Manakar a Kaiba so Dios Legan na Sarayan Magulon Panaon

“Si Enoc so akiulop-ulop ed Dios: Insan andi la: ta sikato so inala na Dios.”​—GENESIS 5:24.

1. Anto so pigaran nagagawa ed panaon tayo a pakapatnagan na makapasinagem iran kipapasen?

 MAGULON panaon! Saratan a salita so matukoy a manideskribe ed magulo tan marawal a taotaon a sinagmak na katooan nanlapu la ed inkiletneg na Mesianikon Panarian nen 1914. Diad satan ya amin a panaon et manbibilay la iray totoo ed ‘kaunoran iran agew.’ Saray desyang a singa saray eras, sakit, yegyeg, tan guerra so malaklaknab lan manasalot ed sikara. (2 Timoteo 3:1; Apocalipsis 6:1-8) Apektado met ed saratan iray mandadayew ed si Jehova. Balanglan apektadon maong odino andi, nakaukolan tayon talonaan iray kairapan tan agpakaseguroan ed panaon a pambibilayan tayo. Oniirap so panagbilay lapud saray pakadesdesan ed ekonomya, gulo ed politika, krimen, tan sakisakit.

2. Antoran angat so kipapaarapan na saray lingkor nen Jehova?

² Niarum ni, susungdoan na dakel ed saray lingkor nen Jehova so agmanunda tan pirmin panamasegsegang legan a babakalen nen Satanas iramay ‘manguunor ed ganggan na Dios tan mantatasi ed si Jesus.’ (Apocalipsis 12:17) Tan anggaman aliwan amin ed sikatayo et manasagmak na direktan panamasegsegang, nepeg a mipuligesgesan so amin a tuan Kristiano sumpad si Satanas a Diablo tan ed espiritu ya iyaalibansa to ed katooan. (Efeso 2:2; 6:12) Nakaukolan so tuloytuloy a pambantay pian ag-itayo naimpluensyaan na ontan ya espiritu, lapud nipapaarap itayo ed satan diad trabaho, eskuelaan, tan ed inerman a pasen a nakaukolan so pideneng ed saramay ag-interesado ed puron panagdayew.

Manakar a Kaiba so Dios, Aliwan Saray Nasyon

3, 4. Diad anton paraan a midumaan iray Kristiano manlapud mundo?

³ Nen inmunan siglo, nantultuloy met ya akitulot iray Kristiano ed espiritu na sayan mundo, tan satan so angibiig ed sikara manlapud saramay walad paway na Kristianon kongregasyon. Deneskribe nen Pablo itan a pidumaan sanen insulat to: “Saya sirin so ibagak, tan tasian ko ed Katawan, ya agkayo la manakar a singa kakaakar met na saray Gentiles ed maapan kalakal da, ya  abilungetan so kalakal da, a niarawi ra ed bilay na Dios, lapu ed agpikakabat a wala ed sikara, a nisengeg ed yaawet na puso ra, a diad inkamaunor da ed liknaan da inter da so inkasikara a dili ed kaalakan na laman, pian gawaen da a siaagap so amin a nengneng na karumsisan.”​—Efeso 4:17-19.

⁴ Saratan a salita so malinlinew a manideskribe ed pirmin kabilungetan na sayan mundo nipaakar ed espiritual tan moral​—diad panaon nen Pablo tan ed panaon tayo! Singa diad inmunan siglo, saray Kristiano natan so ‘agmanaakar a singa kakaakar na saray Gentiles’ odino nasyones. Imbes, panggagayagaan da so alay abig a pribilehyo a panakar a kaiba so Dios. Tua, nayarin panduaruwaan na arum no kasin makatunongan so pangibaga a makapanakar iray makabos tan ag-ayadyarin totoo a kaiba nen Jehova. Balet, ipapatnag na Biblia a nayarian da. Niarum ni, iilaloan nen Jehova a gawaen da itan. Nen koma-walon siglo sakbay na Komon a Panaon tayo, insulat nen propeta Miqueas so onggendan ya apuyanan a salita: ‘Anto ta so kaukolan nen Jehova ed sika, noag say panggawa lambengat na inkatunong, tan pangaro ed kaabigay linawa, tan mauy-uyamon panakar a kaiba so Dios mo?’​—Miqueas 6:8.

