Istorya na Bilay

Impansungdo Bilang Sundalo nen Kristo

UNONG ED SALAYSAY NEN YURII KAPTOLA

“Kombinsido ak la natan a peteg a walaan ka na pananisia!” Saratan a salita so ag-inilaloan ya imbalikas na sakey ya opisyal na armada na Sobyet, tan amaseseg itan ed siak diad panaon a kakkaukolan ko itan. Siak so nipaarap ed saman diad pakasentensia na mabayag a pakapriso kanian masimoon ak a kinmerew na tulong ed si Jehova. Nipaarap ak ed abayag ya impipuligesgesan a mankaukolan na panagsungdo tan determinasyon.

NIANAK ak nen Oktubre 19, 1962, tan binmaleg ak ed sagur a parte na Ukraine. Diad saman met a taon, say amak, a kangaranan ko met, so akapitongtong ed saray Tasi nen Jehova. Agnambayag et sikato so nagmaliw ya inmuna-unan managdayew ed si Jehova diad baryo mi. Say kimey to so naimano na saray opisyal ya onsusumpa ed saray Tasi nen Jehova.

Balet, say atateng ko so nirespeto na karaklan ed saray kakaabay mi lapud saray kalidad da bilang Kristiano tan ed pangiyaansakit da ed arum. Inanamot na atateng ko so amin a pankanawnawa pian ipurek ed siak tan ed taloran agagik a bibii so panangaro ed Dios sanen kaugawan mi, tan akatulong itan pian naarap ko so dakel a subok ed siak diad eskuelaan. Sakey ed saratan a subok so agawa sanen kinaukolan ya ipeket na kada estudyante so badge a mangipabidbir a sikatoy sakey ed saray Lenin’s October Children. Lapud neutral ak bilang Kristiano, agak angipeket na badge kanian siak so nikadkaduma.​—Juan 6:15; 17:16.

Diad saginonor, sanen wala ak la’d komatlon grado, amin a maneeskuela so kinaukolan a mimembro ed Komunistan organisasyon parad  saray tobonbalo a tinawag a Young Pioneers. Sakey ya agew et say klase mi so impaway diad sular na eskuelaan nisesengeg ed seremonyan mangipabidbir ed saray membro. Tinmalaw ak ed satan lapud inilaloan kon balbalawen tan pantamian da ak. Siak labat so ag-angawit na balon ambalangan panyo parad saray membro na Young Pioneers, tan saray maneeskuela so nanlilinya ed arapan na prinsipal na eskuelaan, saray managbangat, tan saray maneeskuela a walad atagey iran grado. Sanen niganggan iray maneeskuelan walad atagey a grado ya ibedber da laray panyo ed beklew mi, inmusdong ak la, a maniilalon anggapo komon so makaimano ed siak.

Niyakar ed Arawi Iran Prisoan

Sanen 18 años ko, siak so asentensiaan na taloy taon a pakapriso lapud impansiansiak a neutral bilang Kristiano. (Isaias 2:4) Say primeron taon na sentensiak et diad prisoan na baley na Trudovoye, diad Distrito na Vinnitskaya, Ukraine. Sanen wadman ak, akabat ko so 30 niran Tasi nen Jehova. Sanderwa da kamin impantrabaho ed nambibiigan a lugar, lapud aglabay na autoridad a manlilimog kami.

Nen Agosto 1982, sikami nen Eduard, a sakey nin Tasi, so inyalis da ed amianen ya Ural Mountains, ya inlugan da kami ed tren a kaiba so grupo na arum niran priso. Waloy agew min inanosan so salimuot tan panseseksekan ed tren anggad insabi mi diad Solikamsk Prison, diad Distrito na Permskaya. Sikami nen Eduard so impisok ed mandumaan a selda. Kayari na duay simba, siak so inyakar ed amianen diad Vels, a walad rehyon na Krasnovishersky.

Akasabi so luganan mi ed pegley-labi, tan ambilbilunget diad paway. Anggaman ed kabilungetan, say grupo mi so ingganggan na sakey ya opisyal ya ombaliw ed ilog, diad panamegley na baloto. Agmi nanengneng so ilog tan say baloto! Balet, nankarkarapkap kami anggad akapa mi so baloto tan akabaliw kami anggaman natatakot kami. Kasabi mi ed pangdel, tinonton mi so kawalaan na silew a sankanengneng ed asingger a pukdol, a diman so akaromogan mi ed pigaran tolda. Ditan so nanayaman mi. Sikami so nanayam ed balbaleg a tolda a kaiba so 30 niran priso. Diad panaon na ambetel, inanosan mi so klima a no maminsan et onleksab ni anggad -40 degrees Fahrenheit, tan aliwan komportable diad loob na tolda mi. Say manunan trabaho na saray priso et manbatang na kakiewan, balet say trabahok et manpaalagey na saray alolong a panayaman na saray priso.

