‘Say Kampilan nen Jehova tan nen Gideon!’

SINGARA duron ed karakel, a pinankibalatar da so mabunabunan kaumaan. Agawa itan diad samay panaon a saray ukom so manuuley ed Israel, tan saray Israelita et naaandian la na ilalo. Diad loob na pitoy taon, sano binmasik la so intatanem a bini, onlasor met la iray managsamsam a pangkat na saray de-kamelyo a Midianita, Amalekita, tan saray taga-Bukig. Insan saray pulok na saray managlubak so ontayak pian mananap na pankabkaban, a buagen da so amin ya intanem. Balet saray Israelita et andian na asno, baka, odino karnero. Agaylan makapataktakot so pananguley na Midian, kanian saray dukan Israelita so mankakamalir ed maamot a pasen diad kapalandeyan, diad saray ungib, tan diad saray lugar a mairap a sabien.

Akin a niwala itan a pakaskasin kipapasen? Lapud manlilingkor ed palson dirios so apostatan Israel. Kanian, pinaulyanan ira nen Jehova ed saray managpairap. Sanen agla itan naanosan na saray anak na Israel, kinmerew ira na tulong ed si Jehova. Kasin talinengen to ra? Anto so naaralan tayo ed asagmak na Israel?​—Uko-ukom 6:1-6.

Maalwar a Dumaralos Odino “Makapanyari a Laki a Mabayani”?

Saray dumaralos ya Israelita so kaslakan a maniilik na trigo diad tulong na kalakian a baka tan galusa diad pasen a pataktak tan maragem pian nipalir so taep tan ombiig ed ilik legan na panagtaep. Balet ompatnag ya anggapo so nanengneng a mantataep lapud pananesga na saray managlubak a determinadon mansamsam diad dalin. Ta pian agnanengneng na saray Midianita, si Gideon so maniilik dia ed darapilan, a nayarin sakey a baleg tan nantarong a kawa ya imbungaw ed bato. (Uko-ukom 6:11) Diman et nayarin paspasen so sandaraiset ya ilik panamegley na bislak. Diad saratan a kipapasen, uusaren nen Gideon so antokaman a nausar to.

Isipen pa so impakabigla nen Gideon sanen pinmayawar ed sikato so anghel nen Jehova tan inkuan to: “Si Jehova wala ed sika, sika a makapanyari a laki a mabayani.” (Uko-ukom 6:12) Bilang laki ya akaamot a maniilik diad sakey a darapilan, maseguron ag-inisip nen Gideon a sikatoy mabayani. Ingen, ipapatnag na saraman a balikas so kompiyansa na Dios a nayarian nen Gideon so magmaliw a mabayanin lider ed Israel. Siansia ni, kaukolan a sikato so nakombinse.

Sanen ingganggan nen Jehova si Gideon pian ‘ilaban so Israel ed lima na saray Midianita,’ oniay mapaabeban inkuan to: “O, Katawan, Anto so pangilaban ko ed Israel? Nia! Say pamilyak sikato so karukaan ed Manases, tan siak so kaunoran dia ed abung nen amak.” Say maalwar a Gideon so kinmerew na tanda a sikatoy tulongan na Dios diad pangabil ed Midian, tan si Jehova et mabulos ya amenek ed makatunongan a pankaukolan nen Gideon parad panamaseguro. Diad ontan, angiyapay si Gideon na langkap a tagano ed anghel a sankaili to, et dinmayabdab so apoy manlapud sakey a bato tan inupot na satan so apay. Kayarin pinakepa nen Jehova so katatakot nen Gideon, angipaalagey ditan si Gideon na sakey ya altar.​—Uko-ukom 6:12-24.

“Iyagel Komon nen Baal”

Say sankabalgan a problema na Israel et aliwan say panagpairap na Midianita, noagta say inkigalet ed panagdayew ed Baal. Si Jehova so “Dios a maimon,” tan anggapo so naabobonan a makapanlingkor ed sikato legan a mandadayew ed arum a dirios. (Exodo 34:14) Kanian, ingganggan nen Jehova si Gideon a deralen to so altar nen ama to a parad Baal tan igeba to so sagradon lusek. Lapud mapaga ed reaksion na ama to tan saray arum no gawaen to itan diad agew, kinmiwas si Gideon diad labi, diad tulong na samploran ariripen.

