Ipapatnag na Saray Kristiano so Gloria nen Jehova

“Mapalar so saray mata yo, ta makanengneng ira; tan saray layag yo, ta makadngel ira.”​—MATEO 13:16.

1. Anton tepet so onlesa ed kanonotan nipaakar ed reaksion na saray Israelita ed si Moises diad Palandey Sinai?

 SARAY Israelita a nandaragup ed leksab na Palandey Sinai so walaan na maabig a rason pian onapit ed si Jehova. Diad tua, inliktar to ra ed Ehipto diad panamegley na pakapanyari to. Inasikaso to iray pankaukolan da, ya intaryaan to ira na tagano tan danum sanen wala ira ed kalawakan. Insan, impanbiktorya to ira sumpad onlulusob ya armada na saray Amalekita. (Exodo 14:26-31; 16:2–17:13) Sanen mankakampamento ira ed kalawakan diad asingger ed Palandey Sinai, natatakot a maong iray totoo ed karol tan kirmat kanian manggiwgiw ira. Diad saginonor et anengneng da si Moises a linmeksab ed Palandey Sinai, ya iwawandag na lupa to so gloria nen Jehova. Ingen, imbes a pankelawan tan apresyaen da itan, sikara so inmarawi. ‘Tinmakot ira ya onasingger ed si Moises.’ (Exodo 19:10-19; 34:30) Akin ya antakot dan nengnengen so gloria nen Jehova, anta dakerakel lay ginawa to parad sikara?

2. Akin a nayarin tinmakot iray Israelita sanen anengneng da so gloria na Dios ya inwandag nen Moises?

² Nayarin say makasengeg ed intakot na saray Israelita et samay agawa la ed akadkauna. Sikara so dinisiplina nen Jehova sanen ginagala ray tinmunganga ed sikato diad impanggawa ra na binalitokan a kilaw a baka. (Exodo 32: 4, 35) Kasin akaaral ira ed impandisiplina nen Jehova tan inapresya ra itan? Aliwan ontan so ginawa na karaklan ed sikara. Sanen mansampot lay bilay nen Moises, impanonot to imay inkagawa nipaakar ed binalitokan a kilaw a baka pati ed arum niran inkagawa a tinmunganga iray Israelita. Oniay inkuan to ed totoo: “Sinmumpa kayo ed ganggan nen Jehova a Dios yo, tan sikato so agyo sinisia, nisay dinmengel kayo ed boses to. Masumpa kayo nensaman ed kinen Jehova, nanlapu ed agew ya impakapikabat ko ed sikayo.”​—Deuteronomio 9:15-24.

3. Anto so gagawaen nen Moises nensaman sano sasakbongan to so lupa to?

³ Isipen pa no antoy reaksion nen Moises ed intakot na saray Israelita. Oniay nabasa ed salaysay: “Sanen ayari lay impisalita nen Moises ed sikara, inyan to ed lupa to so sakey a sakbong. Bangbalet sanen linmay Moises [ed loob na tabernakulo] ed arap nen Jehova ya akisalita ed sikato, inekal to so sakbong ya angga ed intaynan to; et pinmaway tan imbaga to so saray nibilin ed sikato ed saray anak na Israel. Et saray anak na Israel anengneng da so lupa nen Moises, a say baog na lupa nen Moises dinmalangirang: et sinakbongan nen Moises so lupa to lamet; ya angga ed inloob to a pisalita lamet ed kinen Jehova.” (Exodo 34:33-35) Akin a no maminsan et sasakbongan nen Moises so lupa to? Anto so naaralan tayo ed satan? Ontulong iray ebat ed saratan a tepet pian nausisa tayo so mismon relasyon tayo ed si Jehova.

