Binilang la nen Jehova ‘Iray Buek na Ulo Yo’

“Agnapelag naani sakey [ya anuyaw] ed dalin no agyabuloy nen Ama yo. Et anggan saray buek na ulo yo abilang ira ya amin.”​—MATEO 10:29, 30.

1, 2. (a) Akin ya inisip nen Job a sikatoy inkaindan la na Dios? (b) Kasin say labay ya ibaga na saray imbalikas nen Job et sikato lay sinmumpa ed si Jehova? Ipaliwawa.

 “ONTATAWAG ak ed sika, O Dios, balet agmo ak ebatan; no manpikasi ak agmo ak asikasoen. Nagmaliw kan maruksa ed siak; iyuupot moy pakayarim ed pamapairap mo’d siak.” Say toon angibesngaw ed saratan a salita et nagogonigon a maong, tan agpankelawan no akin! Naandi so pambibilayan to, sakey a biglaan a desyang so amatey ed ananak to, tan diad saginonor et sikato so sinalot na makapakapuy a sakit. Say ngaran na sayan too et Job, tan say makapagonigon a subok ed sikato so nikurit ed Biblia pian nagunggonaan itayo.​—Job 30:20, 21, Maung a Balita.

² Nayarin ompatnag ed saratan a balikas nen Job a sikato lay sinmumpa ed Dios, balet ta aliwan ontan. Ibebesngaw labat nen Job so pirmin gonigon ed puso to. (Job 6:2, 3) Agto amta a si Satanas so panlalapuan na saray subok ed sikato, kanian lingo so inisip to a sikatoy inkaindan la na Dios. Walay bekta ya onia ni ingen so imbaga nen Job ed si Jehova: “Akin et papaliisan mo ak? Akin et ipapasen mo ak a kalaban?” *​—Job 13:24, Maung a Balita.

3. Sano onlesa iray kairapan, anto so nayarin onsebang ed kanonotan tayo?

³ Natan et sasagmaken na dakel a totoo nen Jehova so agmanundan kairapan bilang epekto na saray guerra, gotgotan ed politika odino sosyedad, natural iran kalamidad, itatakken, sakit, pirmin kairapan na bilay, tan pananebel na gobierno. Nayarin wala met iray subok a sasagmaken mo. No maminsan, nayarin iisipen mo ya agka la iimanoen nen Jehova. Maseguron amtam iray salita ed Juan 3:16: “Ontan lay impangaro na Dios ed mundo, ya inter to so bogbogtong ya Anak to.” Balet, sano maniirap ka tan anggapo so nanengneng mon solusyon, nayarin isipen mon: ‘Kasin talagan aaroen ak na Dios? Kasin naiimano to so sasagmaken ko? Kasin iyaansakit to ak bilang indibidual?’

4. Anton kipapasen so kinaukolan a sungdoan nen Pablo, tan diad antoran paraan a nayarin naapektoan itayo ed ontan a kipapasen?

⁴ Konsideraen pa so agawa ed si apostol Pablo. “Niiter ed siak so sakey a sabit ed laman, sakey ya ibabaki nen Satanas a manampal ed siak,” so insulat to, tan inyarum to: “Nipaakar ed saya akikasi ak ed Katawan ya amitlo, pian naekal komon ed siak.” Nadngel nen Jehova iray ey-ey to. Anggaman kuan, impabitar to ed si Pablo ya agto itan solusyonan diad mamilagron paraan. Imbes, kinaukolan a manmatalek si Pablo ed pakayari na Dios ya ontulong ed sikato pian natalonaan to so “sabit ed laman” to. * (2 Corinto 12:7-9) Singa si Pablo, nayarin walay subok a peles mon naeeksperiensya. Nayarin oniay uumamengen mo, ‘Kasin say ompatnag ya ag-ikikiwas nen Jehova ed pakakasubokan ko so mankabaliksan ya agto amta so nagagawa ed siak odino anggapoy pibabali to ed siak?’ Say seguradon ebat et andi! Saray aralem  a panangiyansakit nen Jehova ed kada sakey ed saray matoor a lingkor To so nidanet ed imbaga nen Jesus ed saray apostol to kayarin tuloy na impamili to ed sikara. Imanoen tayo no panon itayon napaseseg natan ed saray salita to.

