Nilaban, Aliwan Lapud Saray Gawa Lambengat, Noagta Lapud Agkanepegan a Panangasi
Nilaban, Aliwan Lapud Saray Gawa Lambengat, Noagta Lapud Agkanepegan a Panangasi
‘Nilaban kayo diad panamegley na pananisia, aliwan lapud saray gawa, pian agnigloria so anggan siopaman.’—EFESO 2:8, 9.
1. Panon a midumaan iray Kristiano manlapud saray totoo ed inkalapagan no nipaakar ed saray personal ya agawaan, tan akin?
IKIKINON na totoo natan so personal iran agawaan da, tan mabetbet et mainomay dan ilastog iratan. Duma iray Kristiano. Agda ipapangta so dilin agawaan da, anggan saramay misiglaotan ed tuan panagdayew. Anggaman panliliketan da so nagagawaan na totoo nen Jehova bilang grupo, agda ipapangta so nagagawaan da bilang indibidual. Momoriaen da a diad serbisyo ed si Jehova et mas importante so dugan motibo nen say personal iran agawaan. Siopaman a naikdan na langkap ya andi-anggaan a bilay so makagamor ed satan, aliwan lapud personal ya agawaan to, noagta diad panamegley na pananisia tan lapud agkanepegan a panangasi na Dios.—Lucas 17:10; Juan 3:16.
2, 3. Anto so ikikinon nen Pablo, tan akin?
2 Satan a katuaan so kabisado nen apostol Pablo. Kayari na amitlon impanpikasi to a naekal la komon so “sabit ed laman” to, oniay naawat ton ebat nen Jehova: “Say grasyak [“agkanepegan a panangasik,” NW] so masarag ed sika; ta say pakayarik agawan ayadyari ed kakapuyan.” Oniay inkuan nen Pablo diad mapaabeban impangawat to ed imbaga nen Jehova: “Sankabalgan so liket a lablabay ko so manpasirayew ed saray kakapuyan ko, pian say pakayari nen Kristo manayam ed siak.” Nepeg tayon aligen so mapaabeban awawey nen Pablo.—2 Corinto 12:7-9.
3 Anggaman matalonggaring si Pablo diad impanumpal to ed Makristiano iran kimey, binidbir to a saray agawaan to et aliwan makasengeg ed antokaman iran abilidad to. Oniay inkuan to tekep na kauyamoan: “Dia ed siak, a kamelagan ak nen say kamelmelagan ed saray amin a sasantos, niiter so saya a grasya, pian ipulong ko ed saray Gentiles so saray agnatukor a kayamanan nen Kristo.” (Efeso 3:8) Diad sarayan salita et anggapo so napatnagan ya inkalastog odino pantunongtunongan. “Say Dios sumpaen to so atagey a linawa, bangbalet mangiter na grasya ed mauyamo.” (Santiago 4:6; 1 Pedro 5:5) Kasin aaligen tayo so alimbawa nen Pablo, a mapaabeba tayon ipapasen so inkasikatayo a mas abeba nen saray agagi tayo?
‘Ibilang so Arum a Magmaong’
4. Akin a no maminsan et mairap ya ipasen so arum bilang magmaong odino atagtagey nen say sikatayo?
4 Oniay insimbawa nen apostol Pablo ed saray Kristiano: “Anggapon balot komon so gawaen yo a lapud kasusumpa o pampasirayew, noag dia ed kaabebaan na kalakal balang sinansakey ibilang to so arum a magmaong nen say sikaton dili.” (Filipos 2:3) Saya so nayarin mairap, nagkalalo la no walaan itayo na responsablin posisyon. Nayarin onlesa iray problema lapud walay laknab a naimpluensyaan itayo na espiritu na kompetisyon, a kasmak a tuloy ed mundo natan. Nayarin nibangat itayo lan mikompetensia sanen ugugaw tayo ni, balanglan diad saray agagi tayo ed laman odino saray kaklase tayo. Nayarin naynay a nipapaseseg ed sikatayo a dampoten so kagalangan ed pagmaliw a bantog ya atleta na eskuelaan odino sankamaongan ya estudyante. Siempre, nakomendaan so sankaabigan a gagawaen tayo ed antokaman a matukoy a kimey. Anggaman ontan, gagawaen itan na saray Kristiano, aliwan pian ipasirayew day inkasikara, noagta pian sigpot iran nagunggonaan ed kimey tan pati saray arum. Balet, mapeligro so lawas panggunaet a narayrayew bilang numero uno. Panon ya ontan?
