‘Iyakar so Maong a Balita na Kaabigan’
‘Iyakar so Maong a Balita na Kaabigan’
“Agayla so kalimgasan ed tapew na saray palandey so saray sali na . . . mangiyakar na saray maong a balita na kaabigan.”—ISAIAS 52:7.
1, 2. (a) Antoran makapataktakot a bengatla so inagew-agew a nagagawa? (b) Panon so ikikiwas na dakel a totoo diad naynay a pakakarengel da na mauges a balita?
SARAY totoo natan diad sankamundoan so natatalagnaw ed saray mauges a balita. No paknolen da so radyo, say narengel da et makapataktakot iran balita nipaakar ed saray makapatey a sakit a manesesga ed dalin. No manbantay ira na balita ed telebisyon, say nanengneng da et saray agnalingwanan ya itsura na nanaerasan ya ugugaw ya oneey-ey kalamor na tulong. No manbasa ira na peryodiko, say nabasa ra et saray insabog na bomba ya angaygay ed saray bilding tan amatey na dakel ya inosentin totoo.
2 On, inagew-agew a nagagawa iray makapataktakot a bengatla. Say kipapasen na sayan mundo so talagan manguuman tan onloloor. (1 Corinto 7:31) Inkomento na sakey a peryodiko ed Mamasagur ya Europa a no maminsan et singano “ngalngali la naulam na apoy” so interon mundo. Agpankelawan sirin no akin ya ondarakel so totoo a nagogonigon! Sakey a too ya inaon ed surbi nipaakar ed balita ed telebisyon diad Estados Unidos so maseguron angibalikas met ed liknaan na minilyon sanen inkuan ton: ‘Kayarik a manbantay na balita, siak so nagogonigon a maong. Amin a balita et mauges. Makapakapuy.’
Say Balita a Nakaukolan a Narengelan na Amin
3. (a) Anton maong a balita so iyaabawag na Biblia? (b) Akin a papablien yo so maong a balita na Panarian?
3 Diad onian makapagonigon a mundo, wala ni kasi so naromog a magmaong a balita? On, wala! Makapaligliwan naamtaan ya iyaabawag na Biblia so maong a balita. Satan so balita a panganggaen la na Panarian na Dios so sakit, eras, krimen, bakal, tan amin a nengneng na panagpairap. (Salmo 46:9; 72:12) Agta satan so balita a nakaukolan a narengelan na amin? Ontan so seguradon nononoten na saray Tasi nen Jehova. Sirin, kabkabat ira ed inerman a pasen lapud tuloytuloy a pansasagpot dan manginabang na maong a balita na Panarian na Dios diad totoo na amin a nasyon.—Mateo 24:14.
4. Dinan iran aspekto na ministeryo tayo so konsideraen ed sayan artikulo tan ed ontumbok ya artikulo?
4 Balet, anto so nagawaan tayo ta pian nitultuloy so makapnek tan makabaliksan a pibibiang ed panangipulong ed sayan maong a balita—anggan diad saray teritoryan dagdaiset so interesado? (Lucas 8:15) Seguradon makatulong so antikey a panrepaso ed taloran importantin aspekto na panagpulong tayo. Usisaen tayo so (1) motibo tayo, odino no akin a manpupulong itayo; (2) mensahe tayo, odino no anto so ipulong tayo; tan (3) saray metodo tayo, odino no panon so pampulong tayo. Diad pamasiansia tayon malinis so motibo tayo, malinew so mensahe tayo, tan epektibo iray metodo tayo, niiter tayo ed dakel a klase na totoo so pankanawnawan makarengel ed sankaabigan a balita—say maong a balita na Panarian na Dios. *
No Akin a Mibibiang Itayo ed Panangipulong na Maong a Balita
5. (a) Manuna ed amin, anto so mamapakiwas ed sikatayo pian mibiang ed ministeryo? (b) Akin a nibagan say katutulok tayo ed ganggan na Biblia a manpulong et panangipatnag na panangaro ed Dios?