Asaew Iran Pankanawnawa

4. Anton kabaliksan so imparungtal nen apostol Pablo nipaakar ed impansakbong nen Moises?

⁴ Insalaysay nen apostol Pablo a say impansakbong nen Moises et makalanor ed kaisipan tan kipapasen na puso na saray mismon Israelita. Oniay insulat nen Pablo: “Saray anak nen Israel agda ayarian ya inseleng so mata ra ed lupa nen Moises a nisengeg ed gloria na lupa to . . . Et saray kaisipan da kinmigtel” odino nagmaliw a matewet. (2 Corinto 3:7, 14) Agaylan makapaermen itan a kipapasen! Saray Israelita et pinilin totoo nen Jehova, tan labay ton onapit ira ed sikato. (Exodo 19:4-6) Ingen ta agda labay so onnengneng ed sinag na gloria na Dios. Imbes ya ipaarap da so kapusoan tan kanonotan da ed si Jehova diad pangagamil da na maaron debosyon, napatnagan ed saray kiwas da a sikaray binmeneg ed sikato.

5, 6. (a) Anto so pampadparaan na saray Judio nen inmunan siglo tan saramay diad panaon nen Moises? (b) Anto so pandumaan na saramay dinmengel tan agdinmengel ed si Jesus?

⁵ Diad sayan aspekto et walay pipadparaan na satan nen inmunan siglo K.P. Diad samay panaon na inkakomberte nen Pablo ed Inkakristiano, say sipanan ed Ganggan so sinalatan na balon sipanan, a si Jesu-Kristo so manamegley, say Babaleg a Moises. Diad panamegley na salita tan gawa nen Jesus, naspot ton impatnag so gloria nen Jehova. Oniay insulat nen Pablo nipaakar ed apaolin Jesus: ‘Sikato so sinag na gloria na Dios, tan dilin talintao na inka-Dios to.’ (Hebreos 1:3) Agaylan abig a pankanawnawa itan parad saray Judio nensaman! Nayarian day ondengel ed saray salita nipaakar ed andi-anggaan a bilay manlapud Anak na Dios a mismo! Makapaermen balet ta karaklan ed saray pinulongan nen Jesus et agdinmengel. Nipaakar ed sikara, inaon nen Jesus so propesiya nen Jehova diad panamegley nen Isaias: ‘Say puso na sayan baley abalang toy liknaan to, tan saray layag da et mairap a makadngel, tan inlikdem da so kamataan da; ta pian ag-iran balot makanengneng ed saray mata ra, tan makadngel ed saray layag da, tan makatalos ed puso ra, tan magbabawi ra, et napaabig ko ira.’​—Mateo 13:15; Isaias 6:9, 10.

⁶ Wala so pirmin pandumaan na saray Judio tan saray babangatan nen Jesus, ta oniay inkuan nen Jesus nipaakar ed sikara: “Mapalar so saray mata yo, ta makanengneng ira; tan saray layag yo, ta makadngel ira.” (Mateo 13:16) Pampipilalekan na saray tuan Kristiano a kabaten tan panlingkoran si Jehova. Panliliketan dan sumpalen so linawa to, unong a niparungtal  itan ed Biblia. Bilang resulta, nipapatnag na saray alanaan a Kristiano so gloria nen Jehova diad ministeryo ra nipaakar ed balon sipanan, tan ontan met so gagawaen na saramay kabiangan na arum a karnero.​—2 Corinto 3:6, 18.

Akin ya Asakbongan so Maong a Balita

7. Akin ya agmakapasurprisa a maslak et mangipupulisay ed maong a balita?

⁷ Unong ed anengneng tayo la, diad panaon nen Jesus tan diad panaon nen Moises et impulisay na maslak ed saray Israelita so nikadkaduman pankanawnawa a nilukas ed sikara. Mipadpara met itan ed panaon tayo. Ipupulisay na maslak a totoo so maong a balita ya ipupulong tayo. Ag-itan makapasurprisa ed sikatayo. Oniay insulat nen Pablo: “Anggan say ebanghelyo tayo asakbongan ni, asakbongan ed saray nabalang. Et dia ed saramay say dios na sayan panaon binulag to so kaisipan da lapu’d agpanisia.” (2 Corinto 4:3, 4) Nilikud ni ed saray sagpot nen Satanas a sakbongan so maong a balita, dakel a totoo et sasakbongan da so kalupaan da lapud agda labay so makanengneng.

