‘Say Tulong Ko et Manlalapu ed si Jehova’

Walad Kasuloan a Napepenek ed Panlilingkor ed si Jehova

“DAKDAKEL ed sikami so malikeliket anggano andian kami na asawa,” so inkuan na sakey a Kristianon bii ed España. Anto so mamepenek ed sikato? “Panggagayagaan mi so magmaliw a bulos ed dakel a kapagaan ta pian makapanlingkor kamin nagkalalo ed si Jehova a Dios tayo.”

Mitunosan iratan a liknaan ed ibabaga na Salitay Dios nipaakar ed kipapasen na walad kasuloan. Sanen siningbat nen apostol Pablo so nipaakar ed panangasawa, innabang to iyan apuyanan ya aralem a kakabatan: “Kuan ko ed saray andian na asawa tan saray bibii a balo, ta maong ed sikara no makapansiansia ra a singa siak.” Si Pablo a mismo et andian na asawa. Balet anton rason so inter to diad impangirekomenda to ed pansiansian walad kasuloan? Impabitar to a say toon de-asawa et naapag, bangta say laki odino bii ya andian na asawa et “pampagaan to so saray kien na Katawan.” (1 Corinto 7:8, 32-34) Say panlingkor ed si Jehova so manunan lapuan na liket tan inkapnek na sakey a walad kasuloan.

Pansiansian Walad Kasuloan Tekep na Alay Abig a Gagala

Nayarin makapasurprisa iray komento nen Pablo diad saray kultura a papablien a tuloy so panangasawa tan panagpamilya. Balet, si Jesu-Kristo, a sakey ya andian na asawa ingen ta maliket tan kontento, so anaglawi ed alay abig a gagala parad saray Kristianon walad kasuloan. Oniay inkuan to: “Walaray eunoko, a ginawa ray inkasikaran dili a eunoko nisengeg ed panarian na tawen. Say makayarin mangawat ed saya, sikatoy awaten to.”​—Mateo 19:12.

Mitunosan ed saratan a balikas, napapaneknekan na dakel a sikaray bulos a makapanlilingkor ed Dios lapud pansiasiansia ran walad kasuloan, aliwan singa ed saray walaan na asawa. (1 Corinto 7:35) Nilibon Kristiano so maliket a mandadayew ed si Jehova anggaman andian ira na asawa, tan panggagayagaan da so aktibon panutulong ed arum. *

Momoriaen na dakel a Kristianon andian na asawa ya aliwan saramay de-asawa lambengat so maliket tan aliwan amin a walad kasuloan et maermen. Diad parehon grupo et walaray makakalikna na liket ontan met ed ermen a panapanaon. Diad tua et realistikon ibabaga na Biblia a say mismon panangasawa et mangitarok na ‘irap ed laman.’​—1 Corinto 7:28.

Walad Kasuloan Lapu ed Kipapasen

Dakel so walad kasuloan aliwan lapud nilabay da itan noagta lapu ed saray kipapasen da. Nayarin pipilaleken da so panangaro, maabig ya ulopan, tan panamabli a nayarin nalikna ed pakawalaan na asawa. Balet, parad arum et agda ni labay so mangasawa o miasawa lapud ikokonsidera ra so pinansyal odino arum niran bengatla. Arum a Kristiano​—a karaklan et saray pinablin agagin bibii ed espiritual​—so agni akiasawa lapud determinado iran mangunor ed simbawa na Biblia a miasawa lambengat “dia ed linawa na Katawan.” (1 Corinto 7:39) Sikaray matoor a manaanap na kapareha diad limog lambengat na saray dedikado tan bautismado lan lingkor nen Jehova.

 Panapanaon, arum ed sarayan indibidual so begtebegtew. Kayarin inaksobi na sakey a Kristianon biin walad kasuloan ya ontan so nalilikna to, oniay inkuan to: “Amta mi so ganggan nen Jehova tan agmi labay a napaermen si Jehova diad antokaman a paraan. Nayarin kaliktan mi so makapiasawa, balet anggano aminpigapiga lan sasalien na totoon taga-mundo ya ‘iyanapan kami na kapareha,’ mansiasiansia kamin mapekder. Agmi anggan labay so miulop ed saray agmananisian lalaki odino bibii.” Nakomendaan iratan a Kristiano lapud pangiyaaplika ra ed simbawa na Biblia tan ed pansiasiansia ra ed atagey iran estandarte ed moral ta pian napaliket si Jehova anggaman nayarin nagogonigon so liknaan da.

Mabunlok a Pananulong na Dios

Si Jehova so matoor ed saraman so manmamatoor ed sikato diad saray pamaakaran a singa say agpangasawa odino agpiasawa ed saray indibidual ya agmanlilingkor ed sikato. Unong ed naeksperiensyan mismo nen Arin David, oniay napaneknekan to: “Dia ed sakey a matoor sika [Jehova] so onkiwas a matoor.” (Salmo 18:25, NW) Tan oniay insipan na Dios ed saramay matoor ya ontutulok ed sikato: “Agta ka naani taynan, tan agta ka naani ikaindan.” (Hebreos 13:5) Bilang pangalig ed si Jehova, makapangiter itayo na mabunlok a komendasyon ed amin a Kristianon walad kasuloan a matoor a manguunor ed Salitay Dios. Nayarian tayo met ya ipikasi ed si Jehova a pabiskegen to ira pian natalonaan da iray problema ra.​—Uko-ukom 11:30-40.

Napapaneknekan na dakel a Kristianon walad kasuloan a magmamaliw a makabaliksan so bilay da lapud sigpot a pibibiang ed kimey a panagbangat ed Biblia. Konsideraen so alimbawa nen Patricia, a sakey a marikit a masulok to lan 30 tan payunir, odino sigpot-panaon ya ebanghelisador. Oniay inkuan to: “Anggaman dakel iray subok ed pagmaliw a walad kasuloan, angiter itan ed siak na pankanawnawan magmaliw a regular payunir. Lapud mansusulo ak, mainomay kon itukoy-tukoy so eskedyul ko, kanian mas dakel so panaon ko ed panagaral. Naaralan ko met so sigpot a manmatalek ed si Jehova, nagkalalo la diad makapasubok iran panaon.”

Saratan a panmoria so nibase ed makapabiskeg a sipan na Biblia: “Ipiam ed Jehova so dalan mo; manmatalek ka met ed sikato: et sikato igawa to.” (Salmo 37:5) On, amin a matoor a mandadayew ed si Jehova, balanglan de-asawa odino walad kasuloan, so naligliwa tan napabiskeg ed sarayan apuyanan a salita: ‘Say tulong ko et manlalapu ed si Jehova.’​—Salmo 121:2.

[Paimano ed leksab]

[Blurb ed pahina 9]

“Say ag-angasawa pampagaan to so saray kien na Katawan, no panon kasi pamalike’to ed Katawan.”​—1 CORINTO 7:32

[Kahon ed pahina 8]

GAWAEN A MAKAPATUMANG SO KIPAPASEN A WALAD KASULOAN

Oniay inkuan nen Jesus, ya agbalot angasawa: “Say kanen ko sikato so panggawak na linawa na saman so angibaki ed siak, tan manumpal na kimey to.”​—Juan 4:34.

Say apatiran mamarikit nen Felipe so nantultuloy ya okupado ed ‘panagpropesiya.’​—Gawa 21:8, 9.

Saray walad kasuloan a Kristianon agagin bibii a mangiyaabawag ed mensahe na Panarian so kabiangan na ‘abalbaleg ya ulop na bibii a mangipapaamta na maong a balita.’​—Salmo 68:11.