“Say Itakot ed si Jehova​—Satan so Kakabatan”

“SAYA sikato so anggaan na kanonotan; amin, sikara so nadngel: Takotan mo so Dios, tan unoren mo so saray ganggan to; ta saya sikato so katiponan na kanepegan na too.” (Eclesiastes 12:13) Agaylan matudion konklusyon so imbalikas nen Arin Solomon na kadaanan ya Israel diad impangipuyan na Dios! Si patriarkan Job so angapresya met ed kakanaan na itakot ed Dios, lapud oniay inkuan to: “Nia! Say itakot ed si Jehova​—satan so kakabatan, tan say iyarawi ed kaugsan et pakatalos.”​—Job 28:28, NW.

Say Biblia so mangipupurek ed kaimportantian na itakot ed si Jehova. Akin a makabat so pamayubo tayo ed mapagalang a takot ed Dios? Diad anton dalan a pakagunggonaan tayo so maridios a takot, bilang indibidual tan bilang grupo na saray tuan managdayew? Eebatan na Uliran kapitulo 14, bersikulo 26 anggad 35 irayan tepet. *

Lapuan na “Mabiskeg a Panmatalek”

“Dia ed takot ed Jehova wala so mabiskeg a panmatalek,” kuan nen Solomon, “et saray anak to nawalaan ira na pasen na painawa.” (Uliran 14:26) Anggapo lay arum a panmamatalekan na matakot ed Dios a too noag say matoor tan makapanyarin-amin a Dios, si Jehova. Agpankelawan no akin a mataletalek so ontan a too a nasarag ton arapen so onsabi! Say arapen to so andukey tan maliket.

Anto, balet, so nibaga nipaakar ed arapen na saramay manmamatalek ed mundo​—saray plano, organisasyon, ideolohiya, tan kaykayamanan na satan? Antokaman ya iilaloan dan arapen et maganggano labat, lapud oniay inkuan na Biblia: “Say mundo mangangga, tan saray penel to: sabalet so mangunor ed linawa na Dios onsiansia lawas.” (1 Juan 2:17) Wala tay rason, sirin, na ‘pangaro tayo ed mundo, ni saray bengatla a wala ed mundo’?​—1 Juan 2:15.

Antoray nakaukolan a gawaen na matakot ed Dios ya atateng pian naseguron saray anak da so “nawalaan . . . na pasen na painawa”? Oniay inkanta na salmista: “Gali dia, sikayo anak, talineng kayo ed siak: ibangat ko ed sikayo so itakot ed Jehova.” (Salmo 34:11) Sano diad panamegley na ehemplo tan panamilin na atateng et nibabangat so ananak ya ontakot ed Dios, baleg so posibilidad ya ombaleg ira bilang lalaki tan bibii a walaan na mabiskeg a panagmatalek ed si Jehova.​—Uliran 22:6.

“Say takot ed Jehova sikato so subol na bilay,” so intuloy nen Solomon “pian say sakey makaarawi ed saray kalot na patey.” (Uliran 14:27) Say takot ed si Jehova et “subol na bilay” lapud say tuan Dios so “subol na saray danum a mabilay.” (Jeremias 2:13) Say igamor na kakabatan nipaakar ed si Jehova tan ed si Jesu-Kristo so mankabaliksan na bilay ya andi-anggan parad sikatayo. (Juan 17:3) Iyarawi itayo met na maridios a takot ed saray kalot na patey. Panon? Oniay inkuan na Uliran 13:14: “Say tunong na makabat sikato so sakey a subol na bilay, pian say sakey makaarawi ed saray kalot na patey.” Sano takotan tayo si Jehova, tuloken so ganggan to, tan abuloyan so Salita to a mangiwanwan ed saray kurang tayo, agta napaliisan tayo so makapasakit iran ag-agamil tan emosyon a sengegan na masakbay ya ipapatey?

