Inusar na Inmunan Biblia ya Aleman so Ngaran na Dios
Inusar na Inmunan Biblia ya Aleman so Ngaran na Dios
SAY personal a ngaran na Dios, a Jehova, so nilibon danay a pinmatnag diad New World Translation of the Holy Scriptures, ya impalapag diad salitan Aleman nen 1971. * Balet, aliwan saya so primeron Biblia ya Aleman ya angusar ed ngaran na Dios. Nayari a say primeron Biblia ya Aleman a pakabasaan na ngaran a Jehova et impalapag ed ngalngali 500 taon lay apalabas nen Johann Eck, sakey a prominentin teologo a Romano Katoliko.
Si Johann Eck so nianak nen 1486 diad mamaabalaten ya Alemanya. Diad edad a 24, sikatoy sakey lan propesor na teolohiya diad unibersidad na Ingolstadt, a satan so posisyon to anggad impatey to nen 1543. Si Eck et kapanaonan nen Martin Luther, tan nagmaliw iran sankaaro ed loob na antikey a panaon. Balet diad saginonor et si Luther so nagmaliw a lider na Repormasyon, bangta si Eck et sakey a manangidepensa na Iglesia Katolika.
Say duke na Bavaria so angiganggan ed si Eck ya ipatalos to so Biblia diad salitan Aleman, tan nipalapag itan nen 1537. Unong ed Kirchliches Handlexikon, say patalos to so maapit ya anumbok ed orihinal a teksto tan “makanepegan na nagkalalon panamidbir nen say agamoran la na satan.” Oniay nabasa ed patalos nen Eck ed Exodo 6:3: “Siak so Katawan, a pinmayawar ed si Abraham, Isaac, tan Jacob bilang say Makapanyarin-amin a Dios: tan say ngaran ko ya Adonai, agko imparungtal ed sikara.” Si Eck so angiyarum na komento diad mardyin parad sayan bersikulo: “Say ngaran ya Adonai et Jehova.” Panisiaan na dakel ya iskolar na Biblia a saya so primeron impangusar ed ngaran na Dios diad Biblia ya Aleman.
Balet, say personal a ngaran na Dios et kabkabat tan uusaren la ed loob na nilibon taon. Say sankaunaan ya impangusar ed satan et nikurit diad salitan Hebreo, ya inusar so “Jehova” pian nipakabat so alenleneg a tuan Dios. (Deuteronomio 6:4) Ngalngali 2,000 a taon lay apalabas, say balikas nen Jesus ya impakabat to so ngaran na Dios et nikurit diad salitan Griego. (Juan 17:6) Manlapu la’d saman, satan a ngaran so impalapag ed dakerakel a lenguahe, tan agla manbayag, bilang kasumpalan na Salmo 83:18, amin a totoo et nakabatan da a samay manngaran a bukbukor a Jehova et Sankatagyan diad interon dalin.
[Paimano ed leksab]
^ par. 2 Impalapag na saray Tasi nen Jehova, a diad primero et Ingles nen 1961. Say intero odino kabiangan na satan so wala la ed masulok a 50 a lenguahe.
[Litrato ed pahina 32]
Say 1558 ya edisyon na Biblia nen Eck, a diad mardyin na satan et atukoy so ngaran a Jehova diad Exodo 6:3