Tepetepet Manlapud Saray Managbasa

Lapud agnanmatoor ed Dios si Arin Solomon na kadaanan ya Israel sanen masiken la, nibaga tayo kasin sikatoy agla napaoli?​—1 Arari 11:3-9.

Anggaman angibinsabinsa so Biblia na kangaranan na pigaran matoor a lalaki tan bibii a maseguron napaoli, ag-espisipikon impaliwawa na satan no anton kikioli so ilaloan na kada sakey ed saray indibidual a binitla. (Hebreos 11:1-40) Anggaman ontan, diad kaso nen Solomon, makala itayo na ideya ed sentensia na Dios diad pangikompara ed agawa ed sikato sanen inatey ed agawa ed pigaran matoor ya indibidual sanen inatey ira.

Duara lambengat so sinalita na Kasulatan a pansumpalan na inaatey​—say temporaryon agkiwawala tan say magnayon ya agkiwawala. Saramay nasentensiaan ya agmakana ed kikioli so ibantak ed “Gehenna,” odino “dayat ya apoy.” (Mateo 5:22; Marcos 9:47, 48; Apocalipsis 20:14) Kabiangan ed saraya so inmunan sanasawa a si Adan tan Eva, si Judas Iscariote a manangitapat, tan pigaran indibidual a tinigway sanen impaakseb na Dios so panangukom to ed sikara, a singa saray totoo ed panaon nen Noe tan saramay manaayam ed Sodoma tan Gomorra. * Diad ipapatey, saramay pagamoran na kikioli so onla ed kaslakan a lubok na katooan, salanti, diad Sheol odino Hades. Oniay inkuan na Biblia nipaakar ed arapen na saratan a totoo: “Say dayat initer to so inaatey a wala ed sikato; tan say patey tan say Hades initer da so inaatey a wala ed sikara: tan agawa so impangukom ed balang sakey unong ed saray gawa to.”​—Apocalipsis 20:13.

Saramay tinukoy sirin ed Hebreos kapitulo 11 a matoor so wala ed Sheol, odino Hades, a manaalagar na kikioli. Kabiangan ed saraya so matoor a lingkor na Dios a di Abraham, Moises, tan David. Natan imanoen pa no panoy impanalambit na Biblia nipaakar ed ipapatey da. “Et sika,” kuan nen Jehova ed si Abraham, “wala ka naani ed saray atateng mo; niponpon ka naani ed inkamasiken mo lan tuloy.” (Genesis 15:15) Oniay inkuan nen Jehova ed si Moises: “Nia miugip ka naani ed saray amam.” (Deuteronomio 31:16) Nipaakar ed ama nen Solomon a si David, oniay inkuan na Biblia: “Si David akiugip ed saray ateng to, tan niponpon ed syudad nen David.” (1 Arari 2:10) Kanian, say balikas a ‘miugip ed saray ateng to’ et sananey a panangibaga a say too so linma ed Sheol.

Antoy agawa ed si Solomon sanen inatey? Oniay ebat na Biblia: “Say panaon na impan-ari nen Solomon dia ed Jerusalem ed amin ya Israel sikato so apataplo a taon. Et si Solomon akiugip ed saray ateng to, tan niponpon ed syudad nen David ya ama to.” (1 Arari 11:42, 43) Kanian, ompatnag a makatunongan so pangibagan si Solomon et wala ed Sheol, odino Hades, a manaalagar met na kikioli.

Ipapasabi na saya a wala so posibilidad ya onoli so arum ya espisipikon sinalambit na Kasulatan ya ‘akiugip ed saray ateng da.’ Diad tua, anggaman aliwan matoor so dakel ya ararin sinmublay ed si Solomon, ontan met so impanalambit ed sikara. Agpanduaruwaan iya lapud “wala naani kioli ed bilay na saray matunong tan agmatunong.” (Gawa 24:15) Siempre, naseguro tayo lambengat no siopay apaoli kayarin “amin so saray wala ed saray lubok” so ombangon. (Juan 5:28, 29) Kanian imbes a magmaliw a dogmatiko nipaakar ed kioli na siopaman ya indibidual nensaman, manalagar tan manmatalek itayo ed naspot a desisyon nen Jehova.

[Paimano ed leksab]