Tepetepet Manlapud Saray Managbasa

Diad kadaanan ya Israel, anto so kabaliksan na mamilagron liwawa a tatawagen no maminsan a Shechinah ya onsisinag ed Sankasantosan a pasen diad tabernakulo tan diad templo?

Si Jehova, a maaron Ama tan Mananalimbeng na totoo to, so nikadkaduman angipatnag ed kiwawala to ed Israel. Say sakey a paraan a ginawa to itan et diad panamegley na maliwliwawan lurem a misiglaotan a tuloy ed pasen a pandadayewan ed sikato.

Satan a masmasnag a liwawa so mangirerepresenta ed agnanengneng a kiwawala nen Jehova. Sinminag itan ed Sankasantosan a pasen diad tabernakulo tan diad templo ya impaalagey nen Solomon. Satan a mamilagron liwawa et agmankabaliksan ya aktual a nanenengneng diman si Jehova. Say Dios et agnayarin manayam ed antokaman ya impaalagey na too. (2 Awaran 6:18; Gawa 17:24) Sayan masmasnag a liwawa ya insindag na Dios ed santuaryo to so makapangiter na kompiyansa ed atagey a saserdote tan diad panamegley to et makapankompiyansa met so amin ya Israelita a say mananalimbeng a kiwawala nen Jehova so mangasikaso ed sikara tan ed saray pankaukolan da.

Kayari na inkisulat na Biblia, sayan liwawa so tinawag ed Aramaikon salita bilang Shechinah (shekhi·nahʹ), a mankabaliksan na “ditan manaayam” odino “say panaayaman.” Sayan termino et agnaromog diad Biblia balet naromog diad saray Aramaikon patalos na Hebreon Kasulatan, a kabkabat met a saray Targum.

Sanen bibilinen nen Jehova si Moises nipaakar ed pangipaalagey na tabernakulo, oniay inkuan to: “Itapew [mo] so yurongan na panangasi ed tapew na kaban; tan ’yan mo naani’d man ed kaban so panamintuan ya iter ko ed sika naani. Et diman naani pinengnengan ko ed sika, tan diman ak ed tagey na yurongan na panangasi a mangibaga ed sika naani, manlapud man ed leet na duaran kerubin a wala ed tapew na kaban.” (Exodo 25:21, 22) Samay Kaban ya asalambit et nauklopan na balitok a walad Sankasantosan a pasen. Diad tapew na sakob na Kaban et wala so duaran balitok a kerubin.

Iner so pansalitaan nen Jehova? Inebatan to itan sanen inkuan to ed si Moises: “Ompanengneng ak diman ed sakey a lurem diad tagey na sakob na Kaban na Sipanan.” (Levitico 16:2, Maung a Balita) Sayan lurem so mansiasiansia ed petek na sagradon Kaban diad nanleetan na duaran balitok a kerubin. Ag-ipaparungtal na Biblia no kaunongan kaatagey itan a lurem odino kaunongan kaarawi itan ed saray kerubin.

Sayan masmasnag a lurem so manliliwawa ed Sankasantosan a pasen. Diad tua et satan lambengat so lapuan na liwawa ed loob na satan a silir. Say atagey a saserdote so minanabang ed satan a liwawa sano onloob ed sankadaleman a silir diad Agew na Pananakbong. Sikatoy onalagey diad imaton nen Jehova.

Kasin walay antokaman a kabaliksan na sayan mamilagron liwawa parad saray Kristiano? Diad panamegley na pasingawey, akanengneng si apostol Juan na sakey a syudad ya ‘anggapo so labi.’ Sayan syudad et say Balon Jerusalem, a tugyopen na saray alanaan a Kristiano ya apaoli pian manuley a kaiba nen Jesus. Agmanlapu ed banwa odino bulan so liwawa na sayan masimbolikon syudad. Say karlangan nen Jehova a Dios so direktan manliliwawa ed sayan organisasyon, no panon a say lurem a Shechinah so nanliwawa ed Sankasantosan a pasen. Ontan met, say Kordero, a si Jesu-Kristo, so “silew” na satan a syudad. Bilang resulta, sayan “syudad” so mangisisindag na espiritual a liwawa tan mangugunggona ed saray arondon a totoo a nanlalapud amin a nasyon pian mangigiya ed sikara.​—Apocalipsis 21:22-25.

Lapud makakaawat ira na ontan a daakan a bendisyon manlapud si Jehova a Dios, saray mandadayew ed sikato so makaseguro a sikato so Mananalimbeng a Pastol da tan maaron Ama ra.