Panangidayew ed si Jehova Diad Eskuelaan

DIAD interon mundo, saray kalangweran a Tasi nen Jehova so makakalmo na saray paraan pian nidayew so Dios diad eskuelaan, salanti, diad pananalita ra tan kondukta ra. Imanoen pa so pigaran eksperiensya a mangiyiilustra ed inkaseseg da bilang tobonbalo.

Sakey a kalangweran a Tasi ed Gresya so inyasain a mansulat na report nipaakar ed polusyon ed atmospera na dalin. Sanen sikatoy nananap ed Watch Tower Publications Index, aromog to so mausar a materyal ed magasin ya Awake!, tan diad sampot na essay to et impaamta ton satan so reperensya to. Inkuan ed sikato na maestra to a satan so sakey ed saray sankaabigan ya essay ya abasa to. Diad saginonor et inusar na maestra so impormasyon ed sakey a seminar, tan maabig iray resulta. Kanian denesidi na kalangweran ya agin bii ya opresian na kaaruman niran isyu na Awake! so maestra, laktip lay sakey a mangipaparungtal ed seryen “Teachers​—What Would We Do Without Them?” Diad saginonor, indaydayew na maestra ed klase so magasin ya Awake!, kanian arum ed saray estudyante so kinmekerew met na saray kopya. Kinaukolan na agin bii so mangawit na saray magasin diad eskuelaan pian nabasa ra iray arum ya isyu.

Diad Benin, Aprika, sakey a tin-edyer a Kristiano so nidunget ed nikaduman klase na pananesdes. Unong a niyugali la, saray atateng na dakel ya estudyante ed paneeskuelaan to so nampapaknan mangupa na saray tutor parad mairap iran asignatura pian iparaan iray kalangweran ed eksamin. Balet, say pinili a sesyon na saramay manbangat et kada Sabado na kabuasan parad saratan a sesyon. Ag-inmabuloy so kalangweran a Tasi, a kuan ton: “Say Sabado na kabuasan et panaon a say interon kongregasyon so sankakaiban manpupulong. Parad siak et satan so sankaliketan a panaon ed loob na sakey simba, tan agko isalat itan ed antokaman!” Say ama to, a mansusulon ateng tan sakey met a Tasi, so mipakna ed sikato tan sinali ton tinangguyor so sakey a grupo na atateng tan managbangat ya umanen so eskedyul. Balet, amin da so agmalabay. Denesidi na kalangweran a bii ya agla manpabangat. Imbes et sikatoy nampulong a kaiba so kongregasyon to. Sikatoy minudmora na saray kaklase to, tan tinangguyor dan tundaan to lay manpulong tan italirak to met lay Dios to. Singa segsegurado la ran sikatoy agmakapasa ed eksamin. Balet, say nansumpalan et samay grupo na saray estudyante a nampaibangat so ag-akapasa, bangta say kalangweran ya agi tayon bii so akapasa. Diad satan et tinmunda so pamabalaw da. Natan, say ibabaga la na saray estudyante ed sikato et, “Nepeg mon itultuloy a panlingkoran so Dios mo.”

Diad Czech Republic, walay 12-años a bii a kaukolan a mangiparaan na report nipaakar ed sakey a libro. Sikatoy pinaseseg na ina to a mangusar ed libron The Greatest Man Who Ever Lived. Ginapoan toy report to diad impangitepet na: “Anto so nibaga yo? Siopa kasi so sankatalonggaringan a too a nambilay ed kapiganman?” Deneskribe na tobonbalo si Jesus, say bilay to diad dalin, tan saray bangat to. Insan to siningbat so kapitulon apauloan na “Sakey a Leksion ed Panamerdona.” Inkuan na maestra ton, “Satan so sankaabigan a report a nadngelan ko ed sika!” tan maliket ya angawat ed sakey a kopya na libro. Kaliktan met na arum ya estudyante so nawalaan na kopya. Kanian diad kaimbuasan, maliket so kalangweran a bii ya angibunog na 18 a kopya.

Saratan a kalangweran so naliliketan a mangidayew ed si Jehova diad eskuelaan. Amin tayo so nepeg a mangalig ed pirmin inkaseseg da.