5. No napaulyanan, anto so pansumpalan na makompetensian awawey?
5 No napaulyanan, say makompetensia odino mapaatagey ya awawey so pansengegan na pagmaliw ya agmarespeto tan malastog na sakey a too. Nayarin panimonan to iray abilidad tan pribilehyo na arum. Oniay ibabaga na Uliran 28:22: “Say walaan na mata a mauges mangganat ya ontumbok ed saray kayamanan, tan agto amta a say pankaukolan onsabi ed sikato.” Nayarin sikato so mapalakbat ni ingen a mandampot ed saray posisyon ya aliwan parad sikato. Pian nikatunongan iray kiwas to, sikato so nayarin onggapon manmeremere tan magmaliw lan makritiko ed arum—saray tendensian nepeg a paliisan na saray Kristiano. (Santiago 3:14-16) Diad ontan et mapeligron nababayuboan to la so awawey a “siak-ni.”
6. Panon ya amasakbay so Biblia sumpad makompetensian awawey?
6 Onia sirin so impaseseg na Biblia ed saray Kristiano: “Ag-itayo komon mapaagum ed maapan dayew, a pasanoken so sakey tan sakey, a mansisibletan so sakey tan sakey.” (Galacia 5:26) Sinaglawi nen apostol Juan so sakey a kaparan Kristiano a mapatnag ya abiktima ed ontan a klase na awawey. “Siak sinulat ko na daiset so iglesia,” so inkuan nen Juan, “balet si Diotrefes, ya aroen to a wala ed sikatoy katagtageyan ed sikara ed kalimog da, agto kami akoen. Kanian no onsabi ak, ipanonot ko so kagagawa to, a gagawaen to, a pitalabutob to itayo na maramsak iran salita.” Agaylan makapaermen a kipapasen a pakapelagan na sakey a Kristiano!—3 Juan 9, 10.
7. Anto so paliisan na sakey a Kristiano diad makompetensian anapan natan?
7 Siempre, aliwan realistiko so panisip a sigpot a napaliisan na sakey a Kristiano so amin a gegemtan a walay kompetensiaan. Alimbawa, say sekular a trabaho to so nayarin mangilanor ed pilaslasan ed arum ya indibidual nipaakar ed kabaleg na anap odino ed saray negosyo a walaan na mipadpara iran produkto odino iyoopresin serbisyo. Balet, anggaman ed ontan iran kipapasen, say sakey a Kristiano so malabay a mangipakurang ed negosyo to diad marespeto, maaro, tan makonsidera ya awawey. Ipulisay to so ilegal odino agmakristianon ag-agamil tan paliisan to so nakabkabat bilang makompetensia tan walaay sinisiblet ya awawey. Agto isipen a say pagmaliw a numero uno—ed antokaman a gegemtan—so sankaimportantian a bengatla ed bilay. No tua itan ed sekular iran gegemtan, nagkalalon tua met itan ed pasen na panagdayew!
“Agto la Nepeg ya Ipara ed Ginaway Arum”
8, 9. (a) Akin a saray Kristianon mamatatken et andian na rason pian mankompetensiaan? (b) Akin ya onaplika so 1 Pedro 4:10 ed amin a lingkor na Dios?
