Si Jehova so “Mananumang ed Saray Mananap ed Sikato”

“Say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.”​—HEBREOS 11:6.

1, 2. Akin a mipupuligesgesan so arum ed saray lingkor nen Jehova ed negatibo iran liknaan?

 “SIAK so Tasi nen Jehova ed loob la na ngalngali 30 taon, balet agkon balot alikna a manepeg ak a tawagen na ontan,” so impatua nen Barbara. * “Anggano nampayunir ak la tan awalaan na dakel niran pribilehyo, singa agmagenap iratan a mangombinse ed siak a manepeg ak a tawagen a Tasi.” Ontan met iray walad kanonotan nen Keith. Inkuan to: “Saray lingkor nen Jehova so walaan na dakel a rason pian manliket, balet ta no maminsan et naliliknak ya agak manepeg lapud agko nalilikna so liket. Lapud satan et nakokonsiensia ak, a lalon amaloor la ingen ed saray bengatla.”

² Dakel ed saray matoor a lingkor nen Jehova nensaman tan natan so akipuligesgesan ed ontan met iran liknaan. Ontan met kasi so pipupuligesgesan mo? Nayarin nadedetdetan ka la ed mantutumbokan a problema, bangta saray kapananisiaan mo et ompatnag a manggagayaga ed bilay, andiay-problema tan maliket. Bilang resulta, nayarin liknaen mo ya agka aabobonan nen Jehova odino agka manepeg ed panangimano to. Agbengatbengat a nononoten ya ontan so kipapasen mo. Oniay ipapaseguro ed sikatayo na Biblia: “[Si Jehova] agto minudmora nisay ginula so kaermenan na apaermen; noag say nen tinmagleey ed sikato dinengel to.” (Salmo 22:24) Ipapabitar na saratan a mapropetikon salita nipaakar ed Mesias ya aglambengat dedengelen nen Jehova iray  matoor ed sikato noagta tutumangan to met ira.

3. Akin ya ag-itayo nipuera ed pananesdes na sayan sistema na bengabengatla?

³ Anggapo so nipuera ed pananesdes na sayan sistema na bengabengatla, a pati saray totoo nen Jehova. Manbibilay itayo ed sakey a mundon uuleyan na manunan kabusol nen Jehova, si Satanas a Diablo. (2 Corinto 4:4; 1 Juan 5:19) Imbes a mamilagron naprotektaan, saray lingkor nen Jehova so diad tua et manunan pupuntiryaen nen Satanas. (Job 1:7-12; Apocalipsis 2:10) Kanian, angga ed isabi na aturon panaon na Dios, nakaukolan tayon ‘sungdoan so kairapan’ tan ‘mansiansian malet ed pikakasi,’ a matalek ya iyaansakit itayo nen Jehova. (Roma 12:12) Ag-itayo padadaeg ed kanonotan ya ag-itayo aaroen nen Jehova a Dios!

Saray Ehemplo Nensaman ed Panagsungdo

4. Mangiter na pigaran alimbawa na matoor iran lingkor nen Jehova a nansungdo ed makapagonigon iran kipapasen.

⁴ Dakel ed saray lingkor nen Jehova nensaman so kinaukolan a mansungdo ed makapagonigon iran kipapasen. Alimbawa, si Ana so “maer-ermen” lapud sikato so andiay anak​—sakey a kipapasen a minoria ton mipadpara ed sakey a nilingwanan lay Dios. (1 Samuel 1:9-11, Maung a Balita) Sanen si Elias so papaanap nen Reyna Jezabel, ya angigagaem a mamatey ed sikato, say propeta so tinmakot tan oniay impikasi to ed si Jehova: “Sarag la; natan, O Jehova, ekalen mo so bilay ko; ta agak magmaong nen saray ateng ko.” (1 Arari 19:4) Tan si apostol Pablo so maseguron agonigon a maong ed agto inkayadyari sanen oniay inaksobi to: ‘Say mauges wala ed siak sanen labay ko a gawaen so maong.’ Tan inyarum to: “Alay kasegsegang ko a too!”​—Roma 7:21-24.

5. (a) Panon ya atumangan si Ana, Elias, tan Pablo? (b) Anton ligliwa so nagamoran tayo ed Salitay Dios sano mipupuligesgesan itayo ed saray negatibon liknaan?

