“Sikaray Nibulos la Komon a Tampol”

SI Geneviève De Gaulle, a kaanakan nen Charles de Gaulle, datin presidente na Pransya, so personal ya akapikabat ed saray Tasi nen Jehova ed panangipangawan a kampo na Nazi diad Ravensbrück, amianen ya Alemanya. Sikato so angisulat ed saray salitan walad tagey nen Agosto 1945.

Say panangipangawan a kampo diad Auschwitz, Poland, so nilukas nen Enero 27, 1945. Manlapu la nen 1996, satan a petsa so intalaga ya agew na pannodnonot ed Alemanya parad saray biktima na Third Reich nen Hitler.

Sanen sinelebraan itan nen Enero 27, 2003, oniay impaliwawa nen Peter Straub, a presidente na State Parliament na Baden-Württemberg: “Amin iraman so apasegsegang nisengeg ed relihyoso odino mapolitika iran sisiaen da tan saramay mabulos ya ompatey imbes a mikompromiso so makanepegan na aralem a respeto tayo, respeto a mairap ya ibalikas ed saray salita. Saray Tasi nen Jehova lambengat so relihyon a sigpot ya ag-inmabuloy ed saray kakaukolanen na uley nen Hitler: Ag-ira nansaludo ed si Hitler. Ag-ira nansamba na pananuporta ed ‘Führer tan Estado,’ no panon ya ag-ira met nansundalo tan nanserbi ed militar. Tan saray ananak da et ag-akibiang ed Hitler Youth Movement.”

Oniay inkuan nen Jesu-Kristo nipaakar ed saray patumbok to: “Ag-ira taga mundo, salanti unong ya agak taga mundo.” (Juan 17:16) Kanian, say talindeg na saray Tasi nen Jehova et makasengeg lambengat ed relihyon. Oniay inyarum nen Straub: “Saray Tasi nen Jehova lambengat, a kinaukolan a mangipeket na lilan trianggulo ed unipormi ra bilang priso ed panangipangawan a kampo, so nibulos la komon ed inkipriso ra tan ag-ira napapatey. Say pampirma da labat ed sakey a dokumento a mangiburi ed pananisia ra so magenap la komon.”

Parad karaklan ed saray Tasi, agda pinili so pangiburi ed pananisia ra. Kanian, manga 1,200 ed sikara so inatey legan na panaon na Nazi. Manga 270 so pinatey lapud agniyabuloy na konsiensia ra so mansundalo tan mamemben na armas. Agda lambengat sasalitaen noagta iyaaplika ra met iray balikas a: “Nakaukolan ya unoren mi so Dios, nen saray totoo.”​—Gawa 5:29.

Saray Tasi nen Jehova et ordinaryo lambengat a totoo, unong ya inkuan nen Ulrich Schmidt, a presidente na State Parliament na North Rhine-Westphalia. Diad impangaon ed paliwawa to, say brosyur a Landtag Intern so anukoy ed sikara bilang “ordinaryon totoo a diad panguunor da ed konsiensia ra et sikaray mapekder a tinmalindeg parad relihyoso iran sisiaen da, ya impatnag da so inkakpel bilang mibabaley, tan impulisay da so ideolohiya [na Nazi] lapu ed kombiksion da bilang Kristiano.” Makaseguro itayo a panliliketan nen Jehova a Dios so amin a mansiasiansian matoor ed sikato anggaman ed mairap iran sirkumstansya. Oniay nabasa tayo ed Uliran 27:11: “Ana’ko, onkabat ka, tan paliketen mo so pusok, pian naebatan ko so mamalaw ed siak.”

[Picture Credit Line ed pahina 30]

Diad panangiyabuloy na United States Holocaust Memorial Museum