Tuan Bangabangat​—Iner so Pakaromogan Mo ed Saratan?

PINATELEK na sakey a laki ed Tibet so sakey a prayer wheel a nankarga na nisulat iran pikakasi. Panisiaan to a diad kada itelek na satan et naulit iray pikakasi to. Diad sakey a maawang ya abung ed India, walay melag a silir ya inggana parad ritual a puja​—sakey a nengneng na panagdayew a kabiangan so panangiyapay na insenso, saray rosas, tan arum niran bengatla diad saray imahen na nambabangil a dios tan diosa. Manga nilibon kilometro a kaarawi ed Italya, walay bii ed loob na madekorasyon a simbaan ya akatalimukor ed arap na imahen nen Maria, ya ina nen Jesus, tan mandarasal legan a sankaegnaan to so rosaryo.

Nayarin naimanom lan mismo so impluensya na relihyon ed bilay na totoo. “Say relihyon . . . so nagmaliw tan walaan lawas na makanan betang ed saray sosyedad ed interon mundo,” so inkuan na libron The World’s Religions​—Understanding the Living Faiths. Diad libron God​—A Brief History, oniay inkomento na autor a si John Bowker: “Anggapo nin balot so sosyedad na too ya agnagmaliw a kabiangan so Dios, a kaslakan et bilang mananguley tan manamalsa. Tua itan anggan diad saray sosyedad a gagagalaen day agmagmaliw a relihyoso.”

Say relihyon so talagan mangiimpluensya ed bilay na minilyon a totoo. Agta saya so mabiskeg a paneknek a say too et walaan na pankaukolan tan pampirawat ed espiritual? Tinukoy na bantog a sikolohista a si Dr. Carl G. Jung diad libro ton Undiscovered Self so pankaukolan na too a mandayew ed sakey a walaan na atagtagey a pakapanyari tan inkuan to a “saray pakapatnagan ed satan so nasubaybayan ed interon awaran na too.”

Ingen, dakel a totoo so agmangipapatnag na pananisia ed Dios nisay walaan na antokaman ya interes ed relihyon. Say manunan rason no akin a  walaray manduaruwa odino mangibuburi a wala so Dios et lapud agnapepenek na saray relihyon da so espiritual a pankaukolan da. Inukeran so relihyon bilang “debosyon ed sakey a prinsipyo; mapeget a katooran odino inkamatoor; inkamaalwar; masanton panamabli odino pisisiglaotan.” Unong ed sayan impanguker, amin lawarin too so mangipapatnag na sakey a nengneng na relihyoson debosyon ed bilay to, anggan saray ateista.

Legan na nilibon taon ya awaran na too, say panasali na too a peneken so espiritual a pankaukolan to so angitonton ed sikato ed dakel a nengneng na panagdayew. Bilang resulta, niwala so dakerakel tan nanduruman relihyoson panmoria diad sankamundoan. Alimbawa, anggaman iyaalibansa na amin lawarin relihyon so panisia ed atagtagey a pakapanyari, nanduruma balet so ideya ra no siopa odino anto itan. Idadanet met na maslak a relihyon so kaimportantian na kilalaban odino kawayangan. Balet manduruma so bangat da ed no anto so kilalaban tan no panon itan a nagamoran. Lapu ed nanduruman nengneng na sisiaen, panon tayon nibiig so tuan bangabangat a makapaliket ed Dios?