Istorya na Bilay

Maliket Ak Lapud Akapibiang Ak ed Sankamundoan a Panagbangat ed Biblia

UNONG ED SALAYSAY NEN ANNA MATHEAKIS

Napopoolan so bapor a pambiahe. No onlereg iyan baleg a bapor a 561-piye karukey, pati siak et ilereg na saya tan nalener ak. Kanian pinilit koy onlangoy pian makaliktar ak, a sinubak so angkakabaleg a daluyon. Say mogmon paraan pian makaletaw ak et diad ipeket kon maong ed dyakit a pampaletaw ya akasulong ed sananey a bii. Nampikasi ak ed Dios pian ombiskeg tan makapanpakpel ak. Ontan lambengat so nagawaan ko.

AGAWA iman nen 1971, sanen papawil ak la ed komatlon asainmin ko bilang misionaryo, diad Italya. Diad saman ya inkakneb, naandi lawarin amin so kayarian ko. Balet agnaandi ed siak iray sankaimportantian a bengatla​—say bilay ko, say maaron Kristianon impanaagi, tan say pribilehyon manlingkor ed si Jehova. Talora lan kontinente so nakar ko lapud panlilingkor ko, tan saman ya inkakneb et sakey labat ed saray dramatikon ebento.

Nianak ak nen 1922. Manaayam ed saman so pamilya mi diad Rām Allāh, manga labin-anem kilometro ed amianen na Jerusalem. Saray ateng ko so parehon taga-isla na Crete, balet say amak et binmaleg ed Nazaret. Siak so sankayugtanan ed sikamin sanaagi, a taloran laki tan duaran bii. Agonigon so pamilya mi lapud impatey na komadua’d-panguloan a kuyak, a nalner ed Ilog Jordan legan na iskursyon na eskuelaan da. Kayari na sayan trahedya, agla labay nen nanay ko so manayam ed Rām Allāh, kanian inmalis kami ed Atenas, Gresya, sanen taloy taon ko ni labat.

Nadngelan na Pamilya Mi so Katuaan ed Biblia

Ag-abayag kasabi mi ed Gresya, say sankapanguloanan a kuyak a si Nikos, a 22 años ed saman,  so akapitongtong ed saray Estudyante na Biblia, say pananawag ed saray Tasi nen Jehova nensaman. Diad impakagamor toy pikakabat ed Biblia, sikatoy malikeliket tan agaylay seseg to ed Makristianon ministeryo. Lapud satan et sinmanok si tatay ko, kanian pinataynan to’d abung si Nikos. Balet, sano manbiahe so tatay ko ed Palestina, si nanay, say atsik, tan siak so mimila ed si Nikos diad Makristianon pantitipon. Nanonotan ko ni so pandinayew a maong nen nanay ed saray narerengelan to diad saraman a pantitipon. Balet ag-abayag, sikatoy akanser tan inatey diad edad a 42. Legan na saman a mairap a panaon, si atsik Ariadne so maaron angasikaso ed pamilya mi. Anggaman malangwer ni, sikatoy nagmaliw a pinagka-inak ed loob na dakel a taon.

Siak so naynay ya ipipila nen tatay ko diad Orthodox Church sano sikatoy wala’d Atenas, tan anggan sanen inatey la, intultuloy ko so mimimisa, balet ta aliwa lan onman kabetbet. Lapud anggapo so nanenengneng kon mangaagamil na maridios a debosyon diad simbaan, tinundaan ko lay mimisa diad kaunoran.

Kayari na impatey nen tatay ko, akaromog ak na permanentin trabaho diad ministry of finance. Balet, si kuyak et indeboto toy bilay to ed panangipulong na Panarian, a nanlingkor diad Gresya ed loob na dakel a taon. Nen 1934, sikatoy inmalis ed Cyprus. Diad saman a panaon et anggapo ni iray bautismadon Tasi nen Jehova diad satan ya isla, kanian pribilehyo to ya ilaknab so panagpulong diman. Kayari na kasal to, si Galatia, ya asawa to, so nanlingkor met bilang sigpot-panaon a ministro ed loob na dakel a taon. * Sikami so mabetbet a papawitan nen Nikos na saray libro tan magasin a nibase ed Biblia, balet mataltalag min bukayen iratan. Sikatoy nampirmi diad Cyprus anggad impatey to.

