Say Problema ed Trabaho

“Mantrabaho​—mantrabaho! Talagan makapaliket a naamtaan a wala ni iray sankaabigan a bengatlan nagawaan tayo.”​—Katherine Mansfield, autor (1888-1923).

KASIN ontan met so ideyalistikon panmoriam nipaakar ed trabaho? Panon so pangipapasen mo ed trabaho? Iisipen mo ta a say trabaho et sakey a mabaybayag tan makapaalipanes a bengatla a kaukolan mon anosan antis kan makapanrelaks diad sampot-simba? Odino nailuam ka la ed satan ya anap-anapen mo itan?

Parad maslak a totoo, say sankarakelan ya oras da ed sanagew et nauusar ed trabaho. Nayarin mandependi ed trabaho no iner so panayaman tayo tan no anto so estiloy-bilay tayo. Manlapud kaksilan ya anggad panretiro, moriaen na dakel a totoo a say trabaho so alenleneg a gegemtan a sankamanunaan ed bilay da. Arum ed sikatayo so talagan napepenek ed trabaho tayo. Saray arum balet et susukaten day kablian na trabaho unong ed naaalmoan dan kuarta odino kagalangan, bangta momoriaen na arum a sikaray mantratrabaho pian walay pakausaran labat na panaon da odino ipapasen ni ingen itan na arum a pakadarakan na panaon.

Walaray mantratrabaho pian manbilay tan walaray manbibilay pian mantrabaho; arum so ompapatey diad trabaho odino lapu ed trabaho ra. Singa bilang, unong ed agano nin report na Nasyones Unidas, say trabaho so sengegan na dakel a sakit tan ipapatey “nen saray guerra odino panag-abuso ed druga tan alkohol.” Bilang komento ed saya, oniay inreport na peryodikon The Guardian na London: “Masulok a duaran milyon a totoo so ompapatey ed kada taon lapu ed saray aksidente odino sakit a nisisiglaot ed trabaho . . . Say mabetbet a kipapaarap ed dabok, saray kemikal, ingal tan radiation [so] panlalapuan na kanser, sakit tan ataki ed puso.” Say panagpatrabaho ed ugugaw tan paskaran a panagtrabaho et duara labat ed saray aliwaliwan kipapasen na trabaho natan.

Niarum ni, wala so tinukoy na sikolohistan si Steven Berglas a “supernova burnout.” Deneskribe to so sakey a makulin trabahador ya akasabi la ed pantok na karera to balet ta makakalikna na “graben kapagaan, gonigon, inkaandi na ilalo odino depresyon lapud panisiaan ton sikatoy akalotan la ed trabaho, odino ed karera to, ya agto la itan natakasan nisay makalikna ni na inkapnek.”

Say Pandumaan na Maseet a Panagtrabaho tan Inkigalet ed Trabaho

Dia ed mundo a dakel so mantratrabaho ed andukey ya oras, importante ya amtaen so pandumaan na saray maseet a mantratrabaho tan saray nigalet ed trabaho. Momoriaen na dakel a nigalet la’d trabaho a say pantratrabahoan da so maligen  a pasen diad mapeligro tan manguman-uman a mundo; bangta parad saray makulin mantratrabaho et satan so makanakana tan no maminsan et makapnek ya obligasyon. Aabuloyan na saray nigalet la’d trabaho a naupot so panaon dan nausar komon ed arum niran aspekto na bilay; balet saray maseet a mantratrabaho et amta ra no kapigan so itunda ra, no dinan so onsublay a pangiteenan day imano, tan bilang alimbawa, agda liliwatan so selebrasyon na anibersaryoy kasal da. Saray nigalet la ed trabaho so naliliketan ed sobran panagtrabaho tan magmamaliw iran aktibo lapud satan; balet aliwan ontan so liknaan na saramay maseet a mantratrabaho.

Mairap lan napambiigan itan a dua lapu ed modernon sosyedad, ta pagmamaliwen na satan a makapasagyat so sobran panagtrabaho. Lapu ed saray modem, cell phone, tan pager, mairap lan nibiig so pasen na trabaho tan ayaman. No magmaliw lan pasen na trabaho so inerman a pasen tan oras la na trabaho so anggan anton oras, sobsobra la itan, ya anggad pansengegan la na ipatey na arum.

Panon so ikikiwas na arum a totoo ed ontan a makapuy ya ugali? Atebek na saray sosyologo a say tendensia na saray totoon alabas ed panagtrabaho tan sobran nadedetdetan et itekep day espiritualidad ed trabaho ra tan ilaok so relihyon ed propesyon da. Inreport na San Francisco Examiner a “say pangitetekep na espiritualidad ed trabaho et paniinteresan la na karaklan a totoo.”

Oniay inkuan na agano nin report nipaakar ed Silicon Valley, say makanakanan sentro na iyaaligwas ed teknolohiya diad Estados Unidos: “Bangta ondarakel so nabibilang na saray ehekutibo a bakantin paradaan diad pasen na trabaho lapud panagbawas na saray empleyado, onkukulang balet iray paradaan diad lugar a panaaralan na Biblia legan na labi.” Antokaman so nayarin kabaliksan na satan, namomoria na dakel a totoo ed sankamundoan a say Biblia so walaan na positibon impluensya ed panmoria ra ed trabaho, a manreresulta ed lalon asimbang a kabibilay.

Panon a makatulong ed sikatayo so Biblia pian nawalaan itayo na asimbang a panmoria ed trabaho? Kasin walaray Makasulatan a prinsipyo a makatulong ed sikatayo pian natalonaan iray angat ed sekular a trabaho natan? Say onsublay ya artikulo so mangebat ed saratan a tepet.