Manakar Unong ed Pananisia ya Aliwan Unong ed Pakanengneng!
Manakar Unong ed Pananisia ya Aliwan Unong ed Pakanengneng!
“Manakar itayo lapu ed pananisia, aliwan lapud pakanengneng.”—2 CORINTO 5:7.
1. Anto so pakapatnagan a nanakar si apostol Pablo unong ed pananisia ya aliwan unong ed pakanengneng?
SAY taon et 55 K.P. Manga 20 taon lay apalabas sanen say sakey a too a manngaran ed saman na Saulo, a manamasegsegang ed saray Kristiano, so angawat ed Inkakristiano. Agto inabuloyan so inlabas na panaon a mamaletey ed pananisia to ed Dios. Anggaman agto anengneng iray bengatla ed tawen, sikatoy mapekder ed pananisia. Kanian, sanen mansusulat ed saray alanaan a Kristiano a walaan na mangatatawen ya ilalo, onia so inkuan nen apostol Pablo: “Manakar itayo lapu ed pananisia, aliwan lapud pakanengneng.”—2 Corinto 5:7.
2, 3. (a) Panon tayon nipatnag a manaakar itayo unong ed pananisia? (b) Antoy kabaliksan na panakar unong ed pakanengneng?
2 Say panakar unong ed pananisia et mankakaukolan na sigpot a panagmatalek ed abilidad na Dios ya iwanwan so kabibilay tayo. Nepeg a sigpot itayon kombinsido a talagan amta to no antoy pankaabigan tayo. (Salmo 119:66) Diad saray panagdesisyon tayo tan ikiwas ed saratan, ikokonsidera tayo iray “bengatla ya agni anengneng.” (Hebreos 11:1) Kalaktip dia so insipan a “tawen a balo tan dalin a balo.” (2 Pedro 3:13) Diad biek a dapag, say panakar unong ed pakanengneng et mankabaliksan na pangemtan tayo ed kabibilay ya akadepende labat ed natetebek tayo panamegley na pisikal iran pakalikna. Mapeligro iya lapud mansumpal iya ed sigpot a pangibaliwala tayo ed linawa na Dios.—Salmo 81:12; Eclesiastes 11:9.
3 Balanglan kabiangan itayo na “daiset a papastolan,” a walaan na mangatatawen a tawag, odino kabiangan na ‘arum a karnero,’ a walaan na mangaraldalin ya ilalo, balang sakey ed sikatayo so nepeg a mangipapuso ed bilin a manakar unong ed pananisia ya aliwan unong ed pakanengneng. (Lucas 12:32; Juan 10:16) Imanoen tayo no panon a say panumbok ed sayan apuyanan a simbawa so manalimbeng ed sikatayo ed pakabiktima ed temporaryo odino onlabas a panliket ed kasalanan, patit na materyalismo, tan pakalingwan tayo a mangangga la iyan sistema na bengabengatla. Usisaen tayo met iray kapeligroan na panakar unong ed pakanengneng.—Hebreos 11:25.
Pangipulisay ed ‘Onlabas a Panliket ed Kasalanan’
4. Antoy pinili nen Moises, tan akin?
4 Nonoten pay kabibilay komon nen Moises ya ilalak nen Amram. Si Moises so pinabaleg ed limog na ananak na ari ed kadaanan ya Ehipto, a walaan na posibilidad a makagamor na pakapanyari, kayamanan, tan impluensya. Nayarian nen Moises komon ya irason: ‘Akapanaral ak a maong ed dederlengen a kakabatan na Ehipto, tan makapanyari ak ed salita tan gawa. No mansiansia ak ed sankaabungan na ari, sarag kon usaren so posisyon ko pian tulongan iray nalalames a Hebreon agagik!’ (Gawa 7:22) Imbes, pinili nen Moises so “mantepel ed irap [a kaiba] na saman a baley na Dios.” Akin? Anto so amakiwas ed si Moises ya italirak so amin a nagamoran to ed Ehipto? Say ebat na Biblia: “Lapu ed pananisia tinaynan [nen Moises] so Ehipto, ya agto tinakotan so sanok na ari: ta nansiansia a singa to nengnengnengen so [Sakey ya] agnanengneng.” (Hebreos 11:24-27) Say pananisia nen Moises ed seguradon tumang nen Jehova ed saray matunong so tinmulong ed sikaton italirak so kasalanan tan pampenek tan ed temporaryon liket na satan.
