Maong a Balita Parad Totoo ed Amin a Nasyon

“Sikayo so tasik . . . angga ed kasampotan na dalin.”​—GAWA 1:8.

1. Bilang managbangat na Biblia, anto so imanoen tayo, tan akin?

 SARAY marunong a managbangat so aglambengat maniimano ed no anto so ibaga ra ed estudyante ra noagta no panon da met itan ya ibaga. Ontan met so gagawaen tayo bilang managbangat na katuaan na Biblia. Iimanoen tayo so mensahe ya ipupulong tayo tan saray metodo ya uusaren tayo. Say mensahe tayo, salanti say maong a balita na Panarian na Dios, so agmanguuman, balet iyaadapta tayo iray metodo tayo. Akin? Pian nasabi so dakel a totoo anggad posible.

2. Sano iyadapta tayo iray metodo tayo ed panagpulong, siopara so aaligen tayo?

² Diad pangiyaadapta tayo ed saray metodo tayo ed panagpulong, aaligen tayo iray lingkor na Dios nensaman. Alimbawa, nodnonoten pa si apostol Pablo. Oniay imbaga to: “Dia ed saray Judio, nagmaliw ak a singa Judio, . . . dia ed saray anggapo so ganggan, singa anggapo so ganggan, . . . dia ed saray makapuy nagmaliw ak a makapuy, pian naalak so saray makapuy: nagmaliw ak ya ami’ ganagana ed amin day totoo, ta pian dia ed ami’ gawa nilaban ko so saray arum.” (1 Corinto 9:19-23) Epektibo so metodo nen Pablo diad pangiyaadapta to ed panagbangat to. Magmaliw itayo met ya epektibo no makonsidera tayon uman-umanen iray presentasyon tayo pian nitukoy ed saray indibidual a nakakatongtong tayo.

Angga ed “Sampot na Dalin”

3. (a) Anton angat so aarapen tayo diad panagpulong a kimey? (b) Panon a nasusumpal natan iray salita na Isaias 45:22?

³ Say manunan angat ya aarapen na saramay mangipupulong ed maong a balita et say kabaleg na teritorya​—say “sankamundoan.” (Mateo 24:14) Diad imbeneg a siglo, nansagpotan na dakel a lingkor nen Jehova a sabien iray balon teritorya ta pian nikayat so maong a balita. Anto so  resulta? Makapakelkelaw ya inlaknab ed sankamundoan. Diad gapo na koma-20 siglo, say panagpulong so nireport ed pigara lambengat a daldalin, balet diad kaplesan et aktibo iray Tasi nen Jehova ed 235 a daldalin! On, say maong a balita na Panarian so niyaabawag anggad “sampot na dalin.”​—Isaias 45:22.

4, 5. (a) Sioparay walaan na importantin betang ed panangikayat na maong a balita? (b) Anto so imbaga na pigaran sangan opisina nipaakar ed saramay nanlalapud arum a bansa a manlilingkor diad teritorya na sanga?

⁴ Antoray rason ed ontan ya iyaaligwas? Dakel. Baleg so nitutulong na saray misionaryo a nipasal ed Watchtower Bible School of Gilead tan, diad agano ni et masulok a 20,000 a nangraduar ed Ministerial Training School. Wadtan met so dakel a Tasi a namboluntaryon inmalis ed saray bansa a babaleg so pankaukolan parad saray manangipalapag na Panarian. Saratan a masakripisyon Kristiano​—lalaki tan bibii, malangwer tan matakken, mansusulo tan de-asawaan​—so walaan na importantin betang ed panangipulong ed mensahe na Panarian diad interon dalin. (Salmo 110:3; Roma 10:18) Sikara so papablien a tuloy. Imanoen so insulat na pigaran sangan opisina nipaakar ed saramay linma ed arum a bansa pian manlingkor ed lugar a babaleg so pankaukolan a walad teritorya na sanga.