⁵ Siempre, amta tayo a si Ana, Elias, tan Pablo so nansungdo sanen manlilingkor ira ed si Jehova, tan sikara so mapalabon tinumangan To. (1 Samuel 1:20; 2:21; 1 Arari 19:5-18; 2 Timoteo 4:8) Anggaman kuan, akipuligesgesan ira ed amin a klase na liknaan, a singa say ermen, inkaandiay-ilalo, tan takot. Ag-itayo sirin nepeg a nasurprisa no panapanaon et negatibo iray nalilikna tayo. Balet, anto so gawaen tayo sano saray kapagaan ed bilay et sengegan lay pannonot tayo no kasin talagan aaroen itayo nen Jehova? Naligliwa ka ed Salitay Dios. Alimbawa, diad akadkaunan artikulo et siningbat tayo so imbalikas nen Jesus a binilang la nen Jehova ‘iray buek na ulo yo.’ (Mateo 10:30) Ipapabitar na saratan a makapaseseg a salita a si Jehova so interesadon tuloy ed kada lingkor to. Nodnonoten met so ilustrasyon nen Jesus nipaakar ed saray anuyaw. No iimanoen nen Jehova so sakey ed saratan ya angkelag a manok a napepelag ed dalin, agta imanoen to met so mairap a kipapasen mo?

6. Panon a makaligliwa so Biblia ed saramay mipupuligesgesan ed negatibo iran liknaan?

⁶ Posible kasi a magmaliw itayon mabmabli ed imaton na sankamakapanyarian a Manamalsa, si Jehova a Dios, anggaman ag-itayo ayadyari? On! Diad tua, wala so dakel a teksto ed Biblia a mangipapaseguro ed sikatayo nipaakar ed satan. No ipapuso tayo iratan, nibalikas tayo met so imbaga na salmista: “No mapagpaga tan nagogonigon ak, liligliwaen tan pagagayagaen mo ak.” (Salmo 94:19, Maung a Balita) Konsideraen tayo so pigara ed saratan a makatambayon balikas na Salitay Dios ya ontulong ed sikatayon makatalos a maong a papablien itayo na Dios tan tumangan to itayo no mantultuloy tayon gawaen so linawa to.

Say ‘Dilin Kayarian’ nen Jehova

7. Anton makapaseseg a propesiya parad say mauges a nasyon so impasabi nen Jehova panamegley nen Malaquias?

⁷ Makapasinagem so kipapasen na saray Judio nen komaliman siglo K.K.P. Aawaten na saray saserdote iray agmanepeg ya ayayep tan ibabagat da iratan ed altar nen Jehova. Ipapatnag na saray ukom so panaglabi. Kasmak so  panagparles, panagtila, panagpalikdo, tan pikakalugoran. (Malaquias 1:8; 2:9; 3:5) Imbalikas nen Malaquias so makapasurprisan propesiya ed sayan mapangaya tan mauges a nasyon. Sinmabi panaon, impawil nen Jehova iyan totoo ed naabobonan a kipapasen da. Oniay nabasa tayo: “Sikara naani so kien ko, kuan nen Jehova na saray ehersito, salanti, dili a kayarian ko, dia ed agew a gawaen ko; et imasakit ko ra naani, singa sakey a too imasakit to so dili ya anak to a laki a manlingkor ed sikato.”​—Malaquias 3:17.

8. Diad prinsipyo, akin ya onaplika so Malaquias 3:17 ed baleg ya ulop?

⁸ Say propesiya nen Malaquias so walaan na modernon-agew a kasumpalan a misiglaotan ed saray alanaan ya espiritun Kristiano, a manibukel ed espiritual a nasyon na 144,000. Satan a nasyon so peteg a ‘dili a kayarian,’ odino ‘baley a dilin kayarian’ nen Jehova. (1 Pedro 2:9) Say propesiya nen Malaquias so makapaseseg met ed “baleg ya ulop,” a “manal-alagey ira’d arap na trono, tan ed arap na Kordero, a nankawes ira na kawekawes ya amputi.” (Apocalipsis 7:4, 9) Sikara tan saray alanaan so nagmaliw a sakey a pulok diad silong na sakey a Pastol, si Jesu-Kristo.​—Juan 10:16.