8. Diad anton paraan a nabubulag so dakel a totoo lapud agpikakabat, tan panon tayon napaliisan itan?

⁸ Saray piguratibon mata na dakel a totoo et abulag lapud agpikakabat. Sinaglawi na Biblia iray nasyon bilang ‘abilungetan so kalakal da, a niarawi ira ed bilay a kien na Dios, lapu ed agpikakabat a wala ed sikara.’ (Efeso 4:18) Sakbay a nagmaliw a Kristiano, si Pablo a makabat a tuloy ed Ganggan et abulag a tuloy ed agpikakabat kanian pinasegsegang to so kongregasyon na Dios. (1 Corinto 15:9) Ingen, imparungtal nen Jehova so katuaan ed sikato. Oniay insalaysay nen Pablo: “Lapu ed saya agamoran ko so panangasi, pian dia ed siak a manunaan, si Jesu-Kristo ipanengneng to so amin ya alablabas ya anos to, pian uliran na saray manisia ed kaunoran dia ed sikato nipaakar ed bilay ya andi angga.” (1 Timoteo 1:16) Singa si Pablo, dakel ed saray datin sinmumpa ed katuaan na Dios so manlilingkor la natan ed Sikato. Satan so maabig a rason no akin a mantultuloy itayon manpulong, anggan ed saramay onsusumpa ni ingen ed sikatayo. Kaleganan ni, diad regular a panaral ed Salitay Dios tan panggunaet a talosan itan, nipaliis itayo ed agmakabat a kakikiwas ya agmakapaliket ed si Jehova.

9, 10. (a) Panon ya impatnag na saray Judio nen inmunan siglo ya agda labay so paibangat tan ipipilit da iray pakatalos da? (b) Wala ta so pipadparaan da ed Kakristianoan natan? Ipaliwawa.

⁹ Parad karaklan, agda natalosan iray maespiritual a bengatla lapud ag-ira paibangat tan ipipilit da iray pakatalos da. Dakel a Judio so angipulisay ed si Jesus tan ed saray bangat to lapud mapegpeget dan tutumboken so Mosaikon ganggan. Siempre, aliwa met ya ontan so amin a Judio. Alimbawa, sanen apaoli si Jesus, “baleg ya ulop na saray saserdotes so tinmulok ed pananisia.” (Gawa 6:7) Anggaman kuan, nipaakar ed karaklan ed saray Judio, oniay insulat nen Pablo: “Angga ed sayan agew, no nabasa ra si Moises, sakey a sakbong so ontapew ed  puso ra.” (2 Corinto 3:15) Maseguron amta nen Pablo no anto so akauna lan imbaga nen Jesus ed saray Judion papangulo na relihyon: “Usisaen yo so saray sulsulat, ta nonoten yo a diad sikara wala so bila’yon maando; et saraya so mantasi ed siak.” (Juan 5:39) Say Kasulatan a maalwar dan uusisaen so akatulong komon ed sikara pian natebek da a si Jesus so Mesias. Balet ta walay dilin pakatalos na saray Judio, tan anggan say Anak na Dios a nanggawa na milagro et ag-akatangguyor ed sikara.

¹⁰ Mipadpara met itan ed karaklan ed Kakristianoan natan. Singa saray inmunan-siglon Judio, “wala so seseg da ed Dios, bangbalet aliwa ya unong ed [suston] kakabatan.” (Roma 10:2) Anggaman say arum et manaaral na Biblia, agda labay a panisiaan no anto so ibabaga na satan. Agda labay a bidbiren ya ibabangat nen Jehova so totoo to diad panamegley na matoor tan makabat ya aripen a klase na saray alanaan a Kristiano. (Mateo 24:45) Balet, natatalosan tayo ya ibabangat nen Jehova so totoo to tan tuloytuloy ya onaligwas so pakatalos ed madibinon katuaan. (Uliran 4:18) No papaibangat itayo ed si Jehova, natumangan itayo na pikakabat ed linawa tan gagala to.

