Manakar Itayo Diad Ngaran nen Jehova a Dios Tayo

“Manakar itayo naani dia ed ngaran nen Jehova a Dios tayo ed ando lan ando lawas.”​—MIQUEAS 4:5.

1. Nipaakar ed moralidad, anto so kipapasen ed panaon nen Noe, tan panon a miduma si Noe?

 SAY inmunan too ya asalambit ed Biblia a nanakar a kaiba so Dios et si Enoc. Say komadua et si Noe. Oniay ibabaga ed sikatayo na rekord: “Si Noe [so] sakey a too a maptek tan nagnap ed saray kapolian to, si Noe [so] akiulop-ulop ed Dios.” (Genesis 6:9) Diad panaon nen Noe, say katooan ed inkalapagan so kinmasipa ed puron panagdayew. Linmoor so mauges a kipapasen makasengeg ed saray agmatoor ya anghel, ya agmanepeg ya angasawa ed bibii tan nanilalak na tatawagen a Nefilim odino alan, “mabibiskeg ira a totoo,” odino “lalaki ra a nibanbantog,” ed saraman a panaon. Kanian agpankelawan a say dalin et napno na karawalan! (Genesis 6:2, 4, 11) Balet, pinaneknekan nen Noe so inkasikato ya andi-matik tan “managpulong na katunongan.” (2 Pedro 2:5) Sanen sikatoy ingganggan na Dios a manggawa na biong a kiliktaran na bilay, ‘ginawa nen Noe so amin ya ingganggan na Dios ed sikato. Ontan so ginawa to.’ (Genesis 6:22) On, nanakar si Noe a kaiba so Dios.

2, 3. Anton maabig ya ehemplo so impatnag nen Noe ed sikatayo natan?

² Si Noe so inlaktip nen Pablo ed saray indatak ton matoor a tasi sanen insulat ton: “Lapu ed pananisia si Noe, sanen binilin na Dios nipaakar ed saray bengatla ya agni anengneng, nen saman aragdag ed mapagalang a takot, angiparaan na sakey a biong a kilabanan na abung to; ed panamegley na pananisia to dinusa to so sayan mundo, tan nagmaliw a tomatawir ed katunongan unong ed pananisia.” (Hebreos 11:7) Agaylan abig ya ehemplo! Lapud sikato so matalek a nagawa iray salita nen Jehova, inusar nen Noe so panaon, biskeg, tan saray kayarian to pian nasumpal iray ganggan na Dios. Diad mipadparan paraan, dakel natan so ag-angawat ed saray pankanawnawan onasenso ed sayan mundo pian nausar da so panaon, biskeg, tan kaykayarian da diad panguunor da ed saray ganggan nen Jehova. Makatantanda so pananisia ra tan mansumpal itan ed dilin kilalaban da ontan met ed arum.​—Lucas 16:9; 1 Timoteo 4:16.

³ Say pangagamil ed pananisia so petepeteg a mairap parad si Noe tan ed pamilya to pati ed si Enoc, say laki-ed-pueg nen Noe, a siningbat ed inmunan artikulo. Singa diad panaon nen Enoc, diad panaon nen Noe et dagdaiset iray tuan managdayew, salanti, walwaloran totoo a nanmatoor tan akaliktar ed Delap. Si Noe so angipulong ed inkatunong diad marawal tan imoral a mundo. Niarum ni, sikaran sankapamilyaan so nanggawa na baleg a biong bilang preparasyon ed onsabin Delap ed interon mundo, anggaman anggapo ni so agawan delap nensaman. Satan so maseguron nikadkaduma ed saramay makakaimaton ed sikara.

4. Anton lingo so impabitar nen Jesus nipaakar ed saray kapanaonan nen Noe?

⁴ Makapainteres, sanen tinukoy nen Jesus so panaon nen Noe, agto sinaglawi so karawalan, palson relihyon, odino imoralidad, anggaman seryoso iratan a bengatla. Say lingo ya impabitar nen Jesus et say ag-intalineng na totoo ed panamasakbay. Imbaga to a sikara et “nanaakan tan naniinum, a saray lalaki et angasawa ra tan saray bibii et akiasawa ira, anggad agew ya inloob nen Noe ed biong.” Anto so makapuy ed pangan, iyinum,  pangasawa, odino piasawa? Manbibilay labat ira a “normal”! Balet onsabi la ed saman so delap, tan ipupulong nen Noe so inkatunong. Saray salita tan kondukta to so amasakbay la komon ed sikara. Ingen ta ‘ag-ira nan-imano anggad sinmabi so delap tan inyanor to ira ya amin.’​—Mateo 24:38, 39, NW.

