“Maliket Iramay Sinononot ed Espiritual a Pankaukolan Da”

SANO naliing ed kabuasan iray billit, sipor la iran man-uni a magano insan la ontekkiab pian mananap na naakan. Diad labi, ompawil ira ed ubong da, man-uni lamet a magano, insan la naugip. Walaray tiempo a sikaray mankabisa, maniknol, tan mamabaleg ed sibong da. Onia met so sikulo na bilay na arum ya ayep.

Sikatayoran totoo et duma. Tua a mamangan, nauugip, tan maniilalak itayo, balet dakel ed sikatayo so agkontento ed saratan labat a bengatla. Labay tayon amtaen no akin a wadia itayo. Aanapen tayo so kabaliksan na bilay tayo. Labay tayo met so nawalaan na ilalo ed arapen. Sarayan mas aralem a pankaukolan so mangipapabitar ed kalidad a nikadkaduma ed totoo​—say espiritualidad, odino say pankaukolan tan kapasidad parad maespiritual iran bengatla.

Apalsa Unong ed Indengan na Dios

Ipapaliwawa na Biblia so rason no akin a nisipor la ed too so pankaukolan to ed espiritual, a mangibabagan: “Say Dios pinalsa to so too ed indengan ton dili, dia ed indengan na Dios sikato so pinalsa to; say laki tan say bii pinalsa to ra.” (Genesis 1:27) Say inkapalsa tayo unong “ed indengan na Dios” et mankabaliksan ya anggaman sikatayoy amatikan na kasalanan tan ag-ayadyari, walaan itayo na abilidad a mangipatnag na pigaran kalidad na Dios. (Roma 5:12) Alimbawa, walay abilidad tayon mandesinyo odino mangimbento. Walaan itayo met na kakabatan, inkahustisya, tan abilidad a mangipatnag ed balang sakey na aron atekepan na dilin-panagsakripisyo. Sakey ni, sarag tayon nonoten so apalabas tan manplano parad arapen.​—Uliran 4:7; Eclesiastes 3:1, 11; Miqueas 6:8; Juan 13:34; 1 Juan 4:8.

Say espiritual a kapasidad tayo so mabitabitar a napatnagan ed nisipor a pilalek tayon mandayew ed Dios. Anggad agtayo suston napenek so pankaukolan a misiglaotan ed Manamalsa tayo, agtayo naromog so peteg tan magnayon a liket.  “Maliket iramay sinononot ed espiritual a pankaukolan da,” so inkuan nen Jesus. (Mateo 5:3, NW) Balet, nepeg tayon pagaan a peneken itan a pankaukolan panamegley na espiritual a katuaan​—saray katuaan nipaakar ed Dios, saray estandarte to, tan say gagala to parad katooan. Iner so pakaromogan tayo na espiritual a katuaan? Naromog tayo itan diad Biblia.

‘Say Salitam so Katuaan’

Oniay insulat nen apostol Pablo: “Amin a sulat ya impuyan na Dios sikato met so maabig a pakaaralan, pakasumalan, pakasimbawaan, tan pakapanontonan.” (2 Timoteo 3:16) Saratan a salita nen Pablo et mitunosan ed saray imbalikas nen Jesus diad pikakasi to ed Dios: “Say salitam sikato so katuaan.” Natan, amta tayo a satan a Salita et say Masanton Biblia, kanian makabat so pangusisa tayo no kasin mitunosan ed satan iray sisiaen tan estandarte tayo.​—Juan 17:17.

No ikokompara tayo iray sisiaen tayo diad Salitay Dios, aaligen tayo iramay taga-Berea nensaman, a sineguro ra no kasin mitunosan ed Kasulatan iray bangat nen Pablo. Imbes a kritikoen nen Lucas iray taga-Berea, kinomendaan to ira lapud awawey da. “Inako ra so salita ed sipaparaan a nonot,” so insulat to, ya “inagew-agew ya inusisa ra so sulat, no peteg so sarayan bengatla.” (Gawa 17:11) Lapud ondarakel natan so mansusumlangan a bangat nipaakar ed relihyon tan moral, importante ya aligen tayo so ehemplo na saray makabat a taga-Berea.

