Importante Kasi no Antoy Iisipen na Arum ed Sikatayo?

NGALNGALIN amin et malabay a nirayew. Saray komplimento so mamaligsa ed sikatayo, a liknaen tayon walay nagagawaan tayo. Pakiwasen itayo ni ingen na panangabobon a paaligwasen ni so nagagawaan tayo. Balet, miduman tuloy so nalikna tayo sano nalikas tayon ag-itayo aabobonan na arum a totoo. Nayarin naderal so determinasyon tayo lapud matabtabang a kakaebat odino ansakit a pananalita. Say pangipapasen na arum ed sikatayo so pirmin mangapekta ed panmoria tayo’d inkasikatayo.

Lingo so pangibaliwala ed panmoria na arum nipaakar ed sikatayo. Diad tua et nagunggonaan itayo no pausisa tayo ed arum so kondukta tayo. Sano nibase ed atagey iran prinsipyo ed moral, say opinyon na arum so mangunggona ed sikatayo, a mamakiwas ed sikatayon magmaliw a maptek. (1 Corinto 10:31-33) Balet, mabetbet ya aliwan makatunongan so opinyon na karaklan a totoo. Isipen pa so pikewet a panmoria na saray manunan saserdote tan saray arum ni ed si Jesu-Kristo sanen “naningal ira a kuan da, Paipasak mo, . . . paipasak mo”! (Lucas 23:13, 21-25) Saray panmoria a nibase ed palson impormasyon odino naimpluensyaan na imon odino panaglabi so nepeg labat ya ibaliwala. Kanian, kaukolan tayon usaren so maong a pakatebek tan sikakabat ya onkiwas ed saray opinyon na arum.

Siopan Opinyon so Makana?

Labay tayon abobonan itayo na saramay maapit ed sikatayo diad tuan panagdayew. Kabiangan ed saraya iray kaparan mananisia a membro na pamilya tayo tan saray Kristianon agagi tayo. (Roma 15:2; Colosas 3:18-21) Say aro tan respeto na saray kaparan mananisia tan say ‘pampapabiskegan’ da so makabkabaliksan ed sikatayo. (Roma 1:11, 12, Maung a Balita) Tekep na ‘kaabebaan na kalakal, ibibilang tayo so balang sinansakey a magmaong nen say sikatayon dili.’ (Filipos 2:2-4) Niarum ni, aanapen tan papablien tayo so panangabobon na “saray wala a manuley” ed sikatayo, salanti, saray mamatatken ed kongregasyon.​—Hebreos 13:17.

Say sakey nin kalkaliktan et say “maabig a balita [manlapud] saray taga paway.” (1 Timoteo 3:7) Agaylan abig sano rerespetoen itayo na saray agkapananisiaan a kakanayon, katrabahoan, tan kakaabay tayo! Tan agta panggugunaetan tayoy makapangipanengneng na maabig ya impresyon ed totoo a pupulongan tayo pian paborabli so ikiwas da ed mensahe na Panarian? Nadayew so Dios diad pakawalaan tayoy reputasyon ed komunidad bilang malinis ed moral, maptek, tan matuan totoo. (1 Pedro 2:12) Anggaman ontan, agtayon balot ikompromiso iray prinsipyo na Biblia pian paboran labat na arum; nisay mansimpisimpitan pian pandinayewen ira. Nepeg tayon bidbiren ya imposiblin napaliket so amin. Oniay inkuan nen Jesus: “No taga mundo kayo say mundo aroen to so saray kayarian to. Balet lapud aliwa kayo a taga mundo, noag say pinili ta kayo ed mundo, kanian say mundo busolen to kayo.” (Juan 15:19) Wala kasi nagawaan tayo pian nagamoran so respeto na saramay onsusumpa ed sikatayo?