5. Antoran kalidad so kinaukolan nensaman nen Noe tan say pamilya to?

⁵ No nodnonoten tayo iraman a panaon, natebek tayo so kakabatan ed impankurang nen Noe. Balet, diad saray panaon sakbay na Delap, kinaukolan so inkakpel pian magmaliw a duma manlapud arum. Kinaukolan nen Noe tan say pamilya to so mabiskeg a kombiksion pian nagawa ra so baleg a biong tan panoen da itan na nanduruman klase na ayep. Kasin pinilalek na arum ed saratan a matoor a nambilay la ra komon na “normal” tan agtanton nikadkaduma? Anggaman sinmebang iratan a pilalek diad kanonotan da, ag-itan amaletey ed katooran da. Kayari na dakerakel a taon​—a mas andukey ni nen say susungdoan na siopaman ed sikatayo ed sayan sistema na bengabengatla​—niliktar si Noe ed Delap lapud pananisia to. Balet, inukom nen Jehova so amin na saramay nambilay a “normal,” ya agnan-imano ed kabaliksan na saray panaon a pambibilayan da.

Say Katooan so Sinalot Lamet na Karawalan

6. Kayari na Delap, anton kipapasen so siansia nin nagagawa?

⁶ Sanen inmekat laray danum na Delap, ginmapo lamet so katooan. Balet, saray totoo so siansia nin ag-ayadyari, tan “say panag-isisip na puso na too” so nantultuloy a “mauges a nanlapu ed inkaugaw to.” (Genesis 8:21) Nilikud ni ed satan, anggaman agla nayarian na saray demonyo so magmaliw a too, siansia nin aktibo ira. Apatnagan a tampol ed mundo na agmaridios a totoo a satan so ‘mandukdukol ed pakayari na mauges a sakey’ tan singa met natan, saray tuan managdayew so kinaukolan a mitulot ed “saray pangalot na Diablo.”​—1 Juan 5:19; Efeso 6:11, 12.

7. Panon a linmoor so karawalan ed mundo kayari na Delap?

⁷ Manlapu la’d panaon nen Nimrod, say dalin kayari na Delap so napno lamet na karawalan na too. Bilang resulta na ondarakel a populasyon tan iyaaligwas na teknolohiya, satan a karawalan so linmoor diad inlabas na panaon. Diad akadkauna iran taon, walaray kampilan, gayang, bekang tan pana, tan say karwahe. Diad agano niran panaon, say riple tan say kanyon, insan say paltog tan maksil iran panagpabanto diad kasakbayan na koma-20 siglo. Nen Guerra Mundial I et niwala so mas makapataktakot iran armas, a singa say eroplano, tanke, submarino, tan makasamal a gas. Diad satan a guerra, sarayan armas so amatey ed minilyon a totoo. Agkasi itan inilaloan? Andi.

8. Panon a nasusumpal so Apocalipsis 6:1-4?

⁸ Nen taon 1914, si Jesus so nitrono bilang Ari na mangatatawen a Panarian na Dios, tan ginmapo la so “agew na Katawan.” (Apocalipsis 1:10) Diad sakey a pasingawey a nireport ed libro na Apocalipsis, si Jesus so anengneng bilang Ari a mabiktoryan akalugan ed amputin kabayo. Tinmumbok ed sikato so arum niran managkabayo, a kada sakey et mangirerepresenta na miduman bakbak ed katooan. Sakey ed saratan so akalugan ed ambalangan kabayo, tan sikato so “naikdan na pakayari a mangekal na deen ed dalin, tan pian manpapateyan so sakey tan sakey:  tan naikdan na sakey a baleg a kampilan.” (Apocalipsis 6:1-4) Sayan kabayo tan say akalugan ed satan so mangililitrato ed pambabakal, tan say baleg a kampilan so mangirerepresenta ed malaklaknab a deral ya epekto na panlalaban natan pati ed mabiskeg iran armas ya uusaren ed saratan. Saratan ya armas so mangilaktip ed nuklear iran uusaren, a kada sakey et nayarin mamatey ed nilibolibon totoo; saray rocket a makapangipuntirya ed saratan ya uusaren diad nilibon kilometro ed kaarawi; ontan met ed sopistikado iran kemikal tan biolohikal ya armas a nayarin mamatey na dakerakel a totoo.