Say Espiritual a Tagano so Akasabi ed Niyarawin Kampo Mi

Siak labat so Tasi ed satan a kampo; ingen ta agak pinaulyanan nen Jehova. Sakey ya agew et walay impawit nen inak, a manaayam ni ed sagur ya Ukraine. Sanen nilukasan na guardia so abalkot a pawit, say inmunan anengneng to et say melag a Biblia. Inala to itan insan to binukaybukay. Nanisip ak na ibagak ta pian agnakompiska iyan espiritual a kayamanan. “Anto’ya?” so biglan intepet na guardia. Sakbay ak a makapanisip na ibagak, inmebat la so sakey a maniinspeksion ya akaalagey ed abay mi: “Ah! Diksionaryo itan.” Agak la nansalita. (Eclesiastes 3:7) Binukitkit na maniinspeksion so arum a karga na pawit insan inderew to itan ed siak pati say papablien a Biblia. Diad liket ko et sikatoy inikdan ko na pigaran kastanyas ya impawit ed siak. Sanen naawat ko iyan pawit, amtak ya agak alingwanan nen Jehova. Sikato so mabunlok a tinmulong tan angasikaso ed saray pankaukolan ko ed espiritual.​—Hebreos 13:5.

Panagpulong ya Andi-Tunda

Kayari na pigaran bulan, asurprisa ak ed impakaawat ko na sulat manlapud sakey ya agin Kristiano a nipriso ed ngalngali 400 a kilometro ed kaarawi. Impaanap to ed siak so sakey ya interesado a nayarin walad kampo mi ed saman. Aliwan makabat so pangipawit na ontan a klase na sulat, lapud sisitaen da iray sulat ed sikami. Kanian agpankelawan no akin a siak so impatawag na sakey ed saray opisyal ed opisina to tan pinasakbayan to ak ya agla manpupulong. Insan  papipirmaan to ed siak so dokumento a mangisasalaysay ya agko la inabang ed arum iray sisiaen ko. Inmebat ak ya agko natalosan no akin a nepeg kon pirmaan itan, lapud amta la na amin a sakey ak ed saray Tasi nen Jehova. Imbagak met a labay a naamtaan na arum a priso no akin a nipisok ak. Anto so ibagak ed sikara? (Gawa 4:20) Amoria na opisyal ya agto ak napatalaw, kanian siak so pinaalis to. Siak so impaiyakar to ed arum a kampo.

Siak so niyalis ed baryo na Vaya, a 200 kilometro ed kaarawi. Diman et nirespeto na saray superbaysor so talindeg ko bilang Kristiano tan siak so inyasain da ed trabaho ya agmisiglaotan ed militar​—unona bilang karpentero, insan bilang elektrisyan. Balet wala met iray akasubokan ko ed sarayan trabaho. Diad sakey ya inkagawa, siak so niganggan a mangala ed saray kagawaan ko insan onla ed club na baryo. Sanen sinmabi ak, manliket iray sundalo sanen anengneng da ak. Agda napasilew iramay indekorasyon da ed saray nanduruman simbolo ed militar. Papaapiger da ed siak iratan lapud pangipaparaan da ed tinaon a selebrasyon na Red Army Day. Kayarik a ninonot tekep na pikakasi no anto so nepeg kon gawaen, imbagak ed sikara ya agko nayarin gawaen itan a kimey. Inter ko ed sikara so kagawaan ko tan tinaynan ko ra. Siak so inreport da ed akasandin direktor, tan asurprisa ak lapud sanen nadngel to iray reklamo ed siak, oniay inyebat to: “Sikato so rerespetoen ko lapud satan. Sikato so walaan na prinsipyo.”

Ag-inilaloan a Lapuan na Panamaseseg

Nen Hunyo 8, 1984, kayari na eksakton taloy taon ya inkapriso, siak so nibulos. Kasempet ko ed Ukraine, siak bilang datin priso so kinaukolan a manparehistro ed militar. Imbaga ed siak na saray opisyal a siak so bistaen lamet ed korte kayari na anem bulan tan magmaong no ontaynan ak la ed distrito. Kanian tinmaynan ak ed Ukraine tan diad saginonor et akalmo ak na trabaho diad Latvia. Walay panaon ya akapampulong ak tan apilimogan ko so melag a grupo na saray Tasi a manaayam ed Riga, a kabisera, tan diad kaliberliber na satan. Balet, kayari lambengat na sakey taon, siak lamet so impatawag pian mansundalo. Diad opisina a panagpalistaan na saray mansundalo, imbagak ed opisyal ya agak la nansundalo nensaman. Bilang ebat et oniay inyeyag to: “Natatalosan mo so gagawaen mo? Nengnengen ta no anto so ibagam ed tenyente koronel!”