5 Konsideraen tayo so unonan aspekto—say motibo tayo. Akin ya ipupulong tayo so maong a balita? Mipadpara itan ed rason no akin a nampulong si Jesus. Inkuan to: “Inarok so Ama.” (Juan 14:31; Salmo 40:8) Manuna ed amin, sikatayo so papakiwasen na aro ed Dios. (Mateo 22:37, 38) Impansiglaotan na Biblia so aro ed Dios tan say ministeryo lapud oniay inkuan na satan: “Saya so aro na Dios, a sumpalen tayo so saray ganggan to.” (1 Juan 5:3; Juan 14:21) Kasin laktipen na saray ganggan na Dios so ‘onlan panggawa na babangatan’? (Mateo 28:19) On. Saratan so sinalita nen Jesus, balet ta si Jehova so nanlapuan na saratan. Panon? Oniay insalaysay nen Jesus: “Anggapo so gawaen ko ed inkasiak, noag unong na imbangat na Ama ed siak, salitaen ko so sarayan bengatla.” (Juan 8:28; Mateo 17:5) Kanian, diad panusumpal tayo ed ganggan a manpulong, nipapatnag tayo met ya aaroen tayo si Jehova.
6. Diad antoran paraan a napapakiwas itayo na aro ed Dios a manpulong?
6 Niarum ni, say aro ed si Jehova so mamapakiwas ed sikatayon manpulong lapud labay tayon kontraen iray katilaan ya ikakayat nen Satanas sumpad Dios. (2 Corinto 4:4) Sinuppiat nen Satanas so inkatunong na uley na Dios. (Genesis 3:1-5) Bilang saray Tasi nen Jehova, pampipilalekan tayoy mibiang ed panangiwalwal ed panagpauges nen Satanas tan ed panamasantos ed ngaran na Dios ed arap na katooan. (Isaias 43:10-12) Niarum ni, mibibiang itayo ed ministeryo lapud naamtaan tayo iray kalidad tan dalan nen Jehova. Maapit itayo ed sikato tan mabiskeg so pilalek tayon ibaga ed arum so nipaakar ed Dios. Diad tua, say kaabigan nen Jehova tan saray matunong a dalan to so makapaliket a tuloy kanian ag-itayo napatundan mangitongtong na nipaakar ed sikato. (Salmo 145:7-12) Napapakiwas itayon mangiyabawag ed dayew to tan salitaen so “karlangan” to ed saramay ondengel.—1 Pedro 2:9; Isaias 43:21.
7. Nilikud ed panangaro ed Dios, anto ni so importantin rason no akin a mibibiang itayo ed panagpulong a kimey?
7 Wala ni sakey ya importantin rason no akin ya itutuloy tayo so mibiang ed ministeryo: Masimoon a kaliktan tayo a ligliwaen iray indibidual a nagogonigon ed dakerakel a mauges a balita tan ed saramay maniirap lapud nanduruman rason. Diad sayan kimey, panggugunaetan tayon aligen si Jesus. Alimbawa, imanoen pa so adeskribe ed Marcos kapitulo 6.
8. Anto so ipapatnag na salaysay ed Marcos kapitulo 6 nipaakar ed liknaan nen Jesus ed totoo?
8 Kayari na impanpulong na saray apostol, sikara so pinmawil tan inreport da ed si Jesus so amin a ginawa tan imbangat da. Naimano nen Jesus a naksawan iray apostol, kanian intagar to ra a ‘manpainawan magano.’ Kanian sikara so linmugan ed baloto tan amaarap ed mareen a pasen. Sikara so tinumbok na totoo, a kibatiktik ira ed gilig na dayat, tan agnambayag et nabotan da ra. Anto so ginawa nen Jesus? “Anengneng to so saray dakel a katooan,” so inkuan na salaysay, “tan naabagey to ra, lapu ed singa ra saray karnero ya andian na managpastol; et ginapoan to so nambangat ed sikara na amayamay a bengabengatla.” (Marcos 6:31-34) Lapud panangabagey, apakiwas si Jesus a mantultuloy a manginabang ed maong a balita anggaman sikatoy naksawan. Mabitar, si Jesus so walaan na empatya ed sarayan totoo. Naabagey to ira.
9. Anto so naaralan tayo ed salaysay ed Marcos kapitulo 6 nipaakar ed dugan motibo ed panagpulong?
9 Anto so naaralan tayo ed sayan salaysay? Bilang Kristiano, nalikna tayo so obligasyon a mangipulong ed maong a balita tan manggawa na babangatan. Bibidbiren tayo so responsabilidad tayon mangiyabawag ed maong a balita, lapud linawa na Dios ya “amin a totoo nilaban ira komon.” (1 Timoteo 2:4) Balet, susumpalen tayo so ministeryo tayo aliwan lapud obligasyon labat noagta lapud panangabagey met. No walaan itayo na panangabagey ed totoo a singa ed alikna nen Jesus, say puso tayo so napakiwas a manggawa ed amin a nayarian tayo pian mantultuloy a manginabang na maong a balita ed sikara. (Mateo 22:39) Say pakawalaan tayo na ontan a maabig a motibo diad pibibiang tayo ed ministeryo so mamakiwas ed sikatayon mangipulong ed maong a balita ya andi-tunda.
