Say Ganggan na Aro a Walad Kapusoan

‘Iyan ko naani tunong ko ed saray akindalem a kabiangan da, tan dia ed puso ra sikato so isulat ko naani.’​—JEREMIAS 31:33.

1, 2. (a) Anto so aralen tayo natan? (b) Panon ya impatnag nen Jehova so inkasikato diad Palandey Sinai?

 DIAD akadkaunan duaran artikulo, naaralan tayo a sanen linmeksab si Moises manlapud Palandey Sinai, say lupa to so angisinag na gloria nen Jehova. Asingbat tayo met so sakbong ya insulong nen Moises. Konsideraen tayo natan so misiglaotan a pamaakaran a walaan na kabaliksan ed saray Kristiano natan.

² Sanen si Moises so walad tagey na palandey, inawat to iray bilin manlapud si Jehova. Naimatonan na saray Israelita a nandaragup ed asingger na Palandey Sinai so makapadinayew ya impangipatnag na Dios ed inkasikato. “Wala so karokarol tan kirkirmat, tan sakey a makapal a lurem diman ed tagey na palandey, tan say tanol na trumpeta mapalaloy tubaw; kanian ginmiwgiw so amin a katooan a wala ed kampamento. . . . Tan say palandey a Sinai walan asigpot nensaman ed asewek, lapud no si Jehova linmeksab ya angga ed tapew to a manluglugan ed apoy: tan say asewek to amatagey a singa say asewek na sakey a horno, tan say sankapalandeyan ayegyeg a mapalalo.”​—Exodo 19:16-18.

3. Diad anton paraan so impangiter nen Jehova ed Samploran Ganggan ed Israel, tan anto so atalosan ed saman na satan a nasyon?

³ Nansalita si Jehova ed totoo diad panamegley na sakey ya anghel, ya inter to ed sikara so tinawag a Samploran Ganggan. (Exodo 20:1-17) Kanian, anggapoy duaruwa a sarayan ganggan et nanlapud Makapanyarin-amin. Insulat nen Jehova iratan a ganggan diad saray tapyas a bato, ya imbetag nen Moises sanen anengneng to iray Israelita a mandadayew ed binalitokan a kilaw a baka. Insulat lamet nen Jehova iratan a ganggan diad bato. Diad saman, sanen linmeksab si Moises ya awit to iray tapyas a bato, say lupa to so mangisisinag na liwawa. Kanian, natalosan la na amin a saraman a ganggan et importantin tuloy.​—Exodo 32:15-19; 34:1, 4, 29, 30.

4. Akin ya importantin tuloy so Samploran Ganggan?

⁴ Say duaran tapyas a bato ya angisulatan ed Samploran Ganggan so inkarga ed kaban na sipan  a walad Sankasantosan a silir na tabernakulo tan diad saginonor et diad templo. Saray ganggan a nisulat ed saratan so angidatak ed manuna iran prinsipyo na sipanan ed Mosaikon Ganggan tan angiletneg ed basiyan na pananguley na Dios ed nasyon na Israel. Impabitar na saratan a say pidedenengan nen Jehova et sakey a klase na totoo, a pinilin totoo.

5. Diad antoran paraan ya apatnagan ed saray ganggan na Dios so aro to ed Israel?

⁵ Dakel so imparungtal na saratan a ganggan nipaakar ed si Jehova, nagkalautla ed panangaro to ed totoo to. Agaylan kamablin langkap iratan parad saramay angunor ed saratan! Oniay insulat na sakey ya iskolar: “Anggapo so sistema ed moral a ginawa na too nensaman odino manlapu la nensaman . . . a makapipetekan, makapipara, odino mamalumbas, ed saratan a samploran salita na Dios.” Nipaakar ed interamentin Mosaikon Ganggan, oniay imbaga nen Jehova: “No tuloken yo so boses ko a tuatua, tan em-eman yo so sipanan ko, sikayo ed satan so pabpablien ko a pinagka-kayamanan ko a manuna nen saray amin a totoo; ta amin a dalin kien ko. Et sikayo naani singa sakey a panarian na saray saserdotes, tan sakey a masimpit a nasyon.”​—Exodo 19:5, 6.

