Tepetepet Manlapud Saray Managbasa
Tepetepet Manlapud Saray Managbasa
Kadngel na saray babangatan a walad puerta so imprison si Pedro, akin ya inkuan dan: “Say anghel to ’tan”?—Gawa 12:15.
Nayarin lingon inisip na saray babangatan a say mensaheron anghel a mangirerepresenta ed si Pedro so akaalagey ed puerta. Imanoen pa so konteksto na sayan teksto.
Si Pedro so impaerel nen Herodes, a nampapatey ed si Santiago. Kanian makatunongan labat a panisiaan na saray babangatan ya ontan met so pansumpalan nen Pedro. Sanen inkulong si Pedro, sikatoy binalor na gulong-gulong tan ginuardiaan na nansusublayan ya apatiran grupoy sundalo a saneepat. Insan, sakey a labi et sikatoy mamilagron imbulos tan impaway na anghel ed prisoan. Sanen amoria nen Pedro ed kaunoran no anto so nagagawa, inkuan to: “Natan natalosan kon tua a say Katawan imbaki to so anghel to tan inlaban to ak ed lima nen Herodes.”—Gawa 12:1-11.
Tampol a linma si Pedro ed abung nen Maria ya ina nen Juan Marcos, a nandaragupan na pigaran babangatan. Sanen sikatoy tinmoktok ed puerta na wangalan, say inmabet et say aripen a bii a manngaray Rhoda. Sanen abosesan toy Pedro, alingwanan ton lukasay puerta ta sikatoy batik a tampol pian ipaamta ed arum! Diad primero et agnapanisiaan na saray babangatan a samay walad wangalan et si Pedro. Imbes et lingon inisip da: “Say anghel to ’tan.”—Gawa 12:12-15.
Kasin panisiaan na saray babangatan a si Pedro so impapatey la tan samay sinmian ya espiritu to so walad wangalan? Agnayarin ontan, lapud kabat na saray patumbok nen Jesus so Makasulatan a katuaan nipaakar ed inaatey, salanti, “agda amta so bengatla.” (Eclesiastes 9:5, 10) Anto sirin so labay ya ibaga na saray babangatan sanen inkuan dan: “Say anghel to ’tan”?
Amta na saray babangatan nen Jesus a diad interon awaran et tinmutulong iray anghel ed totoo na Dios. Alimbawa, sinalambit nen Jacob so “anghel ya anondon ed siak ed amin a mauges.” (Genesis 48:16) Tan oniay inkuan nen Jesus ed saray babangatan to nipaakar ed saray ugugaw ed limog da: “Nengneng yo ya agyo mudmoraen so sakey ed sarayan ugugaw; ta kuan ko’d sikayo, a dia ed tawen saray angheles da sankanengneng dan naynay so lupa nen Amak a wala ed tawen.”—Mateo 18:10.
Makapainteres, impatalos na Young’s Literal Translation of the Holy Bible so salitan agʹge·los (“anghel”) bilang “mensahero.” Ompatnag a walaray Judio nensaman a manisian say balang lingkor na Dios et walaan na dilin anghel, a singa “anghel dela guardia.” Siempre, sayan panmoria so agdirektan imbangat ed Salita na Dios. Anggaman ontan, posible a sanen inkuan na saray babangatan a, “Say anghel to ’tan,” impasen dan walay mensaheron anghel a mangirerepresenta ed si Pedro ya akaalagey ed wangalan.