Say Mensahe Tayo—Say Maong a Balita na Panarian na Dios
10, 11. (a) Panon a deneskribe nen Isaias so mensahe ya ipupulong tayo? (b) Panon ya intarok nen Jesus so maong a balita na kaabigan, tan panon so impanumbok na saray lingkor na Dios natan ed ehemplo nen Jesus?
10 Anto so komaduan aspekto na ministeryo tayo? Say mensahe tayo. Anto so ipupulong tayo? Inter nen propeta Isaias iyan alay dakep a deskripsion na mensahe ya ipupulong tayo: “Agayla so kalimgasan ed tapew na saray palandey so saray sali na mangiyakar na saray maong a balita, a mangibawag na deen, a mangiyakar na saray maong a balita na kaabigan, a mangibawag na kilalaban, a kuan to ed Sion, Say Dios mo man-ari!”—Isaias 52:7.
11 Say importantin balikas ed satan a teksto, a “Say Dios mo man-ari,” so mangipapanonot ed sikatayo ed mensahe a nepeg tayon iyabawag, salanti, say maong a balita na Panarian na Dios. (Marcos 13:10) Imanoen met a sayan bersikulo so mangipaparungtal ed positibon tema na mensahe tayo. Inusar nen Isaias iray terminon “kilalaban,” “maong a balita,” “deen,” tan “kaabigan.” Pigaran siglo kayari nen Isaias, nen primeron siglo K.P. et matalonggaring a sinumpal nen Jesu-Kristo iyan propesiya diad impangiletneg to na maseseg ya alimbawa ed panangipalapag na balita na bengatlan mas maabig, salanti, say onsabin Panarian na Dios. (Lucas 4:43) Diad modernon panaon, nagkalalo la manlapu nen 1919, tinumbok na saray Tasi nen Jehova so ehemplo nen Jesus diad maseseg a panangiyabawag ed maong a balita na niletneg a Panarian na Dios tan saray bendisyon a tarok na satan.
12. Anto so epekto na maong a balita na Panarian ed saramay mangawat ed satan?
12 Anto so epekto na maong a balita na Panarian ed saramay mangawat ed satan? Natan a singa met ed panaon nen Jesus, say maong a balita so mangiiter na ilalo tan ligliwa. (Roma 12:12; 15:4) Mangiiter itan na ilalo ed saray matuan-impanpuson totoo lapud naamtaan da a walaray putel a rason pian panisiaan a walay magmaong a panaon diad arapen. (Mateo 6:9, 10; 2 Pedro 3:13) Baleg so nitulong na satan ya ilalo diad saray matakot ed Dios pian napansiansia ra so positibon panmoria. Insalaysay na salmista a sikara et “ag-antakot naani ed saray mauges a balbalita.”—Salmo 112:1, 7.
Say Mensahe a “Mamedber ed Puso a Maermen”
13. Panon so impaneskribe nen propeta Isaias ed saray gunggona natan a nagamoran na saramay mangawat ed maong a balita?
13 Niarum ni, say maong a balita ya ipupulong tayo so mangitatarok na pakainawaan tan gunggona natan ed saramay ontalineng ed satan. Panon? Arum ed saratan a bendisyon so impabitar nen propeta Isaias sanen impasakbay ton: “Say espiritu nen Katawan a Jehova wala ed siak; ta si Jehova nilanaan to ak a mangipulong na saray maong a balita ed saray mauyamo [tan] imbaki to ak a mamedber ed puso a maermen, a mangibawag na kawayangan ed saray dinakep, tan say kilukas na panangipangawan ed saray pinangaw; a mangibawag na taon na pamalangkap nen Jehova, tan say agew na kababales na Dios tayo; a manligliwa ed amin a managogol.”—Isaias 61:1, 2; Lucas 4:16-21.
14. (a) Anto so ipapabitar na balikas a ‘mamedber ed maermen a puso’ nipaakar ed mensahe na Panarian? (b) Panon tayon nipatnag so panangiyansakit nen Jehova ed saramay maermen a puso?