5. Panon a say ehemplo nen Moises so mamaseseg ed sikatayo?
5 Mabetbet itayo met a nidudunget ed mairap iran panagdesisyon a singa saraya: ‘Kasin itundak lay pigaran ag-agamil odino niyugali ya agsigpot a mitunosan ed saray prinsipyo na Biblia? Kasin awaten ko so trabaho ya ompatnag a pakalmoay baleg balet ta mangamper ed espiritual ya iyaligwas ko?’ Say ehemplo nen Moises so mamaseseg ed sikatayon agpilien iray bengatlan pakapatnagan na ag-inkamatudio na mundo; imbes et nepeg tayon agamilen so pananisia ed matudion kakabatan na “[Sakey ya] agnanengneng,” salanti, si Jehova a Dios. Singa si Moises, komon ta pablien tayo so pikakaaro ed si Jehova a nagkalalo ni nen say antokaman ya iyopresi na sayan mundo.
6, 7. (a) Panon ya impatnag nen Esau a nilablabay toy manakar unong ed pakanengneng? (b) Anto so panmadmaran tayo ed alimbawa nen Esau?
6 Ikompara si Moises ed si Esau, ya anak na patriarkan si Isaac. Nilablabay nen Esau so tampol a pakapenek. (Genesis 25:30-34) Insalat nen Esau so kanepegan to bilang panguloan ya agto ‘inggalang iray bengatla a sagrado lapu ed sanlipong a kanen.’ (Hebreos 12:16) Agto ninonot no panon a say desisyon ton ilako so kanepegan to bilang panguloan et mangapekta ed relasyon to ed si Jehova odino no antoy epekto na kiwas to ed saray ilalak to. Anggapoy espiritual a pakatebek to. Imbaliwala nen Esau iray mablin sipan na Dios, a minoria to iratan ya agtanto makana. Sikatoy nanakar unong ed pakanengneng ya aliwan unong ed pananisia.
7 Say alimbawa nen Esau so panmadmaran tayo natan. (1 Corinto 10:11) Sano walaray dedesisyonan tayo, baleg man odino melag, nepeg ya ag-itayo pasasagyat ed propaganda na mundo nen Satanas, a mangisusugsog a nepeg mon nagamoran a tampol so kaliktan mo. Nepeg a tepetan tayoy inkasikatayo: ‘Kasin napatnagan ed saray desisyon ko iray singa-Esau ya ugali? Kasin unaen koy kaliktan ko a sengeg na pangisakripisyok la ed saray espiritual a pankaabigan? Kasin saray pilik et mangipepeligro ed pikakaarok ed Dios tan ed tumang ko ed arapen? Anton klase na ehemplo so ipapanengneng ko ed arum?’ No saray pili tayo et pakapatnagan na apresasyon tayo ed saray sagradon bengatla, bendisyonan itayo nen Jehova.—Uliran 10:22.
Ipaliis ed Patit na Materyalismo
8. Anton pasakbay so naawat na saray Kristiano ed Laodicea, tan akin a makapainteres itan ed sikatayo?
8 Diad pasingawey nen apostol Juan ed pansamposampot na inmunan siglo, say niglorian Jesu-Kristo so angiter na mensahe ed kongregasyon ed Laodicea, diad Asia Minor. Sakey itan a panamasakbay a mensahe sumpad materyalismo. Anggaman mayaman ed materyal, saray Kristiano ed Laodicea so pobri ed espiritual. Imbes a mantultuloy a manakar unong ed pananisia, inabuloyan day materyal a kaykayarian a mamulag ed espiritual a pakanengneng da. (Apocalipsis 3:14-18) Say materyalismo so walaan na mipadparan epekto natan. Mamaletey itan ed pananisia tayo tan pansengegan na itunda tayon ‘ombatik a siaanos ed babatiken’ parad bilay. (Hebreos 12:1) No ag-itayo maalwar, saray ‘likeliket ed bilay’ so mangamper ed espiritual iran aktibidad tayo ya anggad punton ‘agla iratan manbunga.’—Lucas 8:14.
