Kasin Ipatnag Yo so Gloria na Dios?

’Sikatayo so mangipatnag na marlang a kagalangan [odino gloria] na Katawan.’​—2 CORINTO 3:18, Maung a Balita.

1. Anto so anengneng nen Moises, tan anto so agawa ed saginonor?

 SAKEY iya ed saray makapakelkelaw a pasingawey a naimatonan na siopaman a too ed kapiganman. Naebatan so nikadkaduman kerew nen Moises sanen bukbukor to ed tagey na Palandey Sinai. Nipanengneng ed sikato so agnin balot anengneng na too, salanti, say gloria nen Jehova. Siempre, agto direktan anengneng si Jehova. Masmasnag so ereng na Dios kanian anggapo so too a manbilay a makanengneng ed Sikato. Imbes, insanib nen Jehova so ‘lima’ to ed si Moises pian naprotektaan anggad inlabas To, a mapatnag ya inusar To so sakey ya anghel. Insan inabuloyan nen Jehova si Moises a makanengneng ed sinag a mangipapatnag ed gloria To. Si Jehova so akitongtong met ed si Moises diad panamegley na sakey ya anghel. Dedeskribien na Biblia so agawa ed saginonor: “Et agawa, a sanen linmasur si Moises a nanlapu ed palandey a Sinai . . . say baog na lupa to dinmalangirang makalanor ed impisalsalita to ed [si Jehova].”​—Exodo 33:18–34:7, 29.

2. Anto so insulat nen apostol Pablo nipaakar ed gloria ya ipapatnag na saray Kristiano?

² Isipen pa a kaiba yo si Moises ed saman a palandey. Agaylan makapaliket so pakanengneng ed masmasnag a karlangan na Makapanyarin-amin tan say pakadngel ed saray salita to! Agaylan pribilehyo so ileksab ed Palandey Sinai a kaiba si Moises, say manamegley na sipanan ed Ganggan! Balet, amta yo ta a diad pigaran paraan et ipapatnag na saray tuan Kristiano so gloria na Dios, a nagkalalo ni ed samay impangipatnag nen Moises? Satan a makapatenyeg-kanonotan a katuaan so naromog ed sulat nen apostol Pablo. Insulat to a saray alanaan a Kristiano et ‘mangipapatnag na marlang a gloria nen Jehova.’ (2 Corinto 3:7, 8, 18) Diad sakey a pantalos, say gloria na Dios so ipapatnag met na saray Kristianon walaan na mangaraldalin ya ilalo.

No Panon ya Ipapatnag na Saray Kristiano so Gloria na Dios

3. Panon tayon akabat si Jehova diad saray paraan ya ag-agawa ed si Moises?

³ Panon tayon nipatnag so gloria na Dios? Agtayo anengneng odino nadngel si Jehova a singa ed naeksperiensya nen Moises. Balet, akabat tayo si Jehova diad saray paraan ya ag-agawa ed si Moises. Si Jesus so pinmatnag bilang Mesias ngalngali 1,500 a taon kayari na impatey nen Moises. Kanian, agnaamtaan nen Moises no panon so inkasumpal na Ganggan ed si Jesus, ya inatey pian narondon so katooan manlapud makapasinagem a panamairap na kasalanan tan ipapatey. (Roma 5:20, 21; Galacia 3:19) Niarum ni, limitado lambengat so natebek nen Moises ed inkatalonggaring na gagala nen Jehova, a niyapasakey ed Mesianikon Panarian tan ed mangaraldalin a Paraiso ya itarok na satan. Kanian natetebek tayo so gloria nen Jehova, aliwan diad literal a mata tayo, noagta diad panamegley na mata na pananisia a nibase ed saray bangat na Biblia. Niarum ni, nadngel tayo so boses nen Jehova, aliwan diad panamegley na sakey ya anghel, noagta diad panamegley na Biblia, nagkalalo la ed saray Ebanghelyo, ya alay abig ya aneskribe ed saray bangat tan ministeryo nen Jesus.

4. (a) Panon ya ipapatnag na saray alanaan a Kristiano so gloria na Dios? (b) Diad antoran paraan a nipatnag na saramay walaan na mangaraldalin ya ilalo so gloria na Dios?