Akin ya ‘Agkayo Ontatakot’?

5, 6. (a) Panon a tinulongan nen Jesus iray apostol ya ag-ontakot ed no anto so nagawa ed arapen? (b) Panon ya impatnag nen Pablo so panagmatalek ed panangasikaso ed sikato nen Jehova?

⁵ Naawat na saray apostol so nikadkaduman pakayarin nanlapud si Jesus, a pati say “pakauley ed saray marumsis ya espiritu, pian papawayen da ra, tan pian tambalen da so saray amin a nengneng na sakit tan amin a nengneng na beblay.” Balet, agkabaliksan na satan ya agda lan balot naeksperiensya iray subok tan kairapan. Imbes, detalyadon deneskribe nen Jesus so pigara ed saray bengatlan nagawa ed sikara. Anggaman ontan, oniay impaseseg to ed sikara: “Agyo takotan so saray mamatey na laman, ya agda met nayarian a pateyen so kamarerwa: takotan yo ingen so samay makayarin mamatey na laman tan say kamarerwa ed impierno.”​—Mateo 10:1, 16-22, 28.

⁶ Ta pian natalosan na saray apostol to no akin ya ag-ira nepeg ya ontakot, inter nen Jesus so duaran ilustrasyon. Oniay inkuan to ed sikara: “Agta nalako so duaran anuyaw ed sakey a kuarta? Et agnapelag naani sakey ed sikara ed dalin no agyabuloy nen Ama yo. Et anggan saray buek na ulo yo abilang ira ya amin. Agkayo antakot sirin; ta mamabli kayo nen saray amayamay ya anuyaw.” (Mateo 10:29-31) Imanoen pa ya impansiglaotan nen Jesus so ag-itakot ed kairapan tan say pagmaliw a matalek ed personal a panangasikaso nen Jehova ed sikatayo. Mabitar ya ontan met so impanmatalek nen apostol Pablo. Oniay insulat to: “No say Dios gampi ed sikatayo, siopa ni kasi onsumpa ed sikatayo? Saman so agto kinawanan so dili ya Anak to, noag ingen inyawat to lapud sikatayo ya amin, panon so agto pangiter ed sikatayo, ya anggapo so bayar, na ami’ ganagana a pati sikato?” (Roma 8:31, 32) Antokaman iray angat ya aarapen mo, makapanseguro ka ya asikasoen kan mismo nen Jehova daput no mansiansia kan matoor ed sikato. Lalo ni ingen a napatnagan itan no usisaen tayo so insimbawa nen Jesus ed saray apostol to.

Say Balor na Sakey ya Anuyaw

7, 8. (a) Panon so impangipasen ed saray anuyaw diad panaon nen Jesus? (b) Akin a mabitar ya inusar na Mateo 10:29 so porma na Griegon salita parad “anuyaw” a mankabaliksan na “angkelag iran anuyaw”?

⁷ Saray ilustrasyon nen Jesus so epektibon manideskribe ed panangiyansakit nen Jehova ed kada sakey ed saray lingkor To. Konsideraen pan unona so nipaakar ed saray anuyaw. Diad panaon nen Jesus, saray anuyaw so ikakana bilang tagano, balet ipapasen iratan a peste lapud peperdien da iray tanem. Saray anuyaw et dakerakel tan mamura kanian say duaran anuyaw so nasaliw ed kulang a taloy pesos diad kaplesan  a balor. No doblien itan a kantidad, aliwa labat ya apatiran anuyaw so nasaliw noagta limara​—a say sulok ya anuyaw et buntok, a singano anggapon balot so balor na satan!​—Lucas 12:6.

⁸ Isipen met so kabaleg na sayan ordinaryon siwit odino billit. No ikompara ed dakel niran billit, say binmaleg lan anuyaw so melmelag nin siansia. Ingen, say Griegon salita a nipatalos ya “anuyaw” diad Mateo 10:29 so espisipikon manutukoy ed angkelag iran anuyaw. Mapatnag a labay nen Jesus ya ipurek ed saray apostol to so sankamelagan tan ag-importantin tuloy a billit. Unong ed inkuan na sakey a reperensya, “sinalambit nen Jesus so melmelag a billit tan inusar to so porma na salita a mankabaliksan a melmelanting!”