Say Impangipapusok ed Katuaan na Biblia

Nen 1940, si George Douras, a maseseg a Tasi ed Atenas tan kaaro nen Nikos, so dinmalaw ed sikami tan inimbitaan to kamin mibiang ed melag a grupo na saray manaaral na Biblia diad abung to. Maliket min inawat so imbitasyon to. Ag-abayag et innabang mi met la ed arum iray naaaralan mi. Say impakawalaan mi na pikakabat ed Biblia so amakiwas ed sikami nen atsik pian idedikay bilay mi ed si Jehova. Abautismoan si Ariadne nen 1942, tan siak et nen 1943.

Sanen anampot lay Guerra Mundial II, inimbitaan kami nen Nikos ya onla ed Cyprus, kanian nen 1945 et inmalis kami ed Nicosia. Aliwan singa diad Gresya, bulos so kimey a panagpulong diad Cyprus. Aliwan diad panagkabkaabungan a ministeryo labat so pibibiangan mi noagta dia met ed panagpulong ed karsada.

Duay taon ed saginonor, kinaukolan nen Ariadne so ompawil ed Gresya. Akabat to diman so magmaliw ya asawa to, a kaparan managdayew ed si Jehova, kanian sikatoy nampirmi ed Atenas. Ag-abayag et siak so pinaseseg na bayaw ko tan say atsik ya ompawil ed Gresya pian manlingkor bilang sigpot-panaon a ministro diad kabisera. Lapud abayag lan kalat ko so magmaliw a payunir, pinmawil ak ed Atenas, a babaleg ditan so pankaukolan.

Nilukas Iray Balon Pankanawnawa

Nen Nobyembre 1, 1947, ginmapo ak a nampayunir, a manguusar na 150 ya oras ed panagpulong kada bulan. Maawang so teritorya na kongregasyon mi, tan kinaukolan ko so manakar na arawi. Anggaman ontan et nanggayagaan ko so dakel a bendisyon. Mabetbet ya eerelen na popolis so siopaman a Tasi a nanengneng dan manpupulong odino onaatendi ed Makristiano iran pantitipon, kanian ag-abayag et siak so inerel da.

 Inakusaan da ak na proselitismo, a sakey ya ambelat a kasalanan diad saman a panaon. Asentensiaan ak na duaran bulan ed Averof Women’s Prison diad Atenas. Asabian ko diman so sakey a Tasi, tan nanggayagaan min dua so makapaliket tan makapabiskeg a Makristianon ulopan anggaman wala kami ed loob na prisoan. Sanen anampot lay sentensiak, maliket ak ya angituloy ed panagpayunir ko. Dakel ed saramay datin inyaralan ko na Biblia so siansia nin matoor a manlilingkor ed si Jehova, tan satan so amaliket a maong ed siak.

Nen 1949, akaawat ak na imbitasyon a manaral ed koma-16 a klase na Watchtower Bible School of Gilead diad Estados Unidos, a diman so pangipapasalan ed saray manlilingkor a sigpot-panaon parad misionaryon kimey. Siak tan saray kapamilyak so aliketan. Diad saman et implanok so onatendi ed internasyonal a kombension ed New York City nen tiagew na 1950, insan ak la nanaral ed Gilead.