Sakey a Ganggan a Nisulat ed Puso

6. Anton ganggan so apaneknekan a mas mabli ni nen saray ganggan a nisulat ed bato?

⁶ On, mabmabli iratan a ganggan na Dios. Balet, amta yo ta a walay kayarian na saray alanaan a Kristiano a mabmabli ni nen saray ganggan a nisulat ed bato? Impasakbay nen Jehova so panggawa to ed sakey a balon sipanan, ya agla mipara ed samay sipanan ed Ganggan a ginawa parad nasyon na Israel. ‘Iyan ko naani tunong ko ed saray akindalem da a kabiangan da, tan dia ed puso ra sikato so isulat ko naani.’ (Jeremias 31:31-34) Si Jesus, a Manamegley ed balon sipanan, so ag-angiter na nisulat a kodigo na ganggan ed saray patumbok to. Impurek to so ganggan nen Jehova ed isip tan puso na saray babangatan to diad saray imbaga tan ginawa to.

7. Siopa so inmunan angiteran ed “ganggan nen Kristo,” tan siopa so angawat ed satan diad saginonor?

⁷ Sayan ganggan et tinawag a “ganggan nen Kristo.” Satan so inmunan niiter, aliwan diad literal a nasyon na Israel, a kapolian nen Jacob, noagta diad sakey ya espiritual a nasyon, say “Israel na Dios.” (Galacia 6:2, 16; Roma 2:28, 29) Say Israel na Dios et tugyopen na saray Kristianon alanaan na espiritu. Diad saginonor, akiulop ed sikara so “baleg ya ulop” a nanlapud amin a nasyon a manggugunaet met a mandayew ed si Jehova. (Apocalipsis 7:9, 10; Zacarias 8:23) Bilang “saksakey a pulok” a walaan na “saksakey a pastol,” saratan a duaran grupo so angawat ed “ganggan nen Kristo,” ya aabuloyan da itan a mangigiya ed amin a gagawaen da.​—Juan 10:16.

8. Anto so pandumaan na Mosaikon Ganggan tan say ganggan nen Kristo?

⁸ Aliwan singa saray Israelita, a kinaukolan a mangunor ed Mosaikon Ganggan lapud nianak ira ed nasyon na Israel, saray Kristiano so mansiasiansia  ed silong na ganggan nen Kristo lapud pinili ra itan, kanian ag-importante no antoy rasa tan no iner so inkianakan. Naaralan da so nipaakar ed si Jehova tan ed saray dalan to tan pampipilalekan dan gawaen so linawa to. Lapud nisulat so ganggan na Dios ed ‘akindalem a kabiangan’ da, odino “dia ed puso ra,” saray alanaan a Kristiano so ontutulok ed Dios aliwan lapud amta ran dusaen to iramay ag-ontulok nisay obligasyon da labat so pangunor ed sikato. Say katutulok da so nibase ed mas importante tan mas mapuersan bengatla, tan saramay kabiangan na arum a karnero so ontutulok met lapud say ganggan na Dios et walad kapusoan da.

Saray Ganggan a Nibase ed Aro

9. Panon ya impabitar nen Jesus a say aro so pinagkasegek na saray ganggan nen Jehova?

⁹ Nasegek so amin a ganggan tan pananontonan nen Jehova diad sakey a salita: aro. Manlapu la’d saman ya angga ed arapen, say aro so manunan kabiangan na puron panagdayew. Sanen atepetan si Jesus no dinan so sankamanunaan ed Ganggan, oniay inyebat to: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo.” Say komadua et: “Aroen mo so kaparam a too unong ed sikan dili.” Insan oniay imbaga to: “Dia ed sarayan duaran ganggan so pansaksabitan na amin a katunongan tan say salita na saray propeta.” (Mateo 22:35-40) Impabitar sirin nen Jesus, ya aliwa labat a say Ganggan a mangilaktip ed Samploran Ganggan, noagta say interon Hebreon Kasulatan so nibase ed aro.