Say sakey nin paraan a nabidbiran tayo so espiritual a katuaan et diad pangimano ed no panon itan a mangiimpluensya ed bilay na totoo. (Mateo 7:17) Alimbawa, say pambilay unong ed katuaan na Biblia et nepeg a manpagmaliw ed sakey a too a magmaong ya asawan laki, ama, bii, odino ina, a diad ontan et lalon onliket so pamilya tan lalon nalikna na sakey so inkakontento. “Mapalar so saray ondengel ed salita na Dios, tan sikatoy unoren da,” so inkuan nen Jesus.​—Lucas 11:28.

Ipapanonot ed sikatayo na saray salita nen Jesus iray salitan imbalikas na mangatatawen ya Ama to ed saray Israelita nensaman: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon. O no komon ta dinengel mo so saray bilin ko! Dia ed ontan say deen mo singa komon sakey ya ilog, tan say inkatunong mo singa komon daluyon na dayat.” (Isaias 48:17, 18) Amin a mangaaro ed kamaongan tan inkatunong et seguradon napakiwas ed satan a maaron kerew!

Kinaliktan na Arum so “Dilin Kaalakan na Laman Da”

Onman so masimoon ya imbalikas na Dios ed saray Israelita lapud apalikdo ira ed saray relihyoson katilaan. (Salmo 106:35-40) Nepeg itayo met a manalwar sumpad saray katilaan. Oniay insulat nen Pablo nipaakar ed saray mankuan a Kristiano: “Onsabi so panaon ya agda nitepel so maabig a bangat; noag ingen dia ed kiwala na gatel ed laman da mantipon ira ed saray managbangat ed sikara; unong ed saray dilin kaalakan na laman da. Et itaynan da so saray pandengel da ed tua.”​—2 Timoteo 4:3, 4.

Saray lider na relihyon so singa mangikiki ed kalayagan na totoo diad pangokonsenti ra ed saray agamil a mangisasagyat na mauges a pilpilalek, a singa say pisekso ed ag-asawa,  homoseksualidad, tan panagbuanges. Ipapabitar na Biblia a saramay mangaabobon tan mangaagamil ed saratan a bengatla et “agda natawir so panariay Dios.”​—1 Corinto 6:9, 10; Roma 1:24-32.

Seguradon nakaukolan so inkakpel pian makapambilay unong ed saray estandarte na Biblia, nagkalalo la sano balbalawen, balet ta posiblin nagawaan itan. Dakel ed limog na saray Tasi nen Jehova so datin adik, managbuanges, milalawanan, maton, matakew, tan matila. Ingen, impapuso ra so Salita na Dios tan diad tulong na masanton espiritu et inuman day kabibilay da ta pian ‘makapankurang ira a makana ed si Jehova.’ (Colosas 1:9, 10; 1 Corinto 6:11) Lapud impakapipulangan da ed Dios, agamoran da met so kareenan na nonot tan, unong a naseguro tayo, say tuan ilalo parad arapen.

Say Ilalo a Panarian

Say nibase ed Biblia ya ilalon magnayon a kareenan parad matulok a totoo et nasumpal panamegley na Panarian na Dios. “Onsabi komon so panarian mo. Nagawa komon so linawam, unong ed tawen, ontan met ed dalin,” so inkuan nen Jesus diad modelon pikakasi to. (Mateo 6:10) On, say Panarian na Dios lambengat so makapangiseguro a nagawa so linawa na Dios diad dalin. Akin? Lapud satan a mangatatawen a Panarian​—a sakey a gobierno ya uleyan nen Jesu-Kristo​—so paraan na Dios pian nipatnag a Sikatoy manepeg a soberano ed interon dalin.​—Salmo 2:7-12; Daniel 7:13, 14.

Bilang Ari na satan a mangatatawen a Panarian, si Jesu-Kristo so mangibulos ed matulok a totoo manlapud amin a nengneng na panangaripen, laktip lay mabiskeg a panamanlong na Adanikon kasalanan tan say epekto na satan a sakit tan ipapatey. Oniay ibabaga na Apocalipsis 21:3, 4: “Nia, so tabernakulo na Dios wala ed saray totoo . . . Tan punasen [nen Jehova a Dios] so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.”

Ontalona so magnayon a kareenan ed interon dalin. Akin a makaseguro itayo ed satan? Niparungtal so rason diad Isaias 11:9, ya angibagan: “[Saray uuleyan na Panarian et] ag-ira naani mamaunong odino mamagbag dia ed amin a masanto a palandey ko; ta say dalin napano naani ed pikakabat ed Jehova, singa saray danum sakbongan  da so dayat.” On, amin a too diad dalin so nawalaan na suston pikakabat ed Dios tan magmaliw lan matulok ed sikato. Agta makapaliket ed sikayo itan ya ilalo? No ontan, natan la so panaon pian onggamor na mablin “pikakabat ed Jehova.”