11. Anto so epekto na ideyan ‘panisiaan labat so labay a panisiaan’ diad kasasakbongan na katuaan?

¹¹ Arum so abulag lapud ‘papanisiaan da labat so labay dan panisiaan.’ Nipasakbay ya arum so mamalaw ed totoo na Dios tan ed mensahen ipupulong da nipaakar ed kiwawala nen Jesus. Oniay insulat nen apostol Pedro: “Unong ed panlabay da, sayan katuaan so agda naim-imano,” salanti, say impangitarok na Dios ed delubio ed mundo sanen panaon nen Noe. (2 Pedro 3:3-6, NW) Mipadpara, dakel a mankuan a Kristiano so manisia ya ipapatnag nen Jehova so panangasi, kaabigan, tan panamerdona; ingen ta ibabaliwala odino ipupulisay da so katuaan ya anggapoy ipuepuera to ed pananusa. (Exodo 34:6, 7) Panseseetan na saray tuan Kristiano a talosan no anto so peteg ya ibabangat na Biblia.

12. Panon a nabubulag so totoo lapud tradisyon?

¹² Dakel a mimimisa so nabubulag lapud tradisyon. Oniay imbaga nen Jesus ed saray lider na relihyon diad panaon to: “Sikayo ginawa yo ya andi-kakanaan so salita na Dios nisengeg ed ugali [tradisyon] yo.” (Mateo 15:6) Maseseg ya impawil na saray Judio so puron panagdayew kapawil da manlapud inkakautibo ed Babilonia, ingen ta saray saserdote et nagmaliw a mapaatagey tan mantunongtunongan. Saray relihyoson piesta so nagmaliw a pormalistiko, ya agpeteg a mamapagalang ed Dios. (Malaquias 1:6-8) Diad panaon nen Jesus, inyarum na saray eskriba tan Fariseo so dakerakel a tradisyon ed Mosaikon Ganggan. Inwalwal nen Jesus iratan a lalaki bilang mansimpisimpitan lapud agda la natebek iray matunong a prinsipyo ya angibasiyan ed Ganggan. (Mateo 23:23, 24) Nepeg a manalwar iray tuan Kristiano ya ag-ira ikasipa na saray relihyoson tradisyon a ginawa na too manlapud puron panagdayew.

“Nengnengnengen so Agnanengneng”

13. Diad anton duaran paraan ya anengneng nen Moises so arum ed gloria na Dios?

¹³ Kinerew nen Moises a nanengneng so gloria na Dios diad palandey, tan anengneng to so sinag na gloria nen Jehova. Sanen linmoob ed tabernakulo, agto sinakbongan so lupa to. Si Moises so walaan na aralem a pananisia, a nampilalekan ton gawaen so linawa na Dios. Anggaman sikato so naikdan na pankanawnawan nanengneng so arum ed gloria nen Jehova diad pasingawey, diad sakey a pantalos et anengneng to la so Dios panamegley na mata na pananisia to. Ibabaga na Biblia a si Moises et  “nansiansia a singa to nengnengnengen so agnanengneng.” (Hebreos 11:27; Exodo 34:5-7) Tan impatnag to so gloria na Dios, aliwa lambengat ed saray sinag a manlalapud lupa to, noagta diad impanulong to ed saray Israelita a makapikabat tan makapanlingkor ed si Jehova.

14. Panon so impakanengneng nen Jesus ed gloria na Dios, tan anto so nanliketan to?

¹⁴ Diad tawen, direktan anengneng nen Jesus so gloria na Dios diad andukey a panaon, antis ni ingen ya apalsa so uniberso. (Uliran 8:22, 30) Kaleganan na satan ya amin a panaon, abayuboan da so pirmin panangaro tan panamabli ed balang sakey. Impatnag nen Jehova a Dios so sankamatamoyan ya aro tan panamabli to ed sayan panguloan na amin a pinalsa. Impatnag met nen Jesus so aralem a panangaro tan panamabli to ed Dios ya angiter ed sikato na bilay. (Juan 14:31; 17:24) Naspot so aroan dan dua bilang Ama tan Anak. Si Jesus, a singa si Moises, so nanliket ed impangipatnag to ed gloria nen Jehova diad saray bengatlan imbangat to.