Kasabik ed Estados Unidos, apribilehyoan ak a manlingkor bilang housekeeper ed loob na pigaran bulan diad sankamundoan a hedkuarter na saray Tasi nen Jehova ed New York City. Say kaliberliber diman so malinlinis, makapaliket, tan makapabiskeg, tan nakakalimog ko iray maimis ya agagin lalaki tan bibii. Agko nalingwanan so makapaliket ya impanayam ko diman ed loob na anem bulan. Kayari na satan et siak lay nanaral ed Gilead School, a no iner et aganggano a linmabas so limay bulan ya impasyan panagaral tan panangibangat. Amoria mi ran estudyante a mabmabli tan alay abig so pikakabat manlapud Kasulatan, tan satan so lalon amaliket ed sikami tan amaaralem ed pilalek mi ya inabang ed arum so manangiter-bilay a pikakabat ed katuaan.

Say Primeron Asainmin Ko Bilang Misionaryo

Diad Gilead School, naabuloyan kamin manpili na saray nakaulop mi sakbay min awaten iray asainmin mi bilang misionaryo. Say kaulop ko et si Ruth Hemmig (Bosshard la natan), a maomaong ya agin bii. Sikami nen Ruth so aliketan a maong sanen naawat mi so asainmin mi ed Istanbul, Turkey​—a walad nansangaan na Asia tan Europa! Amta mi ya agni legal a bibidbiren so kimey a panagpulong ed satan a bansa, balet matalek kami a tulongan kami nen Jehova.

Say Istanbul et sakey a marakdakep tan abalbaleg a syudad. Diman et wala so dakdakel a lakoan, nanduruman klase na masasamit a luto ed interon mundo, makapainteres iran museum, makapaliket a kaliberliber, tan makapasagyat a pasen ed gilig na dayat. Mas importante, aromog mi diman iray masimoon a totoo a malabay a makaaral nipaakar ed Dios. Say melag a grupo na saray Tasi ed Istanbul et manunan tutugyopen na saray Armenyano, Griego, tan Judio. Balet, dakel ni so nanlalapud arum a bansa, kanian makatulong so pakapansalita na nanduruman lenguahe, laktip lay Turko. Nanggayagaan min maong so impakapitongtong ed totoo a nandurumay nasyonalidad a napepegaan ed katuaan. Dakel ed saraya so siansia nin matoor a manlilingkor ed si Jehova.

Makapaermen ta agla makala na balon residence permit si Ruth, kanian sikatoy kapilitan ya ontaynan ed bansa. Intuloy to so sigpot-panaon a serbisyo to diad Switzerland. Diad inlabas na saray taon, naiiliwan ko ni anggad natan so makapaliket tan makapabiskeg ya ulopan mi.

Inyalis Ko ed Sananey a Parte na Mundo

Nen 1963, agak la makala na balon residence permit ed Turkey. Mairap parad siak a taynanan iray kaparan Kristiano a nanenengneng kon onaaligwas ed espiritual legan a pambabanikelan dan talonaan so dakel a kairapan. Ta pian napaseseg ak, saray kapamilyak so mabunlok a nambayar ed pamasahek a paonla ed New York  City ta pian makaatendi ak ed kombension diman. Agko ni naawat ed saman so onsublay ya asainmin ko.

Kayari na kombension, siak so nibaki ed Lima, Peru. Manlapud New York et dinmiretso ak la ed balon asainmin ko, a kaibay malangwer nin agin bii a magmaliw a kaulop ko. Nanaral ak na Español tan nanayam ak ed ayaman na misionaryo a walad tagey na sangan opisina na saray Tasi nen Jehova. Makapalikliket so manpulong tan makapikabat ed saray agagi diman.

Sananey ya Asainmin tan Sananey a Lenguahe

Asabi panaon, saray kapamilyak a walad Gresya so ginmapon akasagmak na saray epekto na itatakken tan ikakapuy na bunigas. Agda ak pinaskar a balot ya ontunda la ed sigpot-panaon a serbisyo tan ompawil ed say tatawagen a normal a bilay pian tulongan ira. Balet, kayarik a ninonot a maong itan tekep na pikakasi, amoriak a magmaong no manlingkor ak diad lugar ya asingger ed pamilyak. Saray agagi ed sanga so maaron inmabobon tan imbaki da ak ed Italya, tan inyopresi na saray kapamilyak a gastosan so pasahek diad iyalis ko. Naamtaan ko a baleg manaya so pankaukolan parad saray ebanghelisador diad Italya.