14 Unong ed satan a propesiya, si Jesus so ‘mamedber ed maermen a puso’ diad panamegley na panangipulong ed maong a balita. Agaylan makabaliksan so deskripsion nen Isaias! Unong ed sakey a diksionaryo na Biblia, say Hebreon salita a nipatalos a ‘bedberen’ “so mabetbet ya uusaren ed ‘pangibedber’ na benda, tan ed panagtambal tan panamaabig ed asugatan.” Say maasikason nars so nayarin mangibedber na benda odino mangidepel na abel ed asugat a parte na laman na biktima pian naprotektaan itan. Diad ontan met a paraan, sano ipupulong so mensahe na Panarian, saray manangiyansakit a manangipalapag so ontutulong ed amin ya ondedengel a maniirap. Tan diad panutulong da ed saramay mankaukolan, nipapatnag da so panangiyansakit nen Jehova. (Ezequiel 34:15, 16) Oniay inkuan na salmista nipaakar ed Dios: “Sikato paabigen to so saray binmetag ed puso, tan bedberen to so sugasugat da.”—Salmo 147:3.
No Panon Kaepektibo so Mensahe na Panarian
15, 16. Antoran alimbawa a peteg ya agawa ed bilay so mangiyiilustra ed no panon a say mensahe na Panarian so manusuporta tan mamapabiskeg ed saramay mankaukolan?
15 Ipapabitar na dakel ya alimbawan peteg ya agawa ed bilay no panon a say mensahe na Panarian et talagan makakatulong tan mamapabiskeg ed saramay maneermen. Konsideraen pa si Oreanna, sakey ya akulaw a taga-Abalaten ya Amerika, a naandian la na ilalon manbilay. Sakey a Tasi nen Jehova so binmisita ed si Oreanna tan imbasa ed sikato so Biblia tan say publikasyon a My Book of Bible Stories. * Diad primero, say naeermenan a bii so dinmengel ed ibabasa legan ya akarukol, ya akalikdem tan sagpaminsan ya oneengas na aralem. Balet, agnambayag et nanggunaetan toy yinmurong ed dukolan to legan na pambabasa. Diad saginonor, sikato so akayurong la ed sakey a yurongan ed sala, a manaalagar ed mangibabangat ed sikato na Biblia. Insan, say bii so ginmapon inmatendi ed saray Makristianon pantitipon diad Kingdom Hall. Lapud apaseseg ed naaralan to ed saratan a pantitipon, sikato so angiyopresi met la na literatura na Biblia diad saray onlalabas ed abung to. Diad kaunoran, say 93 años a si Oreanna so abautismoan bilang sakey ed saray Tasi nen Jehova. Say mensahe na Panarian so amasimbalo ed pilalek ton manbilay.—Uliran 15:30; 16:24.
16 Say mensahe na Panarian so mangiiter na kakkaukolan a suporta anggan ed saramay magano lan ompatey lapud sakit. Konsideraen pa so alimbawa nen Maria a taga-Mamasagur ya Europa. Sikato so walaan na makapatey a sakit tan naandian lay ilalo. Sikato so maer-ermen a maong sanen asabian na saray Tasi nen Jehova a dinmalaw ed sikato. Balet, sanen naamtaan to iray gagala na Dios, say bilay to so awalaan lamet na gagala. Sikato so abautismoan tan nagmaliw ya aktibon maong ed panagpulong a kimey. Legan na unor a duaran taon na bilay to, sankapatnagan ed saray mata to so masnag ya ilalo tan gayaga. Si Maria so inatey a walaan na malet ya ilalo ed kikioli. —Roma 8:38, 39.
17. (a) Panon kaepektibo so mensahe na Panarian ed bilay na saramay mangaawat ed satan? (b) Diad antoran paraan a personal yon naeksperiensya so ‘pangiyaatagey nen Jehova ed amin ya aruknot’?
17 Paneknekan na saratan a report so inkaepektibo na mensahe na Panarian ed kabibilay na saramay manpipirawat ed saray katuaan ed Biblia. Saray indibidual a maneermen ed impatey na inad-aro ra et ombiskeg lamet sano naaralan da so nipaakar ed ilalon kikioli. (1 Tesalonica 4:13) Saray mairap-bilay tan mantatalikarkar kalamor a manlegpet ed pamilya ra so makagamor na apasimbalon kagalangan tan inkakpel sano naaralan da ya ag-iran balot ikaindan nen Jehova no manmatoor ira ed sikato. (Salmo 37:28) Diad tulong nen Jehova, dakel a manasagmak na depresyon so kalkalnan akabayubo na kakkaukolan a biskeg pian makapansungdo tan diad arum a kipapasen et atalonaan da ni ingen itan a sakit. (Salmo 40:1, 2) On, diad panamegley na pakayari ya itatarya na Salita nen Jehova, sikato natan so ‘mangiyaatagey ed amin ya aruknot.’ (Salmo 145:14) Diad pakakaimaton tayo ed no panon a makaligliwa so maong a balita na Panarian ed saramay maermen-puso diad teritorya tayo tan diad Kristianon kongregasyon, naynay itayon napapanonotan a walaan itayo na sankaabigan a balita natan!—Salmo 51:17.