 “Gayaga na Ari”

Diad ngalngali interon impanuley to, si Solomon so matakot ed Dios ya ari a tinmulok ed si Jehova. Saya so nanresulta ed matalonan pananguley to. Anto so mangipatnag a say sakey ya ari et matalonan manuley? Oniay ebat na Uliran 14:28: “Dia ed karaklan na baley wala so gayaga na ari; balet dia ed kaukolan na baley wala so kabagbag na prinsipe.” Nadetermina so itatalona na ari diad inkaaligwas na uuleyan to. No labalabay na maslak ed saray nasasakopan to so pauleyan ed sikato, satan so mamaneknek a sikatoy sakey a matalonan manuley. Si Solomon so awalaan na ‘uuleyan manlapu ed [Ambalangan] dayat angga ed dayat [a Mediteraneo], tan manlapu ed Ilog [Eufrates] angga ed saray samsampot na dalin.’ (Salmo 72:6-8) Akabkabat so pananguley to lapud agnaparaan a kareenan tan inkaaligwas. (1 Arari 4:24, 25) Matalona so uley nen Solomon. Diad biek a dapag, sano say sakey a prinsipe odino atagey ya opisyal et kabusol na saray nasasakopan to, satan so mamabanday ed sikato.

Diad sayan pamaakaran, anto so nibaga ed kagalangan na Babaleg a Solomon, say Mesianikon Ari a si Jesu-Kristo? Imanoen pa iray uuleyan to anggad natan. Diad sankamundoan, pinili la na masulok ya anemiran milyon a matakot ed Dios a lalaki tan bibii so manpasakop ed pananguley nen Kristo. Angagamil ira na pananisia ed si Jesus tan nankakasakey ed tuan panagdayew ed mabilay a Dios. (Juan 14:1) Diad pansampot na Milenyon Uley, amin iramay walad pakanodnonotan na Dios so napaoli la. Diad satan et napano so paraison dalin na maliket, matunong a totoo a mangipapatnag na apresasyon ed Ari ra. Agaylan abig a paneknek itan na matalonan pananguley nen Kristo! Agtayon balot lilingwanan so marakdakep ya ilalo tayo ed Panarian.

Espiritual tan Pisikal Iran Gunggona

Say mapagalang a takot ed Dios so mangipagamor ed sikatayo na kalmadon puso tan deen na nonot, lapud kabiangan na dakel ya aspekto na kakabatan so maong a pakatalos tan pakatebek. Oniay inkuan na Uliran 14:29: “Say matantan a manpasnok baleg so pakatalos to; balet say maigagano [odino, agmakankaanos] ya espiritu paatageyen to so inkaatiw.” Say pakatalos odino pakatebek so ontulong ed sikatayo pian namoria a say agnakontrol a sanok et walaay makaderal ya epekto ed espiritualidad tayo. Saray “pambubusolan, pankokolkol, imon, sanok, pansesepakan” et kabiangan ed saray gawa a mangamper ed sikatayon ‘manawir ed Panarian na Dios.’ (Galacia 5:19-21) Sikatayoy nasisimbawa ya agmangeem-em na anggan say makatunongan a sanok. (Efeso 4:26, 27) Tan say agpakankaanos so mangitonton ed makulangkulang a panagsalita tan kakikiwas a pagbabawian tayo ed saginonor.

Diad pangipapaimano ed makapuy ya epekto na sanok ed bunigas, oniay inkuan na ari na Israel: “Say mareen a puso sikato so bilay na laman; balet say siblet sikato so inkabulok na saray pukel.” (Uliran 14:30) Kabiangan ed sakisakit a resulta na sanok et say problema ed respiratoryo, atagey a presyon na dala, sakit ed altey, tan pakaapektoan na pancreas. Papanisiaan met na saray doktor a say sanok et sakey ya emosyon a mamapaloor, odino pansengegan ni ingen na sakisakit a singa say ulser, gatel, asma, sakit ed baog, tan panlikna na eges. Diad biek a dapag, “say mareen a puso sikato so bilay na laman.” (Uliran 14:30) Makabat sirin so ‘itumbok tayo ed saray bengatla a manggawa na kareenan, tan saray bengatla a kipaalageyan na sakey tan sakey ed sikatayo.’​—Roma 14:19.