10. Panon tayon naseguro a say aro so basiyan na ganggan nen Kristo?

¹⁰ Kasin say aro ed Dios tan ed kaparan too so basiyan met na ganggan a walad kapusoan na  saray Kristiano? On! Say ganggan nen Kristo so mangilalanor ed impapuson aro ed Dios tan mangilaktip ed balon ganggan, salanti, saray Kristiano so kinaukolan a nawalaan na masakripisyon panangaro ed balang sakey. Sikara so manaaroan a singa ed impangaro nen Jesus ed saray babangatan to, tan mabulos ton inter so bilay to nisesengeg ed saray kakaaro to. Imbangat to iray babangatan to ya aroen da so Dios tan manaaroan ira ed balang sakey, a singa impangaro to ed sikara. Say matalonggaring ya aro ya ipapatnag da ed balang sakey so manunan kalidad a pakabidbiran na saray tuan Kristiano. (Juan 13:34, 35; 15:12, 13) Sikara ni ingen so imbangat nen Jesus ya aroen da iray kakabusol da.​—Mateo 5:44.

11. Panon ya impatnag nen Jesus so aro ed Dios tan ed katooan?

¹¹ Inletneg nen Jesus so naspot ya alimbawa diad panangipatnag na aro. Bilang makapanyarin espiritun pinalsa ed tawen, maliket ton inawat so pankanawnawan iyalibansa so intereses nen Ama to diad dalin. Nilikud ed impangibagat to na bilay to bilang too ta pian makapambilay a magnayon so arum, impatnag to ed totoo no panon so nepeg dan pambilay. Sikato so mapaabeba, mapangasi, tan makonsidera, a tinulongan to iramay nabebelatan tan napapairap. Innabang to met ‘iray salita na maando a bilay,’ a maseet ton tinulongan so arum pian nakabat da si Jehova.​—Juan 6:68.

12. Akin a nibaga a say aro ed Dios tan ed kaparan too et maapit a mansiglaotan?

¹² Diad tua et maapit a mansiglaotan so aro ed Dios tan ed kaparan too. Oniay inkuan nen apostol Juan: “Say aro kien na Dios . . . No wala so mankuan, Aroen ko so Dios, tan busolen to so agi to, sikato so matila: Ta say agmangaro ed agi to, anta anengneng to, agto nayarian ya aroen so Dios ya agto anengneng.” (1 Juan 4:7, 20) Si Jehova so nanlapuan tan mismon personipikasyon na aro. Napatnagan so aro ed amin a gagawaen to. Mangaaro itayo lapud apalsa itayo unong ed indengan to. (Genesis 1:27) No ipapatnag tayo so aro ed kapara tayon too, ipapatnag tayo so panangaro tayo ed Dios.

Nipatnag so Panangaro Diad Pangunor

13. No aaroen tayo so Dios, anto so unonan gawaen tayo?

¹³ Panon tayon naaro so Dios, ya agtayo nanengneng? Say importante tan manunan kundang et say pikabat ed sikato. On, agtayo naaro odino napanmatalkan so sakey ya agtayo kabkabat. Kanian, papasesegen itayo na Salitay Dios a kabaten so Dios diad pambasa ed Biblia, pampikasi, tan pilimog ed saramay mikabat tan mangaaro la ed sikato. (Salmo 1:1, 2; Filipos 4:6; Hebreos 10:25) Nagkalalo lan makatulong so panaral ed apatiran Ebanghelyo lapud ipaparungtal na saratan so personalidad nen Jehova unong a napatnagan ed bilay tan ministeryo nen Jesu-Kristo. Lalon ombulaslas so pilalek tayo ya unoren so Dios tan aligen so personalidad to no sikatoy nakabkabat tayo tan naapresya tayo so aro ya impatnag to ed sikatayo. On, say panangaro ed Dios so mangilalanor ed katutulok.

14. Akin a nibaga ya aliwan makapabelat iray ganggan na Dios?

¹⁴ Sano aaroen tayo iray indibidual, amta tayo no anto so labay tan agda labay, tan itutukoy tayo ed sikara so ugali tayo. Agtayo labay a paermenen iramay aaroen tayo. “Saya so aro na Dios,” so insulat nen apostol Juan, “a sumpalen tayo so saray ganggan to: tan saray ganggan to aliwa ran ambelat.” (1 Juan 5:3) Aliwa iratan a makapabelat tan dakerakel. Say aro so mangigiya ed dalan tayo. Agtayo la nakaukolan so mangipatlep ni na dakerakel a totontonen a mangigiya ed kada kiwas tayo, noagta say aro ed Dios so mangigiya ed sikatayo. No inaro tayo so Dios, panliketan tayon gawaen so linawa to. Diad ontan et nagamoran tayo so panangabobon na Dios, tan nagunggonaan itayon mismo, a say panangidirehi to so lawas pankaabigan tayo.​—Isaias 48:17.