⁵ “Sarayan pinablin Tasi so mangidadaulo ed panagpulong ed niyarawi iran lugar, ontutulong a mamorma na balo iran kongregasyon, tan ontutulong ed espiritual ya ibubulaslas na lokal ya agagi.” (Ecuador) “No ontaynan so nilasus a sankaili a manlilingkor dia, naapektoan so biskeg na kongregasyon. Bendisyon so pakapiiba mi ed sikara.” (Dominican Republic) “Karaklan ed kongregasyon mi et baleg a porsiento na agagin bibii, a no maminsan et anggad 70 porsiento. (Salmo 68:11) Maslak ed sikara et balo ni ed katuaan, balet saray mamarikit a payunir a nanlalapud arum a bansa so mangitatarya na mabmablin tulong diad pangipapasal ed saratan a balo ni. Sarayan agagin bibii a nanlalapud arum a bansa  so tuan langkap ed sikami!” (Sakey a bansa ed Bukig a Europa) Kasin inisip yo la so manlingkor ed arum a bansa? *​—Gawa 16:9, 10.

‘Samploran Lalaki a Manlapu ed Amin a Pansasalita’

6. Panon ya ipapabitar na Zacarias 8:23 so angat ed panagpulong tayo lapud panduruma na lenguahe?

⁶ Say sakey nin manunan angat et say pandurumaan na lenguahe diad interon mundo. Oniay impasakbay na Salitay Dios: “Dia ed saraman ya agew nagawa naani a samploran lalaki ompeket ira naani, manlapu ed saray amin a pansasalita na saray nasyon, sikara naani ompeket ed saloy na kawes na saman so Judio, a kuan da, Sikami mila kami naani ed sikayo, ta sikami nadngelan mi a say Dios wala ed sikayo.” (Zacarias 8:23) Diad modernon kasumpalan na sayan propesiya, say samploran lalaki so mangirerepresenta ed baleg ya ulop, a nipropesiya ed Apocalipsis 7:9. Balet ta imanoen ed propesiya nen Zacarias a say “samploran lalaki” so aglambengat manlapu ed amin a nasyon noagta ‘manlapu met ed amin a pansasalita na saray nasyon.’ Anengneng tayo la kasi so kasumpalan na sayan importantin detalye na propesiya? On!

7. Antoran estatistika so mangipabitar a saray totoo ed “amin a pansasalita” so napapasabian na maong a balita?

⁷ Konsideraen tayo so pigaran estatistika. Limamplon taon ed apalabas, say literatura tayo so nipalapag ed 90 a lenguahe. Natan, satan a bilang so tinmagey a nagmaliw lan masulok ya 400. Ginawa na “matoor tan makabat ya aripen” so amin a nayarian da pian nitarya so literatura anggan diad lenguahen sasalitaen labat na dagdaiset a totoo. (Mateo 24:45) Alimbawa, say literatura na Biblia so wala la natan ed Greenlandiko (sasalitaen na 47,000 a totoo), Palauano (sasalitaen na 15,000), tan Yapese (sasalitaen na kulang a 7,000 a totoo).

Sakey a “Baleg a Kaput” ya Ompugta ed Balo Iran Pankanawnawa

8, 9. Anton nagagawa so angilukas na “baleg a kaput” parad sikatayo, tan panon so inkiwas na nilibon Tasi?

⁸ Balet natan, nayarin agla nakaukolan so onla ni ed arum a bansa pian inabang so maong a balita ed totoo na amin a pansasalita. Diad imbebeneg a taon, say insabi na minilyon iran imigrante tan refugee ed maaligwas iran bansa so amawala na dakel a komunidad na saray imigrante a mansasalita na dakel a lenguahe. Singa bilang, diad Paris, Pransya et manga 100 a lenguahe so sasalitaen. Diad Toronto, Canada, say bilang et 125; tan diad London, Inglatera et masulok a 300 a sankailin lenguahe so sasalitaen! Say inkiwala na totoo a nanlapud arum a bansa diad dakel a teritorya na kongregasyon so mangilulukas na “baleg a kaput” a mangitonton ed balo iran pankanawnawa pian ninabang so maong a balita ed totoo na amin a nasyon.​—1 Corinto 16:9.

