Kasin Mitotongtong Kayo ed Saray Inad-aro Yo?

“ONKAKAPUY lan maong so abilidad tayon mitalosan ed saray inad-aro tayo,” so inreport na sinimba a Polakon Polityka. Diad Estados Unidos, akalkula ya anemiran minuto labat ed loob na sanagew so uusaren na saray sanasawa parad makabaliksan a pantotongtong. Momoriaen na pigaran eksperto a kapaldua ed amin a pansisian tan diborsio et resulta na sayan impamaulyan.

Komusta so pantotongtong na atateng tan ananak? Diad maslak a kipapasen, “say nagagawa et aliwan pantotongtong, noagta sesyon na panagtepet: Komustay eskuela? Saray kakaarom ey?” so inkuan na report ya asaglawi ed tagey. “Panon a naaralan na ananak tayo a bayuboan so emosyonal iran pisisiglaotan?” so intepet na satan.

Lapud ag-automatiko so pakawalaan na saray dunong ed maabig a komunikasyon, panon tayon napaaligwas so abilidad tayo a mitongtong? Inikdan itayo na Kristianon babangatan a Santiago na importantin simbawa: “Amin a too masiglat komon ya ondengel, mapalna ed pansalita, mairap a manpasnok.” (Santiago 1:19) On, pian makapaseseg so pantotongtong tayo, kaukolan ya ontalineng itayon maong tan ag-onsasalet ya agmakankaanos odino manhusga lan tampol. Paliisan so pamalaw lapud main-inomay itan a mamuger ed pantotongtong. Niarum ni, si Jesus so angusar na mataktika iran tepet, aliwan pian mangalay impormasyon, noagta pian paibesngaw so walad puso na dumerengel to tan pian napaelet so aroan da.​—Uliran 20:5; Mateo 16:13-17; 17:24-27.

Say pangiyaplika yo ed saray maabig a prinsipyon naromog ed Biblia so ontulong ed sikayo pian manbulon lan mitongtong tan mitalosan ed saramay pinabli yo. Satan so manresulta ed maapit a relasyon a pabpablien ed dakel a taotaon​—a sanlegay bilay ni ingen.