8 Say awawey a nepeg ya ipatnag na saray Kristiano ed panagdayew da so nidatak ed sarayan apuyanan a salita: “Balang sakey patnagen to komon so gawa ton dili, et dia ed ontan wala naani sirin so like’to nipaakar ed sikato, [“tan agto la nepeg ya ipara ed ginaway arum,” Maung a Balita].” (Galacia 6:4) Saray mamatatken ed kongregasyon, a mamibidbir ya ag-ira nepeg a mankokompetensiaan, so mankokoopera tan maapit a mantutulongan bilang sakey ya ulop. Panliketan da so nitulong na balang sakey parad interamentin pankaabigan na kongregasyon. Kanian papaliisan da sirin so makaderal a kompetisyon tan ipapatnag da so maabig ya alimbawa diad pikakasakey ed arum a kabiangan na kongregasyon.
9 Lapud edad, eksperiensya, odino sipor iran abilidad, arum a mamatatken so nayarin magmaong nen say arum, odino walaan ira na mas aralem a pakatalos. Bilang resulta, saray mamatatken so walaan na nanduruman responsabilidad diad organisasyon nen Jehova. Imbes a sikaray mankokomparaan, nonodnonoten da so simbawan: “Sakey tan sakey unong na agamoran to a pamalangkap ipagamor to met ed saray arum ta ontan so maong a panangimatalkan na daakan a grasya na Dios.” (1 Pedro 4:10) Diad tua, sayan teksto so onaplika ed amin a lingkor nen Jehova, lapud diad pigaran laknab et amin so akaawat na langkap a suston pikakabat tan panggagayagaan na amin so pribilehyon mibiang ed Makristianon ministeryo.
10. Diad anton paraan ya abobonan labat nen Jehova so sagradon serbisyo tayo?
10 Say sagradon serbisyo tayo so makapaliket ed si Jehova no isaklang tayo itan lapu ed aro tan debosyon, ya aliwan nisesengeg ed pangiyatagey tayo ed inkasikatayo. Importante sirin so pakawalaan na asimbang a panmoria ed kimey tayo bilang panuporta ed tuan panagdayew. Anggaman anggapo so suston makapanhusga ed saray motibo na arum, si Jehova so ‘manisimbang ed saray puso.’ (Uliran 24:12; 1 Samuel 16:7) Kanian, nepeg a sagpaminsan tayon usisaen so inkasikatayo, ‘Anto so motibok ed panggagawak na kimkimey a nipaakar ed pananisia?’—Salmo 24:3, 4; Mateo 5:8.
Manepeg a Panmoria ed Kimey Tayo
11. Antoran tepet nipaakar ed kimey tayo ed ministeryo so makatunongan ya ikonsidera?
11 No importantin tuloy so motibo pian nagamoran so panangabobon nen Jehova, anto sirin so nepeg tayon unaen nipaakar ed saray kimey tayo ed pananisia? Daput no susumpalen tayo so ministeryo tayo tekep na dugan motibo, nakaukolan ni kasi so pangirekord ed gagawaen tayo odino no kaunongan karakel itan? Makatunongan iratan a tepet, lapud agtayo labay a magmaliw a mas importante iray numero nen saray gawa na pananisia odino say manunan interes tayo ed Makristianon kimey tayo et say dakel a nireport.
12, 13. (a) Anto so pigaran rason no akin ya irerekord tayo so serbisyo tayo ed lawak na kimeyan? (b) Antoray rason na panliket tayo sano iisipen tayo so interon report na panagpulong a kimey tayo?