9. Panon a say inkakontento tan pisasalamat ed espiritual a tagano so manalimbeng ed sikatayo?
9 Say tumbok ed espiritual a salimbeng et say inkakontento imbes a sigpot ya anamoten iyan mundo pian manpayaman itayo ed materyal. (1 Corinto 7:31; 1 Timoteo 6:6-8) No manakar itayo unong ed pananisia tan aliwan unong ed pakanengneng, naeksperiensya tayoy gayaga ed peles ya espiritual a paraiso. Legan ya onggagamor itayo na makapabiskeg ya espiritual a tagano, agta napakiwas itayon “mankanta . . . nisengeg ed liket na puso”? (Isaias 65:13, 14) Sakey ni, panliketan tayoy pakapilimog ed saramay mangipapatnag na bunga na espiritu na Dios. (Galacia 5:22, 23) Agaylan makana a napepenek tan naliliketan itayo ed itatarya nen Jehova ed espiritual a paraan!
10. Antoran tepet so nepeg tayon itepet ed inkasikatayo?
10 Saray pigaran tepet a kaukolan tayon itepet ed inkasikatayo et: ‘Panon kaimportante iray materyal a bengatla ed bilay ko? Kasin uusaren koy materyal a kaykayarian ko parad panliket ed bilay odino pian suportaan so tuan panagdayew? Anto so makapenek a maong ed siak? Kasin say panagaral ed Biblia tan pitutuyaw diad saray pantitipon na Kristiano, odino saray sampot-simba a libre ed saray responsabilidad bilang Kristiano? Kasin mabetbet kon igagana iray sampot-simba parad panligliwa imbes ya usaren itan a panaon ed lawak na ministeryo tan arum niran aktibidad nipaakar ed puron panagdayew?’ Say panakar unong ed pananisia et kabaliksan toy pagmaliw tayon okupado ed kimey na Panarian, tan sigpot a panmatalek ed saray sipan nen Jehova.—1 Corinto 15:58.
Sankanonot Lawas so Anggaan
11. Panon a say panakar unong ed pananisia so ontulong ed sikatayon sankanonot lawas so anggaan?
11 Say panakar unong ed pananisia so ontulong ed sikatayon paliisan so silalaman iran panmoria a say anggaan so mabayag ni odino agla onsabi. Aliwan singa saray manduaruwa a manleleglemew ed propesiya na Biblia, natetebek tayo no panon a nasusumpal na saray nagagawa ed mundo so impasakbay na Salita na Dios parad panaon tayo. (2 Pedro 3:3, 4) Alimbawa, agta say awawey tan ugali na totoo ed inkalapagan so mamaneknek a manbibilay itayo la ed “saray kaunoran ya agew”? (2 Timoteo 3:1-5) Tekep na mata na pananisia, nanenengneng tayo a saray peles a nagagawa ed mundo et aliwan basta labat pakauulit na saray agawa ed apalabas. Imbes, saratan so manugyop na “tanda ed isabi [nen Kristo] tan say anggaan na mundo.”—Mateo 24:1-14.
12. Panon a saray salita nen Jesus a nikurit ed Lucas 21:20, 21 so asumpal nen inmunan siglo?
12 Konsideraen so sakey ya agawa nen inmunan siglo ed Komon a Panaon tayo a walaan na pipetekan ed panaon tayo. Sanen wadiad dalin, pinasakbayan nen Jesu-Kristo iray papatumbok to: “Sano nanengneng yo so Jerusalem a niliktob na saray ehersito, saman la amtaen yo a say kabagbag to asingger la. Saman la saray wala ed Judea ombatik ira ed saray palandey; et saray wala ed pegley to, ontaynan ira.” (Lucas 21:20, 21) Bilang kasumpalan na sayan propesiya, kinubkob na saray sundalo na Roma diad panangimando nen Cestius Gallus so Jerusalem nen 66 K.P. Balet ta biglan inmatras iray sundalo, ya angiter na sinyal tan pankanawnawa ed saray Kristiano pian ‘ombatik ed saray palandey.’ Nen 70 K.P., saray sundalo na Roma so pinmawil, a nilusob da so syudad na Jerusalem, tan dineral day templo ditan. Inreport nen Josephus a masulok a sakey milyon a Judio so inatey, tan 97,000 so akautibo. Say panangukom na Dios so nipaakseb ed Judion sistema na bengabengatla. Saramay nanakar unong ed pananisia tan tinmulok ed pasakbay nen Jesus so akalegyas ed desyang.
13, 14.(a) Antoray magano lan nagawa? (b) Akin a nepeg itayon mansiansian alerto ed kasumpalan na propesiya na Biblia?