‘Say Pikakasik ed Dios Nipaakar ed Sikara’
18. Panon a naapektoan si Pablo ed impangipulisay na saray Judio ed maong a balita, tan akin?
18 Anggaman lugan na mensahe tayo so sankaabigan a balita, dakel so mangipupulisay ed satan. Panon itayon naapektoan ed satan? Diad paraan na impakaapektoan met nen apostol Pablo. Sikato so mabetbet a nampulong ed saray Judio, balet maslak ed sikara so angipulisay ed mensahe na kilalaban. Naapektoan a tuloy si Pablo ed impangipulisay da. Oniay inaksobi to: “Wala ed siak so baleg a kaermenan tan naynay a sakit ed pusok.” (Roma 9:2) Alikna nen Pablo so panangabagey ed saray Judio a pinulongan to. Sikato so apaermen ed satan lapud impulisay da so maong a balita.
19. (a) Akin a natalosan a nadidismaya itayo no maminsan? (b) Anto so akatulong ed si Pablo pian mantultuloy ed panagpulong a kimey to?
19 Ipupulong tayo met so maong a balita lapud panangabagey. Kanian, natalosan no nadismaya itayo met sano ipulisay na dakel a totoo so mensahe na Panarian. Ipapatnag na satan a reaksion a walaan itayo na puron panangiyansakit ed espiritual a pankaabigan na saramay pupulongan tayo. Balet, nepeg tayon nodnonoten so alimbawa nen apostol Pablo. Anto so akatulong ed sikato pian mantultuloy ed panagpulong a kimey to? Anggaman say impangipulisay na saray Judio ed maong a balita et amaermen tan akasakitan nen Pablo, agto tinmundan nampulong ed saray Judio, ya agto inisip ya agla ra natulongan. Sikatoy nanilalo a wala nin siansia so arum a mangawat ed si Kristo. Kanian, nipaakar ed liknaan to ed saray Judio, oniay insulat nen Pablo: “Say pilalek na pusok tan say pikakasik ed Dios sikatoy nipaakar ed sikara, pian nilaban ira.”—Roma 10:1.
20, 21. (a) Nipaakar ed ministeryo tayo, panon tayon naalig so alimbawa nen Pablo? (b) Anton aspekto na ministeryo tayo so konsideraen ed ontumbok ya artikulo?
20 Imanoen so duaran bengatla ya impabitar nen Pablo. Pilalek na puso to a nilaban so pigaran indibidual, tan sikato so akikasi ed Dios nipaakar ed saya. Aligen tayo natan so alimbawa nen Pablo. Pansiansiaen tayo so impapuson pilalek ya anapen so siopaman a nayarin suston nikiling ed maong a balita. Mantultuloy tayon ipikasi ed si Jehova a naromog tayo iratan ya indibidual ta pian natulongan tayo ira ya ontumbok ed kurang a mangitonton ed kilalaban da.—Uliran 11:30; Ezequiel 33:11; Juan 6:44.
21 Balet, pian nasabi so dakel a totoo anggad posible tekep na mensahe na Panarian, nakaukolan tayon imanoen ya aliwa lambengat a no akin tan no anto so ipulong tayo noagta no panon itayon manpulong. Sayan tema so konsideraen ed ontumbok ya artikulo.
[Saray paimano ed leksab]
^ par. 4 Konsideraen ed sayan artikulo so primeron duaran aspekto. Say komatlon aspekto et konsideraen ed komaduan artikulo.
^ par. 15 Impalapag na saray Tasi nen Jehova.
Anto so Naaralan Yo?
• Antoray rason no akin a mibibiang itayo ed ministeryo?
• Anto so manunan mensahe ya ipupulong tayo?
• Antoran bendisyon so naeksperiensya na saramay mangaawat ed mensahe na Panarian?
• Anto so ontulong ed sikatayo pian mantultuloy itayo ed ministeryo?
[Tepetepet Parad Panagaral]
[Saray litrato ed pahina 18]
Say mensahe na Panarian so mangiiter na biskeg ed saray maermen-puso
[Saray litrato ed pahina 20]
Ontulong ed sikatayo so pikakasi pian mansungdo ed ministeryo tayo