⁹ Nilibon Tasi so onkikiwas ed angat a panginabang ed maong a balita diad panaaral da na sananey a lenguahe. Parad karaklan ed sikara, mairap itan; ingen ta satan a panagbanikel et  natutumangan na liket lapud pakakatulong da ed saray imigrante tan refugee a makaaral na katuaan a naromog ed Salitay Dios. Nen imbeneg a taon, ngalngali 40 porsiento ed amin na saramay abautismoan ed saray distriton kombension diad sakey a bansa ed Sagur a Europa so nanlapud arum a bansa.

10. Panon yon uusaren so bokletan Good News for People of All Nations? (Nengnengen so kahon a “Saray Kabiangan na Bokletan Good News for People of All Nations,” ed pahina 26.)

¹⁰ Tua, maslak ed sikatayo et agmakayarin manaral na sankailin lenguahe. Anggaman ontan, makapibiang itayo ed pananulong ed saray imigrante diad pangusar tayon maong ed balon paway a bokletan Good News for People of All Nations, * a walaan na makapasagyat a mensahe na Biblia diad dakel a lenguahe. (Juan 4:37) Kasin uusaren yo iyan bokleta ed ministeryo yo?

Sano Ag-ondengel so Totoo

11. Anton kaaruman ya angat so aarapen diad arum iran teritorya?

¹¹ Legan ya ombibiskeg so impluensya nen Satanas diad dalin, walay angat a mas mabetbet a kipapaarapan, salanti, dagdaiset so ondengel ed arum iran teritorya. Siempre, sayan situasyon so aliwan makapasurprisa ed sikatayo, lapud impasakbay la nen Jesus ya onlesa so ontan a kipapasen. Oniay imbaga to nipaakar ed panaon tayo: “Say aro ray amayamay ombetel.” (Mateo 24:12) On, say pananisia ed Dios tan panagrespeto ed Biblia so naaandi la ed limog na dakel a totoo. (2 Pedro 3:3, 4) Kanian diad arum a parte na mundo et dagdaiset so nagmaliw a balon babangatan nen Kristo. Balet, ag-itan mankabaliksan a maapa so pansasagpot na pinabli tayon Kristianon agagi a matoor a manpupulong ed ontan iran teritorya ya anggapon tanto so ondengel. (Hebreos 6:10) Akin? Konsideraen so onggendan.

12. Anto so duaran gagala na panagpulong a kimey tayo?

¹² Ipapabitar na Ebanghelyo na Mateo so duaran manunan gagala na panagpulong a kimey tayo. Sakey la et pian ‘manggawa itayo na babangatan ed totoo na amin a nasyon.’ (Mateo 28:19) Say sananey et say mensahe na Panarian so onkanan “pamintuan” odino pantasi. (Mateo 24:14) Namparan importante iratan a gagala, balet nagkalalo lan makabaliksan iyay mikadua. Akin?

13, 14. (a) Anto so matalonggaring a kabiangan na tanda ed isabi nen Kristo? (b) Anto so nepeg a nodnonoten tayo, nagkalalo la ed panagpulong diad saray teritoryan daiset so ondengel?

¹³ Inkurit nen Mateo, a managsulat na Biblia, so intepet na saray apostol ed si Jesus: “Anto kasi so tanda ed isabim tan say anggaan na mundo?” (Mateo 24:3) Bilang ebat, imbaga nen Jesus a say sakey a matalonggaring a kabiangan na satan a tanda et say panagpulong a kimey ed interon mundo. Kasin say tutukoyen to et say panaggaway babangatan? Andi. Inkuan to: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones.” (Mateo 24:14) Diad ontan et impatnag nen Jesus a say kimey a panangipulong na Panarian et importantin kabiangan na tanda.

¹⁴ Kanian, legan tayon ipupulong so maong a balita na Panarian, tandaan tayo ya anggan agtayo lawas ontatalona ed panaggaway babangatan, ontatalona itayo ed panangiter na pantasi. Antokaman  so reaksion na totoo, amta ra no anto so gagawaen tayo, kanian walay betang tayo ed kasumpalan na propesiya nen Jesus. (Isaias 52:7; Apocalipsis 14:6, 7) Oniay inkuan nen Jordy, sakey a kalangweran a Tasi ed Sagur a Europa: “Makapaliket ed siak so pakaamta ya uusaren ak nen Jehova a makapibiang diad pananumpal ed Mateo 24:14.” (2 Corinto 2:15-17) Maseguron ontan met so nalilikna yo.