13 Wala met so mipadparan bengatla a magano lan nagawa ed panaon tayo. Saray elemento na Nasyones Unidas so nawalaan na betang ed kipaakseb na panangukom na Dios. No panon a saray sundalo na Roma nen inmunan siglo et inggetman mamasiansia ed Pax Romana (Romanon Kareenan), say Nasyones Unidas natan so inggetma met a mamasiansia ed kareenan. Anggaman sinali na saray sundalo na Roma a seguroen so kaligenan ed interon mundo nensaman, sikara la ingen so aneral ed Jerusalem. Ontan met natan, saray propesiya na Biblia so pakapatnagan a saray puersa na militar a walad panangontrol na Nasyones Unidas so mangipasen ed relihyon bilang babeng tan onkiwas pian deralen so modernon-panaon a Jerusalem, salanti, say Kakristianoan, ontan met ed arum nin kabiangan na Babilonia a Baleg. (Apocalipsis 17:12-17) On, say interon sankamundoan ya empiryo na palson relihyon so wala la’d tambib na kadederal.
14 Say kadederal na palson relihyon so gapoan na baleg a kairapan. Diad unor a kabiangan na baleg a kairapan, saray nakekeraan a kabiangan na sayan marelmeng a sistema na bengabengatla so naderal. (Mateo 24:29, 30; Apocalipsis 16:14, 16) Say panakar unong ed pananisia so ontulong ed sikatayon mansiansian alerto ed kasumpalan na propesiya na Biblia. Ag-itayo napapalikdo ya isipen a dinanman a tinugyop na too ya ahensia a singa say Nasyones Unidas et uusaren na Dios pian itarok so tuan kareenan tan kaligenan. Kanian, agta nepeg a napatnagan ed kabibilay tayo so kombiksion tayo a “say agew nen Jehova [et] asingger” la?—Sofonias 1:14.
Panakar Unong ed Pakanengneng—Panon Kapeligro?
15. Anggaman ed saray naeksperiensya ran bendisyon na Dios, anton patit so naplagan na nasyon na Israel?
15 Saray eksperiensya na kadaanan ya Israel so mangipapabitar ed kapeligroan na iletey na pananisia na sakey diad panakar unong ed pakanengneng. Anggaman naimatonan na saray Israelita so samploran salot ya inkipabpaabeba na saray palson dirios na Ehipto tan ed impakaeksperiensya ra ed makapakelkelaw ya inkiliktar da ed Ambalangan Dayat, sikaray matungangan nanggawa na balitok a kilaw a baka tan nandayew ed satan. Sikaray nagmaliw ya agmakankaanos tan kinmesaw lara ed panalagar ed si Moises, ya “abayag la ya agni linmasur ed palandey.” (Exodo 32:1-4) Say agpakaanos so anagdag ed sikaran mandayew ed sakey ya idolo a nanengneng. Say impanakar da unong ed pakanengneng so anginsulto ed si Jehova tan nanresulta ed impatey na “talonlibo ed saray totoo.” (Exodo 32:25-29) Agaylan makapaermen no saray desisyon na sakey a managdayew nen Jehova natan et pakapatnagan na agto panmatalek ed si Jehova tan kaandi na kompiyansa to ed abilidad Ton manumpal ed saray sipan To!
16. Panon a saray Israelita so naapektaan na akinpaway iran nengneng?
16 Saray akinpaway a nengneng so pirmin angapekta ed saray Israelita ed arum nin paraan. Lapud nanakar ira unong ed pakanengneng, ginmiwgiw ira ed takot ed saray kakabusol da. (Numeros 13:28, 32; Deuteronomio 1:28) Satan so sengegan na impan-angat da ed autoridad nen Moises ya inter na Dios tan impanreklamo ra ed kipapasen na kabibilay da. Lapud sayan kaandian na pananisia et mas nilablabay da so kontrolado-na-demonyo ya Ehipto imbes a say Insipan a Dalin. (Numeros 14:1-4; Salmo 106:24) Agaylan asakitan a maong si Jehova legan ton naiimatonan so pirmin agpanagrespeto na totoo to ed agnanengneng ya Ari ra!
17. Antoy sengeg na impangipulisay na saray Israelita ed panangiwanwan nen Jehova ed panaon nen Samuel?
17 Dia lamet ed panaon nen propeta Samuel, say pinalaboan a nasyon na Israel so apatitan lapud impanakar unong ed pakanengneng. Pinilalek na saray totoo so sakey ya ari a nanengneng da. Anggaman impabitar nen Jehova a sikatoy Ari ra, aliwa iyan magenap pian manakar ira unong ed pananisia. (1 Samuel 8:4-9) Sengegan na impakasagmak day mauges so makulangkulang ya impangipulisay da ed naspot a panangiwanwan nen Jehova, a nilablabay da la ingen so magmaliw a singa saray walad kaliberliber dan nasyon.—1 Samuel 8:19, 20.