12 Imanoen tayo so inkuan na libron Organisadon Manggawa na Linawa nen Jehova: “Interesado iray inmuunan papatumbok nen Jesu-Kristo ed saray report na inyaligwas ed panagpulong a kimey. (Mar. 6:30) Ibabaga ed sikatayo na libro na Biblia a Gawa a walay manga 120 a presente sanen nikalbo so masanton espiritu ed saray babangatan nen Pentecostes. Tampol a say bilang na saray babangatan so dinmaak anggad 3,000 insan anggad 5,000. . . . (Gawa 1:15; 2:5-11, 41, 47; 4:4; 6:7) Agaylan makapaseseg a tuloy ed saray babangatan iray report nipaakar ed sarayan indaak!” Lapud satan met a rason, panggugunaetan na saray Tasi nen Jehova natan so mangisimpen na malinew iran rekord na agawaan da ed sankamundoan bilang kasumpalan na saray salita nen Jesus: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.” (Mateo 24:14) Itatarya na saratan a report so realistikon nagagawaan ed sankamundoan. Ipapabitar na saratan no iner so mankaukolan na tulong tan dinan a literatura tan no pigara ed satan so nakaukolan pian niyabanti so panagpulong a kimey.
13 Sirin, say pangireport tayo ed agawaan tayo ed panagpulong a kimey so ontulong pian nagawaan tayon mas epektibo so ganggan ya ipulong so maong a balita na Panarian. Niarum ni, agta makapaseseg sano narengel tayo so nipaakar ed kimey a gagawaen na saray agagi tayo diad arum a parte na mundo? Saray balita nipaakar ed ibubulaslas tan ilalaknab ed sankamundoan so mamaliket a tuloy ed sikatayo, mamakiwas ed sikatayo pian palaknaben so kimey tayo, tan mangipaseguro ed sikatayo ed panamendisyon nen Jehova. Tan agaylan makapaliket a naamtaan a say personal a report tayo so nilaktip ed satan a sankamundoan a report! Say report tayo et melag no ikompara tayo ed dagup a bilang, balet ta naiimano itan nen Jehova. (Marcos 12:42, 43) Tandaan, agnakompleto so interon report no anggapo so report mo.
14. Nilikud ed panagpulong tan panagbangat, anto ni so nilaktip ed panagdayew tayo ed si Jehova?
14 Siempre, karaklan ed gagawaen na kada Tasi diad panusumpal ed responsabilidad to bilang dedikadon lingkor nen Jehova so ag-ompatnag ed report to. Singa bilang, agnilaktip ed report so maparanay a panagaral ed Biblia, iyaatendi tan pibibiang ed saray Makristianon pantitipon, saray obligasyon ed kongregasyon, itutulong ed saray kapananisiaan no nakaukolan, pinansyal a suporta parad sankamundoan a kimey na Panarian, tan arum nira. Sirin, anggaman importante so report tayo ed lawak na serbisyo, a mamasiansia ed seseg tayo ed panagpulong a kimey pian ag-itayo ontayer, nepeg tayon pansiansiaen so dugan panmoria. Ag-itan nepeg a moriaen bilang espiritual a lisensia odino pasaporte, pian onkualipika itayon makagamor na andi-anggaan a bilay.
Maseseg Odino “Mapaga ed Saray Maabig a Gawa”
15. Anggaman ag-itayo nilaban na saray gawa lambengat, akin a nakaukolan iratan?
15 Malinew, anggaman ag-itayo nilaban na saray gawa lambengat, saratan et nakaukolan. Satan so rason no akin a saray Kristiano et atawag a “sakey a baley a nipaakar a kien ton dili, mapaga ed saray maabig a gawa” tan no akin a papasesegen ira a ‘manpapagalangan ed sakey tan sakey pian manaayatan ed aro tan dia ed saray maabig a gawa.’ (Tito 2:14; Hebreos 10:24) Pian nidanet et oniay simplin inkuan nen Santiago, a sakey nin managsulat na Biblia: “Unong a say laman ya asian [ed] espiritu et inatey, ontan met say pananisia ya andi gawa inatey.”—Santiago 2:26.
