“Ag-ira Akikompromiso”

“MAPALAR kayo sano balawen da kayo’y totoo, tan pasegsegangen da kayo, tan salitaen day amin a nengneng na mauges a sumpa’d sikayo, nisengeg ed siak, a mantila ra,” so inkuan nen Jesu-Kristo ed saray babangatan to. (Mateo 5:11) Saray Tasi nen Jehova natan so mapalar odino maliket lapud mitunosan ed bangat tan ehemplo nen Kristo et mansiasiansia iran “[agkabiangan na] mundo” tan mapeget dan pansiasiansiaen so inkaneutral da ed politika tan katooran da ed Dios diad antokaman iran sirkumstansya.​—Juan 17:14; Mateo 4:8-10.

Nipaakar ed ag-impikompromiso na saray Tasi nen Jehova diad Unyon Sobyet, a pati saramay walad Estonia, oniay insulat na Lutheran a teologo tan managpatalos na Biblia a si Toomas Paul diad libro ton Kirik keset küla (Say Simbaan ed Pegley na Baryo): “Mataltalag so makaamta ed samay agawa diad palbangon na Abril 1, 1951. Implano so kampanya ya ibantak iray Tasi nen Jehova tan saray onsusuporta ed sikara​—a 279 so dagup na totoon inerel tan imbantak ed Siberia . . . Inikdan iray pankanawnawa a pirmaan so dokumento a mangitatalirak la ed pananisia ra pian ag-ira nibantak odino nipriso. . . . Diad ami-amin et 353 so inkulong, kaiba iramay inmunan inaresto, pati 171 a totoon akilimog lambengat ed saray kongregasyon da. Ag-ira akikompromiso​—anggan diad Siberia. . . . Mataltalag ed saray membro na Simbaan [na Lutheran ed Estonia] so walaan na pananisia a mipara ed saray Tasi nen Jehova.”

Saray Tasi nen Jehova diad interon mundo so manmamatalek ed Dios a tulongan to iran mansiansian matoor tan matulok ed sikato anggaman ed panamasegsegang. Maliket ira lapud amta ran baleg so tumang ed inkamatoor da.​—Mateo 5:12.