 Makatunongan so impanalwar nen Gideon, ta sano nasukayan na saray mandadayew ed Baal so ginawa to ya “agpanagrespeto ed sagradon bengatla,” sikatoy ipapatey da. Balet, diad agnasuppiat a katunongan, si Joas, ya ama nen Gideon, so nankatunongan ed totoo a no si Baal et Dios, niyagel to komon so inkasikato. Diad satan, si Joas so matukoy ya angingaran ed ilalak ton laki a Jerubaal, a mankabaliksay “Iyagel Komon nen Baal so Inkasikato.”​—Uko-ukom 6:25-32.

Lawas bebendisyonan na Dios iray lingkor to lapud mapekder ya itatalindeg da parad tuan panagdayew. Sanen nilusob lamet na saray Midianita tan saray kaalyado ra so teritorya na Israel, “say espiritu nen Jehova linma ed Gideon.” (Uko-ukom 6:34) Diad panamabiskeg na espiritu, odino aktibon puersa, na Dios, nantipon si Gideon na saray armada manlapud saray tribu na Manases, Aser, Zebulun, tan Neftali.​—Uko-ukom 6:35.

Namparaan Parad Pibakal

Anggaman 32,000 la so sundalo nen Gideon, sikatoy kinmerew ed Dios na sakey a tanda. No say lanan abel ya itilak ed dalin a panag-ilikan et nabasa na linaew bangta mansiansian amaga so dalin, satan so mangipatnag ya iliktar na Dios so Israel diad panamegley to. Ginawa nen Jehova iyan milagro, tan lalon apaseguroan si Gideon sanen ginawa so kasunian na tanda, salanti, nabasa so dalin bangta amaga so lanan abel. Kasin masyado lay inkasegurista nen Gideon? Mapatnag ya andi, lapud inebatan nen Jehova so kerew to parad panamaseguro. (Uko-ukom 6:36-40) Agtayo nailaloan a walaray ontan a milagro natan. Ingen, makaawat itayo na panangiwanwan tan panamaseguro nen Jehova manlapud Salita to.

Imbaga na Dios ed saman a sobra lay karakel na sundalo nen Gideon. No bilang ta natalo ra so kakabusol da lapud kinarakel da, nayarin ilastog na saray Israelita a sikaray angilaban ed inkasikaran dili. Balet si Jehova so nepeg a narayew parad pambiktorya ra. Antoy solusyon? Inyaplika nen Gideon so probisyon ed Mosaikon Ganggan a pasempeten iramay matakot. Diad saman et 22,000 ed sundalo to so sinmempet tan 10,000 labat so atilak.​—Deuteronomio 20:8; Uko-ukom 7:2, 3.

Diad panmoria na Dios et dakdakel nira a siansia. Niganggan ed si Gideon a palasoren to ra diad danum. Inkuan na Judion manag-awaran a si Josephus a binilin na Dios si Gideon a panakaren to ray armada to a paarap ed ilog diad ampetang a kaagwan. Ipasen lan ontan, si Gideon so nanimaton no panon so kakainum na saray sundalo. Talonlasus labat a lalaki so angikalaos na dakulap da ed danum insan da inilop legan ya akabantay ed posiblin iyataki na kalaban. Saratan labat a 300 a mabayanin lalaki so mila ed si Gideon. (Uko-ukom 7:4-8) Ipasen mo pay inkasika ed kipapasen da. Lapud manbilang na 135,000 so kakabusol yo, seguradon nibagam a manalo kayo lambengat diad panamegley na pakapanyari nen Jehova, aliwan diad dilin pakapanyari yo!

Imbaki na Dios si Gideon a mangitagar na katambayan to pian mansimasim diad kampo na Midianita. Legan a wadman, arengel nen Gideon so sakey a lakin mangibabaga na kugip to ed kaiba to, a tampol ya angipaliwawa ed satan a say Dios et denetermina to la ya iyawat so Midian ed lima nen Gideon. Satan so kakkaukolan a narengelan  nen Gideon. Segurado si Gideon a sikato tan say 300 a sundalo to so pambiktoryaen nen Jehova sumpad saray Midianita.​—Uko-ukom 7:9-15.

Estratehiya ed Bakal

Naapag so 300 ed taloran grupo, a 100 so kada grupo. Balang sundalo so inikdan na sansakey a trumpeta tan baleg a buyog ya andiay-iyan. Insan say buyog so kinargaan na banuot. Tan oniay unonan bilin nen Gideon: ‘Imatonan yo ak, tan gawaen yo so unong ed gawaen ko. Sano paknolen ko so trumpeta, paknol yo met so trumpeta yo, tan iyeyag yon “say kampilan nen Jehova tan nen Gideon!”’​—Uko-ukom 7:16-18, 20.

