Tepetepet Manlapud Saray Managbasa

Anto so basiyan ed pangibagan saray balikas a “sikato labat so wala ed andi ed ipapatey” tan ‘sikato so ag-anengneng odino agnayarin nengnengen na anggan siopa ed saray totoo’ et manutukoy ed si Jesus aliwan si Jehova a Dios?

Oniay insulat nen apostol Pablo: “A sikato sano panaon to ipanengneng to so bendito tan saksakey a Makapanyari, Ari na saray arari, tan Katawan na saray kakatawan. A sikato labat so wala ed andi ed ipapatey, a manayam ed sakey a liwawa ya agnaasinggeran; a sikato so agnanengneng na anggan siopa ed saray totoo, et sikato so agnayari a nengnengen.”​—1 Timoteo 6:15, 16.

Saray komentarista ed Biblia so kaslakan a mangikakatunongan a: ‘Panon kasi a saray balikas a “sikato labat so wala ed andi ed ipapatey,” “saksakey a Makapanyari,” tan sakey ya “ag-anengneng odino agnayari a nengnengen na anggan siopa ed saray totoo” et ontukoy ed arum a persona nilikud ed Makapanyarin-amin?’ Tua a nayarin onaplika iratan a termino ed si Jehova. Balet, ipapabitar na konteksto na 1 Timoteo 6:15, 16 a si Jesus so espesipikon tutukoyen nen Pablo.

Diad sampot na bersikulo 14, sinalambit nen Pablo so “ipatnag nen Katawan tayo a Jesu-Kristo.” (1 Timoteo 6:14) Kanian, sanen insulat nen Pablo diad bersikulo 15 a ‘sano ipanengneng to so bendito tan saksakey a Makapanyari diad aturon panaon na satan,’ say tutukoyen to et say ipatnag nen Jesus, aliwan si Jehova a Dios. Siopa sirin so “saksakey a Makapanyari”? Ompatnag a makatunongan so pangibaga a si Jesus so Makapanyari a tutukoyen nen Pablo. Akin? Ipapalinew na konteksto a si Jesus so ikokompara nen Pablo ed totoon manuley. Unong ya insulat nen Pablo, si Jesus so peteg ya “Ari na saray [totoon] arari, tan Katawan na saray [totoon] kakatawan.” * On, no ikompara ed saratan, si Jesus so “saksakey a Makapanyari.” Naikdan si Jesus na “panuley, tan gayaga tan sakey a panarian, ya amin so saray baley, saray nasyon, tan pansasalita manlingkor ira komon ed sikato.” (Daniel 7:14) Anggapo so toon manuley odino makapanyari a makapangibaga na ontan!

Komusta balet so balikas a “sikato labat so wala ed andi ed ipapatey”? Si Jesus so ikokompara lamet ed totoon arari. Anggapo so totoon manuley a makapangibagan sikatoy naikdan na imortal a bilay, balet nayarian itan ya ibaga nen Jesus. Oniay insulat nen Pablo: “Amta tayo a si Kristo, binmangon ed saray inatey, agla ompatey; say patey agla makapanuley ed sikato.” (Roma 6:9) Kanian, si Jesus so sankaunaan ya adeskribe diad Biblia ya apalangkapan na imortalidad. On, sanen insulat itan nen Pablo, si Jesus ni lambengat so naikdan na imortal a bilay.

Nepeg met a tandaan a sakey a lingo so pangibaga nen Pablo a si Jehova a Dios lambengat so agbalot ompatey, lapud imortal met la si Jesus sanen insulat iratan nen Pablo. Balet nayarian nen Pablo ya ibaga a si Jesus lambengat so imortal no ikompara ed totoon manuley.

Tan petepeteg a kayarin apaoli si Jesus tan tinmokotok ed tawen, sikato so nadeskribe bilang say ‘ag-anengneng odino agnayarin nengnengen na anggan siopa ed saray totoo.’ Tua a saray alanaan a babangatan so makanengneng ed si Jesus kayari na ipatey tan kioli ran mismo ed tawen bilang espiritun pinalsa. (Juan 17:24) Balet anggapo so too diad dalin a makanengneng ed si Jesus diad niglorian kipapasen to. Kanian, naibaga a manlapud inkioli tan intokotok nen Jesus, sikato so agla anengneng na “anggan siopa ed saray totoo.”

On, no ag-usisaen a maong, ompatnag a say Dios so kiyaplikaan na saray deskripsion a naromog diad 1 Timoteo 6:15, 16. Balet ipapabitar na konteksto na saray salita nen Pablo, tekep na pananuporta na arum a teksto, a say tutukoyen nen Pablo et si Jesus.

[Paimano ed leksab]