Pasalimbengan Kayo ed “Salita” nen Jehova

NEN 490 K.K.P. diad maawaran a pambabakal ed Marathon, manga 10 anggad 20 libon sundalo na Atenas so akilaban ed mabisbiskeg ya armada na Persia. Say sankaepektiboan ed saray taktika na Griego et say phalanx​—sakey a grupo na saray sundalo a maapit a nandarasig legan a manmamartsa. Saray kinlong odino samben da a nansasaip et singa padir ya agnalooban tan walaray akapatuyong a gayang. Lapud satan a taktika, say armada na Atenas so makatantandan nambiktorya sumpad mabisbiskeg ya armada na Persia.

Saray tuan Kristiano so mibabakal met diad espiritual a paraan. Mabisbiskeg iray pilalabanan da​—saray agnanengneng a manuley na sayan peles a marelmeng a sistema, a deneskribe diad Biblia bilang “saray manuley ed mundo na sayan kabilungetan, . . . saray mauges ya espiritu ed pasen a mangatatawen.” (Efeso 6:12; 1 Juan 5:19) Lawas manbibiktorya iray totoo na Dios​—balet aliwan lapud dilin biskeg da. Amin a dayew so ipapaarap ed si Jehova, a manasalimbeng tan mamibilin ed sikara, unong a nibaga diad Salmo 18:30: “Say salita nen Jehova asalsali la: sikato so sakey a kinlong na amin na saray manmatalek ed sikato.”

On, diad panamegley na asalsali lan “salita” to a lugan na Masanton Kasulatan, sasalimbengan nen Jehova iray matoor a lingkor to manlapud espiritual a pakasakitan. (Salmo 19:7-11; 119:93) Nipaakar ed kakabatan a niparungtal ed Salitay Dios, nansulat si Solomon: “Sikato so agmo ikaindan, et yagel to ka; sikato so aroen mo, et sikato bantayan to ka.” (Uliran 4:6; Eclesiastes 7:12) Panon itayon nasalimbengan na kakabatan na Dios sumpad pakasakitan? Konsideraen so alimbawa na kadaanan ya Israel.

Totoo a Sinalimbengan na Maridios a Kakabatan

Say Ganggan nen Jehova so analimbeng tan angiwanwan ed saray Israelita diad amin ya aspekto na bilay da. Alimbawa, saray totontonen nipaakar ed panangan, panaglinis ed laman, tan panagkuarantina so angipaliis ed sikara manlapud dakel a sakit ya analot ed saray arum a nasyon. Akapipara lambengat so siensia ed estandarte na Ganggan na Dios kayari  impakadiskobre ed baktirya nen koma-19 a siglo. Saray ganggan nipaakar ed pangayarian na dalin, panondon, kibulos ed utang, tan pamautang a walay interes so akagunggonaan na saray totoo ed Israel diad impakawalaan da na akaletneg a maong a sosyedad tan balansin ekonomya. (Deuteronomio 7:12, 15; 15:4, 5) Akatulong ni ingen so Ganggan nen Jehova pian napansiansian mabuna so dalin na Israel! (Exodo 23:10, 11) Saray ganggan sumpad palson panagdayew so analimbeng ed totoo diad espiritual a paraan, ya angiyagel ed sikara manlapud panagpairap na demonyo, panagbagat ed ugaw, tan dakel niran kaugsan, nilikud ed makapabanday a panagdakmomo na totoo ed andiay-bilay iran talintao.​—Exodo 20:3-5; Salmo 115:4-8.

Petepeteg a say “salita” nen Jehova et “aliwa a maapa” parad Israel; imbes, nankabaliksan itan na bilay tan kinarukey na saray agew parad amin ya angunor ed satan. (Deuteronomio 32:47) Ontan met so nagamoran natan na saramay manguunor ed makabat iran “salita” nen Jehova, anggaman anggapo la ed silong na Ganggan na sipanan iray Kristiano. (Galacia 3:24, 25; Hebreos 8:8) Diad tua, aliwa lan sakey a kodigo na saray ganggan so mangigigiya tan manasalimbeng ed saray Kristiano, noagta saray malaknab a prinsipyo na Biblia.