Iimanoen Tayo Iray Pasakbay nen Jehova

9. Panon a mipadpara so mundo natan ed samay mundo sakbay na Delap?

⁹ Diad panaon nen Noe, dineral nen Jehova so katooan lapud pirmin karawalan na marelmeng iran totoo, diad panangisugsog na saray Nefilim. Komusta met natan? Kasin say dalin et agtanton marawal no ikompara nensaman? Andin balot! Niarum ni, saray totoo natan so mantutultuloy ed inagew-agew a kimey da, a manbibilay ira a “normal,” tan ag-ira maniimano ed saray nipapasakbay, singa ed panaon nen Noe. (Lucas 17:26, 27) Kanian, wala kasi so rason pian panduaruwaan so paneral lamet nen Jehova ed katooan? Anggapo.

10. (a) Anton pasakbay so aminpigan sinalambit ed propesiya na Biblia? (b) Anto so alenleneg a makabat a kurang natan?

¹⁰ Nilasus a taon ni sakbay na Delap, impropesiya la nen Enoc so kadederal ya onsabi ed panaon tayo. (Judas 14, 15) Sinaglawi met nen Jesus so isabi na “baleg ya irap.” (Mateo 24:21) Satan a panaon so impasakbay met na arum iran propeta. (Ezequiel 38:18-23; Daniel 12:1; Joel 2:31, 32) Tan diad libro na Apocalipsis, nabasa tayo so malinew a deskripsion na satan a sampot a kadederal. (Apocalipsis 19:11-21) Bilang indibidual, aaligen tayo si Noe kanian aktibo itayon mangipupulong na inkatunong. Iimanoen tayo iray pasakbay nen Jehova tan maaro tayon tutulongan iray kapara tayon totoo a manggawa met na ontan. Singa si Noe, manakar itayo sirin a kaiba so Dios. On, importante a siopaman a manpilalek ed bilay so mantultuloy a manakar a kaiba so Dios. Panon tayon nagawaan itan anggaman ed saray pananesdes ya aarapen tayo ed kada agew? Nakaukolan tayon bayuboan so mabiskeg a pananisia a nasumpal so gagala na Dios.​—Hebreos 11:6.

Mantultuloy a Manakar a Kaiba so Dios Diad Sayan Magulon Panaon

11. Panon tayon aligen iray Kristiano nen inmunan siglo?

¹¹ Nen inmunan siglo, saray alanaan a Kristiano so tinawag a kabiangan na ‘Say Dalan.’ (Gawa 9:2) Say interon kabibilay da so nisentro ed pananisia ed si Jehova tan ed si Jesu-Kristo. Nanakar ira ed basbas na Katawan da. Natan, ontan met so gagawaen na saray matoor a Kristiano.

12. Anto so agawa kayari na mamilagron impamakan nen Jesus ed ulop na totoo?

 ¹² Say kaimportantian na pananisia so apatnagan ed sakey ya agawa legan na ministeryo nen Jesus. Diad sakey ya inkagawa, mamilagron pinakan nen Jesus so manga 5,000 a totoo. Nikelawan tan aliketan so totoo. Balet, imanoen pa no anto so tinmumbok ya agawa. Oniay nabasa tayo: “Sanen anengneng na saray totoo so tanda a ginawa to, inkuan da, Diad katuaan sikato ya so propeta ya onla dia ed mundo. Si Jesus sirin nen atebek to a ngalngali ra onla tan sikato so alaen da a pilit, pian sikato so gawaen da ya ari, sinmian lamet ed palandey ed kabukbukoran.” (Juan 6:10-15) Diad saman a labi et sikato so linma ed sananey a pasen. Say ag-impangawat nen Jesus ed pagmaliw ton ari so maseguron akadismayaan na dakel a totoo. Tua, impatnag to a sikato et makabat a tuloy a magmaliw ya ari tan sikato so walaan na pakayarin mamenek ed saray pisikal a pankaukolan na totoo. Balet, aliwa nin panaon nen Jehova ed saman pian sikatoy panuleyen To bilang Ari. Niarum ni, say Panarian ya uleyan nen Jesus et mangatatawen, aliwan mangaraldalin.