Inulop to ak a linma ed sakey a kuarto diad komaduan grado na bilding a wadman so tenyente koronel ya akayurong ed abay na andukey a lamisaan. Sikato so dinmengel a maong ed siak legan kon ipapaliwawa so talindeg ko insan imbaga to ed siak a wala ni so panaon kon mannonot ed desisyon ko antis ak ya onarap ed komite a pampapalistaan na saray mansundalo. Sanen pinmaway kami ed opisina na tenyente koronel, oniay inaksobi na opisyal a nampasnok ed siak nensaman: “Kombinsido ak la natan a peteg a walaan ka na pananisia!” Sanen inmarap ak ed komite na militar, inulit ko so neutral a talindeg ko, tan siak so temporaryon imbulos da.

Diad saman a panaon, siak so nanayam ed sakey a panagpundoan. Sakey a labi et walay  makalnan tinmoktok ed puerta. Nilukasan ko itan tan anengneng ko so laki ya aka-amerikana tan aka-porpolyo. Impakabat to so inkasikato, a kuanto: “Nanlapu ak ed State Security. Amtak a walay problemam tan bistaen da ka la ed korte.” “On, tua itan,” so ebat ko ed sikato. Oniay intuloy ya inkuan na laki: “Natulongan mi ka no mitulongan ka ed sikami.” Say inkuan ko, “Andi, agnayari itan. Manmatoor ak ed saray sisiaen ko bilang Kristiano.” Sikato so tinmaynan la sanen agto ak nakombinse.

Apriso Lamet, Nampulong Lamet

Nen Agosto 26, 1986, say National Court of Riga so nansentensya ed siak na apat taon a paskaran a trabaho, tan siak so inyakar da ed Riga Central Prison. Impisok da ak ed baleg a selda a kaiba so 40 nin priso, tan pinulongan ko so kada priso ed satan a selda. Arum so mangibabagan manisia ira ed Dios; arum so manluludlurey labat. Naimanok a saray lalaki et nanggrupo-grupo ira, tan kayari na duay simba et imbaga ed siak na saray lider na sarayan grupo ya agak la nepeg a manpulong, lapud agak ontutumbok ed saray ginawa ran totontonen. Impaliwawak a nipriso ak lapud satan​—ontutumbok ak ed sananey iran ganggan.

Siak so maalwar a nampulong, tan sanen walaray aromog kon interesado ed espiritual, niyaralan ko na Biblia so apatira ed sikara. Sano manaaral kami, isusulat da ed kuaderno iray manunan bangat na Biblia. Kayari na pigaran bulan, siak so inyakar ed guardiadon kampo ed Valmiera, a ditan so nantrabahoan ko bilang elektrisyan. Akapangiyaral ak ditan na sakey nin elektrisyan a kayari na apat taon et sikato so nagmaliw a Tasi nen Jehova.

Nen Marso 24, 1988, siak so inyalis ed asingger a kampo manlapud samay guardiadon kampo a nanlapuan ko. Talagan bendisyon iman, lapud naikdan ak ditan na malaglaem a kawayangan. Niyasain ak ed nanduruman pampapaalageyan, tan siak so naynay a manaanap na pankanawnawan makapanpulong. Mabetbet a wala ak ed paway na kampo, a manpupulong anggad lablabi la, balet anggapo met so problemak no ompawil ak diman.

Benendisyonan nen Jehova iray sagpot ko. Walaray Tasi a manaayam met diman, balet diad mismon baley et saksakey so Tasi, say akulaw lan agi a si Vilma Krūmina. Sikami nen Sister Krūmina so angikondukta na dakel a panangiyaral na Biblia ed saray kalangweran. Panapanaon et walaray agagin manlalapud Riga pian mibiang ed ministeryo, tan wala ra ni ingen so regular payunir a nanlapu ed Leningrad (a natan et St. Petersburg). Diad tulong nen Jehova, akapangigapo kami na pigaran panagaral na Biblia, tan agnambayag et nampayunir ak, ya angusar ak na 90 oras kada bulan diad panagpulong a kimey.