Totoo a Proprotektaan na Saray Prinsipyo

Nayarin limitado so kiyaplikaan na saray ganggan tan temporaryo labat iratan. Balet ta saray prinsipyo ed Biblia, ya ipapasen a manuna iran katuaan, so kaslakan a walaay malaknab tan permanentin kiyaplikaan. Singa bilang, konsideraen so prinsipyo a nidatak diad Santiago 3:17, ya oniay ibabaga na kabiangan na satan: “Say kakabatan a wala a manlapu ed tagey, unona, sikato so malinew [“masimpit,” NW], insan mareen.” Panon a nasalimbengan na satan a manunan katuaan so totoo na Dios natan?

Say pagmaliw a masimpit et mankabaliksay pagmaliw a malinis ed moral. Kanian, pambabanikelan na saramay mamapabli ed kasimpitan ya aglambengat paliisan so imoralidad noag pati saray bengatlan mangitonton ed satan, laktip lay panagpantasya ed sekso tan pornograpiya. (Mateo 5:28) Ontan met, saray saninaro a mangipapapuso ed prinsipyon nidatak diad Santiago 3:17 so ompapaliis ed pagmaliw a maap-apit a nayarin mangitonton ed agda la pakakontrol ed dili ra. Lapud igigiya ira na prinsipyo, ag-ira nasagyat a manggawa na karutakan, a nayarin iisipen da ya abobonan nen Jehova so kondukta ra daput no agda aktual a nasumlang so ganggan to. Amta ra a si Jehova et ‘onnenengneng ed puso’ tan onkikiwas unong ed satan. (1 Samuel 16:7; 2 Awaran 16:9) Lapud makabat ya ikikiwas da, nasasalimbengan da so inkasikara manlapud dakel a makaalis a sakit ed sekso a kasmak la natan tan napansiasiansia ran mabunigas so isip tan liknaan da.

Sakey ni, say maridios a kakabatan et “mareen,” so inkuan na Santiago 3:17. Amta tayo a panggugunaetan nen Satanas ya iyarawi itayo manlapud si Jehova diad pangipapaslep to ed kapusoan tayo na marawal ya espiritu, a no arum et diad panamegley na kuestionablin literatura, pelikula, musika, tan computer games. Arum a computer games so manasagyat ed saray manggagalaw ya aligen so agnaisip a karamsakan tan panamatey! (Salmo 11:5) Say itatalona nen Satanas so napapatnagan diad ikakasmak na maramsak a krimen. Nipaakar ed ontan a krimen, say peryodiko ed Australia a The Sydney Morning Herald so angaon ed si Robert Ressler, ya angimbento ed salitan “serial killer,” pigaran taon lay apalabas. Inkuan nen Ressler a say lalon akasagyatan na saratan a managpatey ya ininterbio to nen dekada na 1970 et say pornograpikon materyal ya agtanto grabe no ikompara ed mabanbanday iran pornograpikon materyal natan. Kanian, imbalikas nen Ressler so “mauddiem ya ilalo ed arapen​—sakey a balon siglo ya ondakel iray managpatey na amayamay.”

Tua itan lapud pigaran bulan labat so linmabas kayarin nipaway itan ed peryodiko, walay sakey a laki ya amaltog ed 16 ya ugugaw pati say managbangat da diad sakey ya eskuelaan na kinder ed Dunblane, Scotland, insan to pinaltog so inkasikato. Kalabas na sakey bulan, wala met so lakin naambagel a pinapaltog to so 32 a totoo diad mareen a baley na Port Arthur ed Tasmania, Australia. Diad agano niran taon et atalagnaw so Estados Unidos lapud nantutumbokan iran masaker ed eskuelaan, kanian saray Amerikano so mantetepet na, Akin? Nen Hunyo 2001, say bansan Hapon so nagmaliw a paulon-balita ed sankamundoan sanen walay naambagel a laki a linmoob ed eskuelaan tan sinasaksak to so 8 ya ugugaw a walad primero tan  komaduan-grado anggad inatey tan sinasalger to so 15 nin totoo. Mapatnag a komplikado iray sengegan na saratan a kaugsan, balet say karawalan a nipaparungtal ed media so mabetbet ya ipapasen a sakey ed saray sengegan. “No say 60-segundo labat a patalastas so mamarakel la na saray nalako diad tindaan,” so insulat na Australianon kolumnista a si Phillip Adams, “segurado a say duay-oras a pelikula a ginastosan na minilyon et makapanguman ed awawey na totoo.” Misiglaotan ed satan, diad abung na samay amatey ed Port Arthur et wala so akompiska na popolis a 2,000 a video a mangipaparungtal na karawalan tan kabandayan ed sekso.

