Dios Odino Too?

“S IAK so silew na mundo. Say ontumbok ed siak agmanakar ed kabilungetan, balet wala ed sikato so silew na bilay.” (Juan 8:12) Sarayan salita et imbalikas nen Jesu-Kristo. Oniay insulat na sakey a makabat a too nen inmunan siglo nipaakar ed sikato: ‘Diad sikato akaamot so amin na saray kayamanan na karunongan tan pakatalos.’ (Colosas 2:3) Niarum ni, oniay inkuan na Biblia: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) Importante so suston pikakabat nipaakar ed si Jesus pian napenek so espiritual a pankaukolan tayo.

Narerengelan na totoo ed interon dalin so nipaakar ed si Jesu-Kristo. Say impluensya to ed awaran na katooan so agnakuestion. Diad tua, say kalendaryon uusaren ed kaslakan a parte na mundo so imbase ed ipapasen a taon na inkianak to. “Tutukoyen na dakel a totoo iray petsa antis na satan a taon bilang B.C., odino kasakbayan nen Kristo,” so impaliwawa na The World Book Encyclopedia. “Uusaren da so A.D., odino anno Domini (diad taon na Katawan tayo), parad saray petsa kayari na satan a taon.”

Balet, walaray mansusumlangan ya ideya nipaakar ed no siopa si Jesus. Parad arum, sikatoy sakey labat a matalonggaring a too ya agnalinglingwanan. Say arum balet et mangidadayew ed sikato bilang Dios a Makapanyarin-amin. Inkompara na arum a debotadon Hindu si Jesu-Kristo ed say dios dan Krishna, ya ibabaga na amayamay bilang dios a nankinon-too. Kasin sakey labat a too si Jesus, odino kasin sikatoy nepeg a dayewen? Siopan talaga si Jesus? Iner so nanlapuan to? Anto kasi personalidad to? Tan iner so kawalaan to natan? Unong a naamtaan tayo ed ontumbok ya artikulo, say libron mangisasalaysay na dakerakel nipaakar ed si Jesus so mangiiter na matuan ebat ed sarayan tepet.