23. Pinmanon si David ed si Jehova antis a nanayam ed Hebron tan antis a dinmugpa ed saray kalaban to. Nepeg a kerewen tayo met so panangiwanwan nen Jehova antis a manggawa na saray desisyon a mangapekta ed espiritualidad tayo.

3:26-30. Makapaermen iray pansumpalan na ibales.​—Roma 12:17-19.

3:31-34; 4:9-12. Napanuliranan so ag-imbales tan ag-impamusol nen David.

5:12. Nepeg ya agtayon balot lilingwanan ya ibabangat itayo nen Jehova ed saray dalan to a lapud satan et posible a nawalaan itayo na maabig a relasyon ed sikato.

6:1-7. Anggaman maabig iray getma nen David, say impangiyalis to ed Kaban ya inlugan ed karwahe et sumlang ed ganggan na Dios tan nanresulta ed impakasaew. (Exodo 25:13, 14; Numeros 4:15, 19; 7:7-9) Ipapanengneng met na impamemben nen Uza ed Kaban a saray maabig a getma so agmakapanguman ed saray kakaukolanen na Dios.

6:8, 9. Diad makapasubok a situasyon, si David so diad gapo et apasnokan insan tinmakot​—ompan tinetel to ni ingen si Jehova lapud trahedya. Nepeg a manalwar itayo ya ag-itetetel ed si Jehova iray problema a resulta na impangibaliwala tayo ed saray ganggan to.

7:18, 22, 23, 26. Say inkamapaabeba nen David, nikabkabiig a debosyon to ed si Jehova, tan interes ton mangitandoro ed ngaran na Dios so kalidades a nepeg tayon aligen.

8:2. Asumpal so propesiya ya impasakbay manga 400 a taon ed apalabas. (Numeros 24:17) Lawas ontutua so salita nen Jehova.

9:1, 6, 7. Tinoor nen David so sipan to. Nepeg a panggunaetan tayo met a tooren iray sipan tayo.

PINAALAGEY NEN JEHOVA SO MAUGES SUMPA ED NILANAAN TO

(2 Samuel 11:1–20:26)

“Nia paalageyen ko so mauges sumpa ed sika a manlapu ed dili ya abung mo,” kuan nen Jehova ed si David, “et alaen ko so saray asawam ed arap na saray matam, tan sikara so iter ko ed kaabay mo, tan sikato so miakdol ed saray asawam dia ed pakanengneng na saray banwa.” (2 Samuel 12:11) Antoy sengegan na sayan panangukom? Say impankasalanan di David tan Bat-seba. Anggaman pinerdona so magbabawi a David, agto apaliisan iray nansumpalan na impankasalanan to.

Unona, say ugaw ya inyanak nen Bat-seba so inatey. Insan say marikit nen David a si Tamar so pinasoot ya inakdolan nen Amnon ya agi to’d ama. Say agin peteg nen Tamar a si Absalom so binmales diad impamatey to ed si Amnon. Si Absalom so akinonong sumpad dilin ama to tan improklama toy inkasikato ya ari diad Hebron. Diad ontan et apaskar si David ya ibatikan so Jerusalem. Si Absalom so akiakdol ed samploran bibiin iyaamong nen ama to ya atilak pian mangasikaso  ed palasyo. Akapawil labat a nanuley si David sanen inatey lay Absalom. Anampot so impanrebelde na Benjamitan si Seba diad impatey to.

Makasulatan Iran Tepet a Naebatan:

14:7​—Anto so isisimbolo na “ngalab ko”? Inusar so ngalab pian tukoyen so mabilay ya ilalak.

19:29​—Akin ya onman so inkiwas nen David ed impangipaliwawa nen Mefiboset? Sanen nadngel nen David so paliwawa nen Mefiboset, nayarin amoria toy impakalingo to sanen sinisia toy imbaga nen Siba. (2 Samuel 16:1-4; 19:24-28) Ompatnag ya akaalipanesan iya nen David, tan agto la labay so makarengel ni na nipaakar ed satan.

Saray Leksion Parad Sikatayo:

11:2-15. Say matuan impangisalaysay ed saray kalilingoan nen David so mamapaneknek a say Biblia et pinuyanan a Salita na Dios.

11:16-27. Sano makapankasalanan itayo na ambelat, nepeg ya agtayo itan iyaamot a singa ginawa nen David. Imbes, nepeg ya ipatua tayo so kasalanan tayo ed si Jehova tan onkerew na tulong ed saray mamatatken ed kongregasyon.​—Uliran 28:13; Santiago 5:13-16.

12:1-14. Angipanengneng na maabig ya ehemplo si Natan parad saray tinuron mamatatken ed kongregasyon. Nepeg dan tulongan iramay akapankasalanan a mangipetek ed kurang da. Nepeg a sidudunong a sumpalen na saray mamatatken iyan responsabilidad.

12:15-23. Akatulong ed si David so suston panmoria ed agawa ed sikato pian onkiwas a matukoy diad magonigon a situasyon.

15:12; 16:15, 21, 23. Sanen mapatnag lan nasamsam nen Absalom so trono, say inkamapaatagey tan ambisyon so anagdag ed marunong a mananimbawan si Ahitopel a mantraidor. Say pagmaliw a mautek balet ta andiay kapaabebaan tan katooran et nayarin magmaliw a kalot.

19:24, 30. Peteg a maapresya si Mefiboset ed maaron-panangasi nen David. Sikatoy maabobon ed desisyon na ari nipaakar ed si Siba. Nepeg a say panangapresya ed si Jehova tan ed organisasyon to so mamakiwas ed sikatayo a magmaliw a mapasakop.

20:21, 22. Say kakabatan na sakey a too so mangipaliis ed pakadesyang na dakel.​—Eclesiastes 9:14, 15.