9. Anton mapuersan punto so nidanet ed ilustrasyon nen Jesus nipaakar ed saray anuyaw?

⁹ Say impangiyaliling nen Jesus ed saray anuyaw so amawala na mapuersan punto: Say andiay-kakanaan ed imaton na totoo so importante ed si Jehova a Dios. Lalon indanet nen Jesus iyan katuaan diad impangiyarum to a say ‘kapelag ed dalin’ na sakey a melag ya anuyaw so naiimano nen Jehova. * Malinew so leksion. No iimanoen nen Jehova a Dios so sankamelagan tan anggapoy kablian a billit, mas nagkalalo so panangiyansakit to ed kipapasen na sakey a too a manlilingkor ed sikato!

10. Anto so kabaliksan na saray salitan: “Saray buek na ulo yo abilang ira ya amin”?

¹⁰ Niarum ni ed ilustrasyon to nipaakar ed saray anuyaw, oniay inkuan nen Jesus: “Saray buek na ulo yo abilang ira ya amin.” (Mateo 10:30) Sayan antikey tan aralem a balikas so mangidadanet ed punto na ilustrasyon nen Jesus nipaakar ed saray anuyaw. Konsideraen pa: Kaslakan, say ulo na too et walaan na manga 100,000 a buek. Anggapoy pidumaan na sakey a buek manlapud arum a buek, tan anggapo so sakey a buek a makanepegan na nikadkaduman panangimano tayo. Balet, say kada buek et naimano tan binilang la nen Jehova a Dios. Lapud onia so kipapasen, wala ta so antokaman a detalye na bilay tayo ya ag-amta nen Jehova? Seguradon natatalosan nen Jehova so inkatoo na kada sakey ed saray lingkor to. On, sikato so ‘onnenengneng ed puso.’​—1 Samuel 16:7.

11. Panon ya imbalikas nen David so panagmatalek to ed panangiyansakit nen Jehova ed sikato?

¹¹ Si David, ya akaeksperiensya lay dakel a kairapan, so matalek a sikato so iimanoen nen Jehova. “O Jehova, sika sinukayan mo ak, et akabatan mo ak,” so insulat to. “Sika amtam so kayuyurong ko tan say kakaalagey ko; sika natalosan mo so nonot ko a wala ni ed arawi.” (Salmo 139:1, 2) Makaseguro ka met a kabat kan mismo nen Jehova. (Jeremias 17:10) Agbengatbengat ipapasen ya anggapon balot so kakanaan mo ed mausisan panangimano nen Jehova!

‘Iyan Mo Iray Luak ed Botelyam’

12. Panon tayon naseguro ya amta nen Jehova iray kairapan a sasagmaken na totoo to?

¹² Aliwa labat a kabat nen Jehova so kada sakey ed saray lingkor to noagta amta to met iray kairapan a sasagmaken da. Alimbawa, sanen napapairap iray Israelita bilang ariripen, oniay imbaga nen Jehova ed si Moises: “Peteg ya anengneng ko so ermen na totook a wadman ed Ehipto, et dinengel ko so tagleey da lapu ed saray kapatas da, ta amtak so kaermenan da.”  (Exodo 3:7) Agaylan makapaligliwan namoria a sano susungdoan tayo so sakey a subok, nanenengneng nen Jehova so nagagawa tan narerengel to iray ey-ey tayo! Maseguro a nalilikna to so paniirap tayo.

13. Anto so mangipatnag a talagan mililikna si Jehova ed saray lingkor to?

¹³ Say panangiyansakit nen Jehova ed saramay awalaan na siglaotan ed sikato so nagkalalon apatnagan ed liknaan to ed saray Israelita. Anggaman say impanirap da et mabetbet a resulta na mismon inka-benger da, oniay insulat nen Isaias nipaakar ed si Jehova: “Dia ed amin ya irap da sikato so apairap.” (Isaias 63:9) Bilang matoor a lingkor nen Jehova, makapanseguro ka sirin a sano nasasakitan ka, nasasakitan met si Jehova. Agta satan so mamakiwas ed sika a makpel a mangarap ed kairapan tan mantultuloy a manggawa ed sankaabigan mo diad panaglingkor ed sikato?​—1 Pedro 5:6, 7.