Nen Abril 7, 1990, say kasok so inyeskedyul a repasoen diad People’s Court ed Valmiera. Sanen ginmapo la so bista, abidbir ko so abogado. Sikato imay kalangweran a laki ya akatongtong ko nensaman nipaakar ed Biblia! Abidbir to ak tan inimisan to ak balet ta anggapo so imbaga to. Agko nalingwanan so imbaga na huis ed bista diad saman ya agew: “Yurii, ilegal imay desisyon a pangipriso ed sika, apat taon lay apalabas. Agda ka nepeg a senentensiaan ed saman.” Ag-inilaloan et siak so nibulos la!

Sakey a Sundalo nen Kristo

Nen Hunyo 1990, siak so kinaukolan lamet a manparehistro ed opisina parad saray mansundalo ta pian makala ak na residency permit ed Riga. Linmoob ak lamet ed samay opisina a walay andukey a lamisaan, apat taon lay apalabas, a diman ko imbaga nensaman ed tenyente koronel ya agak mansundalo. Natan et sikato so inmalagey tan imbano to ak, a pinasamanoan to ak ni, tan inkuan to: “Makapabaing ta sinagmak mo iya nensaman. Dispensa mo ak ta onman so agawa.”

Oniay ebat ko: “Sundalo ak nen Kristo, tan nepeg kon sumpalen so niganggan ed siak. Diad tulong na Biblia, napanggayagaan mo  met so insipan nen Kristo ed saray patumbok to, salanti, say maliket a bilay tan magnayon ya arapen.” (2 Timoteo 2:3, 4) Inmebat so koronel: “Agano ni labat so impanaliw koy Biblia, tan babasaen ko la natan itan.” Awit ko ed saman so libron Makapambilay Kayo na Ando lan Ando Diad Paraison Dalin. * Imbukay ko itan ed kapitulo a manisingbat ed tanda na kaunoran iran agew tan impanengneng ko ed sikato no panon a nagagawa so propesiya na Biblia ed panaon tayo. Maapresyan tuloy ya akipasamano lamet ed siak so koronel tan imbalikas to so pilalek to a maaligwas komon so kimey ko.

Diad sayan panaon et talagan panaon lay panag-ani diad Latvia. (Juan 4:35) Nen 1991, siak so nanlingkor bilang matatken ed kongregasyon. Diad interon bansa et duara ni lambengat so aturon mamatatken! Kayari na sakey taon, nagmaliw lan duara so kongregasyon ed Latvia​—say sakey et mansasalita na Latviano tan say sakey et Ruso. Apribilehyoan ak a manlingkor ed kongregasyon a mansasalitay Ruso. Mapmaples so inyaligwas kanian diad tinmumbok a taon et nagmaliw la itan a talora! No nodnonoten ko iray agawa nensaman, mapatnag ya iwawanwan a mismo nen Jehova iray karnero to ya onloob ed organisasyon to.

Nen 1998, siak so aturon manlingkor bilang espisyal payunir diad Jelgava, sakey a baley a 40 kilometro ed abalaten-sagur na Riga. Diad saman met a taon, siak so un-unaan a naimbitaan ed Latvia ya onatendi ed Ministerial Training School ya inkondukta ed lenguahen Ruso diad Solnechnoye, ya asingger ed St. Petersburg, Russia. Legan na panaaral ko, amoriak so kaimportantian na maaron awawey ed totoo ta pian magmaliw a matalona ed ministeryo. Nilikud ed saray bengatlan nibangat ed eskuelaan, pandinayewan kon tuloy so aro tan atension ya impatnag ed sikami na pamilyan Bethel tan saray instruktor na eskuelaan.

Agawa so sananey nin importantin ebento ed bilay ko nen 2001 sanen nankasal kami nen Karina, sakey a magangganan Kristiano. Si Karina so akiulop ed siak ed espisyal a sigpot-panaon a serbisyo, tan inagew-agew ak a napapaseseg no nanenengneng ko so asawak a malikeliket kapagno onsempet manlapud lawak na kimeyan. On, makapalikliket so panlingkor ed si Jehova. Saray mair-irap ya eksperiensya diad silong na uley na Komunista so angibangat ed siak a sigpot a manmatalek ed si Jehova. Makagunggona so antokaman a panagsakripisyo no pansiansiaen na sakey so pikakaaro to ed si Jehova tan ondapag ed inkasoberano to. Lapud panutulong ko ed arum a makaaral nipaakar ed si Jehova, say bilay ko so awalaan na gagala. Baleg a kagalangan parad siak so panlingkor ed si Jehova bilang “maabig a sundalo nen Kristo.”​—2 Timoteo 2:3.

[Paimano ed leksab]

[Litrato ed pahina 10]

Siak so asentensiaan na paskaran a panagtrabaho ed loob na apat taon tan nipisok ak diad Riga Central Prison

[Litrato ed pahina 12]

Kaibak si Karina diad ministeryo