⁴ Anggaman ag-ipapatnag na saray Kristiano so gloria na Dios diad panamegley na sinag ya ompaway ed kalupaan da, maligliga so kalupaan da legan dan ibabaga ed arum so nipaakar ed maglorian personalidad nen Jehova tan saray gagala to. Nipaakar ed panaon tayo, impasakbay nen propeta  Isaias a say totoo na Dios et ‘ipaliwawa ra so gloria nen Jehova ed nanleleetan na saray nasyon.’ (Isaias 66:19) Niarum ni, oniay nabasa tayo ed 2 Corinto 4:1, 2: “Bangta wala ed sikami so panangasikaso [“ministeryo,” NW], . . . impulisay mi so saray maamot a bengatla ran makapabaing; ya agkami manakar ed kasiliban tan agmi pikeweten so salita na Dios; noag ingen diad inkipaliwawa na katuaan imatalek mi sikamin dili ed konsiensia na balang too ed imaton na Dios.” Nagkalautlan tinukoy nen Pablo iray alanaan a Kristiano, bilang saray ministro odino “manangasikaso na balon sipan.” (2 Corinto 3:6) Balet say ministeryo na sayan duaran grupo so walaan na epekto ed dakerakel a totoo ya awalaan na ilalon andi-anggaan a bilay diad dalin. Lalanoren na ministeryo ra so panangipatnag ed gloria nen Jehova, ya aliwa lambengat diad ibabangat da noagta dia met ed kabibilay da. Responsabilidad tan pribilehyo tayo ya ipatnag so gloria na Sankatageyan a Dios!

5. Anto so ipapatnag na inkaaligwas tayo ed espiritual?

⁵ Natan, say maglorian maong a balita na Panarian na Dios so nipupulong ed interon atooan a dalin, unong ya impasakbay nen Jesus. (Mateo 24:14) Saray indibidual a nanlapud amin a nasyon, tribu, balbaley, tan panagsalita so malikeliket ya angawat ed maong a balita tan amasimbalo ed kabibilay da ta pian nagawa so linawa na Dios. (Roma 12:2; Apocalipsis 7:9) Singa saray akadkaunan Kristiano, ag-ira napatunda a mansalita nipaakar ed saray anengneng tan nadngel da. (Gawa 4:20) Masulok ya anemiran milyon a totoo so mangipapatnag ed gloria na Dios natan, a sankarakelan nen say dinanman a bilang ed awaran na too. Kasin sakey ka la ed sikara? Say inkaaligwas na totoo na Dios ed espiritual so makakombinsin pakapatnagan a sikaray bebendisyonan tan proprotektaan nen Jehova. Napatnagan ni ingen so pananulong na espiritu nen Jehova ed sikatayo lapud mabisbiskeg iray puersa ya onsusumpa ed sikatayo. Nengnengen tayo no akin ya ontan.

Agnapatunda so Totoo na Dios

6. Akin a nakaukolan so pananisia tan inkakpel pian makatalindeg itayo ed dapag nen Jehova?

⁶ Ipasen pa a sikayoy pantetestigoen ed korte sumpad mauge-uges a kriminal. Amta yo a sikatoy walaan na mabiskeg ya organisasyon tan usaren to so amin a paraan pian sikatoy agyo niwalwal. Pian makapantestigo kayo sumpad satan a kriminal, nakaukolan so inkakpel ontan met ed kompiyansa a protektaan kayo na saray walad autoridad. Ontan met so kipapasen tayo. Diad pantatasi tayo nipaakar ed si Jehova tan ed saray gagala to, makapantetestigo itayo sumpad si Satanas a Diablo, a sikatoy niwawalwal tayo bilang managpatey tan matila a mangibabalang ed interon atooan a dalin. (Juan 8:44; Apocalipsis 12:9) Pian makatalindeg kayo ed dapag nen Jehova tan nasumpa yo so Diablo, nakaukolan so pananisia tan inkakpel.

7. Panon kabiskeg so impluensya nen Satanas, tan anto so panggugunaetan ton gawaen?

⁷ Siempre, si Jehova labat so Supremo. Sikato so mas makapanyarin tuloy nen say si Satanas. Makapanmatalek itayo a nayarian tan kaliktan nen Jehova a naprotektaan itayo no matoor itayon manlingkor ed sikato. (2 Awaran 16:9) Anggaman kuan, si Satanas so manuley na saray demonyo tan say mundo na katooan a binmeneg ed Dios. (Mateo 12:24, 26; Juan 14:30) Lapud sikatoy nipukok ed kaliberliber na dalin tan walaan na “baleg a sanok,” si Satanas so maunganget ya onsusumpa ed saray lingkor nen Jehova tan uusaren to so mundon uuleyan to pian patundaen so  amin a mangipupulong ed maong a balita. (Apocalipsis 12:7-9, 12, 17) Panon to itan a gagawaen? Diad taloran paraan.

