Mabulbulos Dan Iyaapay so Inkasikara

“SAY katooan mo yapay da so inkasikara a mabulbulos.” (Salmo 110:3) Saratan a salita et makabkabaliksan ed saray 46 ya estudyante na koma-118 a klase na Watchtower Bible School of Gilead. Panon dan imparaan so inkasikara pian makaatendi ed sayan eskuelaan, a mangipapasal ed saray prospektibon misionaryo pian mangitarya na espiritual iran pankaukolan na totoo ed arum a bansa? Oniay insalaysay di Mike tan Stacie, a kabiangan ed koma-118 a klase: “Say desisyon min manbilay labat a simpli so tinmulong ed sikami pian naparaisetan iray pakasuawian tan pian lawas min niyapasakey so nonot mi ed maespiritual. Determinado kami ya ag-abuloyan so itatalona mi ed negosyo a makaamper ed espiritual iran kalat mi.” Singa di Mike tan Stacie, arum ya estudyante ed sayan klase so mabulos met ya angiyapay ed inkasikara tan manlilingkor la natan bilang manangiyabawag na Panarian diad apatiran kontinente.

Nen Sabado, Marso 12, 2005, mapatpatnag ya aliketan so 6,843 ya inmatendi diad intalineng da ed programa na pangraduar. Say tsirman et si Theodore Jaracz, a membro na Mananguley ya Ulop na saray Tasi nen Jehova. Kayari na maliket ya impangabrasa to ed saray bisita a nanlalapud 28 a daldalin, inyapasakey to so imano diad kablian na edukasyon ed Biblia. Oniay imbaga to, ya inaon to si William Lyon Phelps, sakey ya Amerikanon edukador: “Balang sakey a malaknab so pikakabat to ed Biblia et peteg a natawag ya edukado.” Anggaman nayarin mausar so sekular ya edukasyon, mas lalon mausar so edukasyon ed Biblia. Ontutulong itan ed totoo a nawalaan na pikakabat nipaakar ed Dios, a mangitonton ed bilay ya andi-anggaan. (Juan 17:3) Kinomendaan nen Brother Jaracz iray nangraduar lapud inkamabulos da a mibiang a nagkalalo ed sankamundoan a programan panagaral ed Biblia a gagawaen ed masulok a 98,000 a kongregasyon na saray Tasi nen Jehova ed interon mundo.

Nipanpanaon a Panamaseseg Parad Saray Nangraduar

Kayari na manangilukas a paliwawa na tsirman, impaliwawa nen William Samuelson so teman, “No Panon Kayon Magmaliw a Singa Mabunabunan Kiew ya Olibo ed Abung na Dios,” a nibase ed Salmo 52:8. Impabitar to a say kiew ya olibo so piguratibon inusar ed Biblia bilang simbolo na inkamabunga, karakpan, tan dignidad. (Jeremias 11:16) Diad impangikompara to ed saray estudyante ed saray kiew ya olibo, oniay impaliwawa to: “Sikayo so ipasen nen Jehova a walaan na karakpan tan dignidad legan yon matoor a susumpalen so kimey a panangipulong ed Panarian diad saray asainmin yo bilang misionaryo.” No panon a nakaukolan na kiew ya olibo so dakel a lamot pian nabilay legan na kelang, nakaukolan met na saray estudyante a pabiskegen iray espiritual a lamot da ta pian nasungdoan da iray agpananginenen, isusumpa, odino arum  niran subok a nayarin sagmaken da diad panlingkor da ed arum a bansa.​—Mateo 13:21; Colosas 2:6, 7.

Si John E. Barr, sakey ed saray taloran membro na Mananguley ya Ulop ya akibiang diad programa, so angipaliwawa ed teman “Sikayo so Asin na Dalin.” (Mateo 5:13) Impabitar to a no panon a say literal ya asin so mangiprepreserba ed tagano pian agnabulok, ontan met a say panagpulong na saray misionaryo nipaakar ed Panarian na Dios so makapangisalba ed bilay na saraman so ontalineng, a manalimbeng ed sikara manlapud kabulok ed moral tan espiritual. Insan diad mapangasin tono na boses, pinaseseg nen Brother Barr iray nangraduar a pansiansiaen da so ‘pipapaknaan’ odino kareenan ed arum. (Marcos 9:50) “Bayuboan yo so bunga na espiritu, tan seguroen a say kondukta tan panagsalita yo so lawas mabanayar tan makonsidera,” so insimbawa to.

Say teman “Mansiansian Akalugan Legan a Walad Aralem a Danum,” so impabitar nen Wallace Liverance, sakey ed saray instruktor ed Gilead. No panon a say barkon manlalayag ed aralem a danum et makaarap ed dugan direksion, ontan met a say pakatalos ed ‘araralem a bengatla na Dios’​—saray katuaan nipaakar ed gagala na Dios tan no panon a nasumpal itan​—so makatulong ed sakey pian onaligwas ed espiritual. (1 Corinto 2:10) Say pansiansia ed ataptapew ya espiritual a danum diad pankontento labat ed ‘unonan aaralen ed saray salitay Dios’ so mangamper ed iyaaligwas tayo tan nayarin pansengegan ni ingen na ‘kageba na pananisia tayo.’ (Hebreos 5:12, 13; 1 Timoteo 1:19) “Komon ta ‘say kaaralman na kayamanan na kakabatan tan pakaamta na Dios’ so ontulong ed sikayo ed saray asainmin yo bilang misionaryo,” so impanampot nen Brother Liverance.​—Roma 11:33.

