Tepetepet Manlapud Saray Managbasa

Kasin say salitan “nayari” diad Sofonias 2:3 et mankabaliksan ya agsegurado iray lingkor na Dios a makaawat na maandon bilay?

Oniay nabasa ed satan a teksto: “Anapen yo si Jehova, sikayo ya amin a mauyamo ed dalin, ya angunor na saray panguksoyan to: anapen yo so inkatunong, anapen yo so kauyamoan: nayari a sikato naani niyamot dia ed agew na sanok nen Jehova.” Akin ya inkuan na sayan bersikulo a “nayari”?

Pian natalosan no panon so pideneng nen Jehova ed saray matoor ed sikato diad Armagedon, makatulong so panrepaso ed ibabangat na Biblia nipaakar ed gawaen na Dios ed saramay ompatey sakbay na satan a panaon na panangukom. Arum so napaoli ed imortal a bilay bilang espiritun pinalsa diad katawenan, bangta say arum so napaoli diad dalin a walaan na ilalon manbilay ya andi-anggaan diad Paraiso. (Juan 5:28, 29; 1 Corinto 15:53, 54) Kanian, no nodnonoten tan tumangan nen Jehova iramay matoor ed sikato ya ompatey sakbay na Armagedon, seguradon ontan met so pideneng to ed saray lingkor to a mabilay ni diad agew na sanok to.

Makapaseseg met iray pinuyanan a salita nen apostol Pedro. Insulat to: “Inlaban [na Dios] si Noe, a pati arum nin pitora, sakey a managpulong na katunongan, dia ed impangitarok to na delap ed mundo na saray momoan [“agmaridios a totoo,” NW]; tan [sanen] dinusa to ra, dia ed impaneral to ed saray syudad na Sodoma tan Gomorra, impagmaliw to ra a dapol, . . . tan inlaban to si matunong a Lot. . . . Amta na Katawan [a Jehova] so pangiliktar to ed saray masantos ed katukso, tan mangikana ed saray aliwan matunong ed leksab na kadudusa no nasabi agew na panangukom.” (2 Pedro 2:5-9) Anggaman dineral nen Jehova iray marelmeng nensaman a panaon, inliktar to si Noe tan si Lot, a matoor a nanlingkor ed sikato. Si Jehova so mangiliktar met ed saray totoo a walaan na maridios a debosyon sano deralen to la iray marelmeng diad Armagedon. Say “baleg ya ulop” na saray matunong a totoo so makaliktar.​—Apocalipsis 7:9, 14.

Ompatnag sirin ya inusar so salitan “nayari” diad Sofonias 2:3 aliwan lapud walay antokaman ya agpakaseguro ed abilidad na Dios a mangiliktar ed saraman so aabobonan to. Imbes, say kiyamot na sakey a too diad agew na sanok nen Jehova et talagan posible sano anapen to so inkatunong tan kauyamoan. Say pakaliktar na sakey a too et akadepende ed pantultuloy ton anapen so kauyamoan tan inkatunong.​—Sofonias 2:3.

[Litrato ed pahina 31]

‘Amta nen Jehova so pangiliktar ed saray masantos manlapud katukso’