18. Antoran leksion so naaralan tayo nipaakar ed saray kapeligroan na panakar unong ed pakanengneng?
18 Bilang modernon-panaon a lingkor nen Jehova, papablien tayoy maabig a relasyon tayo ed Dios. Magunaet tayon aaralen tan iyaaplika ed kabibilay tayo iray makanakanan leksion ed saray agawa ed apalabas. (Roma 15:4) Sanen saray Israelita so nanakar unong ed pakanengneng, alingwanan dan sikaray iwawanwan na Dios panamegley nen Moises. No ag-itayo maalwar, nalingwanan tayo met a say Kristianon kongregasyon natan so iwawanwan nen Jehova a Dios tan say Babaleg a Moises, si Jesu-Kristo. (Apocalipsis 1:12-16) Nepeg a manalwar itayo pian aliwan unong ed panmoria na too so pangipasen tayo ed mangaraldalin a kabiangan na organisasyon nen Jehova. No gawaen tayo itan, magmaliw itayon mareklamo tan naandi so apresasyon tayo ed saray mangirerepresenta ed si Jehova ontan met ed espiritual a tagano ya itatarya na “matoor tan makabat ya aripen.”—Mateo 24:45.
Magmaliw a Determinadon Manakar Unong ed Pananisia
19, 20. Anto so determinado yon gawaen, tan akin?
19 Ibabaga na Biblia: “Ag-itayo mitulot ed laman tan dala, noag ingen onsumpa itayo ed saray manunaan, onsumpa ed saray pakayari, onsumpa ed saray manuley ed mundo na sayan kabilungetan, sumpa ed saray mauges ya espiritu ed pasen a mangatatawen.” (Efeso 6:12) Say baleg a kabusol tayo et si Satanas a Diablo, a getma ton deralen so pananisia tayo ed si Jehova. Anamoten to so antokaman a pananangguyor a makapangisuawi ed sikatayo ed desisyon tayon manlingkor ed Dios. (1 Pedro 5:8) Anto so manalimbeng ed sikatayo pian agnapalikdo na akinpaway a nengneng na sistema nen Satanas? Say panakar unong ed pananisia ya aliwan unong ed pakanengneng! Say panmatalek tan pankompiyansa ed saray sipan nen Jehova so manalimbeng ed sikatayo ed pakasagmak na ‘kageba na pananisia tayo.’ (1 Timoteo 1:19) Kanian, magmaliw itayo sirin a determinadon mantultuloy a manakar unong ed pananisia tan sigpot a manmatalek ed panamendisyon nen Jehova. Tan komon ta mantultuloy itayon manpikasi pian napaliisan tayoy amin a bengatlan niganan nagawa ed magano lan arapen.—Lucas 21:36.
20 Diad panaakar tayo unong ed pananisia ya aliwan unong ed pakanengneng, walaan itayo na alay abig ya Ehemplo. Ibabaga na Biblia: “Si Kristo nairapan met lapu ed sikayo, dia ed impangitilak to na panuliranan, pian tumboken yo so baka’to.” (1 Pedro 2:21) Say ontumbok ya artikulo so maningbat no panon itayon makapantultuloy a manakar a singa impanakar to.
Kasin Nanonotan Yo?
• Antoy naaralan yo ed ehemplo nen Moises tan alimbawa nen Esau nipaakar ed panakar unong ed pananisia ya aliwan unong ed pakanengneng?
• Anto so tumbok pian napaliisan so materyalismo?
• Panon a say panakar unong ed pananisia so ontulong ed sikatayon napaliisan so panmoria a mabayag ni so anggaan?
• Akin a mapeligro so panakar unong ed pakanengneng?
[Tepetepet Parad Panagaral]
[Litrato ed pahina 17]
Si Moises so nanakar unong ed pananisia
[Litrato ed pahina 18]
Kasin mabetbet lan nasesebelan kayo ed teokratiko iran aktibidad lapud panligliwaan?
[Litrato ed pahina 20]
Panon a say panimanon maong ed Salita na Dios so manalimbeng ed sikayo?