Kinaukolan ko lamet so manaral na sakey a balon lenguahe, salanti, Italyano. Say primeron asainmin ko et diad syudad na Foggia. Diad saginonor et niyalis ak ed Naples, a babaleg diman so pankaukolan. Say teritoryak et diad Posilipo, sakey ed saray sankarakpan a lugar ed Naples. Maaw-awang itan a lugar, tan saksakey so manangipalapag na Panarian. Nanggayagaan kon maong so kimey, tan tinulongan ak nen Jehova a makapangigapo na dakel a panangiyaral ed Biblia. Asabi panaon et aporma so sakey a baleg a kongregasyon ed satan a lugar.

Say sankaunaan ed saray totoo diman ya inyaralan ko na Biblia et sakey ya ina tan say apatiran ananak to. Sikato tan say duaran anak ton bibii so siansia nin Tasi nen Jehova. Wala met so inyaralan kon sanasawa a walaan na ugaw nin anak a bii. Sikaran sankapamilyaan so inmaligwas ed katuaan tan insimbolo ra so dedikasyon da diad bautismo ed danum. Natan et akiasawa la so anak da ed sakey a lakin matoor a lingkor nen Jehova, tan sikaran dua so maseseg a manlilingkor ed Dios. Legan kon iyaaralan na Biblia so sakey a baleg a pamilya, nandinayewan ko so pakapanyari na Salitay Dios. Sanen babasaen mi so pigaran teksto a mangipapabitar ya ag-aabobonan na Dios so pangusar na imahen ed panagdayew, agla inalagar na ina a nasumpal so panagaral. Tampol ya inekal to so amin ya imahen ed abung to!

Niiyan ed Kapeligroan Diad Dayat

Sano manbiahe ak a papawil-patubo diad Italya tan Gresya, siak so mabetbet ya onlulugan ed barko. Kaslakan et makapaliket a tuloy so panagbiahe. Balet miduma imay aminsan ya impanbiahek diad tiagew na 1971. Papawil ak la ed Italya tan akalugan ak ed bapor a Heleanna. Diad palbangon na Agosto 28, walay biglan pinmool diad kusina na bapor. Kinmayat so apoy kanian agulo iray pasahero. Naelew-elew iray bibii, manakis iray ugugaw, tan saray lalaki et manrereklamo tan mamapagyaw. Manlulumbaan iray totoo ya onlugan ed saray panagsalban-baloto a walad balang diking na kubyerta na barko. Anggaman ontan, dagdaiset iray dyakit a pampaletaw, tan saray lubir et agmakayarin mangipaleksab ed saray panagsalban-baloto. Anggapo so dyakit ko, kanian say makabat labat a nagawaan ko et say ontaboy ed dayat.

Sanen wala ak la ed danum, walay bii ya akasulong na dyakit a manletletaw ed abay  ko. Ompatnag ya agto amtay onlangoy, kanian inegnaan ko so taklay to tan ingguyor ko ya inyarawi ed onlelereg a bapor. Angkakabaleg la so daluyon, tan naknaksawan ak lan maong lapud pipiliten koy manpaletaw. Singano anggapo la so ilalo, balet nantultuloy ak a kinmerew na tulong ed si Jehova a makapanpakpel ak, tan saya so amakasil ed siak. Anggapo lay nanononotan ko noag say inkakneb a naeksperiensya nen apostol Pablo.​—Gawa kapitulo 27.