9. Akin a ‘dilin kayarian’ so pangipapasen nen Jehova ed saray totoo to?

⁹ Panon ya ipapasen nen Jehova iramay manlilingkor ed sikato? Unong ed Malaquias 3:17, ipapasen to ira a singa panangipasen na maaron ama ed anak to. Tan imanoen pa so makapadinayew iran termino ya impaneskribe to ed totoo to​—“dili a kayarian” to. Saratan a salita so impatalos na arum bilang “say mismon kien ko,” “say mabmablin kayarian ko,” tan “saray ankablin bato a kien ko.” Akin ya ontan lan nikabkabiig so pangipapasen nen Jehova ed saramay manlilingkor ed sikato? Sakey lan bengatla et sikato so maapresyan Dios. (Hebreos 6:10) Sikato so onaapit tan ipapasen ton nikabiig iramay impapuson manlilingkor ed sikato.

10. Panon so panasalimbeng nen Jehova ed totoo to?

¹⁰ Wala ta so ankablin kayarian mo ya ipapasen mon nikabkabiig? Agta panggunaetan mon laniran itan? Ontan met so gagawaen nen Jehova ed ‘dilin kayarian’ to. Tua, agto sasalimbengan so totoo to manlapud amin a subok tan trahedya ed bilay. (Eclesiastes 9:11) Balet, nayarian tan seguradon protektaan nen Jehova iray matoor a lingkor to diad espiritual a paraan. Ipapagamor to ed sikara so biskeg a nakaukolan da pian nasungdoan da so antokaman a subok. (1 Corinto 10:13) Kanian, oniay imbaga nen Moises ed saray totoo na Dios nensaman, saray Israelita: “Ombiskeg ka, tan manliket ka a maong . . . si Jehova a Dios mo sikato so mila a miulop ed sika: agnaani onkulang ed sika, nisay manpaulyan ed sika.” (Deuteronomio 31:6) Tutumangan nen Jehova iray totoo to. Parad sikato et sikaray ‘dilin kayarian’ to.

Si Jehova et “Mananumang”

11, 12. Panon itayon natulongan a manalona ed saray liknaan na panduaruwa no natalosan tayo a si Jehova et Mananumang tayo?

¹¹ Sakey nin ebidensya a papablien nen Jehova iray lingkor to et diad panutumang to ed sikara. Oniay imbaga to ed saray Israelita: “Salien yo ak natan ed saya, kuan nen Jehova na saray ehersito, no siak agko naani lukasan ed sikayo so saray pinto na tawen, et ikalbok naani ed sikayo so sakey a bendisyon, ya anggapo naani so pasen a makasarag a mangawat ed sikato.” (Malaquias 3:10) Siempre, diad saginonor et bilay ya andi-anggaan so itumang nen Jehova ed saray lingkor to. (Juan 5:24; Apocalipsis 21:4) Sayan mabmablin tumang so mangipaparungtal ed laknab na panangaro tan inkamabunlok nen Jehova. Ipapatnag met na satan  a talagan papablien to iramay manlingkor ed sikato. No momoriaen tayo si Jehova bilang mabunlok a Mananumang, natulongan itayon manalona ed antokaman iran panduaruwa nipaakar ed talindeg tayo ed Dios. Diad tua, papasesegen itayo nen Jehova a sikatoy moriaen tayo bilang Mananumang! Oniay insulat nen Pablo: “Say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.”​—Hebreos 11:6.

¹² Siempre, manlilingkor itayo ed si Jehova lapud aro tayo ed sikato​—aliwan lapud insipan ton tumangan to itayo. Ingen ta matukoy met odino aliwan sinisiblet so pampirawat tayo ed ilalo a natumangan itayo. (Colosas 3:23, 24) Lapud panangaro tan panamabli ton maong ed sikara, onkikiwas lan unona si Jehova tan tutumangan to iramay magunaet a manaanap ed sikato.