Kasin Ontalineng Ka ed Mensahe na Panarian?

Diad panamegley na Panarian et paandien la na Dios so amin a kimey nen Satanas tan mangibangat ed totoo nipaakar ed saray matunong a dalan To. Kanian, agla pankelawan no akin ya akasentro ed Panarian so bangat nen Jesus. “Kaukolan ko met ya ipulong ko so ebanghelyo na panariay Dios,” so inkuanto, “ta sikato’ya so nibakian ko.” (Lucas 4:43) Ingganggan nen Kristo iray babangatan to ya inabang da itan a parehon mensahe ed arum. (Mateo 28:19, 20) Impasakbay to: “Saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi so anggaan.” (Mateo 24:14) Asingsingger lan tuloy itan ya anggaan. Agaylan importante sirin ya ontalineng iray matuan-impanpuson totoo ed manangisalbay-bilay a maong a balita!

Si Albert, ya asalambit ed akaunan artikulo, so akadngel ed mensahe na Panarian sanen say asawa to tan anak ton laki et ginmapon impaiyaralan na Biblia ed saray Tasi nen Jehova. Diad gapo et manduaruwa si Albert. Kinerew to ni ingen ed sakey a lokal a pari a dalawen so asawa to tan anak to pian niwalwal iray Tasi. Balet aglabay na pari so mibali. Kanian denesidi nen Albert so ondengel ed pantotongtong ed Biblia ta pian naromog iray antokaman a lingo. Kayari na sakey labat a sesyon, sikatoy akibiang met la ed panagaral, a magunaet a makaaral ni na dakel. Impaliwawa to ed saginonor no akin ya anguman so awawey to. “Saya imay abayag lan aanapen ko,” so inkuan to.

Apenek a siansia so espiritual a pankaukolan nen Albert, tan agton balot nagbabawian itan. Aromog to ed katuaan na Biblia so abayag lan aanapen to ed bilay to, salanti, say solusyon ed ag-inkahustisya tan inkabulok a kasmak ed sosyedad tan say ilalo parad arapen. Say katuaan ed Biblia so angiter ed sikato na kareenan na nonot. Kasin napepenek so espiritual a pankaukolan mo? Akin ta no basaen mon magano iray tepet a nidatak ed kahon diad pahina 6? No labay mo so kaaruman nin impormasyon, maliket iray Tasi nen Jehova ya ontulong ed sika.

[Kahon/Saray litrato ed pahina 6]

KASIN NAPEPENEK SO ESPIRITUAL A PANKAUKOLAN MO?

Kasin napepenek ka ed espiritual a tagano a naaawat mo? Pasesegen mi ka a basaen so onggendan iran tepet tan markaan iramay naebatan mo na susto.

□ Siopa so Dios, tan anto so ngaran to?

□ Siopa si Jesu-Kristo? Akin a sikatoy kinaukolan ya ompatey? Panon kan nagunggonaan ed impatey to?

□ Wala ta so Diablo? No ontan, iner so nanlapuan to?

□ Antoy nagawa ed sikatayo sano ompatey itayo?

□ Anto so gagala na Dios ed dalin tan ed katooan?

□ Anto so Panarian na Dios?

□ Antoray estandarte na Dios nipaakar ed moral?

□ Antoran betang so inter na Dios ed asawan laki tan asawan bii diad loob na pamilya? Antoray pigaran prinsipyo ed Biblia a lalon mamaliket ed pamilya?

No agka segurado ed ebat mo ed dinanman ed saratan a tepet, nayarian moy onkerew na kopya na brosyur ya Anto so Kakaukolanen na Dios ed Sikatayo? Sayan brosyur ya impalapag na saray Tasi nen Jehova ed ngalngalin 300 a lenguahe so manisingbat ed 16 a manuna iran tema ed Biblia tan mangitatarya na Makasulatan ya ebat ed amin a tepet a nidatak ed tagey.

[Saray litrato ed pahina 4]

Aliwan singa saray ayep, saray totoo et walaan na espiritual a pankaukolan

[Litrato ed pahina 5]

‘Mantipon ira na saray managbangat ed sikara unong ed saray dilin kaalakan na laman da.’​—2 Timoteo 4:3

[Litrato ed pahina 7]

Niwala so magnayon a kareenan diad panamegley na Mesianikon Panarian na Dios