Tepetepet Manlapud Saray Managbasa

Akin ya ag-apapatey si David tan Bat-seba kayari impankalugoran da, bangta say kapangiyanak ya ilalak da so inatey?

Espisipikon inkuan na Mosaikon Ganggan: “No say sakey a laki et nasabian a midukol ed sakey a bii a walaan na asawa, ompatey ira naani a dua, say laki tan say bii: ontan so panangekal mo na mauges ed Israel.” (Deuteronomio 22:22) No inabuloyan nen Jehova a Dios a saray totoon ukom so mamemben ed hudisyal a kaso na impankasalanan di David tan Bat-seba, unong ed Ganggan et apapatey la komon irayan duan nankalugoran. Lapud agnabasa na totoon ukom so kapusoan, sikaray mangukom base ed ginawa na saray nanggaway mauges unong a pepekderan na saray prueba. Say sakey a gawan pikakalugoran et patey so dusa to. Saray Israelitan ukom so ag-autorisado a mamerdona na ontan a kasalanan.

Diad biek a dapag, say tuan Dios so makabasa ed kapusoan tan mamerdona ed saray kasalanan no walay nanengneng ton basiyan pian gawaen itan. Lapud say nalalanor ed kaso et si David, ya akisipanan nen Jehova nipaakar ed Panarian, bilang eksepsion et denesidi nen Jehova a sikaton mismo lay mangasikaso ed sayan pamaakaran. (2 Samuel 7:12-16) Walay kanepegan na “Ukom na amin a dalin” a pilien itan.​—Genesis 18:25.

Antoy anengneng nen Jehova sanen inusisa toy puso nen David? Ibabaga na superskripsion na Salmo 51 ya ipaparungtal na sayan salmo so liknaan nen David “nen linma si propeta Natan ed sikato, nen kayari inyasingger to ed si Bat-seba.” Oniay inkuan na Salmo 51:1-4: “Kasian mo ak komon, O Dios, ya unong na maaro ya abig na linawam, unong na kinaraklan na malamoy a panangasim, bural mo so saray impakasumpak. Urasan mo ak a maong ed kasulitan ko, tan linisan mo ak ed kasalanan ko. Ta amtak so saray impakasumpak; tan say kasalanan ko wala a naynay ed arapan ko. Onsumpa ed sika, dia ed sika labat, so nankasalananan ko, tan ginawak so saya a mauges ed nanengneng mo.” Nayarin minoria nen Jehova iyan pirmin panagsibkel nen David bilang paneknek na masimoon a panagbabawi tan aseguro ton walay basiyan pian kasian irayan nanggaway mauges. Sakey ni, si David a mismo et mapangasin too, tan kakasian nen Jehova iray mapangasi. (1 Samuel 24:4-7; Mateo 5:7; Santiago 2:13) Kanian, sanen inaksobi nen David so kasalanan to, inkuan nen Natan ed sikato: “Si Jehova met inekal to so kasalanan mo; agka ompatey.”​—2 Samuel 12:13.

Balet, agnaliktaran di David tan Bat-seba so amin a pansumpalan na impankasalanan da. “Lapu ed sayan gawa angiter ka na baleg ya anamot ed saray kabusol nen Jehova pian manayew ira,” kuan nen Natan ed si David, “say anak met a nianak ed sika petepeteg ya ompatey.” Naninagem so anak da tan inatey anggaman nanayunal tan nantagleey si David a pitoy agew.​—2 Samuel 12:14-18.

Agnatalosan na arum no akin a kaukolan ya ompatey so ugaw, anta ibabaga na Deuteronomio 24:16 a: “Saray anak ag-ira napapatey naani nisengeg ed saray ama.” Nakaukolan tayo balet a tandaan a no say amemben ed kaso et totoon ukom, saray atateng pati say lukon ya ugaw so parehon apapatey komon. Say impatey na ugaw so nayarin akatulong met ed si David a nagkalalon namoria so agaylan pambusol nen Jehova ed impankasalanan da nen Bat-seba. Makapanmatalek itayo a makatunongan so impamemben nen Jehova ed satan a pamaakaran, lapud “say dalan to sikato so ayadyari.”​—2 Samuel 22:31.

[Litrato ed pahina 31]

Impatnag nen David so tuan panagbabawi