8, 9. Panon ya uusaren nen Satanas so lingon panangaro, tan akin a nepeg tayon maalwar a pilien iray kalimog tayo?

⁸ Say sakey a paraan nen Satanas pian nisuawi itayo et diad panamegley na saray kapagaan ed bilay. Saray totoo ed sarayan kaunoran ya agew et maaro ed kuarta, maaro ed inkasikaran dili, tan maaro ed likeliket. Aliwa iran maaro ed Dios. (2 Timoteo 3:1-4) Lapud okupado ira ed inagew-agew a kimkimey da ed bilay, maslak a totoo et ‘agmaniimano’ ed maong a balita ya ipapasabi tayo ed sikara. Ag-ira interesadon manaral na katuaan ed Biblia. (Mateo 24:37-39) Say ontan ya awawey so makaimpluensya, a mamateglep ed sikatayo diad espiritual. No abuloyan tayoy inkasikatayo a mangaro ed materyal iran bengatla tan ed saray likeliket ed bilay, ombetel so aro tayo ed Dios.​—Mateo 24:12.

⁹ Lapud sayan rason, maalwar a pipilien na saray Kristiano no siopa iray pilimogan da. “Miulop ka ed saray makabat a totoo, et sika naani makabat,” so insulat nen Arin Solomon, “balet say kaiba na saray maatiw manlikna na segsegang.” (Uliran 13:20) Komon ta “miulop” itayo ed saramay mangipapatnag ed gloria na Dios. Agaylan makapaliket itan! Diad pililimog tayo ed saray agagi tayo ed espiritual diad saray pantitipon tan ed arum niran pankanawnawa, napapaseseg itayo ed aro, pananisia, liket, tan kakabatan da. Say ontan a makagunggonan pililimog so mamabiskeg ed determinasyon tayon manseet ed ministeryo tayo.

10. Diad antoran paraan ya inusar nen Satanas so panagbalaw sumpad saramay mangipapatnag ed gloria na Dios?

¹⁰ Say komaduan paraan nen Satanas pian patundaen so amin a Kristiano ed pangipapatnag da ed gloria na Dios et say panagbalaw. Ag-itayo nepeg a nasurprisa ed sayan taktika. Legan na ministeryo nen Jesu-Kristo diad dalin, sikato so binalawbalaw, ya inelek-elekan, niludlurey, pinabpabaingan, minaltrato, tan nilutlutdaan ni ingen. (Marcos 5:40; Lucas 16:14; 18:32) Saray inmuunan Kristiano so minudmora met. (Gawa 2:13; 17:32) Ontan met a panangabuso so kipapaarapan na saray lingkor nen Jehova natan. Unong ed si apostol Pedro, sikara so ipasen a palson propeta. Oniay impasakbay to: “Dia ed kaunoran ya agew onsabi so saray managlurey a pati panaglurey, a manakar ira’d dilin lawan da, tan kuanen da: Iner so kawalaan na sipan ed idateng to? Ta . . . ganagana a bengatla, ontutuloy a singa nen gapo na inkapalsa.” (2 Pedro 3:3, 4) Balbalawen iray totoo na Dios bilang aliwan realistiko. Ipapasen dan karaanan la iray moral ya estandarte na Biblia. Parad karaklan, say mensahen ipupulong tayo et makulangkulang. (1 Corinto 1:18, 19) Bilang Kristiano, nayarin sikatayo so balbalawen diad eskuelaan, trabaho, tan no maminsan et diad loob na pamilya. Sikatayo so agbalot napatunda a mangipatnag ed gloria na Dios diad panamegley na panagpulong, ya amta tayon impasen met nen Jesus a katuaan so Salitay Dios.​—Juan 17:17.

