“Say Patey Inakmon na Impanalo”

ISIPEN pa ya ontan so paulon-balita a nabasam ed sakey a peryodiko imbes a nipaakar ed ugaw a biin nambikkel. Siempre, anggapo ni so peryodiko ya akapangibalita na ontan. Balet saratan a balikas so naromog ed sakey a libro a nilibon taon lay kabayag, salanti, say Biblia.

Diad Kasulatan et malinlinew a nipaliwawa so nipaakar ed ipapatey. Niarum ni, aglambengat ipaparungtal na Biblia no akin ya ompapatey itayo noagta ipapaliwawa met na satan so kipapasen na inaatey tan mangiyoopresi na ilalo parad saray inatey a pinabli tayo. Kaunoran, sasaglawien na satan so makatantandan panaon a posible la so pangibalita na: “Say patey inakmon na impanalo.”​—1 Corinto 15:54.

Ipapaliwawa na Biblia so ipapatey diad saray salita a mainomay a talosan imbes a misteryoso. Alimbawa, aminpigan inyaliling na satan so ipapatey ed ‘iyuugip,’ tan deneskribe na satan so totoon inaatey a ‘naugip ed patey.’ (Salmo 13:3; 1 Tesalonica 4:13; Juan 11:11-14) Deneskribe met so ipapatey bilang “kabusol.” (1 Corinto 15:26) Nagkalalon importante, tutulongan itayo na Biblia a natalosan no akin a say ipapatey et singa ugip, no akin a mamapairap iya ed katooan, tan no panon a nadaeg iyan kabusol diad kaunoran.

Akin ya Ompapatey Itayo?

Isasalaysay na primeron libro na Biblia so impamalsa na Dios ed inmunan too, si Adan, a pinan-ayam To ed paraiso. (Genesis 2:7, 15) Sanen ginmapon nambilay si Adan, sikatoy inikdan na saray kimey a gawaen to, katekep lay sakey a mapeget a pananebel. Oniay inkuan na Dios ed sikato nipaakar ed sakey a kiew diad hardin na Eden:  “Agmo nepeg a panganan [itan]; ta dia ed agew na pangan mo ed satan ompatey ka.” * (Genesis 2:17) Kanian, atalosan nen Adan ya agnapaliisan so ipapatey. Satan so mismon resulta na panumlang ed ganggan na Dios.

Makapaermen ta tinmunganga si Adan tan Eva. Pinili ra ya ibaliwala so linawa na Manamalsa ra, kanian sinagmak da iray nansumpalan. “Lapud sika et dabok ka, dia ed dabok ompawil ka,” so inkuan na Dios ed sikara sanen indatak to iray resulta na impankasalanan da. (Genesis 3:19) Awalaan ira na baleg a depekto, salanti, nagmaliw iran ag-ayadyari. Say agda inkayadyari, odino inkamakasalanan da, so nanresulta ed impatey da.

Sayan depekto, odino kasalanan, so nipasa met ed saray ilalak di Adan tan Eva, say interon rasa na too. Diad sakey a pantalos et singa itan atawir a sakit. Aglambengat abalang nen Adan so pankanawnawan manbilay ya agmanagmak na ipapatey noagta niyalis to met so ag-inkayadyari ed saray ilalak to. Say katooan so nagmaliw ya aripen na kasalanan. Oniay ibabaga na Biblia: “Kanian unong a say kasalanan linmoob ed mundo lapu ed sakey a too, tan say patey lapu ed kasalanan; et say patey ed satan linma ed amin a too, ta amin nankasalanan.”​—Roma 5:12.

“Say Kasalanan Linmoob ed Mundo”

Sayan atawir a depekto, odino kasalanan, so agnanengneng panamegley na mikroskopyo. Say “kasalanan” et depekto ed moral tan espiritual a niyalis ed sikatayo na inmunan atateng tayo, tan walaan itan na saray epekto ed pisikal. Balet, ipaparungtal na Biblia a say Dios so nanggawa na solusyon. Oniay impaliwawa nen apostol Pablo: “Say bayar na kasalanan say patey; bangbalet say langkap ya andi-bayar na Dios say bilay ya andi-angga ed Kristo Jesus a Katawan tayo.” (Roma 6:23) Diad primeron sulat to ed saray taga-Corinto, angiyarum si Pablo na panamaseguro a makabkabaliksan ed sikato: “Lapud kinen Adan so pateyan na amin, ontan met diad kinen Kristo onoli’ra ed bilay.”​—1 Corinto 15:22.

