“Pinasegsegang Lapu ed Pananisia To”
“Pinasegsegang Lapu ed Pananisia To”
SAY baley na Cernobbio diad mamaamianen ya Italya so angitalaga diad lokal a parki na lugar a pakanodnonotan parad saramay naabuso so kanepegan da. Sakey ed saray imparungtal a pakanodnonotan a plake et indedika ed si Narciso Riet. Si Riet so inyanak ed Alemanya tan saray ateng to et Italyano. Sikatoy nagmaliw a Tasi nen Jehova diad dekada na 1930. Legan na rehimen nen Hitler, saray Tasi nen Jehova so pinasegsegang lapud agda labay ya ipasen si Hitler a mas atagtagey nen say tuan Dios a Jehova.
Sanen asukayan na saray Gestapo a sakey si Riet ed saray mangiloloob na saray kopya na Say Panag-Bantayan diad panangipangawan iran kampo, sikatoy tinmakas ed Cernobbio. Diman et akerew ed sikato ya ipatalos so Say Panag-Bantayan diad Italyano tan ibunog itan ed saray kapananisiaan to a walad kabangibang. Balet, say impasyan panagkimey to so naimano. Say opisyal na SS tan saray bataan to so linmusob ed ayaman nen Riet, sikatoy inaresto ra, tan sinamsam da so “kriminal” ya ebidensya—say duaran Biblia tan pigaran sulat! Si Riet so paskaran ya impawil ed Alemanya, inkulong ed panangipangawan a kampo diad Dachau, tan pinatey ag-abayag antis ya angangga so Guerra Mundial II. Sikatoy “pinasegsegang lapu ed pananisia to,” so akasulat ed plake diad Cernobbio.
Say pananisia nen Narciso Riet tan say nilasus niran arum a Tasi a pinasegsegang na Nazi so mamaseseg ed saray Kristiano natan a mansiansian matoor ed si Jehova, say alenleneg a Persona ed uniberso a makanepegan ed dayew da. (Apocalipsis 4:11) Oniay inkuan nen Jesus: “Mapalar iray apasegsegang la nisengeg ed katunongan.” Nodnonoten na Dios so ginawa ra tan tumangan to ira lapud inkakpel da.—Mateo 5:10; Hebreos 6:10.