15. Diad anton paraan so panmomorekdek na saray Kristiano ed gloria na Dios?

¹⁵ Singa si Moises tan si Jesus, saray Tasi natan ed dalin so magunaet a manmomorekdek ed gloria nen Jehova. Agda impulisay so maglorian maong a balita. Oniay insulat nen apostol Pablo: “Kapiganman ya ipawil na too ed Katawan [pian gawaen so linawa To], say sakbong naekal.” (2 Corinto 3:16) Aaralen tayo so Kasulatan lapud labay tayon gawaen so linawa na Dios. Pandinayewan tayo so gloria ya impatnag na Anak nen Jehova tan say nilanaan Ton Ari, si Jesu-Kristo, tan aaligen tayo so alimbawa to. Singa si Moises tan si Jesus, nipabtang ed sikatayo so sakey a ministeryo, ya ibangat so arum nipaakar ed maglorian Dios a dadayewen tayo.

16. Akin ya agunggonaan itayo ed impakaamta tayo ed katuaan?

¹⁶ Oniay impikasi nen Jesus: “Misalamat ak ed sika, O Ama, . . . ta inyamot mo so sarayan bengatla ed saray makabat tan makatalos, et sikaray impuyan mo’d saray ugugaw.” (Mateo 11:25) Inter nen Jehova so pakatalos ed saray gagala tan personalidad to ed saramay masimoon tan walaan na mapaabeban puso. (1 Corinto 1:26-28) Naproprotektaan itayo lapud panangasikaso to, tan ibabangat to itayo pian nagunggonaan itayon mismo, salanti, nagamoran so sankaabigan ed bilay tayo. Komon ta  anamoten tayo so amin a pankanawnawa pian onapit ed si Jehova, a pablien so dakel a probisyon to pian sikato so nakabat tayo a nagkalalo.

17. Panon tayon nagkalalon naamtaan iray kalidad nen Jehova?

¹⁷ Oniay insulat nen Pablo ed saray alanaan a Kristiano: ‘Sikatayon amin, ya ag-asakbongan so lupa, nengnengnengen tayo a singa dia ed sakey a salming so gloria na Katawan, tan apagmaliw itayon mipadpara ed talintao to manlapu ed gloria angga ed gloria.’ (2 Corinto 3:18) Balanglan say ilalo tayo et mangatatawen odino mangaraldalin, nagkalalo tayon naalig si Jehova no sikatoy lalon nakakabat tayo, salanti, saray kalidad tan personalidad to a niparungtal ed Biblia. No maapresya tayon morekdeken so nipaakar ed bilay, ministeryo, tan saray bangat nen Jesu-Kristo, mas nagnap tayon nipatnag iray kalidad nen Jehova. Peteg a makapalikliket a naamtaan ya idadayew tayo so Dios tayo, a panggugunaetan tayon ipatnag so gloria to!

Kasin Nanonotan Yo?

• Akin a saray Israelita et antakot ya onnengneng ed gloria na Dios ya impatnag nen Moises?

• Diad antoran paraan a say maong a balita et ‘asakbongan’ nen inmunan siglo? diad panaon tayo?

• Panon tayon nipatnag so gloria na Dios?

[Tepetepet Parad Panagaral]

[Litrato ed pahina 19]

Agnayarian na saray Israelita a nengnengen so lupa nen Moises

[Saray litrato ed pahina 21]

Singa si Pablo, dakel a datin onsusumpa ed katuaan na Dios so manlilingkor la natan ed Sikato

[Saray litrato ed pahina 23]

Panliliketan na saray lingkor nen Jehova ya ipatnag so gloria to