14. Antoray kipapasen legan ya isusulat so Salmo 56?

¹⁴ Say kombiksion nen Arin David a si Jehova so angiyansakit tan akilikna ed sikato so nipabitar ed Salmo 56, ya insulat to sanen aarawian toy Arin Saul ya angigagaem a mamatey ed sikato. Si David so batik ed Gat, balet sikato so tinmakot ompan naerel sano sikatoy nabidbir na saray Filisteo. Oniay insulat to: “Saray kakabusol ko labay da ak ya akmonen komon ya agew-agew; ta ondarakel so mibakal ed siak.” Lapud sayan mapeligron kipapasen to, tinmupleg si David ed si Jehova: “Inagew-agew a balbalinglingen da so salsalitak,” so inkuan to. “Amin a nonot da sumpa ra ed siak ya onkana ed mauges.”​—Salmo 56:2, 5.

15. (a) Anto so labay ya ibaga nen David sanen kinerew to ed si Jehova ya iyan iray lua to ed katat a botelya odino diad sakey a libro? (b) Sano susungdoan tayo so makapasubok-pananisian kipapasen, anto so naseguro tayo?

¹⁵ Insan, unong a nikurit ed Salmo 56:8, oniay makapasagyat ya imbaga nen David: “Sika bilangen mo so panakar-akar ko: ‘yan mo so saray lualuak ed botelyam; anggapo ta’ra ed librom?” Agaylan makapatenyeg a deskripsion na matamoy a panangiyansakit nen Jehova! Sano sikatayo so nadedetdetan, nayarin mannangis itayon oney-ey ed si Jehova. Ontan met so ginawa nen Jesus anggaman sikatoy ayadyari. (Hebreos 5:7) Kombinsido si David a sikato so iimanoen nen Jehova tan nodnonoten To so paniirap to, a singano natitipon iray lua to ed katat a botelya odino nisusulat iratan ed sakey a libro. * Nayarin liknaen mo a satan a katat a botelya odino say dakel a pahina na ontan a libro so napano na luam. No ontan so kipapasen, naligliwa ka. Oniay ipapaseguro na Biblia: “Si Jehova asingger ed saray wala ed kipapasen na sakey a nabtagan na puso; tan ilaban to so totoo a wala ed sakey a kamarerwa a masakit ed panagbabawi.”​—Salmo 34:18.

Pagmaliw a Maapit a Kaulop na Dios

16, 17. (a) Panon tayon naseguro ya amta nen Jehova iray probleman kidudungetan na totoo to? (b) Anto so ginawa la nen Jehova pian napanggayagaan na totoo to so pikakaaro ed sikato?

¹⁶ Say impamilang la nen Jehova ed ‘saray buek ed ulo tayo’ so mangiter na ideya nipaakar ed maimano tan mangiyaansakit a Dios a pribilehyo tayon dayewen. Anggaman nakaukolan tayo nin alagaren so insipan a balon mundo pian naandi lan amin so ot-ot tan paniirap, walay makapakelaw a gagawaen nen Jehova parad totoo to natan. Oniay insulat nen David: ‘Say pikakaaro ed si Jehova et wala ed saray ontakot ed sikato; tan ipanengneng to ed sikara so sipanan to.’​—Salmo 25:14.

¹⁷ ‘Pikakaaro ed si Jehova.’ Agayla, satan a mismon ideya so singa mairap a tebeken na ag-ayadyarin totoo! Ingen, iimbitaan nen Jehova iramay ontakot ed sikato a magmaliw a sankaili ed tabernakulo to. (Salmo 15:1-5) Tan anto so gagawaen nen Jehova ed saray sankaili to? Ipapakabat to ed sikara so sipanan to, unong ed inkuan nen David. Ipaparungtal nen Jehova ed sikara so ‘maamot iran bengatla’ diad panamegley na saray propeta ta pian naamtaan da no anto iray gagala to tan no anto so nepeg dan  gawaen pian makapambilay ira a mitunosan ed saratan.​—Amos 3:7.