11. Panon ya uusaren nen Satanas so panamasegsegang pian patundaen iray Kristiano?

¹¹ Say komatlon taktika ya uusaren na Diablo pian patundaen itayo et say isusumpa odino panamasegsegang. Oniay inkuan nen Jesus ed saray patumbok to: “Saman la ‘yawat da kayo ed pakapasegsegang,  tan pateyen da kayo naani; tan gulaen da kayo naani na saray amin a nasyon nisengeg ed ngaran ko.” (Mateo 24:9) On, bilang saray Tasi nen Jehova, nipapaarap itayo ed maruksan panamasegsegang diad dakel a parte na dalin. Amta tayo ya abayag lan impasakbay nen Jehova a say panagbusol, odino panggula, so nagawa ed baetan na saramay manlilingkor ed Dios tan ed saramay manlilingkor ed si Satanas a Diablo. (Genesis 3:15) Amta tayo met a diad pansiansian matoor ed silong na subok et pepekderan tayo a si Jehova so manepeg labat a manuley ed uniberso. Lapud amta tayo itan, napabiskeg itayo anggaman ed saray mair-irap a kipapasen. Anggapo so panamasegsegang a permanentin mangamper ed sikatayo no mansiansia itayon determinado a mangipatnag ed gloria na Dios.

12. Akin a nepeg itayon manliket legan itayon manmamatoor anggaman ed isusumpa nen Satanas?

¹² Kasin lalabanan yo so pananagyat na mundo tan manmamatoor kayo anggaman ed panagbalaw tan isusumpa? Walaan kayo sirin na rason a manliket. Pinaseguroan nen Jesus iramay ontumbok ed sikato: “Mapalar kayo sano balawen da kayoy totoo, tan pasegsegangen da kayo, tan salitaen day amin a nengneng na mauges a sumpa’d sikayo, nisengeg ed siak, a mantila ra. Manggayaga kayo tan manliket kayon mapalalo; ta balbaleg so tumang yo ed tawen; ta ontan met so impamasegsegang da ed saray propeta ya akaunan nambilay nen sikayo.” (Mateo 5:11, 12) Say panagsungdo yo so mamaneknek a say makapanyarin masanton espiritu nen Jehova so walad sikayo, a mamapabiskeg ed sikayo a mangipatnag ed gloria to.​—2 Corinto 12:9.

Panagsungdo Diad Tulong nen Jehova

13. Anto so manunan rason no akin a mansusungdo itayo ed Makristianon ministeryo tayo?

¹³ Say manunan rason no akin a mansusungdo itayo ed ministeryo et aaroen tayo si Jehova tan panliliketan tayon ipatnag so gloria to. Saray totoo so kaslakan a mangaalig ed saramay aaroen tan rerespetoen da, tan anggapo lay mas makanepegan ya aligen tayo noagta si Jehova a Dios. Lapud pirmin panangaro to, imbaki to so Anak to ed dalin pian mantasi ed katuaan tan dondonen so matulok a katooan. (Juan 3:16; 18:37) Singa say Dios, pilalek tayo ya amin a klase na totoo et magbabawi tan nilaban; kanian satan so rason no akin a pupulongan tayo ira. (2 Pedro 3:9) Sayan pilalek, a kalaktip lay determinasyon tayon aligen so Dios, so mamapakiwas ed sikatayon mantultuloy ed panangipatnag ed gloria to panamegley na ministeryo tayo.

14. Panon itayon papabiskegen nen Jehova pian mansungdo ed ministeryo tayo?

¹⁴ Balet ta manuna ed amin, say biskeg tayo pian makapansungdo ed Makristianon ministeryo tayo et manlalapud si Jehova. Susuportaan tan papabiskegen to itayo diad panamegley na espiritu, organisasyon, tan say Salita to, say Biblia. Si Jehova so ‘mangiiter na anos’ odino sungdo ed saramay mabulos a mangipatnag ed gloria to.  Eebatan to iray pikakasi tayo tan iikdan to itayo na kakabatan a mangarap ed saray subok. (Roma 15:5, Maung a Balita; Santiago 1:5) Niarum ni, ag-abuloyan nen Jehova a nidunget itayo ed antokaman a subok ya agtayon balot naanosan. No manmatalek itayo ed si Jehova, sikato so manggawa na paraan ta pian makapantultuloy tayon nipatnag so gloria to.​—1 Corinto 10:13.