Say Takot ed Dios so Ontulong ed Sikatayo Pian Agmangidumaduma

“Say mangapos ed duka mudmoraen to so Manamalsa to,” kuan nen Solomon, “balet say walaan na panangasi ed naukolan sikato so idayew to.” (Uliran 14:31) Bibidbiren na matakot ed Dios a too a saksakey so Nanggawa ed amin a katooan, si Jehova a Dios. Kanian, say duka et sakey a kaparan too, tan say pantrato ed sikato et singa met panangitrato ed Manamalsa na katooan. Pian nidayew so Dios, kaukolan a nampadparay panagtrato tayo ed arum. Say mairap-bilay a Kristiano so nepeg a makagamor na espiritual a pankaukolan  da ya anggapoy panaglabi. Nepeg tayon ipasabi ed namparan mairap-bilay tan mayaman so maong a balita na Panarian na Dios.

Diad panutukoy ed sananey nin gunggona na maridios a takot, oniay inkuan na makabat ya ari: “Say marelmeng nipelag ed mauges a gawa to; balet say maptek walaan na salimbeng ed patey [“integridad,” NW] to.” (Uliran 14:32) Panon a nipelag so marelmeng? Walaray iskolar na Biblia a mangibabagan say kabaliksan na saya et anggapo lay posibilidad na marelmeng a makaimwas sano nasagmak toy desyang. Diad biek a dapag, sano onsabi kairapan, say matakot ed Dios a too so nasalimbengan na integridad to ed Dios. Lapud sigpot a manmamatalek ed si Jehova anggan diad ipapatey, ipapatnag to so determinasyon a mipara ed si Job, ya angikuan: “Angga ed ompatey ak agko ekalen so inkaskey [odino, integridad] ko a manlapu ed siak.”​—Job 27:5.

Say pamasiansia ed integridad et lalanoren toy maridios a takot tan kakabatan. Tan iner so pakaromogan ed kakabatan? “Say kakabatan mansiansia ed puso na walaan na pakatalos;” so ebat na Uliran 14:33, “balet say wala ed kaaralman na saray maatiw nipakabat.” On, naromog so kakabatan ed puso na toon walaan na pakatalos. Balet, diad anton dalan a satan so nipakabat ed limog na saray makulangkulang? Unong ed sakey a reperensya, “say makulangkulang, a magunaet ya ompatnag a makabat, so mangilabir ed ipapasen ton kakabatan balet diad kaunoran et pagmaliwen to itan a kakulangkulangan.”

“Paatageyen to so Nasyon”

Kayarin inimano so epekto na maridios a takot ed indibidual, isublay tayon imanoen so epekto na satan ed interon nasyon, inkuan na ari na Israel: “Say inkatunong paatageyen to so nasyon; balet say kasalanan sikato so kabalawan ed anggan siopa a baley.” (Uliran 14:34) Agaylan malinew a nidemostra iyan prinsipyo diad kaso na nasyon na Israel! Say intulok na Israel ed atagey ya estandarte na Dios so nanresulta ed inkiyatagey da ed akapaliber iran nasyon. Balet, say paulit-ulit ya intunganga ra so angitonton ed kabalawan tan ed impangipulisay nen Jehova ed sikara diad kaunoran. Sayan prinsipyo so onaaplika ed saray totoo na Dios natan. Say Kristianon kongregasyon so miduma ed mundo lapud tutuloken na satan so matunong iran prinsipyo na Dios. Balet, pian napansiansia itan a niyatagey a posisyon, nepeg a masimpit so kabibilay tayo bilang indibidual. Say pangagamil na kasalanan so mangitarok lambengat na kababaingan ed sikatayo tan kabalawan ed kongregasyon tan ed Dios.

Oniay inkuan nen Solomon nipaakar ed no anto so mamaliket ed sakey ya ari: “Say pamalangkap na ari sikato so dapit ed aripen a managamil a makabkabat; balet say sanok to sikato naani sumpa ed makapabaing.” (Uliran 14:35) Tan inkuan na Uliran 16:13: “Saray maptek a bibil sikara so gayaga na saray arari; et aroen da so mansalita na maptek.” On, napapaliket a maong so Lider tan Ari tayo a Jesu-Kristo sano matoor tan sikakabat itayon onkiwas tan sano usaren tayo so bibil tayo diad pangipulong ed Panarian tan panggaway babangatan. On, magmaliw itayo sirin ya okupado ed satan a kimey legan a panggagayagaan iray bendisyon a manlalapud itatakot ed tuan Dios.

[Paimano ed leksab]

[Litrato ed pahina 15]

Nibangat so takot ed Dios