15. Anto so mamakiwas ed sikatayon mangalig ed si Jehova? Ipaliwawa.

¹⁵ Say aro ed Dios so mamakiwas ed sikatayon aligen iray kalidad to. Sano aaroen tayo so sakey a too, pandinayewan tayo iray kalidad to tan panggunaetan tayon aligen iratan. Nodnonoten pa so siglaotan nen Jehova tan si Jesus. Sankaiba  ira ed tawen diad loob la na binilyon a taotaon. Abayuboan da so aralem tan maralus a panangaro ed sakey tan sakey. Nasnaspot a naalig nen Jesus so mangatatawen ya Ama to kanian oniay nibaga to ed saray babangatan to: “Say akanengneng ed siak anengneng to so Ama.” (Juan 14:9) Legan tayon nagagamoran so pikakabat tan nababayuboan so apresasyon ed si Jehova tan ed Anak to, napakiwas itayon mangalig ed sikara. Lapud panangaro tayo ed si Jehova, ontan met ed tulong na masanton espiritu to, nayarian tayon ‘lakseben so toon daan a pati saray gawa to, tan nisulong tayo so balon inkatoo.’​—Colosas 3:9, 10; Galacia 5:22, 23.

Aro a Napapatnagan ed Kiwas

16. Panon a napatnagan so aro ed Dios tan ed kaparan too diad panagpulong tan panagbangat a kimey tayo?

¹⁶ Bilang Kristiano, aabuloyan tayo so aro tayo ed Dios tan ed kaparan too a mamakiwas ed sikatayo pian mibiang ed panangipulong ed Panarian tan panaggaway-babangatan a kimey. No gagawaen tayo itan, napapaliket tayo si Jehova a Dios, a say ‘panlabayan to et amin a totoo so nilaban komon, tan ondago ed suston pikakabat ed katuaan.’ (1 Timoteo 2:3, 4) Manliket tayo sirin no tutulongan tayo so arum a nisulat ed kapusoan da so ganggan nen Kristo. Tan panliketan tayon naimatonan so iyaaligwas da legan a napapasimbalo iray personalidad da pian nipatnag iray madibinon kalidades nen Jehova. (2 Corinto 3:18) On, say panulong ed arum pian nakabat da so Dios et sankamablian a regalo a niiter tayo ed sikara. Saramay mikaaro ed si Jehova so makapanggayaga ed satan diad andi-anggaan.

17. Akin a makabat so pamayubo tayo na aro ed Dios tan ed kaparan too imbes a say aro ed materyal iran bengatla?

¹⁷ Manbibilay itayo ed mundo a papablien a tuloy tan aaroen ni ingen iray materyal a bengatla.  Ingen ta temporaryo labat iray materyal a bengatla. Saratan et natakew odino naderal. (Mateo 6:19) Oniay ipapasakbay na Biblia ed sikatayo: ‘Say mundo mangangga, tan saray penel to, balet say mangunor ed linawa na Dios so mansiansia lawas.’ (1 Juan 2:16, 17) On, si Jehova et mansiansia ed andi-anggaan, tan ontan met ed saramay mangaaro tan manlilingkor ed sikato. Kanian, agta mas makabat so pamayubo tayo na aro ed Dios tan ed totoo nen say pangegemtan ed saray bengatla ed mundo, a temporaryo lambengat?