15. Anto so makatulong ed sikatayo pian mansungdo?

¹⁵ Say panagsungdo tayo ed ministeryo so pakapatnagan a walad sikatayo so espiritu na Dios. Diad pangiyilustra: Ipasen pa a walay akikasi ed sikayo a papaitunog to so sakey a klase na tinapay diad kabkaabungan, ya anggapoy bayar. Imbaga ed sikayo a gawaen yo itan ed dilin gastos tan eskedyul yo. Diad saginonor, naamtaan yo a dagdaiset a totoo so talagan malabay na tinapay yo; arum ni ingen so onsusumpa ed saray sagpot yon mangitunog ed satan. Antoy nikuan yo, kasin mantultuloy kayo ed ontan a klase na trabaho? Maseguron andi. Ingen, nayarin pigay taon la, a dekadekada ni ingen, ya isesekar yo so inkasikayo a mangiyabawag na maong a balita diad dilin panaon yo tan ed dilin gastos yo. Akin? Agta lapud panangaro yo ed si Jehova tan ed panutumang to ed saray sagpot yo panamegley na espiritu to pian natulongan kayon makapansungdo? Seguradon ontan!

Sakey a Kimey ya Agnalingwanan

16. Say pansungdo ed ministeryo tayo et mankabaliksan na anto parad sikatayo tan ed saramay ondengel ed sikatayo?

¹⁶ Say ministeryo na balon sipanan et sakey a langkap ya anggapoy kapara. (2 Corinto 4:7) Ontan met, say Makristianon ministeryo a gagawaen na arum a karnero ed interon globo et sakey a kayamanan. Diad pansusungdo yo ed ministeryo yo, nayarian yon ‘nilaban so inkasikayo tan saray ondengel met ed sikayo,’ unong ya insulat nen Pablo ed si Timoteo. (1 Timoteo 4:16) Isipen pa so kabaliksan na satan. Say maong a balita ya ipupulong yo so mangiiter ed arum na pankanawnawan manbilay ya andi-anggaan. Makapikaaro kayon maong ed saramay tutulongan yo ed espiritual a paraan. Isipen pa so liket ed pambilay ya andi-anggaan diad Paraiso a kaiba iramay atulongan yon makaaral nipaakar ed Dios! Maseguron agdan balot nalingwanan iray sagpot yon ontulong ed sikara. Petepeteg a makapaliket itan!

17. Akin a say panaon tayo et nikadkaduman peryodo na awaran na too?

¹⁷ Manbibilay kayo ed nikadkaduman peryodo na awaran na too. Aglan balot naulit so kipulong na maong a balita ed utel na mundon binmeneg ed Dios. Ontan a klase na mundo so nambilayan nen Noe, tan naimatonan to so inkaderal na satan. Agaylay panliket to ta diad matoor ya impanumpal to ed linawa na Dios sanen ginawa to so biong, sikato tan say pamilya to et niliktar! (Hebreos 11:7) Ontan met a liket so nalikna yo. Isipen pa no anto so liknaan yo diad balon mundo no nodnonoten yo so agawaan yo legan na sarayan kaunoran ya agew, ya amta yon ginawa yoy anggaay nayarian yo pian iyalibansa iray intereses na Panarian.

18. Anto so panamaseguro tan panamaseseg nen Jehova ed saray lingkor to?

¹⁸ Itultuloy tayo sirin ya ipatnag so gloria na Dios. No gagawaen tayo itan, agtayo itan nalingwanan ed andi-anggaan. Nodnonoten met nen Jehova iray agawaan tayo. Oniay panamaseseg na Biblia: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to, ed impanulong yo ed saray sasanto ed saray pankaukolan da, tan ed panutulong yo ni natan ed sikara. Tan pampirpirawatan mi a balang sakey ed sikayo ipanengneng to so onman a seet nipaakar ed inkapno na andi-kaatapan ya ilalo angga ed kasampotan: Ya agkayo mangiras, noag ingen umaalig ed saraman so lapu ed pananisia tan anos tawiren da so saray sipasipan.”​—Hebreos 6:10-12.

Kasin Nipaliwawa Yo?

• Panon a nipatnag na saray Kristiano so gloria na Dios?

• Anto so pigaran taktika ya uusaren nen Satanas pian patundaen so totoo na Dios?

• Anto so walan ebidensya a say espiritu na Dios et walad sikatayo?

[Tepetepet Parad Panagaral]

[Litrato ed pahina 15]

Impatnag na lupa nen Moises so gloria

[Saray litrato ed pahina 16, 17]

Ipapatnag tayo so gloria na Dios diad ministeryo tayo