16. Anto so mas importante ni nen saray gawa, balet anto so nepeg a panalwaran tayo?
16 Anggaman importante iray maong a gawa, mas importante ni iray motibo ed panggawa ed saratan. Makabat sirin so panapanaon a pangusisa ed saray motibo tayo. Balet, lapud anggapo so too a suston makaamta ed motibo na arum, manalwar itayo ompano huhusgaan tayo la so arum. “Siopa ka a mangukom ed aripen na sananey?” so nitepet ed sikatayo, a walaan na mapatnag ya ebat: “Dia ed katawan ton dili manalalagey, o napelag.” (Roma 14:4) Si Jehova, say Katawan na amin, tan say tinuro ton Ukom, a si Kristo Jesus, so mangukom ed sikatayo, aliwan base ed saray gawa tayo lambengat noagta base met ed saray motibo, pankanawnawa, panangaro, tan debosyon tayo. Si Jehova tan si Kristo Jesus labat so suston makapangukom no kasin agawaan tayo so niganggan a gawaen na saray Kristiano, diad sarayan salita nen apostol Pablo: “Seetan mo a sikukuli so ompatnag a naabobonan ed arap na Dios, a singa tometeger ya anggapo so ibaing to, ya agamilen mo ed matunong so salita a tua.”—2 Timoteo 2:15; 2 Pedro 1:10; 3:14.
17. Anggaman panggugunaetan tayon gawaen so anggaay nayarian tayo, akin a nepeg tayon nodnonoten so Santiago 3:17?
17 Si Jehova so makatunongan ed iilaloan to ed sikatayo. Unong ed Santiago 3:17, say sakey ed saray kabiangan na ‘kakabatan a manlapu ed tagey’ et “masimpit” odino makatunongan. Agta sakey a makabat a kurang tan petepeteg ya agawaan, so pangalig tayo ed si Jehova diad sayan pamaakaran? Sirin, nepeg ya ag-itayo mangileletneg na agmakatunongan tan agnakapet iran iilaloan parad sikatayon dili tan parad agagi tayo.
18. Anto so nailaloan tayo sano walaan itayo na asimbang a panmoria ed saray kimey tayo tan ed agkanepegan a panangasi nen Jehova?
18 Daput no mansiansia itayon asimbang ed panmoria tayo ed saray kimey tayo nipaakar ed pananisia tan ed agkanepegan a panangasi nen Jehova, napansiansia tayo so gayaga tayo bilang pakabidbiran ed saray tuan lingkor nen Jehova. (Isaias 65:13, 14) Makapanliket itayo ed saray bendisyon ya ipapalabo nen Jehova ed totoo to bilang organisasyon, antokaman so karakel na nagawaan tayo bilang indibidual. Diad pantultuloy ed “pikakasi tan pikekerew a tekep na pisasalamat,” kerewen tayo so tulong na Dios pian nagawaan tayo so anggaay nayarian tayo. Insan, segurado a “say deen na Dios, a talonaan ton amin a pakatalos, bantayan to so kapusoan [tayo] tan saray nonot [tayo] ed Kristo Jesus.” (Filipos 4:4-7) On, naligliwa tan napaseseg itayo diad pakaamtan nilaban itayo, aliwan lapud saray gawa lambengat, noagta lapud agkanepegan a panangasi nen Jehova!
Kasin Nipaliwawa Yo No Akin a Saray Kristiano et
• agmangilalastog ed saray personal ya agawaan da?
• agmangipapatnag na makompetensian awawey?
• mangirereport ed Makristianon kimey da ed lawak na ministeryo?
• agmanhuhusga ed saray kapara ran Kristiano?
[Tepetepet Parad Panagaral]
[Litrato ed pahina 15]
‘Say agkanepegan a panangasik so masarag la ed sika’
[Saray litrato ed pahina 16, 17]
Panliketan na saray mamatatken so nitutulong na kada sakey parad pankaabigan na kongregasyon
[Saray litrato ed pahina 18, 19]
Agnakompleto so interon report no anggapo so report mo