Sano Susumpaen so Mensahe Tayo

15. (a) Anto so impasakbay nen Jesus ed saray patumbok to? (b) Anto so makatulong ed sikatayo pian makapanpulong anggaman ed isusumpa?

¹⁵ Say pirmin isusumpa so mamapawala na sakey nin angat diad panangipulong na maong a balita na Panarian. Pinasakbayan nen Jesus iray patumbok to: “Gulaen da kayo naani na saray amin a nasyon nisengeg ed ngaran ko.” (Mateo 24:9) Singa met ed saray akadkaunan Kristiano, saray patumbok nen Jesus natan so bubusolen, susumpaen, tan papasegsegangen. (Gawa 5:17, 18, 40; 2 Timoteo 3:12; Apocalipsis 12:12, 17) Diad arum a bansa, sikara so peles a puntirya na pananebel na gobierno. Anggaman kuan, bilang katutulok ed Dios, saray tuan Kristiano diad saratan a bansa so mantutultuloy ed panangipulong ed maong a balita na Panarian. (Amos 3:8; Gawa 5:29; 1 Pedro 2:21) Anto so akatulong ed sikara pati ed arum niran Tasi ed sankamundoan, pian nagawaan itan? Sikara so papabiskegen nen Jehova diad panamegley na masanton espiritu to.​—Zacarias 4:6; Efeso 3:16; 2 Timoteo 4:17.

16. Panon ya impabitar nen Jesus so pansiglaotan na panagpulong a kimey tan say espiritu na Dios?

¹⁶ Indanet nen Jesus so pansiglaotan a maong na espiritu na Dios tan say panagpulong a kimey sanen oniay imbaga to ed saray patumbok to: “Mangawat kayo na pakayari, no onsabi ed sikayo so espiritu santo: et sikayo so tasik . . . angga ed kasampotan na dalin.” (Gawa 1:8; Apocalipsis 22:17) Makabkabaliksan so impantumbokan na saray ebento ed sayan teksto. Unona, saray babangatan so akaawat na masanton espiritu, insan sinumpal da so panagpulong ed interon mundo. Dia lambengat ed tulong na espiritu na Dios a nawalaan ira na biskeg pian makapansungdo ed pangiter na ‘pantasi ed amin a nasyon.’ (Mateo 24:13, 14; Isaias 61:1, 2) Kanian duga so impanukoy nen Jesus ed masanton espiritu bilang ‘say managligliwa’ odino mananulong. (Juan 15:26) Imbaga to a say espiritu na Dios so mangibangat tan mangigiya ed saray babangatan to.​—Juan 14:16, 26; 16:13.

17. Sano nipaarap itayo ed maruksanisusumpa, panon itayon tulongan na masanton espiritu?

¹⁷ Diad antoran paraan so panutulong na espiritu na Dios ed sikatayo natan sano nipaarap itayo ed maruksan isusumpa ed panangipulong ed maong a balita? Papabiskegen itayo na espiritu na Dios, tan onsusumpa itan ed saramay  mamapasegsegang ed sikatayo. Pian niyilustra itan, konsideraen pa so agawa ed bilay nen Arin Saul.

Sinumpa na Espiritu na Dios

18. (a) Anton mauge-uges a pananguman so agawa ed si Saul? (b) Antoran metodo so inkana nen Saul pian pasegsegangen si David?