On, saramay manguunor ed saray prinsipyo na Biblia et naproprotektaan so nonot tan puso ra manlapud amin a nengneng na panliliket a mangipapaseseg na karawalan. Kanian, agda aabuloyan so “espiritu na mundo” a mangapekta ed kanonotan tan pilpilalek da. Imbes, sikara so “ibabangat na espiritu [na Dios],” tan pambabanikelan dan bayuboan so panangaro ed saray bunga na satan, a sakey la so deen. (1 Corinto 2:12, 13; Galacia 5:22, 23) Gagawaen da itan diad panamegley na regular a panagaral na Biblia, panagpikasi, tan makapabiskeg a panagdalepdep. Sikaray agmet mililimog ed saramay walaan na maramsak a disposisyon, noagta say pililimogan da et saramay kapara ran manpipirawat ed mareen a balon mundo nen Jehova. (Salmo 1:1-3; Uliran 16:29) On, talagan makasalimbeng ed sikatayo so kakabatan a manlalapud Dios!

Abuloyan so “Salita” nen Jehova a Manalimbeng ed Puso Yo

Sanen si Jesus so tinukso diad kalawakan, sinuppiat to si Satanas diad suston impangaon to ed Salita na Dios. (Lucas 4:1-13) Balet, sikatoy aglambengat akisalita ed Diablo pian paneknekan no siopa so mas marunong a mankatunongan. Diad impangusar to na Kasulatan bilang basiyan na depensa to, nansalita si Jesus manlapud puso to, kanian say estratehiya na Diablo, ya epektibon maong diad Eden, so agtinmalona ed kipapasen nen Jesus. Ag-ontalona met ed sikatayo iray pakana nen Satanas no panoen tayo so kapusoan tayo na saray salita nen Jehova. Satan so sankaimportantian a nagawaan tayo, lapud ta ‘manlalapu ed puso iray agus na bilay.’​—Uliran 4:23.

Niarum ni, nepeg ya itultuloy tayon alwaran so puso tayo tan agbalot onsusuko. Si Satanas, ya agtinmalona diad kalawakan, so agtinmundan anubok ed si Jesus. (Lucas 4:13) Sikato met so ag-ontundan manukso ed sikatayo, a salien to so nanduruman estratehiya pian buyaken so katooran tayo. (Apocalipsis 12:17) Kanian, aligen tayo si Jesus diad pamayubo na aralem a panangaro ed Salita na Dios, tan maparanay ya ikerew na masanton espiritu tan kakabatan panamegley na pikakasi. (1 Tesalonica 5:17; Hebreos 5:7) Diad biang met nen Jehova, papaseguroan to so amin a manpapasalimbeng ed sikato a niyagel ira ed espiritual a kapeligroan.​—Salmo 91:1-10; Uliran 1:33.

Sasalimbengan na Salitay Dios so Kongregasyon

Agnaamper nen Satanas so nipasakbay a pakaliktar na “baleg ya ulop” manlapud baleg a kairapan. (Apocalipsis 7:9, 14) Bangbalet, gagawaen to nin siansia so anggaay nayarian to ya impluensyaan iray Kristiano ta pian anggan panon et walaray indibidual a makabalang ed pabor nen Jehova. Epektibo itan ya estratehiya diad kadaanan ya Israel, a nanresulta ed impatey na 24,000 a totoo sanen magano la ran onloob ed Insipan a Dalin. (Numeros 25:1-9) Siempre, saray nankasalanan a Kristiano a mangipatnag na tuan panagbabawi so makaawat na maaron tulong ta pian napaabig ira ed espiritual. Balet saray agmagbabawin managkasalanan, a singa si Zimri nensaman, so mangipepeligro ed moral tan espiritual a pankaabigan na arum. (Numeros 25:14) Singa saray nandarasig a sundalo a mangikban ed saray samben da, agda lambengat ipepeligro so inkasikaran dili noag pati saray kakaiba ra.