13, 14. Anton panmoria so impatnag na dakel a totoo, tan panon ya asubok so pananisia ra?

¹³ Anggaman kuan, saray ulop na totoo so determinadon manumbok ed si Jesus tan sikato so aromog da “ed pagpag a gilig na dayat,” unong ed salaysay nen Juan. Akin a sikatoy tinumbok da anta pinaliisan to laray sagpot da a sikatoy gawaen da bilang ari? Impatnag na dakel ed sikara so minumundon panmoria, a pisalambit da iray materyal a probisyon nen Jehova diad kalawakan ed panaon nen Moises. Say labay dan ibaga et nepeg ya ituloy nen Jesus so pangiter ed sikara na materyal a probisyon. Lapud atebek nen Jesus so makapuy a motibo ra, imbangat to ed sikara iray espiritual a katuaan a makatulong pian nipetek so panag-isip da. (Juan 6:17, 24, 25, 30, 31, 35-40) Say reaksion da et nanmeremere ira sumpad sikato, nagkalalo la sanen sinaglawi to iyan ilustrasyon: “Tua, tua, kuan ko ed sikayo, No agkayo mangan ed laman na Anak na too tan agkayo oninum ed dala to, andian kayo na bilay ed inkasikayo. Say mangan na laman ko tan oninum na dalak walaan na maandon bilay, tan sikato so paolien ko ed bilay ed kaunoran ya agew.”​—Juan 6:53, 54.

¹⁴ Saray ilustrasyon nen Jesus so mabetbet a mamapakiwas ed totoo a mangipatnag no kasin pilalek da so manakar a kaiba so Dios. Sakey la imay asalambit ya ilustrasyon, a nansengegan na negatibo iran reaksion. Oniay nabasa tayo: “Amayamay ed saray babangatan to, nen nadngel da ya inkuan da, Saya masoliwet a salita; siopa so makayarin ondengel ed sikato?” Insalaysay ni nen Jesus a nepeg dan tebeken so maespiritual a kabaliksan na saray salita to. Oniay inkuan to: “Say espiritu sikato so mangiter na bilay; say laman anggapo so gunggona to. Saray salita a sinalita ed sikayo sikara so espiritu, tan sikara so bilay.” Balet, dakel nin siansia so agdinmengel, ya oniay kuan na salaysay: “Nisengeg ed saya amayamay ed saray babangatan ton sinmener ira, tan agla ra akila ed sikato.”​—Juan 6:60, 63, 66.

15. Anto so suston panmoria na arum ed saray patumbok nen Jesus?

¹⁵ Anggaman kuan, aliwan ontan so reaksion na amin a babangatan nen Jesus. Tua, agsigpot ya atalosan na saray matoor a babangatan no anto so imbaga nen Jesus. Balet, nansiansian malet so panagmatalek da ed sikato. Si Pedro, a sakey ed saray matoor a babangatan to, so  angibalikas ed liknaan na amin a nansiansia ed si Jesus sanen imbaga ton: “Katawan, siopa so laen mi? Wala ed sika so saray salita na maando a bilay.” (Juan 6:68) Agaylan abig ya awawey tan ehemplo!

16. Panon itayon nayarin nasubok, tan anton manepeg a panmoria so nepeg tayon bayuboan?

¹⁶ Natan et nasubok itayo met a singa ed saramay akadkaunan babangatan. Diad biang tayo, nayarin nadismaya itayo lapud agtampol agawa iray insipan nen Jehova unong ed personal ya iilaloan tayo. Nayarin isipen tayo a mairap a talosan iray panangipaliwawa na saray publikasyon tayon nibase ed Biblia diad saray Kasulatan. Nayarin nadismaya itayo ed kondukta na sakey a kaparan Kristiano. Duga kasi so itundan manakar a kaiba so Dios lapud saratan a rason? Siempre andi! Saray babangatan a sinmian ed si Jesus so angipatnag ed minumundon panag-isip. Nepeg tayon paliisan so ontan a panmoria.