¹⁸ Si Saul so walaan na maabig a gapo bilang unonan ari na Israel, balet diad saginonor et sikato so tinmunganga ed si Jehova. (1 Samuel 10:1, 24; 11:14, 15; 15:17-23) Bilang resulta, say espiritu na Dios so agla tinmulong ed ari. Si Saul so maramsak a sinmanok ed si David, a nilanaan bilang say ontumbok ya ari tan tutulongan la na espiritu na Dios. (1 Samuel 16:1, 13, 14) Si David so ompatnag a mainomay a puntiryaen. On, say sankabembenan to labat et arpa, bangta si Saul et akabemben na gayang. Kanian sakey ya agew sanen papatogtogen nen David so arpa to, “si Saul inggayang to so gayang; ta inkuan to, Sugaten ko si David angga ed bakor. Et si David pinmaliis ed arap to ya amidua.” (1 Samuel 18:10, 11) Kayari na satan et dinengel nen Saul so ilalak ton si Jonatan, say kaaro nen David, tan oniay insipan to: “Unong a si Jehova mabilay, [si David] so agpateyen.” Balet, ag-abayag et “sineetan [lamet nen Saul] a kabilen si David angga ed bakor ed gayang.” Anggaman ontan, si David so “pinmaliis ed arap nen Saul, et say bakor so akabil to ed gayang.” Batik si David, balet sikato so inusilan nen Saul. Diad saman a mapeligron panaon, say espiritu na Dios so sinmumpa ed si Saul. Diad anton paraan?​—1 Samuel 19:6, 10.

19. Panon so impanprotekta na espiritu na Dios ed si David?

¹⁹ Binmatik si David ed si propeta Samuel, balet imbaki nen Saul iray sundalo to pian mangerel ed si David. Anggaman ontan, sanen sinmabi ira ed panaamotan nen David, “say espiritu na Dios linma ed saray igaganggan nen Saul, tan sikara met namparles ira.” Sikara so dinaeg na espiritu na Dios kanian alingwanan da so misyon da. Amidua nin angibaki si Saul na lalaki pian papawilen da si David, tan amidua met ya agawa iman. Diad saginonor, si Arin Saul so linma ed si  David, balet ag-alabanan nen Saul so espiritu na Dios. Diad tua, say masanton espiritu so anaeg ed sikato diad ‘sanagew tan sanlabi’​—ya angiter ed si David na magenap a panaon pian makabatik.​—1 Samuel 19:20-24.

20. Anton leksion so naaralan tayo ed salaysay nipaakar ed impamasegsegang nen Saul ed si David?

²⁰ Sayan salaysay nipaakar ed si Saul tan David so walaan na makapabiskeg a leksion: Saray manamasegsegang ed saray lingkor na Dios so ag-ontalona sano sumpaen ira na espiritu na Dios. (Salmo 46:11; 125:2) Gagala nen Jehova a si David so manari ed Israel. Anggapo so makapanguman ed satan. Diad panaon tayo, denesidi la nen Jehova a ‘say maong a balita et nipulong.’ Anggapo so makaamper ed kagawa na satan.​—Gawa 5:40, 42.

21. (a) Panon so ikikiwas na arum ya onsusumpa natan? (b) Anto so napanmatalekan tayo?

²¹ Uusaren na pigaran relihyoso tan mapolitikan lider so katilaan tan anggan say karawalan pian mangamper ed sikatayo. Balet, no panon a sinalimbengan nen Jehova si David ed espiritual a paraan, ontan met so pansalimbeng To ed totoo To natan. (Malaquias 3:6) Kanian, singa si David, makompiyansa itayo a mangibagan: “Dia ed Dios so anginan ko na panmatale’ko: agak antakot; anto so nayarian na too a gawaen ed siak?” (Salmo 56:11; 121:1-8; Roma 8:31) Diad tulong nen Jehova, itultuloy tayo komon ya arapen so amin ya angat legan a susumpalen tayo so kimey ya ingganggan ed sikatayo na Dios a mangipulong ed maong a balita na Panarian diad totoo ed amin a nasyon.

[Saray paimano ed leksab]

Kasin Natandaan Yo?

• Akin ya iyaadapta tayo iray metodo tayo ed panagpulong?

• ‘Say baleg a kaput’ so mangitonton ed antoran nilukas a balon pankanawnawa?

• Anto so nasusumpal ed panagpulong a kimey tayo, anggan diad saray teritoryan dagdaiset so ondengel?

• Akin ya agnaamper na siopaman a sumusumpa so panangipulong ed maong a balita na Panarian?

