Tepetepet Manlapud Saray Managbasa

Kasin say nabasa ed Deuteronomio 14:21 ya: “Agkayo . . . mansisira na anggan anto ya inatey,” so misumlangan ed ibabaga na Levitico 11:40 a: “Say mangan ed bangkay to pesakan to so kawekawes to, tan aliwan malinis ya angga ed ngarem”?

Anggapoy pansumlangan na sayan duaran bersikulo. Uuliten labat na unonan teksto so pananebel a pangan ed ayep a nalmoan ya inatey, a nayarin pinatey na saray ayep ed uma. (Exodo 22:31; Levitico 22:8) Say mikaduan teksto so mangipapaliwawa ed nayarin gawaen na Israelita no agginagalan asumlang to itan a pananebel.

Say impangisebel na Ganggan ed sakey a bengatla so agmankabaliksan a nayarin ibaliwala itan ed arum a bekta. Alimbawa, walaray ganggan sumpad panagtakew, panamatey, palson panagtasi, tan arum ni. Tan walaray akatekep a dusa ed pakalukso ed saratan ya inter na Dios a ganggan. Saratan a dusa so mangiyiimpuersa ed saray ganggan tan mangipapanengneng ed kinaseryoso na saratan.

Say toon anumlang ed isesebel a pangan ed laman na ayep a nalmoan ya inatey, so marumsis ed imaton nen Jehova tan kaukolan ya ondalan ed matukoy a proseso na panaglinis. No agto suston linisan so inkasikato, “awiten to so kasalanan to.”​—Levitico 17:15, 16.