13. Akin a say probisyon a dondon et sankatalonggaringan ya ebidensya na panangaro nen Jehova ed sikatayo?

¹³ Say sankatalonggaringan a pakapatnagan a mabmabli so katooan ed imaton nen Jehova et say probisyon a dondon. Oniay insulat nen apostol Juan: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Say probisyon a dondon bagat nen Jesu-Kristo so agmitunosan ed ideyan sikatayo so agmakana odino ag-aaroen nen Jehova. On, no balbaleg so insakripisyo nen Jehova parad sikatayo, salanti, inyapay to so bogbogtong ya Anak to, seguradon aaroen to itayon maong.

14. Anto so mangipapabitar ed impanmoria nen Pablo ed dondon?

¹⁴ Kanian, no onsebang ed liknaan mo iray negatibon bengatla, dalepdepen mo so dondon. On, moriaen iyan langkap bilang probisyon nen Jehova ed sika. Ontan so ginawa nen apostol Pablo. Nodnonoten pa so imbaga to: “Alay kasegsegang ko a too!” Balet oniay intuloy ton imbaga: “Misalamat ak ed Dios lapud Jesu-Kristo a Katawan tayo,” a “sikato so angaro ed siak, tan inter to so inkasikaton dili lapud siak.” (Roma 7:24, 25; Galacia 2:20) Sanen imbaga nen Pablo itan, sikatoy agmanpapaimportante. Sikato so walaan lambengat na kompiyansa a sikatoy papablien nen Jehova bilang indibidual. Singa si Pablo, nepeg mo met a moriaen so dondon bilang langkap na Dios ed sika. Si Jehova et aliwa lambengat a makapanyarin Manangilaban noagta maaro met a Mananumang.

Manalwar ed Saray Masilib a Gawa nen Satanas

15-17. (a) Panon ya aanamoten na Diablo iray negatibon liknaan? (b) Anton panamaseseg so nagamoran tayo ed eksperiensya nen Job?

¹⁵ Balet, nayarin agmo panisiaan a saray impuyan a pananambayo a naromog ed Salitay Dios so peteg ya onaplika ed sika. Nayarin isipen mo a say tumang a bilay ya andi-anggaan ed balon mundo na Dios et nagamoran na arum, balet ta agka manepeg a makagamor ed satan. No ontan so naliliknam, anto so gawaen mo?

¹⁶ Maseguron kabisadom so simbawa nen Pablo ed saray taga-Efeso: “Isulong yo so sankabukel a kinlong na Dios, pian nayarian yo so ontalindeg ya onsumpa ed saray pangalot na Diablo.” (Efeso 6:11) Sano isipen tayo iray kalot nen Satanas, nayarin say nanonotan tayon tampol et say materyalismo tan imoralidad, tan talagan tua met itan. Saratan a tukso so amatit la ed dakel a totoo na Dios nensaman tan ed panaon tayo. Balet, agtayo nepeg ya ibabaliwala so sakey nin masilib a gawa nen Satanas​—say pangokombinse to ed totoo ya ag-ira aaroen nen Jehova a Dios.

¹⁷ Say Diablo so onsianon mangaanamot ed ontan iran liknaan pian pabenegen so totoo manlapud Dios. Tandaan iray salita nen Bildad ed si Job: “Panon a magmaliw a matunong o malinis ed arap na Dios so sakey a too? Diad pakanengneng to, anggan say bulan aliwan maliwawa, tan saray bitewen aliwan malinis. Insan la’d saray totoo a sakey a bigis, sakey ya alombayar? Mabli kasi ed arap na Dios?” (Job 25:4-6,  Maung a Balita; Juan 8:44) Agta makapadismaya iratan a salita? Agmo sirin aabuloyan a sikay dismayaen nen Satanas. Diad biek a dapag, ibiig iray kalot nen Satanas ta pian makapanpakpel tan mabiskeg kan mitulot ed panggawa na maptek. (2 Corinto 2:11) Parad si Job, anggano sikato so kinaukolan ya ipetek, si Jehova so anumang ed impansungdo to, a doble so insalat to ed amin ya abalang nen Job.​—Job 42:10.

Si Jehova et ‘Babaleg Nen say Puso Tayo’

18, 19. Panon a say Dios et ‘babaleg nen say puso tayo,’ tan diad anton paraan a ‘kabat to so amin’?