Malinew a si Jesu-Kristo et walaan na makanan betang ed pamaandi na kasalanan tan ipapatey. Inkuan to a sikatoy linma ed dalin pian “iter toy bilay to a panondon ed amayamay.” (Mateo 20:28) Say kipapasen et niyaliling ed kason panag-kidnap, a nibulos lambengat so biktima diad pambayar na espesipikon kantidad. Diad sayan kipapasen, say dondon a makapangibulos ed sikatayo manlapud kasalanan tan ipapatey et say ayadyarin bilay nen Jesus bilang too. *​—Gawa 10:39-43.

Pian nitarya so dondon, imbaki na Dios si Jesus diad dalin a mangibagat ed bilay to. “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato . . . wala so bilay ton andi-anggaan.” (Juan 3:16) Sakbay a sinagmak nen Kristo so masakripisyon ipapatey, sikato so ‘nantasi ed katuaan.’ (Juan 18:37) Tan legan na mapublikon ministeryo to, inanamot nen Jesus so pigaran inkagawa pian iparungtal so katuaan nipaakar ed ipapatey.

“Say Marikit . . . Naugip”

Kabkabisado nen Jesus so nipaakar ed ipapatey sanen sikatoy wadiad dalin. Sikatoy naermenan diad impakaandi na saray totoon apilimogan to,  tan sigpot a kabat to a sikatoy ompatey a masakbay. (Mateo 17:22, 23) Mapatnag a pigaran bulan sakbay na impamatey ed si Jesus, say maapit a kaaro ton si Lazaro et inatey. Diad satan ya agawa, nawalaan itayo na aralem a pakatalos nipaakar ed panmoria nen Jesus ed ipapatey.

Ag-abayag kayarin akabatan nen Jesus so impatey nen Lazaro, oniay inkuan to: “Si kaaro tayon Lazaro naugip, ingen onla ak pian sikato so liingen ko ed ugip.” Inisip na saray babangatan a no manpapainawa lambengat si Lazaro, sikato komon so onabig. Kanian oniay simplin imbaga nen Jesus: “Si Lazaro [et] inatey.” (Juan 11:11-14) Mapatnag ya impasen nen Jesus so ipapatey a singa ugip. Bangta mairap tayon natalosan so ipapatey, say ugip et natalosan tayo. Legan na maitlep ya ugip ed labi, sikatayo so agmikabat ed ilalabas na oras tan no antoy nagagawa ed kaliberliber tayo lapud sikatayo so temporaryon andian na pakalikna. Ontan a mismo so impangipaliwawa na Biblia ed kipapasen na inaatey. Oniay ibabaga na Eclesiastes 9:5: “Saray inaatey anggapoy amta ran balot.”​—Eclesiastes 9:5, Maung a Balita.

Inkompara met nen Jesus so ipapatey ed ugip lapud saray totoo so nayarin ombangon manlapud patey, diad panamegley na pakapanyari na Dios. Diad sakey ya inkagawa, si Jesus et binmisita ed abung na maer-ermen a pamilya a kapatepatey na ugaw nin marikit da. “Say marikit ag-inatey, noag say naugip,” so inkuan nen Jesus. Insan to inasinggeran so biin inatey tan binembenan to so lima to, tan sikato so “inmalagey.” Diad arum a salita, sikatoy inmoli’d bilay.​—Mateo 9:24, 25.

Pinaoli met nen Jesus so kaaro ton si Lazaro manlapud patey. Balet antis ton ginawa itan a milagro, tinambayo to si Marta, ya agi nen Lazaro, ya imbaga ton: “Say agim onoli ed bilay.” Matalek ya inmebat si Marta: “Amtak ya onoli ed bilay sano kioli ed kaunoran ya agew.” (Juan 11:23, 24) Mapatnag ya inilaloan to ya amin a lingkor na Dios et napaoli diad arapen nin panaon.

Anto ta so mismon kabaliksan na kikioli? Say literal a kabaliksan na Griegon salitan “kikioli” (a·naʹsta·sis) et “onalagey.” Mankabaliksan itan na ibangon manlapud inaatey. Nayarin agnapanisiaan iya na arum, ingen kayari na impangibaga nen Jesus a narengel na saray inaatey so boses to, oniay inkuan to: “Agkayo mankelaw ed saya.” (Juan 5:28) Saray impamaoli nen Jesus a mismo diad dalin so mangiiter ed sikatayo na kompiyansa ed sipan na Biblia a saray inaatey a walad pakanodnonotan na Dios et ombangon manlapud andukey ya “ugip” da. Oniay impasakbay na Apocalipsis 20:13: “Say dayat initer to so inaatey a wala ed sikato; tan say patey tan say Hades [kaslakan a lubok na katooan] initer da so inaatey a wala ed sikara.”