“Aliwa Kami ya Iba na Saray Onsener”

17. Panon itayon natulongan pian makapantultuloy a manakar a kaiba so Dios?

¹⁷ Insulat nen apostol Pablo ya: “Amin a sulat [so] impuyan na Dios.” (2 Timoteo 3:16) Diad panamegley na saray pahina na Biblia, malinew ya ibabaga nen Jehova ed sikatayo a: “Saya so dalan, ondalan kayo ed sikato.” (Isaias 30:21) Say pangunor ed Salita na Dios so ontulong ed sikatayo pian ‘mantultuloy a manlikas no panon so panakar tayo.’ (Efeso 5:15) Say panaral ed Biblia tan pandalepdep ed nanaaralan tayo so ontulong pian ‘makapanakar itayo ed katuaan.’ (3 Juan 3) On, unong ed imbaga nen Jesus, “say espiritu . . . so mangiter na bilay; say laman anggapo so gunggona to.” Say napanmatalkan labat a giya a mangiwanwan ed saray kundang tayo et say espiritual a giya, a manlalapud Salita, espiritu, tan organisasyon nen Jehova.

18. (a) Anto so agmakabat a gagawaen na arum? (b) Anton klase na pananisia so nakaukolan tayon bayuboan?

¹⁸ Natan, saramay nadidismaya lapud minumundon panag-isip da odino ed ag-asumpal iran iilaloan da so mabetbet la ingen a mangaanamot ed iyoopresi na sayan mundo. Lapud naandi la so pankaganatan ed biang da, agda la natetebek a nakaukolan so ‘pansiansian akabantay,’ tan pinili ran gegemtanen iray sinisiblet a kalat imbes ya iyuna ra so intereses na Panarian. (Mateo 24:42, NW) Agmakabat so ontan a kurang. Imanoen pa iray salita nen apostol Pablo: “Sikami aliwa kami ya iba na saray onsener pian pakabalangan; noag ingen iba na saray walaan na pananisia ed kilalaban na kamarerwa.” (Hebreos 10:39) Singa si Enoc tan si Noe, manbibilay itayo ed magulon panaon, balet singa sikara, walaan itayo met na pribilehyon manakar a kaiba so Dios. No gawaen tayo itan, seguradon nailaloan tayo so pakanengneng ed kasumpalan na saray insipan nen Jehova, pakaderal na karelmengan, tan kiletneg na matunong a balon mundo. Agaylan abig ya ilalo!

19. Panon a deneskribe nen Miqueas so kurang na saray tuan managdayew?

¹⁹ Imbaga nen apuyanan a propetan Miqueas a saray nasyon ed sayan mundo et ‘manakar ed balang sakey a ngaran na dios to.’ Insan tinukoy to so inkasikato tan arum niran matoor a mandadayew, ya inkuanto: “Manakar itayo naani dia ed ngaran nen Jehova a Dios tayo ed ando lan ando lawas.” (Miqueas 4:5) No mipadpara ed si Miqueas so determinasyon yo, mansiansia kayon maapit ed si Jehova anggan panon lay inkagulo na panaon. (Santiago 4:8) Komon ta say impapuson pilalek na kada sakey ed sikatayo et say andi-anggaan a panakar a kaiba si Jehova a Dios tayo!

Panon Yon Ebatan?

• Antoray pipadparaan na panaon nen Noe ed panaon tayo?

• Anton kurang so tinumbok nen Noe tan say pamilya to, tan panon tayon naalig so pananisia ra?

• Anton lingon panmoria so impatnag na arum ed saray babangatan nen Jesus?

• Anto so determinadon gawaen na saray tuan Kristiano?

[Tepetepet Parad Panagaral]

[Saray litrato ed pahina 20]

Singa ed panaon nen Noe, saray totoo natan so okupadon tuloy ed inagew-agew a kimey da

[Litrato ed pahina 21]

Bilang manangipulong ed Panarian, ‘aliwa itayon iba na saray onsener’