18. Panon tayon naamtaan a labay nen Jehova a nawalaan itayo na maapit a relasyon ed sikato?

¹⁸ On, makapaligsay-puson naamtaan a sikatayon ag-ayadyarin totoo et nayarin magmaliw a maapit a kaulop na Sankatageyan, si Jehova a Dios. Diad tua, papasesegen to itayo ya ontan so gawaen tayo. “Singger kayo ed Dios, et sikato so onsingger naani ed sikayo,” so inkuan na Biblia. (Santiago 4:8) Labay nen Jehova a nawalaan itayo na maapit a relasyon ed sikato. Diad tua, ginawa to la so pigaran kundang pian magmaliw a posible itan. Say dondon bagat nen Jesus so angilukas la na pankanawnawa pian makapikaaro itayo ed Makapanyarin-amin a Dios. Oniay ibabaga na Biblia: “Aroen tayo ta sikato so angaro ed sikatayo ya inmuna.”​—1 Juan 4:19.

19. Panon a pabiskegen na panagsungdo so relasyon tayo ed si Jehova?

¹⁹ Satan a maapit a relasyon so napaelet sano sungdoan tayo iray mair-irap a kipapasen. Oniay insulat nen babangatan a Santiago: “Paulyan komon so anos a wala so ayadyarin gawa to, pian ayadyari kayo komon tan napnek kayo ya andi kulang.” (Santiago 1:4) Anton “gawa” so resulta na pansungdo ed kairapan? Nodnonoten pa so “sabit ed laman” nen Pablo. Anto so resulta na impansungdo to ed satan? Oniay imbaga nen Pablo nipaakar ed saray subok ed sikato: “Panliketan ko so saray kakapuyan, dia ed saray inkapabpabanday, dia ed saray pankaukolan, dia ed saray pakausil-usil, dia ed saray irirap a makalanor ed Kristo; ta sano siak so makapuy, dia ed satan mabiskeg ak.” (2 Corinto 12:9, 10) Diad eksperiensya nen Pablo et inter nen Jehova so pakayari a nakaukolan to, salanti say “sankatageyan ya inkabaleg na pakayari,” ta pian sikatoy makapansungdo. Bilang resulta, sikato so lalon inmapit ed si Kristo tan ed si Jehova a Dios.​—2 Corinto 4:7; Filipos 4:11-13.

20. Panon itayon makapanseguro a si Jehova so ontulong tan manligliwa ed sikatayo ed kairapan?

²⁰ Nayarin aabuloyan ni nen Jehova a mantultuloy iray subok ed sika. No ontan, ipapusom so sipan to ed saramay ontatakot ed sikato: “Agtaka naani taynan, tan agtaka naani ikaindan.” (Hebreos 13:5) Naeksperiensyam so ontan a tulong tan ligliwa. Binilang la nen Jehova ‘iray buek na ulom.’ Naiimano to so pansusungdom. Nalilikna to so ot-ot mo. Peteg ya iyaansakit to ka. Tan agton balot ‘lingwanan so gawam tan say aro ya impanengneng mo ed ngaran to.’​—Hebreos 6:10.

[Saray paimano ed leksab]

Kasin Natandaan Yo?

• Antoray sengegan na panlikna na sakey a too a sikatoy inkaindan la na Dios?

• Anton leksion so naaralan tayo ed saray ilustrasyon nen Jesus nipaakar ed saray anuyaw tan ed inkabilang la na saray buek ed ulo tayo?

• Anto so kabaliksan na kiiyan na saray lua na sakey a too ed “botelya” odino ed “libro” nen Jehova?

• Panon itayon nawalaan na ‘pikakaaro ed si Jehova’?

[Tepetepet Parad Panagaral]

[Litrato ed pahina 22]

Akin ya ag-inekal nen Jehova so “sabit ed laman” nen Pablo?

[Litrato ed pahina 23]

Anto so naaralan tayo ed ilustrasyon nen Jesus nipaakar ed saray anuyaw?

[Credit Line]

© J. Heidecker/VIREO

[Litrato ed pahina 25]

Diad regular a pambasa ed Biblia, naromog tayo so panamaseguro ya iyaansakit itayon mismo na Dios