Gamoran so Respeto na Saray Onsusumpa

“Gulaen da kayo naani na saray amin a katooan nisengeg ed ngaran ko,” so impasakbay nen Jesus, “bangsay mansungdo ya angga ed kasampotan, sikato lanlamang naani so nilaban.” (Mateo 10:22) No maminsan, sayan panggula so manresulta ed mauge-uges iran akusasyon. Nayarin ibaga na manangiduma-duma  iran opisyales na gobierno a sikatayoy “onsusumpa” odino “onkokontra’d pakauley.” Saray prangkan onsusumpa so nayarin mangakusa a magulo itayo kunon sekta a kaukolan a napatunda. (Gawa 28:22) Sarayan palson akusasyon so no maminsan et nasuppiat. Panon? Panamegley na panumbok ed simbawa nen apostol Pedro a: “Maparaan kayo lawas ya onebat ed siopakaman a mankaukolan ya ipaliwawa yo so gapo na satan ya ilalo a wala ed sikayo, balet siuuyamo tan sitatakot.” (1 Pedro 3:15) Niarum ni, nepeg a say ‘pananalita tayo et maabig, ya agnabalaw; pian say onsumpa ombaing komon, ya anggapo so antokaman a mauges a nayarian ton salitaen ed sikatayo.’​—Tito 2:8.

Ambegyan panggugunaetan tayon agnapabanday so ngaran tayo, ag-itayo kaukolan a nadismaya odino naapektoan no sikatayoy agmakatunongan a pinauges. Say ayadyarin Anak na Dios a si Jesus so inakusaan na panag-ayew, sedisyon, tan anggan say panag-espiritismo. (Mateo 9:3; Marcos 3:22; Juan 19:12) Si apostol Pablo so pinauges. (1 Corinto 4:13) Anggaman ontan, imbaliwala nen Jesus tan Pablo so panamalaw tan nantultuloy iran okupado ed kimey da. (Mateo 15:14) Amta ran ag-iran balot abobonan na kakabusol da, lapud “say sankamundoan [so] mandukdukol ed kaugsan.” (1 Juan 5:19) Ontan met so nasasagmak tayo natan. Agtayo nepeg ya ontakot sano saray masumpan mamubusol so mangikayat na tilatila nipaakar ed sikatayo.​—Mateo 5:11.

Saray Opinyon a Peteg a Makana

Nanduruman tuloy so iisipen na totoo ed sikatayo, depende ed saray motibo ra odino ed no antoy nadngel da nipaakar ed sikatayo. Sikatayoy idadayew tan gagalangen na arum, ingen ta babalawen tan bubusolen na arum. Balet, daput no sikatayoy paiwawanwan ed saray prinsipyo na Biblia, walaan itayo na amin a rason pian magmaliw a maliket tan nawalaay kareenan.

Oniay insulat nen apostol Pablo: “Amin a sulat ya impuyan na Dios sikato met so maabig a pakaaralan, pakasumalan, pakasimbawaan, tan pakapanontonan a sikato so wala ed katunongan. Pian say too na Dios anggapo komon so pankulangan to, a nabangatan a maong ed amin a gawa a maabig.” (2 Timoteo 3:16, 17) Nagamoran tayo so panangabobon nen Jehova a Dios tan say Anak to, si Jesu-Kristo, diad maapresyan pangawat ed Salita na Dios bilang giya tayo ed amin a bengatla. Tutal, say talagan makanakana et saramay opinyon a manlapu ed si Jehova tan ed Anak to. Say pangipapasen da ed sikatayo so pakapatnagan na peteg a kablian tayo. Diad kaunoran, say bilay tayo so akadepende lanlamang ed panangabobon da.​—Juan 5:27; Santiago 1:12.

[Blurb ed pahina 30]

“Nababaingan ak sano nirarayew ak, lapud maamot kon pinirawat itan.”​—INDIAN A MANAG-ANLONG O MAKATA A SI RABINDRANATH TAGORE

[Saray litrato ed pahina 31]

Makana iray opinyon na saray kapara tayon mananisia

[Picture Credit Line ed pahina 30]

Culver Pictures