Legan kon akapeket ed samay kaibak, sinubak iray daluyon ed loob na apat oras, a linmangoy ak kapag no onkasil ak tan kinmerew ak na tulong ed si Jehova. Diad kaunoran, walay abantag kon onaasingger a baloto. Nisalba da ak, balet samay kaibak et inatey la. Kasabi mi ed baley na Bari, Italya, inyakar da ak ed ospital, a diman et nireremedyoan da ak. Kinaukolan koy mansiansia ed ospital ed pigaran agew, tan dakel a Tasi so binmisita ed siak, a mapangasin angitarya ed amin a nakaukolan ko. Say Makristianon aro ya impatnag da so nandinayewan a tuloy na arum a kakuartoan ko’d ospital. *

Sanen inmabig ak lan maong, siak so nibaki ed Roma. Inyasain da ed siak so pasen na negosyo diad sentro na syudad, a ditan so nankimeyan ko ed loob na limay taon, diad tulong nen Jehova. Diad interon 20 a taon, nanggayagaan ko so ministeryok diad Italya, tan abayuboan ko so panangaro ed saray Italyano.

Pinmawil Ak ed Nanlapuan Ko

Sinmabi panaon a kinmapuy lan tuloy so bunigas nen Ariadne tan say masiken to. Inisip ko a no manayam ak diad asingger ed sikara, anggan panon et makabales ak ed amin a maaron ginawa ra parad siak. Aksobien ko ya ansakit ed linawak so itaynan ed Italya. Balet, inmabuloy iray agagi ed sangan opisina, kanian manlapu ed tiagew na 1985, diad Atenas la so nampayuniran ko, a diman so ginapoan kon nanlingkor a sigpot-panaon nen 1947.

Diad teritorya na mismon kongregasyon mi so nampulongan ko, tan kinerew ko diad sangan opisina no nayari ak met a manpulong ed pasen na negosyo diad sentro na syudad. Saya so kinimeyan ko ed loob na taloy taon a kaulop ko so sakey a payunir. Sikami so sigpot ya akapantasi ed saray totoo a matalag a naromog ed abung.

Diad ilalabas na panaon, lawas ombibiskeg so pilalek kon manlingkor balet ta onkakapuy la so laman ko. Inatey la so bayaw ko, tan si Ariadne, a nagmaliw a singa inak, so agla makanengneng. Nibagak a maabig so bunigas ko legan na saray taon na impanlingkor ko a sigpot-panaon. Balet, diad agano ni et akaruskos ak ed marmol a takayan tan aputer so kawanan a taklay ko. Insan naplag ak kanian apiley so balambang ko. Siak so kinaukolan ya operaan tan abayag a wala ak ed dukolan. Natan et ngalngali agak la makapanakar-akar. Manbabaston ak la tan makapaway ak labat no wala so mangitabin ed siak. Siansia ni et gagawaen ko so anggaay nayarian ko, a maniilalo ak ya onabig ni so bunigas ko. Say pibibiang ed kimey a panagbangat ed Biblia, anggaman diad limitadon paraan, so lawas manunan mamapaliket tan mamepenek ed siak.

Sano nanonotan ko so maliket iran taon ya inusar ko diad sigpot-panaon a ministeryo, say pusok so manleppua na pisasalamat ed si Jehova. Sikato tan say mangaraldalin a kabiangan na organisasyon to so lawas angitarya na maabig a panangidirehi tan makanakanan tulong, a tinmulong ed siak a nagawaan so anggaay nayarian ko diad impangusar ed bilay ko ed panaglingkor ed sikato. Masimoon kon kekerewen ed si Jehova a pabiskegen to ak ni pian makapantultuloy ak a manlingkor ed sikato. Panliketan ko so melag a nagagawaan ko ed sankamundoan a panagbangat ed Biblia ya ididirehi to.​—Malaquias 3:10.

[Saray paimano ed leksab]

[Litrato ed pahina 9]

Kaibak si atsik Ariadne, tan say masiken to a si Michalis, sanen onla ak la’d Gilead

[Litrato ed pahina 10]

Sikami nen Ruth Hemmig so nibaki ed Istanbul, Turkey

[Litrato ed pahina 11]

Diad Italya, diad kagapo na dekada na 1970

[Litrato ed pahina 12]

Kaibak si atsik Ariadne natan