Say 300 ya Israelitan mibabakal so nankalkalnan inmabanti ed gilig na kampo na kalaban. Manga alas-dies ed labi iman, a kapkapansalat ni labat na guardia. Ompatnag a saya so matukoy ya oras na iyataki, lapud kaukolan nin imurikat na saray balon bantay so mata ra pian makanengneng diad ambilunget.

Agaylan makapataktakot itan ed saray Midianita! Bigbiglan naandi so kareenan diad impametag ed 300 a buyog, impamaknol ed 300 a trumpeta, tan saray eyag na 300 a lalaki. Lapud abigla iray Midianita, nagkalalo la ed eyag a ‘say kampilan nen Jehova tan nen Gideon!,’ inmeyag met ira kanian lalon inmungol so kaliberliber. Diad impakagulo ra, agda la nibiig no siopa so kabusol o kaiba ra. Say 300 so tinmalindeg labat ed balang pasen da legan a pinakiwas na Dios so kakabusol a manpapateyan panamegley na dilin kampilan da. Lapud imbatikan la so kampo, apugeran so itatakas, tan nilaosan la iray akeran kalaban ya inusil-usilan, sigpot lan naandi so pananesga na Midianita. Anampot a siansia so abayag tan maruksan pananguley.​—Uko-ukom 7:19-25; 8:10-12, 28.

Anggad kayari na sayan impanbiktorya, si Gideon so siansia nin mauyamo. Sanen sinmanok ed sikato iray Efraimita, a mapatnag a nainsulto lapud ag-ira impatawag a mibakal, sikatoy maumildin inmebat. Say maumildin ebat to so amaandi na sanok da tan amareen ed sikara.​—Uko-ukom 8:1-3; Uliran 15:1.

Natan ta niletneg la so kareenan, pinaseseg na saray Israelita si Gideon a magmaliw ya ari ra. Agaylan makapatukso! Balet ag-inmabobon si Gideon. Agto nilingwanan no siopa so angiter ed sikara na impanbiktorya sumpad Midian. “Agak manuley ed sikayo, anggan say ana’ko agmanuley ed sikayo,” so inyabawag to. “Si Jehova so manuley ed sikayo.”​—Uko-ukom 8:23.

Balet, bilang ag-ayadyari, si Gideon so aliwan naynay ya angagamil na maabig a panagdesisyon. Diad agnibagan rason, ginawa ton efod iray asamsam to ed bakal tan imparungtal to itan ed syudad to. Ibabaga na rekord ya amin ya Israel so “akibalangkantis” panamegley na efod. Sikaray nandakmomo ed satan, tan nagmaliw itan a kalot ed si Gideon tan ed sankaabungan to. Ingen, sikatoy aliwan sigpot a managtalintao, lapud sikato so tinukoy na Kasulatan bilang laki a walaan na pananisia ed si Jehova.​—Uko-ukom 8:27; Hebreos 11:32-34.

Saray Leksion Parad Sikatayo

Say istorya nen Gideon so mangitatarya na saray leksion nipaakar ed panamasakbay tan panamaseseg. Ipapasakbay na satan ed sikatayo a no ekalen nen Jehova ed sikatayo so espiritu tan panamendisyon to lapud makapuy a kondukta tayo, say espiritual a kipapasen tayo et magmaliw a singa ed saramay dukan manaayam diad sakey a dalin a dineral na saray duron. Manbibilay itayo ed maatap iran panaon tan nepeg ya agtayo lingwanan a say panamendisyon nen Jehova et “makapayaman; tan agmangarum na ermen.” (Uliran 10:22) Panggagayagaan tayo so panamendisyon na Dios lapud ‘manlilingkor itayo ed sikato ed interon puso tan ed mabulbulos a linawa.’ Ta no aliwan ontan, sikatayo so ipulisay to.​—1 Awaran 28:9, Maung a Balita.

Napaseseg itayo manlapud salaysay nipaakar ed si Gideon, lapud papaneknekan na satan a nayarian nen Jehova ya iliktar so totoo to ed antokaman a peligro, ya usaren to ni ingen iramay ompatnag a makapuy odino agmakayari. Say impanalo nen Gideon tan say 300 a sundalo to sumpad 135,000 a Midianita so mamaneknek ed agmanganggan pakapanyari na Dios. Nayarin nidudunget itayo ed mairap iran situasyon tan nayarin ompatnag a sarasarag itayon taloen na kakabusol tayo. Ingen, say salaysay na Biblia nipaakar ed si Gideon so mamaseseg ed sikatayon manmatalek ed si Jehova, a sikato so mamendisyon tan mangiliktar ed amin a mangaagamil na pananisia ed Sikato.