‘Say Tulong Ko et Manlalapu ed si Jehova’

Amayamay so Mangaawat ed Panagdayew ed si Jehova

SARAY propesiya na Biblia nipaakar ed panaon tayo so mangipapasakbay a saray totoo manlapud amin a nasyon so ondagsa ed nitandoron panagdayew ed si Jehova. Alimbawa, panamegley nen propetan Aggeo, oniay inyabawag nen Jehova a Dios: “Panmayegmegen ko naani so saray amin a nasyon; et saray mabli a bengatla na saray amin a nasyon onsabi naani; et panoen ko naani so sayan abung ed gayaga.” (Aggeo 2:7) Parehon impropesiya di Isaias tan Miqueas a legan na panaon tayo, salanti, “saray kaunoran ya agew,” si Jehova so dayewen na saray nasyon tan totoo diad naabobonan a paraan.​—Isaias 2:2-4; Miqueas 4:1-4.

Talaga ta’n nasusumpal natan iratan a propesiya? Saray peteg a nagagawa so mangebat. Dia lambengat ed imbeneg a samploy taon, masulok a 3,110,000 iran balo so angidedika na inkasikara ed si Jehova diad masulok a 230 a daldalin. On, 6 ed kada 10 a Tasi nen Jehova a manlilingkor natan ed interon mundo so abautismoan diad imbeneg a dekada. Nen 2004, diad promedyo et walay sakey a balon dedikadon lingkor na Dios a niyaarum ed Kristianon Kongregasyon diad kada duaran minuto! *

Singa nen inmunan siglo, natan et ‘dakdakel la iray anisia tan nampataoli ed Katawan.’ Anggaman aliwa met a say mismon indakel ed bilang so pakapatnagan na panamendisyon na Dios, papaneknekan na satan a say “lima na Katawan” et wala ed totoo to. (Gawa 11:21) Antoy manasagyat ed minilyon pian mandayew ed si Jehova? Tan panon kayon personal a naaapektoan ed sayan iyaaligwas?

Nasasagyat Iray Maptek-impanpuson Totoo

Oniay diretsaan ya imbaga nen Jesus: “Anggapo so too a makadago ed siak, likud no say Ama ya angibaki ed siak sikato so yasinger to.” (Juan 6:44) Diad kaultimoan sirin, si Jehova so mangiyaasingger ed saray totoo a “tinandaan ed bilay ya andi-anggaan.” (Gawa 13:48) Napakiwas na espiritu na Dios so totoo a manpaga ed espiritual a pankaukolan da. (Mateo 5:3) Say nagogonigon a konsiensia, desperadon panaanap ed ilalo, odino onderenden a problema so nayarin mamakiwas ed arum pian anapen so Dios diad ontan et naaralan day gagala to parad katooan.​—Marcos 7:26-30; Lucas 19:2-10.

Dakel a totoo so nasasagyat a mandayew ed si Jehova lapud say programa na Kristianon kongregasyon ya edukasyon manlapud Biblia so ontutulong ed sikara a naebatan iray tepet a pakawewetwetan da.

“No walay Dios, akin a mantutultuloy a manasagmak na ag-inkahustisya iray totoo?” Satan so tepet ya akawetwetan nen Davide, sakey a managlako na druga ed Italya. Lapud agmet talagan interesado ed relihyoso iran pamaakaran, intepet to itan pian manuppiat labat. “Agko naisip a makaawat ak na makatunongan tan makakombinsin ebat,” so inkuan to. “Balet ta samay Tasin akitongtong ed siak et maan-anos tan pinekderan to na saray teksto ed Biblia so imbaga to. Naapektaan ak  a maong na saman ya impantongtong mi.” Natan, impetek la nen Davide so kabibilay to tan manlilingkor la ed si Jehova.

Saray arum met so nasasagyat ed mangaraldalin a kabiangan na organisasyon nen Jehova lapud panaanap day kabaliksan tan gagala. Diad panaanap toy terapi odino panempey ed problema to ed emosyon, nila na sakey a psychiatrist ed Zagreb, Croatia, so sakey a balitado a kapara ton doktor. Sikatoy nikelawan ta inter na doktor ed sikato so numeroy telepono na sanga na saray Tasi nen Jehova ed Zagreb, pati say ngaran na Tasi a kabat to. “Nengneng mo,” so inkuan to, “padesir ko et natulongan ka na sarayan totoo. No ibaki ta ka ed simbaan, estatua lambengat so naromog mo​—anggapoy mansasalita, tan ambilunget so ami’ ganagana. Parad siak agka natulongan na simbaan. Imbakik la iray arum a pasyente ed saray Tasi nen Jehova, tan padesir ko et sankaabigan met no laen mo ra.” Sikatoy mabulbulos a nila na saray Tasi tan agnambayag et nigapo so panangiyaral na Biblia ed sikato. Kayari na pigaran simba, malikeliket ya imbalikas na satan a psychiatrist a say pikakabat ed gagala na Dios so akapangiter na kabaliksan ed bilay to.​—Eclesiastes 12:13.

Sano onsabi so ambebelat iran personal a problema, nalmoan na dakel a say katuaan lambengat na Biblia so makapangitarya na peteg a ligliwa. Diad Gresya, sakey a pitoy taon a laki so naplag manlapud atep na eskuelaan da tan inatey. Pigaran bulan ed saginonor, duaran Tasi so akapitongtong ed ina to tan sikatoy niligliwa ra panamegley na impanginabang da na ilalo a kioli. (Juan 5:28, 29) Diad satan et manakis so bii. Intepet na agagin bibii: “No labay mo nin mas makaaral ka nipaakar ed Biblia, kapigan mi ka nayarin laen?” “Natan la,” so kuanto. Intagar to ra ed abung to, tan inggapo so panangiyaral na Biblia. Natan, say interon pamilya to et manlilingkor la ed si Jehova.

Mibibiang Ka Kasi?

Kaslakan la iray ontan ya eksperiensya ed interon mundo. Titiponen tan ipapasal nen Jehova so amayamay a tuan managdayew a nanlalapu ed nanduruman nasyon. Sayan internasyonal a grupo et walaay maliket ya ilalo a makaliktar ed manasingger ya anggaan na sayan marelmeng a sistema na bengabengatla tan manbilay ed matunong a balon mundo.​—2 Pedro 3:13.

Bilang resulta na panamendisyon nen Jehova, sayan agnaparaan a panagtipon a kimey so mapmaples a mamapaarap ed matalonan kakompleto. (Isaias 55:10, 11; Mateo 24:3, 14) Kasin maseseg kayon mibibiang ed panangipulong na Panarian a kimey? No ontan, makapankompiyansa kayo ed tulong na Dios tan nibaga yo iray salita na salmista a: ‘Say tulong ko et manlalapu ed si Jehova.’​—Salmo 121:2.

[Paimano ed leksab]

[Blurb ed pahina 9]

“Anggapo so too a makadago ed siak, likud no say Ama ya angibaki ed siak sikato yasingger to.”​—JUAN 6:44

[Kahon ed pahina 8]

SIOPA SO WALAD BENEGAN NA SAYAN INDAAK?

“Noag si Jehova so mangipaalagey na abung, saray manangipaalagey mansagpot ira ya andi-kakanaan.”​—Salmo 127:1.

“Say Dios so amabaleg; no ontan sirin say mantanem tan manalog andi gapo’ra, noag say Dios a sikato so mamabaleg.”​—1 Corinto 3:6, 7.