‘Say Tulong Ko et Manlalapu ed si Jehova’

Saray Pamilyan Apabiskeg ed Pikakabat na Dios

SAY “Berlin Wall.” Ontan so impanukoy na sanasawan taga-Argentina ed impaalagey dan padir ya angapag ed sankaabungan da! Walaray agnaresolbin balingaan da tan agda la naanosan so sakey tan sakey.

Makapaermen ta say situasyon na satan a sanasawa et aliwan nikadkaduma. Dakel a pamilya so sasaloten na pankokolkol, ag-inkamatoor, tan pirmin pambubusolan. Makapadismaya iya lapud ta say pamilya et sakey ya institusyon ya inletneg na Dios a mismo. (Genesis 1:27, 28; 2:23, 24) Sayan regalo a nanlapud Dios so alay-abig ya uksoyan pian nipatnag so aralem a panangaro. (Rut 1:9) Sano sumpalen na saray membro na pamilya so inter-Dios iran obligasyon da, makapangigalang ira ed si Jehova tan magmaliw iran bendisyon ed sakey tan sakey. *

Lapud inletneg na Dios so uksoyan na pamilya, nepeg a paimpluensyaan tayo ed no panoy panmoria to ed suston kikurang na saray pamilya. Say Salita to so mangitatarya na dakel iran praktikal a simbawa diad italona na saray pamilya, nagkalautla sano onlesa iray angat. No nipaakar ed betang na kaasawaan a lalaki, onia so kuan na Biblia: ‘Saray asawan lalaki so nepeg a mangaro ed saray kaasawaan da a singa panangaro ra ed laman dan dili.’ Sano sumpalen na asawan laki iyan kakaukolanen, panliketan na asawan bii a “takotan [odino respetoen] so asawa to.”​—Efeso 5:25-29, 33.

No nipaakar met ed relasyon na atateng tan ananak, oniay insulat nen apostol Pablo: “Sikayo ya atateng [kaamaan], agyo ilagyat a pasanoken so saray anak yo: noag ingen bangatan yo’ra ed kadudusa tan panamilin na Katawan.” (Efeso 6:4) Bilang resulta et onligsa so atmospera ed pamilya, a mamainomay parad saray anak a tuloken iray ateng da.​—Efeso 6:1.

Saray asalambit a punto so alimbawa na maabig a bilin na Biblia nipaakar ed bilay na pamilya. Diad pangiyaaplika ed saray prinsipyo na Dios, panggagayagaan na dakel so liket ed loob na pamilya. Alaen tayon alimbawa imay sanasawan taga-Argentina ya asalambit ed gapo. Kasumpal na taloy bulan ya impanaral dan dua ed Biblia a kaiba iray Tasi nen Jehova, inggapo dan inyaplika so makabat a simbawa na satan nipaakar ed panamaley. Nankimeyan dan maong a paaligwasen so komunikasyon da, pagmaliw a masimpatya ed pankaukolan na balang sakey, tan say pagmaliw a manamerdona. (Uliran 15:22; 1 Pedro 3:7; 4:8) Naaralan dan kontrolen so sanok da tan onkerew na tulong ed Dios sano ompatnag ya agda la nayarian iray nagagawa. (Colosas 3:19) Ag-abayag et nagba so “Berlin Wall.”

Napabiskeg na Dios so Pamilya

Say pikakabat tan panangiyaplika ed saray estandarte na Dios so mamabiskeg ed pamilya pian natalonaan iray desdes. Importante iya lapud nipropesiya a diad panaon tayo et makaeksperiensya na mauges a panangataki so uksoyan na pamilya. Impasakbay la nen Pablo so kaplesan a kagegeba na moralidad tan sosyedad na too. Inkuan to a diad “saray kaunoran ya agew” et napatnagan so ag-inkamatoor, kakulangan na ‘aro a nianakan,’ tan say itutunganga ed atateng, anggan diad limog ni ingen na saray “wala so nengneng da ya inkasanto.”​—2 Timoteo 3:1-5.