Panon tan Akin a Manakar a Kaiba so Dios?

5. Panon a makapanakar so sakey ya ag-ayadyarin too a kaiba so Dios?

⁵ Panon itayon makapanakar a kaiba so makapanyarin-amin tan agnanengneng a Dios? Mapatnag ya aliwa itan a singa ed piuulop tayo ed kapara tayon totoo. Diad Biblia, say balikas a “manakar” so mankabaliksan ya “ontumbok ed sakey a paraan na kakikiwas.” * Sinononot ed satan a punto, natalosan tayo a say sakey a manaakar a kaiba so Dios et ontutumbok ed kurang na bilay ya indatak na Dios tan makapaliket ed sikato. Diad panumbok ed satan a kurang, sikatayo so midumaan ed maslak a totoo a walad kaliberliber tayo. Ingen, satan so manepeg labat a desisyon a gawaen na sakey a Kristiano. Akin? Wala so dakel a rason.

6, 7. Akin a sankaabigan a kurang so panakar a kaibay Dios?

⁶ Unona, si Jehova so Manamalsa tayo, say Subol na bilay tayo, tan Manangitarya ed amin a nakaukolan tayo pian manbilay. (Apocalipsis 4:11) Bilang resulta, sikato lambengat so makanepegan a mangibaga ed sikatayo no panon so pankurang tayo. Niarum ni, say panakar a kaibay Dios so makagunggonan tuloy a kurang a nagawaan tayo. Parad saramay manakar a kaiba si Jehova, sikato so angitarya la na probisyon parad pakaperdona na kasalanan, tan iyoopresi to so seguradon ilalo ya andi-anggaan a bilay. Say sankamaaroan a mangatatawen ya Ama tayo so mangitatarya met na makabat a simbawa ya ontulong ed saramay mankukurang a kaiba to pian matalona so bilay da natan, anggaman ag-ira ayadyari tan manbibilay ira ed mundo a mandukdukol ed pakayari nen Satanas. (Juan 3:16; 2 Timoteo 3:15, 16; 1 Juan 1:8; 2:25; 5:19) Sakey ni, manakar itayo a kaibay Dios lapud say inkamabulos tayon manggawa ed satan so mangiyalibansa na kareenan tan pankakasakey diad loob na kongregasyon.​—Colosas 3:15, 16.

⁷ Say kaunoran tan sankaimportantian et nipatnag tayo so tatalindegan tayo ed baleg ya isyu a linmesa ed hardin na Eden, salanti, say isyu na inkasoberano, sano manaakar itayo a kaiba so Dios. (Genesis 3:1-6) Diad panagbilay tayo, nipatnag tayo a sigpot itayon ondadapag ed si Jehova, tan makpel tayon iyaabawag a sikato lambengat so manepeg a Soberano. (Salmo 83:18) Diad ontan et onkikiwas itayo unong ed pikakasi tayo a say ngaran na Dios et napasantos tan nagawa so linawa to. (Mateo 6:9, 10) Agaylan makabat iramay mankurang a kaiba so Dios! Makapanseguro ira a duga so direksion ya aarapen da, lapud si Jehova et “saksakey a Dios a makabat.” Sikatoy agbalot nalingo.​—Roma 16:27.

8. Panon a mipadpara ed panaon tayo so panaon di Enoc tan Noe?

⁸ Balet, panon a posible so pambilay bilang Kristiano sano say kipapasen et magulogulo tan  say maslak a totoo et ag-interesado ed panaglingkor ed si Jehova? Nanengneng tayo so ebat sano konsideraen tayo iray matoor a lalaki nensaman a pinansiansia ra so integridad da legan na mair-irap a panaon. Duara ed saratan et si Enoc tan Noe. Pareho ira a nambilay ed panaon a mipadpara ed sikatayo. Kasmak so karelmengan. Diad panaon nen Noe et say dalin so napno na karawalan tan imoralidad. Ingen ta niresistian di Enoc tan Noe so espiritu na mundo diad panaon da tan nanakar ira a kaiba si Jehova. Panon dan agawaan itan? Pian naebatan itan a tepet, singbaten tayo ed sayan artikulo so alimbawa nen Enoc. Diad ontumbok ya artikulo, konsideraen so nipaakar ed si Noe.