Kanian igaganggan na Biblia: “Agki miulop ed bengatlan too ya anggan tatawagen ni na agi no managlawan, odino maagum, odino manangigalang ed talintao, odino manag-ayew, odino managbuanges, odino managpatubo; dia ed satan a too agkayo miulop a mangan. . . . Paekal yo sirin so mauges a too ed pegle’yo.” (1 Corinto 5:11, 13) Agkayo ta mipakna a sayan makabat a “salita” et makasalimbeng ed moral tan espiritual a kalinisan na Kristianon kongregasyon?

Diad baleg a pidumaan, dakel ed saray relihyon na Kakristianoan ontan met ed saray apostata so  mangipapasen a karaanan la iratan a kabiangan na Biblia tan misumlangan ed moderno tan maabuloy iran panmoria ed moralidad. Kanian, kokonsintien da so amin a nengneng na graben kasalanan, anggan diad limog na saray klerigo. (2 Timoteo 4:3, 4) Balet, imanoen a say Uliran 30:5, ya anukoy met ed “salita” nen Jehova a singa kinlong, so tinumbokan na ganggan diad bersikulo 6: “Agmo aruman so saray salita [na Dios], ompan baaten to ka, tan naromog ka a matila.” On, saraman so mangaarum odino mamabawas ed Biblia so peteg a matitila ed espiritual​—say sankagrabian ed amin a matitila! (Mateo 15:6-9) Sirin, apresyaen tayon maong so impagmaliw tayon kabiangan na sakey ya organisasyon a walaan na aralem a respeto ed Salita na Dios.

Sasalimbengan na “Makaroyroyon Balingit”

Lapud uunoren na saray totoo na Dios so Biblia tan inanabang da ed arum so makaligliwan mensahe na satan, sikaray mangikakayat na “makaroyroyon balingit” na bilay a singa insenso a mamapaliket ed si Jehova. Balet parad saray agmatunong ya indibidual, saray mangitatarok na satan a mensahe et “makapatey a samyong na kadederal,” unong ed patalos na J. B. Phillips. On, say piguratibon pakaangob na saray marelmeng so dineral a tuloy na sistema na bengabengatla nen Satanas kanian naalipanesan ira odino busolen da ni ingen iramay mangikakayat na “makaroyroyon balingit nen Kristo.” Diad biek a dapag, saramay maseseg a mangikakayat na maong a balita so magmamaliw a ‘makaroyroyon balingit nen Kristo diad saray nilaban.’ (2 Corinto 2:14-16) Saratan a matuan-impanpuson totoo so mabetbet a nadidimla ed pansimpisimpitan tan relihyoson katilaan a napapatnagan ed palson relihyon. Kanian, sano bukayen tayo so Salita na Dios tan inabang tayo ed sikara so mensahe na Panarian, napapaapit ira ed si Kristo tan labay da ni manaral a nagkalalo.​—Juan 6:44.

Kanian agkayo nadidismaya sano ag-ondengel so arum ed mensahe na Panarian. Imbes, moriaen a makasalimbeng ed espiritual so “makaroyroyon balingit nen Kristo,” a mamapaarawi ed dakel a mapeligron indibidual manlapud espiritual ya ayaman na totoo na Dios, bangta manasagyat ed saraman so maabig-impanpuso a totoo.​—Isaias 35:8, 9.

Lapud maapit a nandarasig iray Griegon sundalo diad Marathon tan binembenan dan malet iray samben da, sikaray nambiktorya anggaman mabisbiskeg iray kalaban da. Mipadpara, makaseguro iray matoor a Tasi nen Jehova a sigpot iran manbiktorya ed espiritual a pibabakal da, lapud initer itan a “tawir” da. (Isaias 54:17) Kanian nepeg a kada sakey ed sikatayo so lawas pasalimbengan ed si Jehova diad pantultuloy a “pamemben a malet ed salita na bilay.”​—Filipos 2:16, NW.

[Saray litrato ed pahina 31]

‘Say kakabatan a manlapud tagey et masimpit, insan mareen’