[Tepetepet Parad Panagaral]

[Kahon ed pahina 22]

Liknaan a Pirmin Inkapnek

“Maliket tan panggagayagaan da so nankakasakey a panaglingkor da ed si Jehova.” Satan so manideskribe ed sakey a pamilya ya inmalis ed Bolivia a nanlapud España. Sakey ya ilalak ed sayan pamilya so linma diman pian suportaan so sakey a niyarawin grupo. Say mapatpatnag a gayaga to so nandinayewan a tuloy na atateng to kanian agnambayag et say interon pamilya​—a kaiba so apatiran kalangweran a lalaki a 14 anggad 25 años​—so nanlingkor diman. Talora ed sarayan kalangweran a lalaki so manpapayunir la natan, tan diad agano ni et samay inmuna diman so nanaral ed Ministerial Training School.

“Dakel iray angat,” so inkuan na 30-años a si Angelica, a taga-Canada, a manlilingkor ed Mamabukig a Europa, “balet nanliketan ko so impanulong ed totoo diad ministeryo. Aliketan ak met ed dakel a balikas na pisasalamat na saray Tasi a taga diman, a mabetbet a misasalamat ed siak lapud impanulong mi ed sikara.”

“Dakerakel so kustombre a piadaptaan,” so inkuan na duaran sanagin bii a masulok da lan 20 años, a taga ra’d Estados Unidos, a manlilingkor natan ed Dominican Republic. “Balet, nanseet kami ed asainmin mi, kanian pitora ed saray iyaaralan mi ed Biblia so onaatendi la natan ed saray pantitipon.” Sarayan duaran agagi so nausar ed inkaorganisa na sakey a grupo na saray manangipalapag na Panarian diad sakey a baley ya anggapo so kongregasyon.

Si Laura, sakey ya agin bii a manedad na masulok a 20, so nanlingkor ed arum a bansa diad masulok lan apat taon. Inkuan to: “Inggagalak a pasimplien so bilay ko. Saya so akatulong ed saray manangipalapag pian natebek a say simplin panagbilay so importantin pilien tan pakapatnagan na limpion kanonotan, aliwan lapud kairapay-bilay. Say pakatulong ed arum, nagkalalo la ed saray tobonbalo, so talagan lapuan na gayaga parad siak a manadaeg ed peteg iran kairapan diad panserbi ed lawak ed arum a bansa. Agko isalat so serbisyok ed antokaman nin klase na bilay, tan mansiansia ak dia anggad iyabuloy nen Jehova.”

[Kahon/Litrato ed pahina 26]

Saray Kabiangan na Bokletan Good News for People of All Nations

Lugan na bokletan Good News for People of All Nations so sakey-pahinan mensahe a niparungtal ed 92 a lenguahe. Say mensahe so nisulat ed personal a paraan. Kanian sano basaen na unabung so mensahe, singa itan mitotongtong ed sikato.

Walay sakey a mapa na mundo ed loob na apis. Usaren iyan mapa pian niletneg so maabig a pakapitongtong ed unabung. Nayarin iturom so bansa a kawalaan mo tan ipatnag ed sikato a labay mon naamtaan no iner a bansa so nanlapuan to. Diad ontan a paraan, nayarin sikato so natangguyor mon mansalita tan mamawala itan na makaaro tan relaks a pantotongtong.

Say paunan-salita na bokleta so angidatak na pigaran kundang a nepeg tayon gawaen ta pian epektibon natulongan iramay mansasalita na lenguahen agtayo natalosan. Ipangasin basaen a maong iratan a kundang tan maalwar iratan ya iyaplika.

Diad listaan na saray lugan et aglambengat nidatak iray lenguahe noagta pati saray kapetekan a simbolo na lenguahe. Sayan kabiangan so ontulong ed sika pian nibiig iray simbolo na lenguahe a niprinta ed saray tract tan ed arum niran publikasyon tayo a walad nanduruman lenguahe.

[Litrato]

Kasin uusaren mo iyan bokleta diad ministeryo?

[Saray litrato ed pahina 23]

Saray publikasyon tayo a nibase ed Biblia so wala la natan ed masulok ya 400 a lenguahe

GHANA

LAPLAND (SWEDEN)

PILIPINAS

[Saray litrato ed pahina 24, 25]

Kasin makapanlingkor kayo ed lugar a babaleg so pankaukolan parad saray manangiyabawag na Panarian?

ECUADOR

DOMINICAN REPUBLIC