Si Enoc so Nanakar a Kaiba so Dios Diad Magulon Panaon

9. Anton impormasyon so walad sikatayo nipaakar ed si Enoc?

⁹ Si Enoc so inmunan too ya adeskribe ed Kasulatan bilang akiulop-ulop odino nanakar a kaiba so Dios. Oniay ibabaga na rekord na Biblia: “Si Enoc nen nailalak to si Matusalem akiulop-ulop ed Dios.” (Genesis 5:22) Insan, kayari na impanaglawi ed karukey na bilay nen Enoc, a mas andukey ni nen say bilay tayo natan, ingen ta antikey labat no ikompara ed saramay kapanaonan to, oniay kuan na rekord: “Si Enoc akiulop-ulop ed Dios: Insan andi la: ta sikato so inala na Dios.” (Genesis 5:24) Mapatnag a si Enoc so pinaugip la nen Jehova ed patey sakbay a sikatoy nakabil na saray onsusumpa ed sikato. (Hebreos 11:5, 13) Nilikud ni ed saratan ya antikey a bersikulo, walay pigaran impanukoy na Biblia ed si Enoc. Anggaman kuan, manlapud impormasyon a naamtaan tayo tan ed arum niran pakapatnagan, walaan itayo na maabig a rason pian nibaga a magulo so panaon nen Enoc.

10, 11. (a) Panon so inkayat na kaugsan kayari na impanrebelde nen Adan tan Eva? (b) Anton mapropetikon mensahe so impulong nen Enoc, tan anton reaksion so nabet to?

¹⁰ Alimbawa, ikonsidera pa so kapeles na inkayat na kaugsan ed sankatooan kayarin nankasalanan si Adan. Ibabaga na Biblia ed sikatayo a say panguloan ya anak nen Adan a si Cain so nagmaliw a primeron managpatey na too sanen tinigway to so agi ton Abel. (Genesis 4:8-10) Kayari na maramsak ya impatey nen Abel, walay sakey nin ilalak di Adan tan Eva, tan sikatoy inngaran dan Set. Oniay nabasa tayo nipaakar ed sikato: “Dia ed kinen Set, nianak met ed sikato so sakey a laki ya anak; et inikdan to na ngaran to ya Enos: insan la ginmapo so totoo ya ontawag ed ngaran nen Jehova.” (Genesis 4:25, 26) Makapaermen ta satan ya ‘itatawag ed ngaran nen Jehova’ et diad  maapostatan paraan. * Dakel nin taon kayari na inkianak nen Enos, tinibukel na sakey a poli nen Cain a manngaray Lamec so sakey a kanta parad duaran asawa to ya ipapasirayew to so impamatey to ed kalangweran a laki ya akasugat ed sikato. Oniay impasakbay to met: “No si Cain nadusa a maminpito, tuatua a si Lamec maminpitomplo tan pito.”​—Genesis 4:10, 19, 23, 24.

¹¹ Saratan ya antikey ya impormasyon so mangipabitar a say kaugsan a pinawala nen Satanas diad hardin na Eden so tampol ya angikayat na karelmengan ed limog na saray poli nen Adan. Diad ontan a mundo, si Enoc so propeta nen Jehova a say mapuersan apuyanan iran salita to so onaplika ni anggad natan. Insalaysay nen Judas ya oniay impropesiya nen Enoc: “Nia, say Katawan onla dia a tarok to so saray samplon libolibo a sasantos to, a mangukom ed ganagana, tan mangipatnag na katuaan ed saray mangaruksa a nipaakar ed mangaruksan gawa ra, tan ganagana a bengatla ya ambelat ya ag-agamil a saray maruksan managkasalanan sinalsalita ra sumpa ed sikato.” (Judas 14, 15) Saratan a salita so sigpot a nasumpal diad Armagedon. (Apocalipsis 16:14, 16) Siansia, makapanseguro itayo ya anggan diad panaon nen Enoc et dakel ya ‘agmaridios a managkasalanan’ so naingongotan ed nadngel dan propesiya nen Enoc. Maaron tuloy so impangala nen Jehova ed bilay na propeta ta pian agda napasakitan!