 Say panggunaet a pamaliket ed Dios so makatulong pian nalabanan iratan a makaderal ya epekto diad pamilya. Nalmoan na dakel a pamilya a nakaukolan so solusyon a manlapud Dios pian natulongan iran mangarap ed dakel ya angat. Sano kaliktan na saray membro na pamilya a napansiansia so maong a relasyon da ed Dios, nakaukolan dan iyaplika iray prinsipyo na Biblia tan moriaen a “noag si Jehova so mangipaalagey na abung, saray manangipaalagey mansagpot ira ya andi-kakanaan.” (Salmo 127:1) Say itatalonan tuloy ed pamawalay liket ed loob na pamilya so manlalapud panangiyuna ed Dios diad bilay na pamilya.​—Efeso 3:14, 15.

Ontan so apaneknekan nen Dennis a taga-Hawaii. Anggaman sikatoy mankuan a Kristiano, kabiangan lay bilay to so maabuson panagsalita tan pisesepakan. Linmoor so inka-agresibo tan pambusol to sanen nansundalo. “Naynay ak a misesebeg,” so nanonotan to. “Agko la iisipen no anto so nagawa ed siak, tan agak antakot ya ompatey. Nantultuloy ak a maayew tan naynay a misesebeg. Say akulaw ko, a sakey ed saray Tasi nen Jehova, so amaseseg ed siak a manaral na Biblia.”

Impulisay nen Dennis iray gunaet nen akulaw to. Anggaman ontan, anguman so negatibon awawey nen Dennis lapud Kristianon kondukta na asawa to. Agnambayag et sikatoy akila ed asawa to tan saray anak to ed sakey a Kristianon pantitipon. Insan inggapo so panangiyaral na Biblia ed si Dennis tan maabig so inyaligwas to. Intunda to lay 28-taon a panagsigarilyo to tan agto met la mililimog ed saray kakaaro ton manggagawa ed saray bengatlan panggugunaetan ton talonaan. Lapud misalsalamat a tuloy ed si Jehova, onia so inkomento nen Dennis: “Inmaligwas so bilay na pamilyak. Miaaral kami tan manpupulong kamin sankapamilyaan. Agla antakot ed siak iray duaran ana’ko lapud ta amtak lan kontrolen so sanok ko tan agak la manguusar na maabuson panagsalita. Makapaniistoryaan kami la tan panggagayagaan mi so pantotongtong nipaakar ed Biblia. No aliwan lapud katuaan na Biblia, anggapo ak dia komon natan ta magmainomay ak ya onsanok.”

Makagamor na liket iray pamilya sano pankimeyan dan maong so panggawa ed linawa nen Jehova. Ipapanengneng na eksperiensya a magmaong so kipapasen na sakey a pamilyan walay membro a mangiyaaplika ed saray prinsipyo na Biblia nen say anggapon balot. Say pamaelet ed Kristianon sankaabungan so sakey ya impasyan kimey, a mankaukolan na dunong tan panaon. Balet makapanseguro iray membro na saratan a pamilya a tumangan nen Jehova iray sagpot dan mamaelet ed sankaabungan da. Nayarian dan iyaniweng iray salita na salmista: ‘Say tulong ko et manlalapu ed si Jehova.’​—Salmo 121:2.

[Paimano ed leksab]

[Blurb ed pahina 9]

Diad Dios “so pangalaan na ngaran na amin a sankaamongan ed tawen tan dia ed dalin.”​—EFESO 3:15

[Kahon ed pahina 8]

PAPABLIEN A MAONG NEN JEHOVA SO UKSOYAN NA PAMILYA

“Say Dios benendisyonan to ra, tan inkuan na Dios ed sikara, ‘Manbunga kayo, tan ondakel kayo, tan makmakan yo so dalin.’”​—Genesis 1:28.

“Mapalar so balang sakey ya ontakot ed Jehova . . . Say [bii] ya asawam singa sakey a managbunga a wakal na ubas ed kaloolooban na abung mo.”​—Salmo 128:1, 3.