Si Mark Noumair, a sananey nin instruktor ed Gilead, so angipaliwawa ed teman “Kasin Manbilay Kayo a Mitunosan ed Tawir Yo?” Diad masulok lan 60 a taon, say Watchtower Bible School of Gilead so awalaan na kredibilidad tan atagey a pakabidbiran lapu ed ‘malaklaknab a maabig a pantasi’ a nagagawaan na saray mangragraduar ed sayan eskuelaan. Sayan tawir a Gilead so nipasa ed saray estudyante ed koma-118 a klase. Pinaseseg nen Brother Noumair iray estudyante ya aligen da iray kadaanan a Tekoita ed panaon nen Nehemias tan mapaabeban mikoopera ed lokal a kongregasyon tan ed saray kapara ran misionaryo. Sikaray sinimbawa a paliisan da so awawey na saramay tinukoy nen Nehemias ya “angkabli” a mapaatagey tan magmaliw iran mabulos a mankimey a mareen tan agpadederleng.​—Nehemias 3:5.

Saray Makaibangat ya Eksperiensya tan Interbio

Say tinmumbok a kabiangan na programa so apauloan na “Manbaleg so Salita na Dios.” (Gawa 6:7) Diad panangidirehi na instruktor ed Gilead a si Lawrence Bowen, inyakto lamet na saray estudyante iray maabig a naeksperiensya ra diad lawak na ministeryo legan iran maneeskuela. Impatnag na saray eksperiensya a saray estudyante so maseseg ya angiyabawag ed Salitay Dios, a diad ontan et mayaman a benendisyonan nen Jehova iray sagpot da.

Si Richard Ashe so anginterbio na saray membro na pamilyan Bethel a maapit a mikikimey ed eskuelaan. Saray komento ra so angiter na aralem a pakatalos nipaakar ed panusuporta na pamilyan Bethel ed saray estudyante ed Gilead pian nagunggonaan a maong ed panaaral da. Insan ininterbio nen Geoffrey Jackson so pigaran nangraduar ed Gilead diad apalabas. Impabitar da so dakel a pankanawnawa parad saray misionaryo a mangidayew tan mangigalang ed si Jehova. Oniay inkomento na sakey ed sikara: “Iimatonan na totoo so amin a gagawaen yo bilang misionaryo. Tatalinengen da, babantayan da, tan tatandaan da.” Kanian, apaseseg iray estudyante a magmaliw a sinononot ed pangipanengneng na maabig ya ehemplo diad amin a panaon. Sayan praktikal a simbawa et seguradon makanakana ed arapen a panaon.

Si Stephen Lett, a membro na Mananguley ya Ulop, so unor a nampaliwawa, ya apauloan na “Onla Kayo Bilang Manangitarok na ‘Mabilay a Danum.’” (Juan 7:38) Imbaga to a diad apalabas a limay bulan, saray estudyante so agunggonaan a tuloy diad impakaasol da na dakel ya espiritual a danum manlapud katuaan na Salitay Dios. Balet antoy gawaen na saray misionaryo ed naasol dan impormasyon? Pinaseseg nen Brother Lett iray nangraduar a mabunlok dan inabang irayan espiritual a danum ta pian say arum so nawalaan na  “sakey a bobon na danum a mansusbol angga ed maandon bilay.” (Juan 4:14) Oniay inyarum na espiker: “Agyon balot lilingwanan ya iter ed si Jehova, ‘say subol na danum a mabilay,’ so galang tan dayew a kanepegan to. Magmaliw kayon maanos sano ibabangat yo iraman so pinmaway manlapud naklangan a Babilonia a Baleg.” (Jeremias 2:13) Sinampotan nen Brother Lett so paliwawa to diad impamaseseg to ed saray nangraduar a maligsan aligen da so espiritu tan say nobya tan mantultuloy dan ibagan: “Gala. Tan say napgaan, ondago: et say malabay, mangala ed danum na bilay ya andi bayar.”​—Apocalipsis 22:17.

Sinampotan nen Brother Jaracz so programa diad impangibasa na saray pabano a naawat manlapud nanduruman daldalin. Sinmublay so impangibasa na sakey ed saray nangraduar ed sulat a pisasalamat.

Nayarian yo ta’n iyapay so inkasikayo pian manlingkor ed lugar a babaleg so pankaukolan? No ontan, gegemtanen yo sirin iray espiritual a kalat, a singa ginawa na saray estudyanten nangraduar. Anien so gayaga tan inkapnek a nalikna na sakey no sikatoy maliket tan mabulos a mangiyapay ed inkasikato diad panlingkor ed Dios​—balanglan sakey a misionaryo ed arum a bansa odino sakey a ministro diad asingger ed panaayaman to.

[Kahon ed pahina 13]

SARAY ESTADISTIKA NA KLASE

Bilang na saray nirepresentan bansa: 8

Bilang na saray bansan angiyasainan: 19

Bilang na saray estudyante: 46

Promedyon edad: 33.0

Promedyon taon ed katuaan: 16.5

Promedyon taon ed sigpot-panaon a ministeryo: 12.9

[Litrato ed pahina 15]

Koma-118 a Klase a Nangraduar ed Watchtower Bible School of Gilead

Diad listaan ed leksab, saray dasig so anumeroan manlapud arap a pasener, tan saray ngaran so akalista manlapud kawigi a manpakawanan ed kada dasig.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.