Anto so Amabiskeg ed si Enoc a Manakar a Kaiba so Dios?

12. Anto so impidumaan nen Enoc ed saray kapanaonan to?

¹² Diad hardin na Eden nensaman, dinengel nen Adan tan Eva si Satanas, tan nanrebelde si Adan sumpad si Jehova. (Genesis 3:1-6) Duma ed sikara so impankurang na ilalak dan si Abel, kanian sikato so inabobonan nen Jehova. (Genesis 4:3, 4) Makapaermen ta karaklan ed saray ilalak nen Adan so ag-angalig ed si Abel. Balet, sikato so inalig nen Enoc, a nianak kayari na piganlasus a taon. Anto so pidumaan nen Enoc ed dakerakel niran ilalak nen Adan? Inebatan nen apostol Pablo itan a tepet sanen insulat ton: “Lapu ed pananisia si Enoc so niyalis ta pian agto nanengneng so ipapatey, tan sikatoy agla naromog na siopaman lapud sikatoy inyalis la na Dios; ta sakbay na inkiyalis to et sikatoy awalaan na paneknek ya apaliket ton maong so Dios.” (Hebreos 11:5, NW) Si Enoc so kabiangan na baleg a “lurem na saray [sakbay-Kristianon] tasi,” a walaan na alay abig ya alimbawa na pananisia. (Hebreos 12:1) Ontan a pananisia so tinmulong ed si Enoc pian napansiansia to so dugan kondukta diad impanbilay ton masulok a 300 a taon​—masulok a mamitlon karukey na panat na bilay na maslak ed sikatayo natan!

13. Anton klase na pananisia so walad si Enoc?

¹³ Deneskribe nen Pablo so pananisia nen Enoc tan arum niran tasi sanen insulat ton: “Say pananisia sikato so agpanduaruwa ed saray bengatla ya iilaloan, say panangipatnag ed saray bengatla ya agni anengneng.” (Hebreos 11:1) On, say pananisia et matalek a paniilalo, a nibase ed saray panamaseguro, a nagawa iray bengatlan iilaloan tayo. Lalanoren na satan so mabisbiskeg a panilalo a mangaapekta ed panmoria tayo no anto so manunaan ed bilay tayo. Satan a klase na pananisia so akatulong ed si Enoc pian manakar a kaiba so Dios anggaman aliwan ontan so gagawaen na totoon walad kaliberliber to.

14. Anton suston pikakabat so nayarin angibasiyan na pananisia nen Enoc?

¹⁴ Say tuan pananisia so nibase ed suston pikakabat. Anton pikakabat so agamoran nen Enoc? (Roma 10:14, 17; 1 Timoteo 2:4) Maseguron amta to iray agawa ed Eden. Nayarin nadngel to  met no anto so kipapasen na bilay diad hardin na Eden​—a nayarin wala ni nensaman, balet ta agnalooban na totoo. (Genesis 3:23, 24) Tan amta to so gagala na Dios a say dalin et napano na ilalak nen Adan tan pagmaliwen dan Paraiso so interon dalin. (Genesis 1:28) Niarum ni, seguradon papablien nen Enoc so sipan nen Jehova a mamawala na Bini a manmekmek ed ulo nen Satanas tan mangekal ed saray makapuy ya epekto na panamalikdo nen Satanas. (Genesis 3:15) On, say apuyanan a propesiya nen Enoc, a nikurit ed libro na Judas, so angipasakbay ed pakaderal na bini nen Satanas. Lapud walay pananisia nen Enoc, maseguro tayo a dinayew to si Jehova bilang say “mananumang ed saray mananap ed sikato.” (Hebreos 11:6) Sirin, anggaman ag-agamoran nen Enoc so amin a pikakabat a walad sikatayo natan, sikato so walaan na magenap a pikakabat ya inkiletnegan na malet a pananisia to. Lapud sikatoy walaan na ontan a pananisia, apansiansia to so integridad to legan na saray magulon panaon.

Aligen so Alimbawa nen Enoc

15, 16. Panon tayon natumbok so kurang nen Enoc?