Kasin sarayan inaatey so napaoli ed bilay insan ontakken tan ompatey lamet, a singa ed si Lazaro? Aliwan ontan so gagala na Dios. Ipapaseguro ed sikatayo na Biblia ya onsabi so panaon ya “anggapo la naani ipatey,” kanian anggapo lay ontakken insan ompatey.​—Apocalipsis 21:4.

Say patey et sakey a kabusol. Tan dakel nira so kaslakan a kabusol na katooan, a singa say sakit tan itatakken, a sengegan met itan na paniirap da. Insipan na Dios a taloen to iratan ya amin, ya idapo ton siansia so sentensia ed sankairapan a kabusol na katooan. “Say kaunoran a kabusol a naekal naani say patey.”​—1 Corinto 15:26.

Sano nasumpal la itan a sipan, panggayagaan la na totoo so ayadyarin bilay, ya agla naapektoan  na kasalanan tan ipapatey. Kaleganan na satan, naligliwa itayo ed pakaamtan saray inaatey ya inad-aro tayo et manpapainawa, tan no wala ra’d pakanodnonotan na Dios, napaoli ira diad aturon panaon to.

Magmaliw a Makabaliksan so Bilay No Natalosan so Ipapatey

Say malinew a pakatalos nipaakar ed ipapatey tan say ilalo parad inaatey so makapanguman na panmoria tayo ed bilay. Si Ian, ya asalambit diad akaunan artikulo, so mantaon na masulok a 20 sanen naamtaan toy eksplinasyon na Biblia nipaakar ed ipapatey. “Aliwan malinew lawas so ilalok no say tatay ko et walad inerman a pasen,” so inkuan to. “Kanian sanen naaralan ko a sikatoy nauugip lambengat ed patey, diad primero et maer-ermen ak.” Anggaman kuan, sanen abasa nen Ian so nipaakar ed sipan na Dios a paolien To iray inaatey, sikatoy aliketan a tuloy ed impakaamta a napinengnengan to lamet so tatay to. “Natan ak labat akalikna na deen diad interon bilay ko,” so nanonotan to. Say suston pakatalos nipaakar ed ipapatey so amareen ed nonot tan liknaan to.

Si Clive tan Brenda so atateng na 21-años a si Steven, ya inatey diad samay aksidente ya asalambit diad akaunan artikulo. Anggaman kabat da la so ibabaga na Biblia nipaakar ed ipapatey, siansia ni a naermenan iran tuloy ed biglan impatey na anak da. Tua a say patey et kabusol, tan makapaot-ot so epekto na satan. Say Makasulatan a pikakabat da nipaakar ed kipapasen na inaatey so kalkalnan amakepa ed paneermen da. Oniay inkuan nen Brenda: “Lapud natatalosan mi so nipaakar ed ipapatey, atulongan kami a makapawil ed datin normal a bilay mi. Siempre, inagew-agew min iisipen so panaon a si Steven so ombangon manlapud maitlep ya ugip to.”

“Patey, Kawalaan na Ot-ot Mo?”

Malinew a nawalaan itayo na balansin panmoria ed bilay no natalosan tayo so kipapasen na inaatey. Agnakaukolan a magmaliw a misteryo so ipapatey. Anggaman manesesga ed sikatayo itan a kabusol, sikatayoy makapanggayaga ed bilay ya agnatatakot. Tan diad pakaamtan say ipapatey so agsigpot a makapanampot ed bilay tayo, ag-itayon balot nasagyat a gegemtanen so bilay a puro panliliket, lapud pananisian “antiktikey so bilay.” Sikatayo so natambayo tan onaralem so pilalek tayon mantultuloy a manbilay lapud amta tayo a saray inaatey ya inad-aro tayo a walad pakanodnonotan na Dios so nauugip lambengat ed patey tan manaalagar na kioli ed bilay.

On, matalek itayon makapanilalo ed arapen sano si Jehova a Dios, say Manangiter na bilay, so mangakmon la ed patey diad andi-anggaan. Agaylan bendisyon sano makatunongan tayo lan nitepet a: “O patey, iner so kawalaan na impanalom? O patey, iner so kawalaan na ot-ot mo?”​—1 Corinto 15:55.

[Saray paimano ed leksab]

[Litrato ed pahina 5]

Nansumpal ed ipapatey so intunganga di Adan tan Eva

[Litrato ed pahina 6]

Binembenan nen Jesus so lima na bii, tan sikatoy inmalagey

[Litrato ed pahina 7]

Dakel so manatalaran ed panaon a saray inaatey ya inad-aro ra so ombangon manlapud ugip, a singa agawa ed si Lazaro