Ag-onkekesaw ed Panggawa na Maabig

“MASIMPIT komon so tongtongan [“kondukta,” NW] yo ed utel na saray bugkalot,” so insimbawa nen apostol Pedro. (1 Pedro 2:12) Say Griegon salita a nipatalos a “masimpit” odino maabig so manutukoy ed bengatlan “marakep, desente, mapagalang, ekselente.” Diad sayan panaon, singa mairap a nailaloan so desente odino mapagalang a kondukta na karaklan a totoo. Balet, diad inkalapagan et saray totoo nen Jehova natan so matalonan manutumbok ed simbawa nen Pedro. Diad tua et balitado ira ed interon mundo lapud maabig a kondukta ra.

Nagkalautlan sankaimano iya sano isipen tayo iray problema tan kapagaan ya aarapen tayo legan na sarayan “panaon a maatap.” (2 Timoteo 3:1) Saray subok so kabiangan na inagew-agew a bilay tayo tan kaslakan la so isusumpa ed Makristianon kabibilay. Niarum ni, anggaman walaray subok a maganggano labat, say arum balet et tuloytuloy, a lalon oniirap ni ingen. Anggaman kuan, oniay imbilin nen apostol Pablo: ‘Ag-itayo komon nakesawan a manggawa na maabig: pian dia ed panaon to manani itayo, no ag-itayo pinmakil.’ (Galacia 6:9) Panon balet a posible so panggawa tan pantultuloy a panggawa na maabig legan a nidudunget ed saray makapaermen a subok tan agmanunda a panagbusol?

Saray Tulong ed Panggawa na Maabig

Say pagmaliw a “desente, mapagalang, ekselente” so malinew a manasaglawi ed akindalem a too, sakey a kalidad na puso. Kanian, say pamasiansia ed maabig a kondukta legan a nidudunget ed saray subok tan irap so aliwan bigbiglan reaksion, noagta satan so resulta na inagew-agew a panutumbok tan pangaagamil ed saray prinsipyo na Biblia ed amin ya aspekto na bilay. Anto so pigaran bengatla a makatulong ed sayan pamaakaran? Konsideraen pa so onggendan.

Bayuboan so awawey na kanonotan nen Kristo. Nakaukolan so inkamapaabeba pian nasungdoan so antokaman ya ompatnag ya agmakatunongan. Say toon mapaatagey so nairapan a mangitepel ed agmarakep a panagtrato. Balet, si Jesus so “nampaabeba a nagmaliw a matulok ya anggad say ipapatey.” (Filipos 2:5, 8) No sikatoy aligen tayo, ag-itayo ‘nakesawan odino onkapuy’ ed sagradon panaglingkor tayo. (Hebreos 12:2, 3) Agamilen so mapaabeban katutulok diad mabulos a pikoopera ed saramay mangidadaulo ed kongregasyon yo. (Hebreos 13:17) Aralen a moriaen so arum bilang “magmaong” nen say sikayo, ya iyuna so pankaabigan da nen say inkasikayo.​—Filipos 2:3, 4.

Tandaan ya inaro kayo nen Jehova. Nepeg a kombinsido itayo a si Jehova et “wala, tan sikato so niiyan a mananumang ed saray mananap ed sikato.” (Hebreos 11:6) Petepeteg ya iyaansakit to itayo tan labay ton nagamoran tayo so bilay ya andi-anggaan. (1 Timoteo 2:4; 1 Pedro 5:7) No tandaan tayo ya anggapo so makapangisian ed aro na Dios ed sikatayo, ag-itayo onsuko sano nasusubok.​—Roma 8:38, 39.

Sigpot a manmatalek ed si Jehova. Makanakana so panagmatalek ed si Jehova nagkalautla no ompatnag a saray subok et agmanunda odino makapasesgay bilay. Nepeg a walay nagnap a panagmatalek tayo ya ag-abuloyan nen Jehova so antokaman a subok ya ‘onlabas ed nayarian tayo,’ tan sikatoy lawas ‘manggawa na dalan a makapaliis.’  (1 Corinto 10:13) Anggano nipaarap itayo ni ingen ed ipapatey, makapanpakpel tayo nin siansia sano manmatalek tayo ed si Jehova.​—2 Corinto 1:8, 9.

Manpeleng diad panagpikasi. Importante so impapuson pikakasi. (Roma 12:12) Say masimoon a panagpikasi so sakey ed saray paraan pian onapit itayo ed si Jehova. (Santiago 4:8) Diad eksperiensya tayon mismo, naaralan tayo a “no mankerew itayo na bengatla . . . , sikato dengelen to itayo.” (1 Juan 5:14) Sano aabuloyan nen Jehova a mantultuloy so problema pian nasubok so katooran tayo, manpikasi itayo parad tulong to pian makapansungdo. (Lucas 22:41-43) Say pikakasi so mangibangat ed sikatayo ya agtayon balot bukbukor, a lawas itayon ontalona lapud walad dapag tayo si Jehova.​—Roma 8:31, 37.

Saray Maabig a Gawa so ‘Kirayewan tan Kigalangan’

Panapanaon et amin a Kristiano so ‘nagogonigon na nambabangil a katuksoan.’ Ingen, nepeg ya ag-itayo “nakesawan a manggawa na maabig.” Sano nadedetdetan, onggamor kayo na biskeg manlapud pikabat a say inkamatoor yo so petepeteg a ‘kirayewan, mamagayaga tan kigalangan.’ (1 Pedro 1:6, 7) Sigpot ya anamoten so amin ya espiritual a probisyon nen Jehova pian mamabiskeg ed sikayo. Sano nakaukolan yo so personal a tulong, asinggeran yo iramay manlilingkor bilang pastol, managbangat, tan mananimbawa ed Kristianon kongregasyon. (Gawa 20:28) Regular ya onatendi ed amin a pantitipon ed kongregasyon pian ‘makapanaayatan itayo ed aro tan dia ed saray maabig a gawa.’ (Hebreos 10:24) Say programa na inagew-agew a panagbasa ed Biblia tan personal a panagaral, ontan met ed regular a pibibiang ed Makristianon ministeryo so mamasiansia ed sikayon alerto tan mabiskeg ed espiritual.​—Salmo 1:1-3; Mateo 24:14.

No lalo yon naeeksperiensya so panangaro tan panangiyansakit nen Jehova, lalon ombibiskeg so pilalek yon magmaliw a “mapaga [“maseseg,” NW] ed saray maabig a gawa.” (Tito 2:14) Tandaan, “say misungdo ya angga ed kasampotan, sikato lanlamang so nilaban.” (Mateo 24:13) On, magmaliw a determinadon ‘ag-onkesaw ed panggawa na maabig’!

[Blurb ed pahina 29]

Nepeg a walay nagnap a panagmatalek tayo ya ag-abuloyan nen Jehova so antokaman a tukso ya ‘onlabas ed nayarian tayo,’ tan sikatoy lawas ‘manggawa na dalan a makapaliis’

[Saray litrato ed pahina 30]

Say pagmaliw ya okupado ed teokratiko iran aktibidad so ontulong pian makapanparaan itayon mangarap ed saray subok