¹⁸ Tua, nayarin mairap a talonaan iray makapadismayan liknaan no saratan et nigalet a maong. Ingen ta say espiritu nen Jehova so makatulong ed sika pian kalkalnam a nadaeg ‘iray malet a fortalezas, ya onalagey ya onsumpa ed kakabatan na Dios.’ (2 Corinto 10:4, 5) Sano natatalonaan ka la na saray negatibon panag-isip, morekdeken iray salita nen apostol Juan: “Dia ed saya nabidbir tayo a kien itayo na tua, tan saray kapusoan tayo apaletan ira ed arap to: Ta no say kapusoan tayo et pooten to itayo, babaleg so Dios nen say puso tayo, tan kaba’to so amin a bengatla.”​—1 Juan 3:19, 20.

¹⁹ Anto so kabaliksan na saray salitan “babaleg so Dios nen say puso tayo”? No maminsan, sikatayo so kokondenaen na puso tayo, nagkalalo la no naynay tayon naiimano so agtayo inkayadyari tan saray kakulangan tayo. Odino nisesengeg ed abenegan tayo et walay alablabas a tendensia tayon manisip na negatibo ed dili tayo, a singano anggapo lay gagawaen tayon makapaliket ed si Jehova. Papaseguroan itayo na saray salita nen apostol Juan a si Jehova so babaleg ni nen say satan a liknaan tayo! Aliwan saray kalilingoan tayo so nenengnengen to, noagta natetebek to so peteg a pagmaliwan tayo. Amta to met iray motibo tan getma tayo. Oniay insulat nen David: “Sikato kabat to so inkagawa tayo; sikato nanodnonotan to a sapok itayo.” (Salmo 103:14) On, mas kabat nen Jehova so dili tayo nen say sikatayon mismo!

“Balanget na Kalimgasan” tan “Maari a Diadema”

20. Anto so ipaparungtal na propesiya nen Isaias nipaakar ed panangipawil ed no panon so panmoria nen Jehova ed saray lingkor to?

²⁰ Diad panamegley nen propeta Isaias, inter nen Jehova ed totoo to nensaman so ilalo nipaakar ed kipawil. Sanen sikara so adestiero ed Babilonia, sayan panamaligliwa tan panamaseguro so kakkaukolan na saratan a maneermen a totoo to! Oniay imbaga nen Jehova diad pampipirawat to ed panaon na pakapawil da ed binalegan dan dalin: “Sika met naani so sakey a balanget na kalimgasan ed lima nen Jehova, tan maari a diadema ed lima na Dios.” (Isaias 62:3) Diad sarayan salita, inarkosan nen Jehova so totoo to na kagalangan tan karlangan. Ontan met so ginawa to ed nasyon ton espiritual ya Israel natan. Singano intandoro to ira pian pandinayewan na amin.

21. Panon kan makapanmatalek a tumangan nen Jehova so matoor a pansusungdom?

²¹ Anggaman say manunan kasumpalan na sayan propesiya et diad saray alanaan, iyiilustra na satan so kagalangan ya ipapagamor nen Jehova ed amin a manlilingkor ed sikato. Kanian, sano naliliknam so panduaruwa, nodnonoten ya anggaman agka ayadyari, sika so mabmabli ed imaton nen Jehova a singa “balanget na kalimgasan” tan “maari a diadema.” Kanian itultuloy mon paliketen so puso to diad magunaet a panggawam na linawa to. (Uliran 27:11) No gawaen mo itan, makapanmatalek ka a tumangan nen Jehova so matoor a pansusungdom!

[Paimano ed leksab]

Kasin Nanonotan Yo?

• Panon itayon nagmaliw a ‘dilin kayarian’ nen Jehova?

• Akin ya importantin moriaen a si Jehova et Mananumang?

• Antoran masilib a gawa nen Satanas so nepeg tayon panalwaran?

• Diad anton paraan a say Dios et ‘babaleg nen say puso tayo’?

[Tepetepet Parad Panagaral]

[Litrato ed pahina 26]

Pablo

[Litrato ed pahina 26]

Elias

[Litrato ed pahina 26]

Ana

[Litrato ed pahina 28]

Lugan na Salitay Dios so dakerakel a makapaligliwan kanonotan