18. Panon ya impatnag na sakey a misionaryo so aro a walay panangisakripisyo ed dili?

¹⁸ Saramay mangipapatnag na aro so makapangidadayew ed si Jehova. Nodnonoten pa si Sonia, sakey a misionaryo ed Senegal. Inyaralan to na Biblia so sakey a bii a manngaran na Heidi, a naalisan na HIV manlapud agmananisian asawa to. Sanen inatey so masiken to, si Heidi so abautismoan, balet agnambayag et kinmapuy so bunigas to, tan sikato so naospital lapud AIDS. Oniay inkuan nen Sonia: “Ginawa na saray walad ospital so anggaay nayarian da, balet dagdaiset ira. Diad kongregasyon et walaray boluntaryon akerew a mangasikaso ed saray pankaukolan to ed ospital. Diad mikaduan labi, dinmukol ak ed ikamen diad abay na katri to tan tinmulong ak ya angasikaso ed sikato anggad impatey to. Oniay imbaga na mangaasikason doktor: ‘Say sankabalegan a problema mi et mabetbet a papaulyanan la na saray kakanayon so kapamilyaan dan walaay AIDS. Akin et iririsgam so bunigas mo pian sikatoy naasikasom, anta agmo pikanayonan, agmo kanasyonan, agmo met kakoloran?’ Insalaysay ko ed sikato a si Heidi et petepeteg ya agik, a maap-apit kami a singano saksakey so atateng mi. Lapud pisisiglaotan ko ed si Heidi, a singa la agi ed laman, panliketan ko so mangasikaso ed sikato.” Anggaman ontan, agnaapektoan so bunigas nen Sonia diad maaron impangasikaso to ed si Heidi.

19. Lapud nisulat ed kapusoan tayo so ganggan na Dios, anto so nepeg tayon anamoten?

¹⁹ Dakel niran alimbawa na aro a walaan panangisakripisyo ed dili so naromog ed limog na saray lingkor nen Jehova. Anggapo so nisulat a kodigo na ganggan a mangipapabidbir ed totoo na Dios natan. Imbes, nanenengneng tayo so kasumpalan na say nisulat ed Hebreos 8:10: “Saya sikato so sipan a gawaen ko ed abung nen Israel kayari na saraman ya agew, kuan na Katawan; ‘Yan ko naani so saray ganggan ko dia ed isip da, tan isulat ko’ra met dia ed kapusoan da. Tan siak naani so Dios da, tan sikara naani so totook.” Komon ta lawas tayon pablien so ganggan na aro ya insulat nen Jehova ed kapusoan tayo, ya anamoten so kada pankanawnawa ya ipatnag so aro.

20. Akin a say ganggan nen Kristo et mabmablin kayarian?

²⁰ Agaylan makapaliket so panlingkor ed Dios a kaiba so sankamundoan ya impanaagi a mangipapatnag na ontan ya aro! Saramay nisulat ed kapusoan da so ganggan nen Kristo so makapanliket ed mabmablin kayarian diad sayan mundon andiay-aro. Agda lambengat panggagayagaan so aro nen Jehova noagta panliliketan da met so malet a bedber na aro na impanaagi. “Nengneng yo, alay kaabigan tan alay kaligliwaan na panayam na sanaagi ed inkasaksakey!” Anggaman saray Tasi nen Jehova et walad nanduruman nasyon, mansasalita na dakel a lenguahe, tan mangirerepresenta ed dakel a kultura, panggagayagaan da so pankakasakey ed relihyon, ya andiay kapara. Lapud sayan pankakasakey, sikara so aabobonan nen Jehova. Oniay insulat na salmista: ‘Si Jehova imbaki to [ed leet na totoon nankakasakey ed aro] so panamapalar, salanti, say bilay ya andi-anggaan.’​—Salmo 133:1-3.

Sarag Yo Kasin Ebatan?

• Panon kaimportante so Samploran Ganggan?

• Anto so ganggan a nisulat ed kapusoan?

• Anto so betang na aro ed “ganggan nen Kristo”?

• Diad antoran paraan a nipatnag tayo so aro ed Dios tan ed kaparan too?

[Tepetepet Parad Panagaral]

[Litrato ed pahina 25]

Saray Israelita so walaan na saray ganggan a nisulat ed tapyas na bato

[Saray litrato ed pahina 26]

Nisulat ed kapusoan na saray Kristiano so ganggan na Dios

[Litrato ed pahina 28]

Si Sonia a kaiba to so bii a taga-Senegal nen 2004 a distriton kombension