¹⁵ Lapud labay tayon paliketen si Jehova, a singa si Enoc, legan na sarayan magulon panaon, nepeg tayon tumboken so alimbawa nen Enoc. Nakaukolan tayon gamoran tan pansiansiaen so suston pikakabat ed si Jehova tan ed gagala to. Balet wala ni so nakaukolan tayo. Nakaukolan tayon paiwanwan so kurang tayo ed satan a suston pikakabat. (Salmo 119:101; 2 Pedro 1:19) Nakaukolan a paigiya itayo ed kanonotan na Dios, a lawas panggunaetan so pamaliket ed sikato diad amin a kanonotan tan kiwas tayo.

¹⁶ Anggapo so rekord tayo no wala ni ed panaon nen Enoc so nanlingkor ed si Jehova, balet mapatnag a bukbukor to ed saman odino kabiangan ed sakey a melag a grupo. Sikatayo so daiset met ed sayan mundo, balet ag-itayo nadidismaya lapud satan. Tulongan itayo nen Jehova anggan siopa so onsumpa ed sikatayo. (Roma 8:31) Si Enoc so makpel ya angipasakbay ed onsabin kadederal na agmaridios a totoo. Sikatayo so manpakpel met legan tayon ipupulong so “ebanghelyo na panarian” anggaman ed panagmudmora, isusumpa, tan panamasegsegang. (Mateo 24:14) Say impanbilay nen Enoc et aliwan singa karukey na impanbilay na saray kapanaonan to. Balet, say ilalo to et ag-akasentro ed saman a mundo. Inyapasakey to so imano to ed bengatlan mas maabig. (Hebreos 11:10, 35) Iyaapasakey tayo met so imano tayo ed kasumpalan na gagala nen Jehova. Kanian, agtayo sigpot ya aanamoten iyan mundo. (1 Corinto 7:31) Imbes, manunan uusaren tayo so biskeg tan saray kayarian tayo diad panaglingkor ed si Jehova.

17. Anton pikakabat so walad sikatayo ya anggapo ed si Enoc, kanian anto so nepeg tayon gawaen?

¹⁷ Si Enoc so walaan na pananisia ya ompatnag so Bini ya insipan na Dios diad aturon panaon nen Jehova. Ngalngali 2,000 a taon lay apalabas manlapu la’d satan a Bini, si Jesu-Kristo, so pinmatnag, angitarya ed dondon, tan angilukas ed dalan parad sikatayo, ontan met ed saray matoor a tasi nensaman a singa si Enoc, pian natawir da so andi-anggaan a bilay. Satan a Bini, a nitrono la bilang Ari na Panarian na Dios, so amagit ed si Satanas manlapud tawen tan imbasileng to diad dalin, tan naeeksperiensya tayo so epekto na satan lapud irap a nagagawa ed kaliberliber tayo. (Apocalipsis 12:12) On, wala so mas dakel a pikakabat natan parad sikatayo nen say diad panaon nen Enoc. Komon ta nawalaan tayo sirin na malet a pananisia a singa sikato. Komon ta say panagmatalek tayo ed kasumpalan na saray sipan na Dios so mangimpluensya ed amin a gagawaen tayo. Singa si Enoc, komon ta manakar itayo a kaiba so Dios, anggaman manbibilay itayo ed magulon panaon.

[Saray paimano ed leksab]

Panon Yon Ebatan?

• Anto so kabaliksan na panakar a kaiba so Dios?

• Akin a sankaabigan a kurang so panakar a kaiba so Dios?

• Anto so akatulong ed si Enoc pian makapanakar a kaiba so Dios anggaman ed magulon panaon?

• Panon tayon naalig si Enoc?

[Tepetepet Parad Panagaral]

[Litrato ed pahina 15]

Lapud pananisia, si ‘Enoc so akiulop-ulop ed tuan Dios’

[Litrato ed pahina 17]

Mapekder tayon papanisiaan a nagawa iray sipan nen Jehova

[Picture Credit Lines ed pahina 13]

Bii, arawin kawanan: FAO photo/B. Imevbore; nagegeray a bilding: San Hong R-C Picture Company