NAPELAG ITAYO KOMON “ED LIMA NEN JEHOVA”

(2 Samuel 21:1–24:25)

Taloy taon a walay eras lapud impankasalanan ed dala nen Saul diad impamatey to ed saray Gabaonita. (Josue 9:15) Pian makabales ed satan ya impankasalanan ed dala, kinerew na saray Gabaonita ya ipapatey so pitoran ilalak nen Saul. Impalima ira nen David ed saray Gabaonita, diad ontan et angangga so kelang diad intedter na uran. Apatiran  Filisteo a higante so “nipasag . . . ed panamegley na lima nen David tan panamegley na lima na saray ariripen to.”​—2 Samuel 21:22.

Akapankasalanan na ambelat si David diad impangiganggan to a bilangen so totoo anggaman aliwan unong ed ganggan. Sikatoy nagbabawi tan pinili toy napelag “ed lima nen Jehova.” (2 Samuel 24:14) Say resulta et 70,000 so inaatey ed salot. Sanen tinulok nen David so ganggan nen Jehova, tinmunda so salot.

Makasulatan Iran Tepet a Naebatan:

21:8​—Panon a nibagan say anak a bii nen Saul a si Micol so awalaan na limaran anak a lalaki, anta ibabaga na 2 Samuel 6:23 a sikatoy ag-akaanak anggad impatey to? Say inkalapagan lan aawaten a paliwawa et saraya so anak a lalaki na agin bii nen Micol a si Merab, ya asawa nen Adriel. Ompatnag ya asakbay ya inatey si Merab, tan say andiay anak a si Micol so amabaleg ed ugugaw.

21:9, 10​—Kaunongan kabayag so impanbantay nen Rizpa ed duaran anak ton laki tan ed limaran apo nen Saul a pinatey na saray Gabaonita? Sarayan pito so imbitay dia “ed saray agew na panagani, dia ed saray unaan ya agew,” salanti, diad Marso odino Abril. Saray bangkay da so pinaulyanan ya akaparungtal ed palandey. Agew-labin binantayan nen Rizpa so pitoran bangkay anggad impatnag nen Jehova diad impamatunda ed kelang a kinmepa lay sanok to. Say maksil ya uran so agkasiporan antis na panampot na tiempoy panagani diad Oktubre. Kanian, si Rizpa so nantultuloy a nanlamay ed loob na limara odino anem bulan. Kayari na satan, impaiponpon nen David so pukepukel na saray lalaki.

24:1​—Akin ya ambelat a kasalanan nen David so impamilang ed totoo? Aliwan say impamilang so mismon isesebel na Ganggan. (Numeros 1:1-3; 26:1-4) Ag-ibabaga na Biblia no antoy gagala nen David ed impamilang to ed totoo. Balet, ipapabitar na 1 Awaran 21:1 a si Satanas so anangguyor ed sikaton manggawa ed satan. Antokaman so agawa, amta na hepe na militar to a si Joab a say desisyon nen David ya iparehistro iray totoo et lingo tan sinali ton binano si David.

Saray Leksion Parad Sikatayo:

22:2-51. Agaylay dakep na impangilitrato na kanta nen David ed si Jehova bilang tuan Dios, a makana ed sigpot a panagmatalek tayo!

23:15-17. Ontan lay panagrespeto nen David ed ganggan na Dios nipaakar ed bilay tan dala a diad sayan inkagawa et pinaliisan toy panggawa na bengatlan kaulibay na isusumlang ed satan a ganggan. Nepeg a bayuboan tayo so ontan ya awawey ed amin a ganggan na Dios.

24:10. Say konsiensia nen David so amakiwas ed sikato a magbabawi. Kasin sensitibo so konsiensia tayo pian ontan met so ikiwas tayo?

24:14. Kombinsido si David a mas mapangasi si Jehova nen saray totoo. Ontan met kasi so sisiaen tayo?

24:17. Nanermenan nen David a say kasalanan to so sengegan na impanirap na interon nasyon. Nepeg a panermenan na magbabawin nanggaway mauges so kabandayan a nayarin intarok na ginawa to ed kongregasyon.

Nadampot Tayo so Pagmaliw a ‘Makapaliket ed Puso na Dios’

Say mikaduan ari na Israel et ‘lakin makapaliket ed puso nen Jehova.’ (1 Samuel 13:14, NW) Agbalot sinuppiat nen David iray maptek ya estandarte nen Jehova, tan agto kinaliktan so onsian ed Dios. Kapagno nalingo si David, bibidbiren to so kasalanan to, aawaten to so disiplina, tan ipepetek to so daladalan to. Si David et lakin matoor. Agta makabat so pangalig tayo ed sikato, nagkalautla sano nalilingo itayo?

Say istorya na bilay nen David et malinlinew a mangiyiilustra a say pamidbir ed inkasoberano nen Jehova et mankabaliksan na pangawat ed saray estandarte To nipaakar ed maong tan mauges tan panggunaetan ya unoren iraya bilang manamemben na katooran. Saya so nadampot tayo. Agaylay pisasalamat tayo ed saray leksion a naaaralan tayo ed libro na Komaduan Samuel! Peteg a say pinuyanan a mensahen walad satan a libro so mabilay tan mabiskeg.​—Hebreos 4:12.

[Paimano ed leksab]

[Litrato ed pahina 16]

Say impannodnonot nen David ed no siopay mapekder ya angiletneg ed sikato bilang ari so amasiansia ed sikato a mapaabeba

[Saray litrato ed pahina 18]

“Nia, paalageyen ko so mauges sumpa ed sika a manlapu ed dili ya abung mo”

Bat-seba

Tamar

Amnon